Jaakup allagaanit Petrusillu allagaanit pingaarnersat
Jehovap oqaasia uumavoq
Jaakup allagaanit Petrusillu allagaanit pingaarnersat
UKIUMI 33-mi piinsip ulluata kingorna ukiut 30-ngajaat qaangiuttut ajoqersukkap Jaakup — Jiisusip affarmik qatanngutaata — anersaakkut Israelikkut ’naggueqatigiivi aqqaneq-marluusut’ allaffigai. (Jaaku 1:1) Jaakup uppeqatini upperluartuarnissaannut misilinneqarnerminnilu pinertusaarnissaannut kajumissaarniarlugit allaffigai. Aamma ilagiinni pissutsinik isumakulunnarsisimasunik qanoq aaqqiisinnaanerat pillugu siunnersorpai.
Romamiut kaasariata Nerop ukiumi 64-imi malersuiniarluni immikkut suliniuteqalinngitsiarnerani Petrusip kristumiunut allakkani siulleq allappaa, tassanilu uppernikkut aalajaannissamut kajumissaarpai. Allakkami aappaanni, siulliup allanneqarnerata kinguninngua allanneqartumi, Petrusip uppeqatini Guutip oqaasianik eqqumaffiginneqqullugit kajumissaarpai Jehovallu ullussaata nalliunnissaa pillugu mianersoqqullugit. Jaakup allagaani Petrusillu allagaani allassimasunik eqqumaffiginninneq iluaqutigingaarsinnaavarput. — Hebræerit 4:12.
GUUTI ’UPPERLUTIK QINUSUNIK’ ILISIMASSUSEQALERSITSISARPOQ
Jaaku ima allappoq: „Pilluarpoq inuk misilinneqarnermini pinertusaartoq, misilinneqarninimi attakkuniuk piumaaramiuk ajugaasumut niaqorusiussassaq inuussutaasoq.“ Jehovap ’upperlutik qinujuartut’ misilinneqarnermi pinertusaarnissamut pisariaqartumik ilisimassuseqalersittarpai. — Jaaku 1:5-8, 12.
Upperneq ilisimassuserlu aamma ilagiinni ’ajoqersuisuusunit’ pisariaqartinneqarput. Jaakup oqaq ’timip ilaannamininnguatut’ ’timimillu tamarmik tunillaasinnaasutut’ allaatigereerlugu, silamiorpaluttumik ileqqoqarnissamut — Guutimut attaveqarnermut ajoqutaasinnaasumut — mianersoqquai. Aamma anersaakkut napparsimasup peqqisseqqinniarluni suut iliuuserissanerai eqqaavaa. — Jaaku 3:1, 5, 6; 5:14, 15.
Allassimaffiit pillugit apeqqutinut akissutit:
2:13, NV — ’Nallittuinerup eqqartuussummik ajugaasimaarfiginninnera’ qanoq paasisariaqarpa? Guutimut nassuertussaanitsinnut tunngatillugu, Jehovap allanik nallittuisimanivut eqqarsaatigisarpai ernermilu utertitsissutitut pilliutaa tunngavigalugu isumakkeerfigisarluta. (Romamiut 14:12) Nallittuinerup inuunitsinni pingaarnerpaatut pissuserinissaanut tamanna pissutissaalluarpoq, ilaa?
Ilinniarfigisinnaasavut:
1:14, 15. Ajortuliorneq pilerissusipilunnit aallaaveqartarpoq. Taamaattumik kissaatigisapiluit eqqarsaatigiuarnaveersaartariaqarpavut. Isumarput uummaterpullu ineriartornartunik immertariaqarpavut taakkualu ’eqqarsaatigiuarlugit’. — Filippimiut 4:8, 1936.
2:8, 9. ’Kinaassusersiorneq’ asanninneq pillugu ’inatsisip akimasup’ akerlianik iliorneruvoq. Taamaattumik kristumiut ilumoortut kinaassusersiorneq ajorput.
2:14-26. ’Uppernikkut annatsitaassaagut’. „Suliat tamatumunnga pissutaanngillat“, suliat Mosesip inatsisaanik malinninnermut tunngagaluarpata kristumiutulluunniit suliaagaluarpata. Uppernerartoqaannarsinnaanngilaq. (Efesosimiut 2:8, 9; Johannesi 3:16) Aamma uppernerput Guutip piumasaa naapertorlugu iliornissamut kajumississutigisariaqarparput.
3:13-17. „Ilisimassuseq pavannga pisoq“ ilisimassusermit ’nunamut tarnimullu anersaapilummullu atasumit’ ilumut pingaarnerujussuuvoq! Ilisimassuseq Guutimeersoq ’ujartariaqarparput erlinnartunik nassaarniartutut ilungersorluta’. — Ussatit 2:1-5.
3:18. Nutaarsiassap nuannersup naatsiiassartaa ’eqqissinermi siaruarterneqartarpoq’. Eqqisseqatigiissitsisuunissarput, makitasuujunnginnissarput, qiningannginnissarput pikitsitsiumatuujunnginnissarpullu pingaaruteqarpoq.
’UPPERNIKKUT AALAJAAGIT’
Petrusip uppeqatini qilammi kingornussinissamik ’neriugisaannik uumasumik’ eqqaasippai. Petrusi ima allappoq: „Ilissi tassaavusi eqqarleriit qinikkat, palaseqatigiit kunngiusut, inuiaat iluartut [illernartut, NV], innuttarisassarsiat.“ Naalatsigitinnissaq pillugu erseqqissumik siunnersuereerluni ima kajumissaarivoq: „Tamassi isumaqatigiillusi inooqatigiigitsi misiginneqataasarlusi, qatanngutigiittut asaqatigiillusi, nallittuisarlusi qanilaarlusilu.“ — 1 Petrusi 1:3, 4; 2:9; 3:8.
Juutit aaqqissuussaanerata ’naggatissaat qanillimmat’, Petrusip qatanngutit siunnersorpai ’silatusaaqqullugit eqiingaqqullugillu qinusarsinnaaqqullugit [qinusarnermut peqqissaaqqullugit, 1936]’. Ima allaffigai: „Eqiingagitsi silatusaarlusilu [Putumatsaalillusilu eqqumagitsi, 1936]! . . . Uppernikkut aalajaallusi [Saatani] assortorsiuk.“ — 1 Petrusi 4:7; 5:8, 9.
Allassimaffiit pillugit apeqqutinut akissutit:
3:20-22 — Kuisinneq qanoq annassutigissavarput? Kuisinnissaq annaanneqarumasunut tamanut piumasaqaataavoq. Kuisinnerli immini annassutissaanngilaq. „Jiisusi-Kristusip toqusunit makinnera tunngavigalugu“ annattoqarsinnaavoq. Kuisittussap upperisariaqarpaa taamaallaat Jiisusip pilliutitut toqunera, makititaanera aamma inuusunik toqusunillu eqqartuussinissamut oqartussaassuseqarluni ’Guutip talerpiata tungaani issianera’ pissutigalugit annattoqarsinnaasoq. Uppernermik taama ittumik tunngavilimmik kuisinneq inuit ’arfineq-pingasut umiarsuarmiillutik imikkut annatsitaanerannut’ assinguvoq.
4:6 — ’Toqoreersut [toqungasut, NV] iivangkiiliumik nalunaajaaffigineqartut’ kikkuuppat? Taakku tassaapput nutaarsiassaq nuannersoq tusanngikkallaramikku ’unioqqutitsisarnerminni ajortuliortarnerminnilu toqusimagaluartut’, imaluunniit anersaakkut toqungasut. (Efesosimiut 2:1) Nutaarsiassamilli nuannersumik upperinnilernermik kingorna anersaakkut ittumik ’inuulerput’.
Ilinniarfigisinnaasavut:
1:7, 1936. Inuup uppissusia erlinnangaassappat misilinneqarsimasariaqarlunilu minguiarneqarsimasariaqarpoq. Taamatut upperluarneq ’tarnimut annaanneqaataasinnaavoq’. (Hebræerit 10:39) Uppernikkut misilinneqarnerit ingalassimanngisaannartariaqarpavut.
1:10-12. Inngilit anersaakkut sallusuissutinik itisuunik itsaq Guutip pruffiitiisa kristumiut tanitat ilagiissaannut tunngatillugu allagaannik paasinnerusungaarput. Tamakkuali aatsaat paasiuminarsipput Jehova ilagiit aqqutigalugit iliuuseqartalermat. (Efesosimiut 3:10) Inngilit maligassiaat malittariaqarparput ’Guutillu itissusiinik’ misissueqqissaarnissaq noqqaassutigalugu. — 1 Korinthimiut 2:10.
2:21. Maligassarput, Jiisusi Kristusi, malittariaqarparput toqumullu allaat naalliunnissamut piareersimasariaqarluta Jehovap kisimi oqartussaassusia qutsissisikkumallugu.
5:6, 7. Isumakuluutivut Jehovamut pisikkaangatsigit taassuminnga pallorfiginninnermik inuunitsinni pingaarnerpaatitsinissamut aqagussamullu qanoq pisoqarsinnaaneranik pisariaqanngitsumik isumakuluutiginninnginnissamut taassuma ikiortarpaatigut. — Matthæusi 6:33, 34.
„[JEHOVAP] ULLUSSAA NALLIUTISSAAQ“
Petrusi ima allappoq: „Pruffiitip siulittuutaa inuup piumasaagut tutsiutinngisaannarpoq, Anersaamilli Illernartumit sunnertillutik inuit Guutimit pisumik oqaaseqartarput.“ Oqaatsinik siulittuutaasunik eqqumaffiginninnerput ’ajoqersuinerluttunut’ inunnullu allanut uagutsinnut ajortumik sunniuteqarsinnaasunut illersuutigisinnaavarput. — 2 Petrusi 1:21; 2:1-3.
Petrusi ima mianersoqqusivoq: „Ullussani kingullerni [tikiukkumaarput] mitallersut.“ „[Jehovalli] ullussaa tillinniatut nalliutissaaq.“ Petrusip allakkani naggaserpai ’Jehovap ullussaata nalliuffissaanik utaqqisunut eqqarsaatiginnittuartunullu’ (NV) pitsaasunik siunnersuuteqarluni. — 2 Petrusi 3:3, 10-12.
Allassimaffiit pillugit apeqqutinut akissutit:
1:19, NV — „Qaasiut“ kinaava, qanga ’nuiva’, qanorlu ililluta nalunngilarput tamanna pereersoq? Qaasiut tassaavoq Jiisusi Kristusi kunnginngortinneqarnermi kingorna. (Saqqummersitat 22:16) 1914-imi Jiisusi kunngitut Missiarsitut ’nuivoq’ ullullu nutaap atuutilernera nalunaarutigalugu. Jiisusip naalannarsisitaaneranik takorruugaq taassuma naalannassusianik kunngisullu pissaaneranik siulittuutaavoq Guutillu oqaasiata siulittuutaasup tatiginassusianut erseqqissaataalluni. (Markusi 9:1-3) Guutip oqaasianik ’uummatitsigut eqqumaffiginninnitsigut’ qaammarsarneqartarpugut, taamaalillutalu paasisarparput Qaasiut nuereersimasoq.
2:4 — ’Itinersuaq’ matumani eqqaaneqartoq suua, inngilillu pikitsitsiumatuut qanga tamatumunnga nakkartinneqarpat? Biibilip allassimaqqaarfiini oqaaseq grækerisooq „Tartaros“ allassimaffimmi matumani ’itinersuaq’-mik nutserneqarsimavoq. Tartaros tassaavoq pinngortitat anersaajusut kisimik — inuit pinnatik — assersuutaasumik igitaaffigisartagaat parnaarussivittullusooq ittoq. Tassunga pisinneqartut anersaakkut taggarissumiipput, tassa imaappoq Guutip siunertaanik nuanningaartunik paasinnissinnaanngitsut. Tartarosimiittut siunissamut neriuutissaqanngillat. Guutip Noap nalaani inngilit naalanngitsut Tartarosimut igippai, taakkulu piuneerunneqarnissamik tungaanut taamatut nikanarsisitaaqqajuassapput.
Ilinniarfigisinnaasavut:
1:2, 5-7. Pissuserineqartussat, soorlu upperneq, pinertusaarneq Guutimullu tunniusimaneq, ineriartortinniarlugit kajumilluta iliuuseqarnerput ’Guuti Jiisusilu pillugit eqqorluartumik ilisimasaqarnikkut’ (NV) ineriartornissamut iluaqutigissavarput. Aamma tamanna eqqorluartumik ilisimasaqarnermut tunngatillugu unittuunnginnitsinnik ineriartornitsinnillu kinguneqassaaq. — 2 Petrusi 1:8.
1:12-15. ’Sallusuissummut aalajangersimajuaqqulluta’ eqqaasinneqartarnissarput pisariaqartittuarparput. Assersuutigalugu ilagiit ataatsimiinnerini pisakkavut, nammineq atuaqqissaarneq Biibilimillu atuartarneq aqqutigalugit eqqaasinneqartarpugut.
2:2. Jehovamik taassumalu peqatigiissortaanik kanngunarsaanngisaannaqqulluta mianersoqqissaartariaqarpugut. — Romamiut 2:24.
2:4-9. Jehovap siornatigut iliuuserisimasai eqqarsaatigalugit qularutiginngilluinnarsinnaavarput ’Jehovap mianerinnitsini ussernartunit [misilinneqarnermit, NV] aniguisinneq sapinngikkai, iluaatsulli parnaarussaatissagai ullormi eqqartuussivissami pillagassanngorlugit’.
2:10-13. „Pissaanerit qutsissumiittut“, imaluunniit ’naalannartut’ (1936), tassa utoqqaanertat kristumiut, naammalluinnartuunngikkaluartut ilaannikkullu kukkusaraluartut asissuerpaluttumik oqaluuserissanngilavut. — Hebræerit 13:7, 17.
3:2-4, 12. ’Itsaq pruffiitit illernartut oqaaserisaannik Naalakkattalu annaassisitta inassutaanik’ eqqaamanninnerput Jehovap ullussaata nalliunnissaanik eqqarsaatiginnittuarnissamut iluaqutigissavarput.
3:11-14. Jehovap ullussaata nalliunnissaa utaqqillugulu eqqarsaatigiuaratsigu (1) ’illernartuulluta inuusariaqarpugut’, timikkut, eqqarsartaatsikkut, ileqqussatigut anersaakkullu minguitsuujuarluta; (2) ’Guutimik mianerinninnitsinnut’, imaluunniit ’Guutimut tunniusimanitsinnut’ (NV), ersiutaasunik iliuuseqartariaqarpugut, soorlu oqaluussinermi ajoqersuganngortitsiortornermilu; (3) inooriaaserput inuttullu pissuserput silarsuarmit ’mingutsinneqatsaalisariaqarparput’; (4) ’assuarnaatsuusariaqarpugut’, suut tamaasa minguitsumik pissutiginiagaqarluta iliuuseralugit, aamma (5) ’eqqissisariaqarpugut’ — tassa Guuti, qatanngutivut kristumiut inuillu allat eqqisseqatigalugit. (w08 11/15-E)