Isi Ihe Ndị Sitere n’Akwụkwọ Ozi Jems na Pita
Okwu Jehova Dị Ndụ
Isi Ihe Ndị Sitere n’Akwụkwọ Ozi Jems na Pita
IHE fọrọ obere ka o ruo afọ iri atọ ka Pentikọst 33 O.A. gachara, onye na-eso ụzọ Jizọs bụ́ Jems—onye otu nne ji ya na Jizọs—degaara “ebo iri na abụọ” nke Izrel ime mmụọ, akwụkwọ ozi. (Jems 1:1) Ebumnuche ya bụ: ịgba ha ume ka okwukwe ha sie ike na ka ha na-atachi obi mgbe ọnwụnwa bịara ha. Ọ dụkwara ha ọdụ banyere ihe ụfọdụ na-ekwesịghị ekwesị na-eme n’ọgbakọ ha.
Obere oge tupu Eze Ukwu ndị Rom bụ́ Nero amalite ịkpagbu Ndị Kraịst n’afọ 64 O.A., Pita onyeozi degaara Ndị Kraịst akwụkwọ ozi ya mbụ, na-agba ha ume ka ha nọgidesie ike n’okwukwe. N’akwụkwọ ozi ya nke abụọ, bụ́ nke o dere obere oge o dechara nke mbụ, Pita gbara ndị kwere ekwe ibe ya ume ka ha na-amụ Okwu Chineke ma dọọ ha aka ná ntị banyere ọbịbịa nke ụbọchị Jehova. N’ezie, anyị ga-erite uru site n’ịgụ akwụkwọ ozi Jems na Pita.—Hib. 4:12.
NDỊ ‘JI OKWUKWE NA-ARỊỌ’ KA CHINEKE NA-ENYE AMAMIHE YA
Jems dere, sị: “Obi ụtọ na-adịrị onye na-atachi obi n’ọnwụnwa, n’ihi na mgbe a nwapụtara ya, ọ ga-anata okpueze bụ́ ndụ.” Ndị ‘ji okwukwe na-arịọ’ ka Jehova na-enye amamihe ka ha nwee ike idi ọnwụnwa ndị na-abịara ha.—Jems 1:5-8, 12.
Ọ dịkwa mkpa ka ndị ‘bụ́ ndị ozizi’ n’ọgbakọ nwee okwukwe na amamihe. Mgbe Jems kwuchara na ire bụ “ihe dị nta nke dị n’ahụ́” ma o nwere ike ‘ime ka ahụ́ dum nwee ntụpọ,’ ọ dọrọ aka ná ntị banyere omume ndị ụwa bụ́ ndị nwere ike imebi mmekọrịta anyị na Chineke. O kwukwara ihe onye ọ bụla na-arịa ọrịa ime mmụọ kwesịrị ime iji gbakee.—Jems 3:1, 5, 6; 5:14, 15.
Azịza nke Ajụjụ Ndị Dabeere n’Akwụkwọ Nsọ:
2:13—Olee otú o si bụrụ na “ebere na-emeri ikpe”? Mgbe a bịara n’ịza ajụjụ maka onwe anyị n’ihu Chineke, Chineke ga-echeta ebere anyị meere ndị ọzọ ma gbaghara anyị dabere n’àjà mgbapụta nke Ọkpara ya. (Rom 14:12) Ọ̀ bụ na anyị ekwesịghị iji maka nke a na-emere nnọọ ndị ọzọ ebere?
4:5—Olee amaokwu Akwụkwọ Nsọ Jems na-ekwu okwu ya ebe a? Enweghị kpọmkwem otu amaokwu Akwụkwọ Nsọ Jems na-ekwu okwu ya ebe a. Otú ọ dị, o yiri ka okwu ndị a e ji ike mmụọ nsọ dee hà gbakwasịrị ụkwụ n’ihe ndị e dere n’akụkụ Akwụkwọ Nsọ ndị dị ka Jenesis 6:5; 8:21; Ilu 21:10; na Ndị Galeshia 5:17.
5:20—Ònye ka “onye mere ka onye mmehie hapụ njehie nke ụzọ ya” ga-azọpụta mkpụrụ obi ya n’ọnwụ? Onye Kraịst nke mere ka onye mmehie hapụ njehie ya ga-azọpụta mkpụrụ obi onye mmehie ahụ chegharịrịnụ n’ọnwụ ime mmụọ nakwa ma eleghị anya zọpụta ya ná mbibi ebighị ebi. Onye na-enyere onye mmehie aka n’ụzọ dị otú a ga-ekpuchikwa ‘ọtụtụ mmehie onye ahụ mere.’
Ihe Ndị Anyị Mụtara:
1:14, 15. Ọ bụ ọchịchọ ọjọọ na-akpata mmehie. N’ihi ya, anyị ekwesịghị ikwe ka ọchịchọ ọjọọ nọgide n’obi anyị site n’ịnọ na-atụgharị ya n’uche. Kama nke ahụ, anyị kwesịrị ịnọgide ‘na-echebara ihe ndị na-ewuli elu echiche,’ hụkwa na ọ bụ ihe ndị dị otú ahụ jupụtara n’uche na obi anyị.—Fil. 4:8.
2:8, 9. ‘Ile mmadụ anya n’ihu’ megidere ‘iwu ịhụnanya nke eze nyere.’ N’ihi ya, ezi Ndị Kraịst adịghị ele mmadụ anya n’ihu.
2:14-26. ‘A zọpụtara anyị site n’okwukwe,’ ọ bụghịkwa ‘site n’ọrụ’ nke Iwu Mozis ma ọ bụ n’ọrụ anyị na-arụ dị ka Ndị Kraịst. Okwukwe anyị ekwesịghị ịbụ naanị ikwu na anyị kweere na Chineke. (Efe. 2:8, 9; Jọn 3:16) O kwesịrị ịkpali anyị ime ihe Chineke na-achọ.
3:13-17. “Amamihe nke si n’elu” karịrị nnọọ amamihe “nke ụwa, nke anụ ahụ́, nke ndị mmụọ ọjọọ”! Anyị kwesịrị ‘ịchọ amamihe nke Chineke dị ka akụ̀ zoro ezo.’—Ilu 2:1-5.
3:18. Ndị na-eme udo kwesịrị iji udo ghaa mkpụrụ nke ozi ọma Alaeze ahụ. Ọ dị mkpa na anyị ga-abụ ndị na-eme udo ọ bụghị ndị mpako, ndị na-esekarị okwu, ma ọ bụ ndị na-akpata ọgba aghara.
“SIENỤ IKE N’OKWUKWE”
Pita chetaara ndị kwere ekwe ibe ya ‘olileanya dị ndụ’ ha nwere, nke bụ́ iketa ndụ n’eluigwe. Pita gwara ha, sị: “Unu bụ ‘agbụrụ a họọrọ, òtù ndị nchụàjà bụ́ ndị eze, mba dị nsọ.’” Mgbe o nyechara ndụmọdụ banyere ndị nwunye ido onwe ha n’okpuru di ha, ọ gbaziri mmadụ niile ume ka ha ‘nwee otu obi, ka ihe banyere onye ọzọ na-emetụ ha n’obi, ka ha nwee ịhụnanya ụmụnna, nwee obi ọmịiko, dịrị umeala n’obi.’—1 Pita 1:3, 4; 2:9; 3:8.
Ebe ọ bụ na “ọgwụgwụ [usoro ihe ndị Juu] adịwo nso,” Pita dọrọ ụmụnna aka ná ntị ka ha ‘nwee uche zuru okè, mụrụ anya ka ha wee na-ekpe ekpere.’ Ọ gwakwara ha, sị: “Nweenụ uche ziri ezi, na-echenụ nche. . . . Guzogidenụ [Setan], sienụ ike n’okwukwe.”—1 Pita 4:7; 5:8, 9.
Azịza nke Ajụjụ Ndị Dabeere n’Akwụkwọ Nsọ:
3:20-22—Olee otú baptizim si azọpụta anyị? Baptizim bụ ihe onye ọ bụla chọrọ ka a zọpụta ya ga-emerịrị. Ma, baptizim n’onwe ya adịghị azọpụta anyị. N’ezie, nzọpụta bụ “site ná mbilite n’ọnwụ Jizọs Kraịst.” Onye a chọrọ ime baptizim aghaghị ikwere na naanị ihe mere ọ ga-eji kwe omume ịzọpụta ya bụ n’ihi na Jizọs nwụrụ iji zọpụta anyị, a kpọlite ya n’ọnwụ, ọ nọkwa “n’aka nri Chineke,” na-enwe ike n’ebe ndị dị ndụ na ndị nwụrụ anwụ nọ. Baptizim nke gbakwasịrị ụkwụ n’okwukwe dị otú ahụ yiri nzọpụta a zọpụtara “mkpụrụ obi asatọ, gafee mmiri ahụ n’enweghị ihe mere ha.”
4:6—Olee ndị bụ “ndị nwụrụ anwụ” e “zisaara ozi ọma”? Ndị a bụ ndị ‘nwụrụ anwụ ná njehie ha,’ ma ọ bụ ndị nwụrụ anwụ n’ụzọ ime mmụọ, tupu ha anụ ozi ọma ahụ. (Efe. 2:1) Ma mgbe ha kweere ozi ọma ahụ, ha malitere ‘ịdị ndụ’ n’ụdị na ha na Jehova bịaziri dịrị ná mma.
Ihe Ndị Anyị Mụtara:
1:7. Ka okwukwe anyị wee bụrụ nke bara ezigbo uru, ọ dị ezigbo mkpa na ọ ga-abụ nke a nwalere anwale. Okwukwe siri ike otú ahụ ‘na-echebe mkpụrụ obi ndụ.’ (Hib. 10:39) Anyị ekwesịghị ịtụ ule nke okwukwe ụjọ.
1:10-12. Ọ gụrụ ndị mmụọ ozi agụụ inyoba anya ma ghọta eziokwu ndị miri emi ndị amụma Chineke oge ochie dere banyere ọgbakọ nke Ndị Kraịst e tere mmanụ. Ma ihe ndị a bịara doo anya naanị mgbe Jehova na ọgbakọ ahụ malitere imekọ ihe. (Efe. 3:10) Ọ̀ bụ na anyị ekwesịghị iṅomi ndị mmụọ ozi ma gbalịa inyocha “ihe ndị miri emi nke Chineke”?—1 Kọr. 2:10.
2:21. Iji gosi na anyị na-eṅomi Onye nlereanya anyị bụ́ Jizọs Kraịst, anyị kwesịrị ịdị njikere ịta ahụhụ ọbụna nwụọ iji hụ na anyị rubeere Jehova isi.
5:6, 7. Ọ bụrụ na anyị atụkwasị Jehova nchegbu anyị, ọ ga-enyere anyị aka ịnọgide na-ebute ofufe Ya ụzọ ná ndụ anyị kama ichegbu onwe anyị banyere ihe echi ga-eweta.—Mat. 6:33, 34.
“ỤBỌCHỊ JEHOVA GA-ABỊA”
Pita dere, sị: “Ọ dịghị mgbe e si n’uche mmadụ buo amụma ọ bụla, kama ndị mmadụ kwuru ihe Chineke mere ka ha kwuo mgbe mmụọ nsọ na-edu ha.” Ige ntị n’okwu amụma a nwere ike ichebe anyị ka “ndị ozizi ụgha” na ndị ọzọ nwere ike imebi okwukwe anyị ghara inweta anyị.—2 Pita 1:21; 2:1-3.
Pita dọrọ aka ná ntị, sị: “N’oge ikpeazụ, ndị na-akwa emo ga-eji ịkwa emo ha bịa.” Ma “ụbọchị Jehova ga-abịa dị ka onye ohi.” Pita mechiziri akwụkwọ ozi ya site n’inye ndị “na-echere ma na-eburu ọbịbịa nke ụbọchị Jehova n’uche” ndụmọdụ katara ahụ́.—2 Pita 3:3, 10-12.
Azịza nke Ajụjụ Ndị Dabeere n’Akwụkwọ Nsọ:
1:19—Ònye bụ “kpakpando ụtụtụ,” olee mgbe o biliri, oleekwa otú anyị si mara na nke a emeela? “Kpakpando ụtụtụ” ahụ bụ Jizọs Kraịst mgbe ọ ghọrọ Eze nke Alaeze Chineke. (Mkpu. 22:16) Na 1914, Jizọs biliri n’ihu ihe niile e kere eke dị ka Eze bụ́ Mesaya, iji gosi na ụbọchị ọhụrụ amalitela. Nnwogha ahụ mere ka a hụperetụ ebube Jizọs na Alaeze ya tupu oge ahụ eruo, si otú a na-egosi na okwu amụma Chineke ga-emezurịrị. Ịṅa ntị n’okwu ahụ na-eme ka ìhè na-enwubata n’obi anyị sikwa otú a na-eme ka anyị mara na Kpakpando Ụtụtụ ahụ ebiliela.
2:4—Gịnị bụ “Tatarọs,” oleekwa mgbe a tụbara ndị mmụọ ozi ahụ nupụrụ isi n’ime ya? Tatarọs bụ ọnọdụ dị ka ụlọ mkpọrọ, bụ́ ebe a tụbara naanị ndị mmụọ e kere eke—ọ bụghị ụmụ mmadụ. Ọ bụ ọnọdụ ịnọ n’oké ọchịchịrị nke amaghị nzube ndị dị ebube nke Chineke. Ndị nọ na Tatarọs enweghị olileanya ọ bụla maka ọdịnihu. Chineke tụbara ndị mmụọ ozi ahụ nupụrụ isi n’oge Noa n’ime Tatarọs, ha ga-anọgidekwa n’ọnọdụ ahụ ruo mgbe a ga-ebibi ha.
3:17—Gịnị ka Pita bu n’uche mgbe o kwuru okwu banyere ‘ibu ụzọ mara ihe ndị a’? Pita na-ekwu banyere ibu ụzọ mara ihe ga-eme n’ọdịnihu, bụ́ nke e mere ka ya na ndị ọzọ so dee Baịbụl site n’ike mmụọ nsọ mara. Ebe ọ bụ na nke a abụghị ihe ọmụma na-adịghị agwụ agwụ, na Ndị Kraịst oge mbụ nwere ya apụtaghị na ha ma ihe niile ga-eme n’ọdịnihu. Ihe ha maara bụ naanị ihe onye ọ bụla nwere ike ịtụ anya ga-eme n’ọdịnihu.
Ihe Ndị Anyị Mụtara:
1:2, 5-7. E wezụga inyere anyị aka inwekwu ‘ezi ihe ọmụma nke Chineke na nke Jizọs,’ ịgbalịsi ike inwe àgwà ndị dị ka okwukwe, ntachi obi, na nsọpụrụ Chineke ‘ga-emekwa ka anyị ghara ịbụ ndị na-adịghị arụ ọrụ ma ọ bụ ndị na-adịghị amị mkpụrụ’ n’ihe metụtara ezi ihe ọmụma ahụ.—2 Pita 1:8.
1:12-15. Iji bụrụ ndị “nọsiri ike n’eziokwu,” ọ dị mkpa na a ga na-echetara anyị ihe mgbe mgbe dị ka ndị nke a na-echetara anyị n’ọmụmụ ihe ọgbakọ, n’ọmụmụ ihe onwe onye, nakwa n’ọgụgụ Baịbụl.
2:2. Anyị kwesịrị ilezi anya hụ na omume anyị adịghị ewetara Jehova na nzukọ ya nkọcha.—Rom 2:24.
2:4-9. N’ihi ihe ndị Jehova merela n’oge ndị gara aga, obi kwesịrị isi anyị ike na ‘ọ maara otú o si anapụta ndị na-asọpụrụ ya n’ọnwụnwa, ma na-edebe ndị ajọ omume maka ụbọchị ikpe ka e wee bipụ ha.’
2:10-13. Ọ bụ ezie na “ndị dị ebube,” nke bụ́ ndị okenye ọgbakọ, nwere ebe ndị ha na-adịghị emetecha nke ọma, nweekwa ike imehie mgbe ụfọdụ, anyị ekwesịghị ikwu okwu ọjọọ banyere ha.—Hib. 13:7, 17.
3:2-4, 12. Ịṅa ntị ‘n’okwu ndị e kwuru na mbụ site n’ọnụ ndị amụma dị nsọ na ihe Onyenwe anyị na Onye Nzọpụta anyị nyere n’iwu,’ ga-enyere anyị aka ịnọgide na-echeta na ụbọchị Jehova dị nso.
3:11-14. Ebe anyị “na-echere ma na-eburu ọbịbịa nke ụbọchị Jehova n’uche,” anyị kwesịrị (1) inwe “àgwà dị nsọ,” site n’ịdị ọcha n’anụ ahụ́, n’echiche, n’omume, nakwa n’ime mmụọ; (2) ijupụta ‘n’omume ịsọpụrụ Chineke,’ ndị dị ka ikwusa ozi ọma Alaeze ahụ nakwa ime ndị ọzọ ka ha bụrụ ndị na-eso ụzọ Jizọs; (3) ime ka omume anyị na ụdị onye anyị bụ ghara inwe “ntụpọ,” ghara ikwe ka ụwa metọọ anyị; (4) ịbụ “ndị na-enweghị mmerụ,” ndị ji obi dị ọcha na-eme ihe niile ha na-eme; na (5) ịbụ “ndị nọ n’udo”—ndị ha na Chineke nọ n’udo, nakwa ndị ha na ụmụnna ha, na ụmụ mmadụ ndị ọzọ nọ n’udo.