Iamesi Bona Petero Bukadia Edia Revareva Edia Hereva Badadia
Iehova Ena Hereva be Ia Mauri Noho
Iamesi Bona Petero Bukadia Edia Revareva Edia Hereva Badadia
PENTEKOSTE 33 C.E. murinai kahirakahira lagani 30 idia ore, bena hahediba tauna Iamesi—Iesu ena tadina—be lauma Israela ena “iduhu 12” dekenai revareva ta ia torea. (Iam. 1:1, BHğ) Unai revareva ia torea ena badina be, ia ura edia abidadama ia hagoadaia bona hahetoho negadiai idia haheauka totona. Danu, sisiba ia henia kongrigeisen ai idia vara hekwakwanai hamaoromaoroa totona.
Lagani 64 C.E. ai, Roma ena Pavapava Nero ese Keristani taudia ia do dagedage henia lasi neganai, aposetolo Petero be ena revareva ginigunana be Keristani taudia dekenai ia torea, bona idia ia hagoadaia edia abidadama ai idia gini goada totona. Ena revareva iharuana ai, Petero be Keristani tadikaka ia hagoadaia Dirava ena hereva idia badinaia totona, bona idia ia hadibaia Iehova ena dina be do ia ginidae. Momokani, Iamesi bona Petero edia revareva ai idia noho herevadia ita duahia neganai, unai ese ita idia durua diba.—Heb. 4:12.
MAI ABIDADAMA IDA IA NOINOI TAUNA BE DIRAVA ESE AONEGA IA HENIA
Iamesi ia gwau: “Hisihisi bona dibagani ia abia neganai ia gini noho, mai haheauka danu tauna be namo. Badina be unai dika dekena amo ia kwalimu neganai, ia ese Dirava ia gwauhamata gauna, mauri hanaihanai, iena kwalimu ahuna, do ia davaria.” Mai abidadama ida idia noinoi taudia, be Iehova ese aonega ia henidia hahetoho idia haheaukalaia totona.—Iam. 1:5-8, 12.
Namona be kongrigeisen lalonai “hadibaia gaukara” idia karaia taudia be mai edia abidadama bona aonega. Iamesi ia gwau, mala be “gau maragina,” to ia ese iseda mauri ibounai ia hadikaia diba, bena ia gwau tanobada ena kara ese iseda hetura karana Dirava ida ia hadikaia diba. Danu, manoka taudia idia goada lou totona, do idia badinaia daladia ia gwauraia hedinarai.—Iam. 3:1, 5, 6; 5:14, 15.
Baibel Henanadaidia Edia Haere:
2:13—Edena dala ai hebogahisi tauna be Kota Biaguna ese do ia hebogahisi henia? Dirava vairanai iseda kerere ita gwauraia hedinarai neganai, Ia be ma haida dekenai ita hahedinaraia hebogahisi karana do Ia laloa, bona iena Natuna ena mauri davalaia boubouna amo iseda kara dika do ia gwauatao. (Roma 14:12) Unai dainai, iseda mauri lalonai hebogahisi karana ita hahedinaraia be mai anina bada, ani?
4:5—Iamesi be edena Buka Helaga ena hereva ia gwauraia? Iamesi be Baibel ena siri ta amo unai hereva ia torea hanai lasi. To, Iamesi be Dirava ena lauma amo unai hereva ia torea, bona ia ese Genese 6:5; 8:21; Aonega Herevadia 21:10; bona Galatia 5:17 ai idia noho hereva edia point badana ia hahedinaraia.
Ita Dibaia Gaudia:
1:14, 15. Tau ta ena lalona dekenai ia noho ura dikana ese kara dika ia havaraia diba. Unai dainai, iseda lalona dekenai ura dikadia ita laloa momo lasi. To, namona be iseda lalona bona kudouna dekenai, ita do ia hagoadaia kara namodia sibona ita “laloa noho.”—Fili. 4:8.
2:8, 9. Bema ‘taunimanima edia toana dekena amo ita kara henidia,’ unai be lalokau karana lasi. Unai dainai, Keristani taudia korikoridia be taunimanima haida sibona kara namo henia karana idia dadaraia.
2:14-26. Iseda “abidadama dainai” Dirava ese ita ia hamauria, to Mose ena Taravatu eiava Keristani taudia edia “gaukara dekena amo lasi.” Uduna sibona amo ita gwau lasi Dirava ita abidadama henia. (Efe. 2:8, 9; Ioa. 3:16) To, Dirava ena ura ita karaia amo ita hahedinaraia ita be abidadama taudia.
3:13-17. “Dirava dekena amo ia mai aonega” ese ‘tanobada bona Satani dekena amo’ ia mai aonega ia hereaia momokani! Dirava amo ia mai aonega be golo bona siliva bamona ita tahua noho be namo.—Aon. 2:1-5.
3:18. Namona be mai maino ida Basileia ena sivarai namona ena uhe ita hadoa. Namo lasi ita hekokoroku, hepapahuahu, o lebulebu karadia ita karaia, to gau badana be ma haida ida maino ita karaia.
“ABIDADAMA DEKENAI DO UMUI GINI GOADA”
Petero ese abidadama tamona taudia ia hadibaia guba dekenai do idia abia helaro namona idia laloa totona. Petero be idia dekenai ia gwau: “Dirava ese umui ia abia hidi vadaeni, umui be iena bese, umui be King ena hahelagaia taudia, bese helagana.” Petero ese ma haida matauraia karana ia herevalaia murinai, idia ia hagoadaia, namona be ibounai be ‘mai lalona tamona danu do idia noho, idia ta ta dekenai durua do idia henia. Idia ta ta dekenai do idia lalokau henia, tadikaka bamona. Idia ta ta dekenai do idia bogahisihisi henia, do idia manau.’—1 Pet. 1:3, 4; 2:9; 3:8.
“[Iuda taudia edia nega] edia dokona ena nega be kahirakahira” dainai, Petero be ena tadikaka ia sisiba henia, ‘do idia noho namonamo, mai laloa maoromaoro danu, bona do idia guriguri noho, nega ibounai.’ Ia gwau: “Do umui laloa maoromaoro, bona naria namonamo. . . . Emui abidadama dekenai do umui gini goada, vadaeni umui ese Satani do umui koua.”—1 Pet. 4:7; 5:8, 9.
Baibel Henanadaidia Edia Haere:
3:20-22—Edena dala ai bapatiso ese ita ia hamauria? Idia ura Dirava ese ia hamauria taudia be bapatiso idia abia be namo. To, bapatiso sibona ese ita ia hamauria lasi. ‘Iesu Keriso be mase dekena amo ia toreisi lou dainai’ hahemauri ita abia. Namona be bapatiso idia abia gwauraia taudia idia abia dae momokani, hahemauri idia abia diba ena badina tamona be, Iesu be boubou gauna ta bamona ia mase, bena ia toreisi lou, bona “Dirava ena idiba kahanai ia helai,” bona idia mauri bona mase vadaeni taudia dekenai ia be mai ena siahu. ‘Lagatoi lalonai idia noho taudia, ibounai 8 be ranu dekena amo idia mauri’ hegeregerena, unai bamona abidadama dainai ta do ia ura bapatiso ia abia.
4:6, BHğ—“Mase taudia” dekenai “Sivarai Namona idia harorolaia.” Unai mase taudia be daidia? Idia be guna ‘edia kara dika bona kerere dainai idia mase,’ eiava sivarai namona idia diba lasi bona Iehova idia tura henia lasi dainai idia be idia mase bamona. (Efe. 2:1) To, sivarai namona idia abia dae murinai, “mauri idia davaria” bona Iehova idia tura henia diba.
Ita Dibaia Gaudia:
1:7. Hahetoho o dibagani ita davaria neganai, unai ese iseda abidadama ia hanamoa o ia tohoa, unai amo do ia goada. Unai bamona abidadama goadana dainai “mauri do ita abia.” (Heb. 10:39) Hahetoho ita davaria neganai, namona be iseda abidadama ita rakatania lasi.
1:10-12. Aneru be idia ura dikadika Dirava ena hereva momokani ena dobu gaudia idia diba, unai gaudia be idaunegai Dirava ena peroveta taudia ese horoa Keristani kongrigeisen totona idia torea. To, unai gaudia be idia hunia ela bona Keristani kongrigeisen ia hamatamaia neganai, Iehova ese ia hahedinaraia. (Efe. 3:10) Aneru edia haheitalai bamona, namona be ita gaukara goada ‘Dirava ena dobu gaudia’ ita diba totona.—1 Kor. 2:10.
2:21. Iseda Haheitalai Tauna namona, Iesu Keriso bamona, ena be hisihisi ita davaria bona ita mase diba, to namona be ita ura Iehova ena lohia siahuna ita abia isi.
5:6, 7. Iseda lalohekwarahi gaudia be Iehova ena imana dekenai ita atoa neganai, Ia be ita do ia durua iseda mauri lalonai tomadiho momokani ita atoa guna totona, bona do idia vara gaudia be do ita laloa momo lasi.—Mat. 6:33, 34.
“LOHIABADA ENA DINA BE DO IA GINIDAE”
Petero ia gwau: “Badina be peroveta hereva gunadia be tau ta ese sibona ena ura dekenai ia gwauraia lasi. Lasi momokani. To Lauma Helaga ese helaga taudia ia hasiahua momokani dainai, idia ese Dirava ena hereva idia gwauraia.” Peroveta hereva ita badinaia neganai, unai ese “hadibaia koikoi taudia” bona kara dika taudia ma haida amo ita do ia gimaia.—2 Pet. 1:21; 2:1-3.
Petero be ita ia hadibaia nega dokona ai, taunimanima be “Dirava badinaia kara do idia kirikirilaia. To Lohiabada ena Dina be do ia ginidae, henaoa tauna ia ginidae bamona.” Petero be ena revareva dokonai, ‘Dirava ena Dina idia naria noho, bona do ia ginidae haraga totona idia gaukara goada noho’ taudia dekenai sisiba namona ia henia.—2 Pet. 3:3, 10-12.
Baibel Henanadaidia Edia Haere:
1:19—“Daba ena hisiu bada” be daika? Edena negai ia toreisi, bona edena bamona ita diba unai ia vara? Iesu Keriso be Dirava ena Basileia ena King ai ia lao murinai, ia be unai “daba ena hisiu bada.” (Apok. 22:16) Lagani 1914 ai, Iesu be Mesia King ai ia lao neganai, unai be dina matamata ta ia matamaia. Iesu ena toana ia idau matahanaina ese ia hahedinaraia vaira nega ai ia be Basileia ena hairai do ia abia, unai ese Dirava ena peroveta herevana do ia hamomokania. Unai peroveta herevana ita kamonai namonamo neganai, do ita diba Daba ena Hisiu Bada be hari ia diari noho.
3:17—Petero ia gwau “inai gaudia umui diba vadaeni,” ena hereva ena anina be dahaka? Petero be ia bona Baibel idia torea taudia ma haida ese lauma helaga ena heduru amo vaira neganai do idia vara gaudia idia diba karana ia herevalaia. Ena be Keristani taudia ginigunadia be vaira neganai do idia vara gaudia idia diba, to gau haida be idia diba namonamo lasi.
Ita Dibaia Gaudia:
1:2, 5-7. Bema ita hekwarahi kara namodia hegeregere, abidadama, haheauka, bona Dirava badinaia karadia ita habadaia, unai ese ita do ia durua ‘Dirava bona iseda Lohiabada Iesu ita diba namonamo’ totona, bona unai diba dainai iseda kara namodia ese anina do ia havaraia.—2 Pet. 1:8.
1:12-15. Hereva momokani lalonai ita “gini goada noho” totona, namona be kongrigeisen heboudia, sibona eda stadi bona Baibel ita duahia karana amo ita abia hadibaia herevadia ita kamonai loulou.
2:2. Namona be ita naria namonamo, namo lasi iseda kara ese Iehova bona ena orea edia ladana ia hadikaia.—Roma 2:24.
2:4-9. Iehova ese guna ia karaia gaudia ita laloa neganai, ita diba momokani “bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba. Dirava ese danu kara dika taudia ia guia diba, ela bona Kota Bada Dinana ia ginidae.”
3:2-4, 12. Peroveta taudia ese “gunaguna idia gwauraia hereva, bona Lohiabada bona Hamauria Tauna ena taravatu” ita laloatao karana ese ita do ia durua Iehova ena dina badana ita laloa bada totona.
3:11-14. “Dirava ena Dina” ita naria bona laloa noho totona, namona be (1) iseda kara ia helaga, iseda tauanina, eda lalohadai, kara maoromaoro badinaia dalana, bona iseda tomadiho karana idia goeva; (2) bema Basileia sivaraina ita harorolaia bona taunimanima be hahediba taudia ai halaoa gaukarana ita goadalaia, ita be “Dirava badinaia” karadia ita hahedinaraia badabada unai; (3) iseda kara ia ‘goeva’ noho bona inai tanobada ena kara ese ia hamiroa lasi be namo; (4) mai eda ura ida Dirava ita hesiai henia bona ita “kerere lasi”; bona (5) namona be Dirava, iseda Keristani tadikaka taihu bona taunimanima ida ita “maino.”