An Tataramon ni Jehova Buhay

Tampok na mga Kabtang sa mga Surat ni Juan Asin ni Judas

AN TOLONG surat ni apostol Juan posibleng marhay na ginibo kan 98 C.E. sa Efeso asin kabilang iyan sa huring mga libro kan ipinasabong na Kasuratan. An enot na duwang surat nagdadagka sa mga Kristiano na padagos na maglakaw sa liwanag asin na labanan an apostasiya. Sa ikatolong surat, dai sana nagtataram si Juan manongod sa paglakaw sa katotoohan kundi dinadagka man nia an mga Kristiano na makikooperar.

Sa saiyang surat na ginibo sa Palestina, mga 65 C.E. gayod, an tugang sa ina ni Jesus, si Judas, nagpatanid sa mga kapwa Kristiano manongod sa maraot na mga tawo na nakalaog nin hilom sa kongregasyon, asin nagtao sia nin sadol kun paano lalabanan an maraot na mga impluwensia. An pagtao nin atension sa mensahe kan tolong surat ni Juan asin kan surat ni Judas makakatabang sa sato na magdanay na makosog sa pagtubod sa ibong nin mga olang.​—Heb. 4:12.

PADAGOS NA MAGLAKAW SA LIWANAG SAKA SA PAGKAMOOT ASIN PAAGI SA PAGTUBOD

(1 Juan 1:1–5:21)

An enot na surat ni Juan ginibo para sa bilog na asosasyon kan mga kasaro ni Cristo asin nagtatao nin marahay na sadol na dinisenyo tanganing tabangan an mga Kristiano na manindogan tumang sa apostasiya saka magdanay na marigon sa katotoohan asin sa katanosan. Idinodoon nia an pangangaipo na padagos na maglakaw sa liwanag saka sa pagkamoot asin paagi sa pagtubod.

“Kun kita naglalakaw sa liwanag siring sa [Dios] mismo na nasa liwanag,” an isinurat ni Juan, “kita igwa nin pakisumaro sa lambang saro.” Asin huling an Dios iyo an Gikanan nin pagkamoot, an apostol nagsabi: “Padagos kitang magkaminorootmootan.” Mantang an “pagkamoot sa Dios” nagpapahiro sa sato na ‘kuyogon an saiyang mga togon,’ nadadaog niato an kinaban paagi sa “satong pagtubod” ki Jehova Dios, sa saiyang Tataramon, asin sa saiyang Aki.​—1 Juan 1:7; 4:7; 5:3, 4.

Mga Hapot sa Kasuratan na Sinimbag:

2:2; 4:10​—Paanong si Jesus “sarong pampagian nin boot na atang”? An pagpagian nin boot nangangahulogan nin “pagpanigo” o “pagpakalma.” Itinao ni Jesus an saiyang buhay bilang sarong pampagian nin boot na atang, na nangangahulogan na paagi sa paggibo nia kaiyan, pinanigoan nia an kahagadan nin sangkap na hustisya. Basado sa atang na iyan, an Dios puedeng magpaheling nin pagkaherak, asin puede niang patawadon an mga kasalan kan mga nagtutubod ki Jesus.​—Juan 3:16; Roma 6:23.

2:7, 8​—Anong togon an sinasabi ni Juan na “daan” saka ‘bago’? An sinasabi ni Juan iyo an togon mapadapit sa mapagsakripisyong pagkamoot na sa magturugang. (Juan 13:34) Inapod nia iyan na “daan” huling itinao iyan ni Jesus labing 60 taon bago ginibo ni Juan an enot na ipinasabong na surat nia. Sa siring, an mga nagtutubod igwa na kaiyan “poon pa sa kapinonan” kan saindang buhay bilang mga Kristiano. An togon ‘bago’ man sa dahelan na lampas pa iyan sa ‘pagkamoot nin saro sa saiyang kapwa nin siring sa saiya man sana’ asin naghahagad iyan nin mapagsakripisyong pagkamoot.​—Lev. 19:18; Juan 15:12, 13.

3:2​—Ano an ‘dai ihinayag’ sa linahidan na mga Kristiano, asin siisay an maheheling ninda “siring sa katunayan nia”? Dai ihinayag sa sainda kun magigin ano sinda kun sinda buhayon na liwat sa langit na may espiritung mga hawak. (Fil. 3:20, 21) Minsan siring, aram ninda na “kun [an Dios] mahayag na, [sinda] magigin siring sa saiya, huli ta sia maheheling [ninda] siring sa katunayan nia,” an boot sabihon, siring sa “Espiritu.”​—2 Cor. 3:17, 18.

5:5-8​—Paano an tubig, dugo, asin espiritu nagpatotoo sa katunayan na “si Jesus iyo an Aki nin Dios”? An tubig nagpatotoo huli ta kan si Jesus mabautismohan sa tubig, ipinahayag mismo ni Jehova an pag-oyon Nia sa saiya bilang Saiyang Aki. (Mat. 3:17) An dugo, o buhay, ni Jesus na itinao bilang “katimbang na pantubos para sa gabos,” nagpatunay man na si Jesus Aki nin Dios. (1 Tim. 2:5, 6) Asin  pinatotoohan kan banal na espiritu na si Jesus iyo an Aki nin Dios kan iyan buminaba sa saiya kan sia bautismohan, na paagi kaiyan sia naglibot “sa daga na naggigibo nin marahay asin nagpapaomay sa gabos na pinapasakitan kan Diablo.”​—Juan 1:29-34; Gibo 10:38.

Mga Leksion Para sa Sato:

2:9-11; 3:15. Kun tinotogotan nin sarong Kristiano an ano man o an siisay man na raoton an saiyang pagkamoot na sa magturugang, sia naglalakaw sa espirituwal na kadikloman, na dai nakakaaram kun masaen sia.

PADAGOS NA ‘MAGLAKAW SA KATOTOOHAN’

(2 Juan 1-13)

Pinonan ni Juan an ikaduwa niang surat paagi sa pagsabi: “An magurang na lalaki sa piniling babae asin sa mga aki kaini.” Ipinahayag nia an kagayagayahan na maheling an ‘nagkapira sa mga aki kaini na naglalakaw sa katotoohan.’​—2 Juan 1, 4.

Pagkatapos magtao nin pagparigon sa boot na magpatalubo nin pagkamoot, si Juan nagsurat: “Iyo ini an kahulogan nin pagkamoot, na padagos kitang maglakaw oyon sa saiyang mga togon.” Nagpatanid man si Juan manongod sa ‘madaya asin anticristo.’​—2 Juan 5-7.

Mga Hapot sa Kasuratan na Sinimbag:

1, 13​—Siisay an “piniling babae”? Posibleng an pinanonongdan ni Juan iyo an sarong babae na inaapod na Kyria, na terminong Griego para sa “babae.” O tibaad naggagamit sia nin pananaram na may piguratibong kahulogan, na pinanonongdan an sarong partikular na kongregasyon, tanganing ribongon an mga nagpepersegir. Kun an huring nasambitan iyo an totoo, an mga aki kaini iyo an mga miembro kan kongregasyon na iyan asin ‘an mga aki kan tugang na babae kaini’ nanonongod sa mga miembro nin saro pang kongregasyon.

7—Ano an sinasabi digdi ni Juan na ‘pagpadigdi’ ni Jesus, asin paanong an mga madaya “dai nagpapahayag” kaiyan? An sinambit na “pagpadigdi” laen man sa dai naheheling na pagdatong ni Jesus sa ngapit. Iyan iyo an pagpadigdi nia sa laman asin an saiyang pagigin linahidan bilang an Cristo. (1 Juan 4:2) Dai ipinahayag kan mga madaya an pagpadigding ini sa laman. Tibaad sinasabi ninda na si Jesus dai nabuhay kasuarin man o na dai sia linahidan nin banal na espiritu.

Mga Leksion Para sa Sato:

2, 4. An satong pakaaram kan “katotoohan”​—an bilog na Kristianong katokdoan na nagin kabtang kan Biblia—​asin an satong pagsunod dian mahalagang marhay para sa satong kaligtasan.​—3 Juan 3, 4.

8-11. Kun habo niatong mawara an “dai na kutana maninigong kabootan, pagkaherak asin katoninongan hale sa Dios na Ama asin hale ki Jesu-Cristo,” saka an mamomoton na pakikiasosyar sa mga kapagtubod, maninigo niatong ‘ingatan’ an satong espirituwalidad asin isikwal an mga “dai nagdadanay sa katokdoan kan Cristo.”​—2 Juan 3.

MAGIN “MGA KAPWA TRABAHADOR SA KATOTOOHAN”

(3 Juan 1-14)

An ikatolong surat ni Juan para sa personal niang katood na si Gayo. “Dai na ako nin orog pa kadakulang dahelan sa pagpasalamat kisa sa mga bagay na ini,” an isinurat nia, “na madangog ko na an sakong mga aki padagos na naglalakaw sa katotoohan.”​—3 Juan 4.

Tinawan nin komendasyon ni Juan si Gayo huli sa ‘paggibo nin maimbod na gibo’ sa pagtabang sa nagdadalaw na mga tugang. “Kita may paninimbagan na mapag-istimar na akoon an siring na mga tawo,” an sabi kan apostol, “tangani na kita magin mga kapwa trabahador sa katotoohan.”​—3 Juan 5-8.

Mga Hapot sa Kasuratan na Sinimbag:

11​—Taano ta an nagkapira minagawe nin maraot? Huling mayo nin espirituwalidad, dai naheheling nin nagkapira an Dios paagi sa saindang mga  mata nin pakasabot. Huling dai ninda sia naheheling paagi sa saindang literal na mga mata, sinda minagawe na garo baga dai nia sinda naheheling.​—Ezeq. 9:9.

14​—Siisay an pinanonongdan na “mga katood”? Bako sanang an mga may dayupot na relasyon sa lambang saro an kaiba sa mga tataramon na ginamit digdi na “mga katood.” Ginamit iyan ni Juan tanganing ipanongod sa mga kapagtubod sa pangkagabsan.

Mga Leksion Para sa Sato:

4. An maygurang sa espirituwal na mga indibiduwal sa kongregasyon nakakaeksperyensia nin dakulang kagayagayahan kun naheheling ninda an mas hoben na mga miembro kaiyan na “padagos na naglalakaw sa katotoohan.” Asin kanigoan na daing kaparehong kagayagayahan an naeeksperyensiahan nin mga magurang kun sinda nagigin mapanggana sa pagtabang sa saindang mga aki na magin mga lingkod ni Jehova!

5-8. Kabilang sa mga nagmamaigot para sa ikakarahay kan saindang mga tugang huli sa pagkamoot sa mga ini asin ki Jehova iyo an nagbibiaheng mga paraataman, misyonero, mga naglilingkod sa mga erokan na Bethel o sa mga sangang opisina, asin an mga payunir. An saindang pagtubod maninigong arogon, asin maninigo sinda sa satong mamomoton na suporta.

9-12. Maninigo niatong arogon an halimbawa kan maimbod na si Demetrio asin bakong kan matabil na si Diotrefes, na parabalobagi.

“MAGDANAY KAMO SA PAGKAMOOT NIN DIOS”

(Judas 1-25)

Ilinadawan ni Judas an mga luminaog nin hilom sa kongregasyon bilang “mga paragumodgumod, mga parareklamo manongod sa saindang kamugtakan sa buhay, na naglalakaw segun sa saindang sadiring mga mawot.” Sinda “nagtataram nin mapaabaw-abaw na mga bagay mantang sinda naghahanga sa mga tawo.”​—Jud. 4, 16.

Paano lalabanan nin mga Kristiano an maraot na mga impluwensia? “Mga namomotan,” an isinurat ni Judas, “girumdoma nindo an mga tataramon na sinabi kaidto kan mga apostol kan satong Kagurangnan na Jesu-Cristo.” Sinabi pa nia: “Magdanay kamo sa pagkamoot nin Dios.”​—Jud. 17-21.

Mga Hapot sa Kasuratan na Sinimbag:

3, 4​—Taano ta sinadol ni Judas an mga Kristiano na “makipaglaban nin maigot para sa pagtubod”? Huli ta an ‘mga tawong bakong diosnon nakalaog nin hilom sa kongregasyon.’ ‘Ginigibo kan mga tawong ini an dai na kutana maninigong kabootan nin Dios na magin sarahotan para sa malaswang gawe-gawe.’

20, 21​—Paano niato ‘mapagdadanay an satong sadiri sa pagkamoot nin Dios’? Magigibo niato ini sa tolong paagi: (1) paagi sa pagpakosog kan satong sadiri sa “kabanalbanaleng pagtubod” niato paagi sa mahigos na pag-adal kan Tataramon nin Dios asin maigot na pakikikabtang sa paghuhulit; (2) paagi sa pagpamibi “na igwa kan banal na espiritu,” o kaoyon kan impluwensia kaiyan; asin (3) paagi sa pagtubod sa nagpagin posible kan buhay na daing katapusan​—an pantubos na atang ni Jesu-Cristo.​—Juan 3:16, 36.

Mga Leksion Para sa Sato:

5-7. Makakaligtas daw an mga maraot sa paghokom ni Jehova? Imposible iyan, segun sa tolong nagpapatanid na halimbawang isinurat ni Judas.

8-10. Maninigo niatong arogon an halimbawa ni Miguel na arkanghel asin maninigo kitang magpaheling nin paggalang sa mga tinawan ni Jehova nin autoridad.

12. An mga apostatang nagsasaginsagin na mamomoton peligroso sa satong pagtubod kun paanong an mga gapong nakatago sa irarom nin tubig peligroso man sa mga barko o sa mga naglalangoy. An falsong mga paratokdo tibaad garo baga matinao, alagad siring sinda sa mga panganoron na dai nin tubig huli ta sinda mayong laog sa espirituwal. An siring na mga tawo daing bunga siring sa gadan na mga kahoy sa paghinanapos nin tigrakdag. Napapaatubang sinda sa pagkalaglag, siring sa nagabot na mga kahoy. Sarong kadonongan na likayan niato an mga apostata.

22, 23. Ikinakaongis nin tunay na mga Kristiano an maraot. Sa paghihingoang iligtas an “nagkapira na igwa nin mga pagduwaduwa” hale sa kalayo nin daing sagkod na pagkalaglag, an mga maygurang sa kongregasyon​—nangorogna an ninombrahan na mga paraataman—​nagtatao sa sainda nin espirituwal na tabang.

[Mga Ritrato sa pahina 28]

An tubig, espiritu, asin dugo nagpatotoo na “si Jesus iyo an Aki nin Dios”