E Mea Ora te Tuatua a Iehova

Au Manako Maata mei te Au Reta a Iakobo Raua ko Petero

VAITATA rai e 30 mataiti i muri ake i te Penetekote o te mataiti 33 T.N., kua tata atu te pipi ko Iakobo​—e teina no Iesu—​i tetai reta i “te au kopu tino ngauru ma rua” o Iseraela vaerua. (Iako. 1:1) Tona akakoroanga: kia akamaroiroi ia ratou kia ngaueue kore i roto i te akarongo e kia akaari i te akakoromaki me aro atu i te au timataanga. Kua oronga katoa atu aia i te akoanga kia akatikatika i te au turanga manamanata tei tupu i roto i te au putuputuanga.

I mua ua ake i te kamupeini takinokino a te Emepera o Roma ko Nero i te mataiti 64 T.N., kua tata atu te apotetoro ko Petero i tana reta mua ki te au Kerititiano, i te akamaroiroi atu ia ratou kia vai ngaueue kore ua i roto i te akarongo. I roto i te rua o tana reta, tei tataia i muri ua ake i te mea mua, kua akamaroiroi atu a Petero i tona au taeake irinaki kia akarongo meitaki ki te tuatua a te Atua e te akamatakite atu ia ratou no runga i te taenga mai te ra o Iehova. E tika rai, e ka puapingaia tatou i te akarongo meitaki ki te au karere o te au reta a Iakobo raua ko Petero.​—Ebe. 4:12.

KA ORONGA TE ATUA I TE PAKARI KI TE ARONGA ‘E PATI RA MA TE AKARONGO’

(Iako. 1:1–​5:20)

“E ao to te tangata e akakoromaki i te timataanga,” i tata ai a Iakobo e, “kua akatika anakeia mai aia ra, e rauka ïa iaia te korona ora.” Ki te aronga ‘e pati ra ma te akarongo,’ ka oronga mai a Iehova i te pakari tei anoanoia kia rauka i te akakoromaki i te au timataanga.​—Iako. 1:5-8, 12.

Ka anoano katoaia rai te akarongo e te pakari no te aronga tei riro mai ei ‘orometua’ i roto i te putuputuanga. I muri ake i te akataka mai anga i te arero ei “melo mea ngiti” te ka rauka ua i ‘te akaviivii i te kopapa katoa nei,’ kua akamatakite mai a Iakobo no runga i te au tu manako o teianei ao te ka riro ei takino i te pirianga o tetai ki te Atua. Kua akakite katoa mai aia i te au takainga te ka tau kia aru tetai tei makiia i te pae vaerua, kia meitaki mai aia.​—Iako. 3:1, 5, 6; 5:14, 15.

Pauia te Au Uianga Tuatua Tapu:

2:13​—Na roto i teea mataara “e vi ra te akaapa i te aroa”? No runga i te tuatua anga no tatou uaorai ki mua i te Atua, e akamanako mai ana rai aia no runga i te aroa ta tatou e akaari ana ki etai ke e e akakore mai ana i ta tatou ara tei akatumuia ki runga i te atinga oko a tana Tamaiti. (Roma 14:12) Kare ainei teia i te tumu tau no te akariro i te aroa ei tu maata i roto i to tatou oraanga?

4:5​—Eaa te irava ta Iakobo e taiku ra i konei? Kare a Iakobo e taiku ra i tetai irava takake. Inara kare e kore e i akatumuia teia au tuatua akauruia a te Atua ki runga i te manako ariki uaia o te au irava mei ia Genese 6:5; 8:21; Maseli 21:10; e Galatia 5:17.

5:20​—“Ko tei akaoki mai i te tangata ara i taua apa nana ra” noai te oraanga tana ka akaora mai mei te mate? Ko tetai Kerititiano ka akaoki mai i tetai tangata ara mei tona aerenga ara ka akaora aia i te oraanga o te tangata tei tataraara mei te mate i te pae vaerua e penei mei te akapouanga mutu kore. Ko te tangata e tauturu ra i te tangata ara na roto i teia mataara “e manganui” katoa “te ara [a taua tangata ra ka] ngaro iaia.”

Au Apiianga no Tatou:

1:14, 15. I tupu mai te ara mei te anoano tika kore. No reira, eiaa tatou e akamou ua rai i te manako ki runga i te au anoano tika kore. Mari ra, ka anoanoia tatou kia “akamaara” ua rai i te au mea akamaroiroi e kia akaki i to tatou manako e to tatou ngakau ki taua au mea ra.​—Phili. 4:8.

 2:8, 9. ‘Te akono i te tu o te tangata ra’ te patoi ra te reira i “te ture ariki” o te aroa. No reira, kare te au Kerititiano mou e akara ana i te tu o te tangata.

2:14-26. I ‘ora oki tatou i te akarongo,’ “kare oki i to te angaanga” a te Ture a Mose me kore i ta te au Kerititiano i rave. E maata atu te umuumuia ra no te akarongo i to te tuatua ua e te irinaki ra tatou i te Atua. (Ephe. 2:8, 9; Ioa. 3:16) Tikaanga ka akakeu te reira ia tatou kia akarotai ia tatou ki te anoano o te Atua.

3:13-17. “Te pakari no runga maira” i teitei roa atu te reira i to ‘teianei ao, i to te tangata nei, e i to te au demoni’! E tau tatou ‘kia kimi pu tikai i te pakari o te atua mei te apinga uunaia ra.’​—Mase. 2:1-5.

3:18. Te ua o te tuatua meitaki o te Patireia ka ‘ruruia ma te au e te aronga e akatupu i te tuatua au ra.’ E mea puapinga tikai e kia riro tatou ei aronga akatupu i te au e kare ei aronga akatietie, akatupu pekapeka, me kore marikonga kore.

‘EI AKARONGO TURORI KORE’

(1 Pete. 1:1–​5:14)

Kua akamaara atu a Petero i tona au taeake irinaki i to ratou “manako ora” no tetai tuanga i runga i te rangi. “E uki ikiia ra kotou, e kau taunga ariki, e iti-tangata tapu” i akakite ei a Petero kia ratou. Muri ake i te oronga anga i tetai akoanga no runga i te tu kauraro, kua akamaroiroi atu aia i te katoatoa kia ‘ngakau tai to ratou ravarai, i te aroa katoa anga, ei aroa taeake ra, ei ngakau maru, ei ngakau taunga.’​—1 Pete. 1:3, 4; 2:9; 3:8.

I te mea e “kua vaitata ra te openga [o te akatereanga ngati Iuda],” kua ako atura a Petero i te au taeake kia ‘akono meitaki, e matakite, ma te pure.’ Kua akakite atura aia kia ratou e: “E akono meitaki, e matakite, . . . patoi atu ïa [Satani] ma te akarongo turori kore.”​—1 Pete. 4:7; 5:8, 9.

Pauia te Au Uianga Tuatua Tapu:

3:20-22​—Akapeea te papetitoanga i te akaora anga ia tatou? E umuumuanga te papetitoanga no te aronga e kimi ra i te ora. Inara, kare te papetitoanga uaorai e akaora ia tatou. Ka na roto mai ra te ora “i te tuakaouanga o Iesu Mesia.” Kia akarongo te tangata ka papetitoia e ka rauka te ora no te mea kua mate akaatinga a Iesu, kua akatu akaouia, e “tei te rima katau o te Atua ra,” e mana tona i runga ake i te aronga ora e te aronga i mate. Te papetitoanga tei akatumuia ki runga i taua tu akarongo ra te aiteite ra te reira ki te ‘ora anga e tokotai puke tangata i te vai, koia oki nga tangata toko varu ra.’

4:6​—Koai ma ra “te aronga i mate ra” tei “ako katoaia atu ei te evangelia”? Ko te aronga teia ‘tei mate i ta ratou au ara e te kino,’ me kore tei mate i te pae vaerua, i mua ake ka akarongo ei ratou i te tuatua meitaki. (Ephe. 2:1) Inara, i muri ake i te akarongo anga i te tuatua meitaki, kua akamata iora ratou i te “ora” mai i te pae vaerua.

Au Apiianga no Tatou:

1:7. No to tatou akarongo kia puapinga maataia, ka anoanoia te reira kia akapapuia, me kore kia timataia. Ka riro tikai taua tu akarongo ngaueue kore ra ei ‘ora no te vaerua.’ (Ebe. 10:39) Auraka tatou e unui ki muri mei te au timataanga o to tatou akarongo.

1:10-12. Kua inangaro ana te au angera i te aroro mai e akara kia marama i te au tuatua mou oonu pae vaerua ta te au peroveta o te Atua i taito i tata no runga i te putuputuanga Kerititiano akatainuia. Inara, kua taka meitaki mai teia au mea nei i te akamata anga ta Iehova angaanga ki te putuputuanga. (Ephe. 3:10) Kare ainei i te mea tau kia aru tatou i te akaraanga o te au angera i te kimi i “te au mea oonu rai o te Atua ra”?​—1 Kori. 2:10.

2:21. Na te aru anga i to tatou Akaraanga, ko Iesu Karaiti, e tau tatou kia ariki puareinga ua i te mamae e tae ua atu ki te mate kia rauka i te turuturu i to Iehova turanga ngateitei.

5:6, 7. Me uri tatou i to tatou au manamanata ki runga ia Iehova, ka tauturu mai aia ia tatou kia tuku i te akamorianga mou ei mea mua i roto i to tatou oraanga i to te manamanata puapinga kore ua i ta terao mai ra ka apai mai.​—Mata. 6:33, 34.

KA ‘TAE MAI TE RĀ O IEHOVA’

(2 Pete. 1:1–​3:18)

Kua tata a Petero e ‘kare oki to te inangaro o te tangata i tae mai ei te totou i taito ra; ko te au tangata tapu ra o te Atua tei tuatua i ta te vaerua  tapu i tuku mai ia ratou ra.’ Ka riro te akarongo meitaki anga ki te tuatua totou ei paruru ia tatou mei te “orometua pikikaa” e etai atu au tangata kino.​—2 Pete. 1:21; 2:1-3.

“Kia tae ki te au rā openga ra, e kitea mai ei e aronga taitoito,” e akamatakite maira a Petero. Inara ka ‘tae mai te rā o Iehova mei te keia i te po ra.’ Kua taopenga iora a Petero i tana reta ma tetai akoanga tau ki te aronga e ‘tatari ra, e te rapurapu ra, kia tae mai taua rā ra.’​—2 Pete. 3:3, 10-12.

Pauia te Au Uianga Tuatua Tapu:

1:19​—Koai ra te “etu popongi,” e aea aia e kake mai ei ki runga, e akapeea tatou i kite ei e kua tupu teia? Ko te “etu popongi” koia oki, ko Iesu Karaiti i roto i tona mana Patireia. (Apo. 22:16) I te mataiti 1914, kua kake mai a Iesu ki runga i mua i te au mea ravarai i angaia, ei Ariki Mesia, i te akakite anga i te makirata o tetai ra ou. Kua oronga mai te akatukeanga i tetai orama tei akaari mai na mua ake i to Iesu kaka e te mana Patireia, i te akapapu tika mai i te tu tiratiratu ngaueue kore o te tuatua totou a te Atua. Ka riro te akarongo meitaki anga ki taua tuatua ra ei turama i to tatou ngakau, e ka kite i reira tatou e kua kake mai te Etu Popongi ki runga.

2:4​—Eaa ra te “pirianganaoa,” e i naea te au angera meameaau i titiriia ai ki roto i reira? Ko te Pirianganaoa, e turanga te reira mei te are tapekaanga te tu, ko te au mea ora vaerua ua rai​—kare ko te tangata​—te ka tukuia ki reira. E turanga manako poiri tangotango te reira no runga i to te Atua au akakoroanga kaka. Ko te aronga i roto i te Pirianganaoa kare o ratou manakonakoanga no te tuatau ki mua. Kua titiri te Atua i te au angera akarongo kore ki roto i te Pirianganaoa i te tuatau o Noa, e ka vai rai ratou i roto i te reira turanga taakamaia e tae atu ei ki to ratou akapouanga.

3:17​—Eaa te aiteanga o ta Petero tuatua e “kua kite ana kotou i teianei au mea”? Te tuatua ra a Petero no runga i te kite tei rauka i mua ake ka tupu ei tetai mea, me kore no runga i te au mea ka tupu i te tuatau ki mua, tei orongaia kiaia e etai atu aronga tata Pipiria tei akauruia. No te mea e kare teia i te kite mutu kore, kare te rauka anga mai te reira i riro ei akakite ki te au Kerititiano mua i te au mea ravarai te ka tupu a te tuatau ki mua. Kua kite ua ratou i te au mea puapinga ta ratou ka tapapa atu.

Au Apiianga no Tatou:

1:2, 5-7. Kapiti atu ki te tauturu anga ia tatou kia akamaata atu i te ‘kite i te Atua, e ia Iesu,’ ka riro ta tatou tautaanga maroiroi kia akatupu i te au tu mei te akarongo, te akakoromaki, e te akono i te Atua ei akariro ia tatou kia akatau e te uua kore no runga i taua kite ra.​—2 Pete. 1:8.

1:12-15. Kia vai ‘tinamou ua rai i taua tuatua-mou nei,’ ka anoano tatou i te au akamaaraanga putuputu, e rauka maira na roto i te au uipaanga putuputuanga, te apii naau uaorai, e te tatau i te Pipiria.

2:2. Kia matakite tatou kia kore to tatou tu e apai mai te akakinoanga ki runga i te ingoa o Iehova e tona akaaerenga.​—Roma 2:24.

2:4-9. No runga i tana i rave i te tuatau i topa, kia papu ia tatou e “kua kite mari te Atu i te akaora i te aronga akono i te Atua i roto i te timataanga ra, e te tāpu i te aronga tuatua-tika kore e, kia tae ki te rā akava anga, kia mate.”

2:10-13. I te mea e e apa ana me kore e tarevake ana “te aronga teitei ra,” koia oki te aronga pakari Kerititiano i tetai au taime, auraka tatou e tuatua akakino atu ia ratou.​—Ebe. 13:7, 17.

3:2-4, 12. Na te akarongo meitaki anga i “te tuatua i tuatuaia mai e te au peroveta tapu i muatangana, e te apiiia atu e matou e te au aposetolo a te Atu ra a te Ora” e tauturu ia tatou kia akamanako marie i te vaitataanga mai o te ra o Iehova.

3:11-14. Ei aronga e ‘tatari ra, e te rapurapu anga atu, kia tae mai taua rā o te Atua ra,’ ka anoanoia kia rauka ia tatou te (1) ‘tu tapu,’ te akono marie anga i te tu viivii kore i te pae kopapa, pae manako, e te tu akono tau i te pae vaerua; (2) kia maata ua atu te angaanga e akaata maira i te “akono i te Atua,” mei te au mea rai e piri atura ki te tutu anga i te Patireia e te angaanga akariro anga i te tangata ei pipi; (3) te akono marie anga kia vai “topata kore” ua to tatou tu e to tatou tu tangata, kia vai viivii kore ua i teia ao; (4) kia “apa kore,” ua na te rave anga i te au mea ravarai ma te ngakau ma; e (5) ma “te au”​—koia oki kia au ma te Atua, ma to tatou au taeake Kerititiano, e te au tangata ravarai.