Bann pwen enteresan dan let Zan ek Zid
Parol Zeova i vivan
Bann pwen enteresan dan let Zan ek Zid
I TRE probab ki zapot Zan ti ekrir sa trwa let ki parmi bann dernyen liv ki form parti Labib, kan i ti Efez pandan lannen 98 N.L. Sa de premye let ti ankouraz bann Kretyen pour kontinyen mars dan lalimyer e reziste lapostazi. Dan sa enn trwazyenm, Zan pa ti zis koz lo kontinyen mars dan lalimyer, me i ti osi ankouraz bann Kretyen pour korpere avek kanmarad.
Dan son let ki i ti ekrir Palestin, petet lannen 65 N.L., demi frer Zezi ki ti apel Zid ti averti son bann frer ek ser Kretyen konsernan bann move dimoun ki ti’n antre an sekre dan kongregasyon e i ti konsey zot lo ki mannyer zot ti pou reziste sa bann move lenfliyans. Si nou port latansyon lo sa mesaz ki i annan dan sa trwa let Zan ek let Zid, sa pou ed nou reste solid dan lafwa malgre bann lobstak ki nou kapab rankontre.—Ebr. 4:12.
KONTINYEN MARS DAN LALIMYER, DAN LANMOUR E PAR LAFWA
Zan ti ekrir son premye let pour tou bann kongregasyon ki ini dan Kris e ladan i annan bann bon konsey ki ti pou ed bann Kretyen rezet lapostazi e reste ferm pour laverite ek ladrwatir. I ti met lanfaz lo sa nesesite pour kontinyen mars dan lalimyer, dan lanmour e par lafwa.
Zan ti ekrir: “Si nou pe viv dan lalimyer parey [Bondye] i dan lalimyer, nou pe viv ini avek kanmarad.” Vi ki Bondye i sours lanmour, sa zapot ti dir: “Annou [“kontinyen,” NW] kontan kanmarad.” Vi ki “lanmour Bondye” i motiv nou pour “obei son k[o]mannman,” nou ganny laviktwar lo lemonn par “nou lafwa” dan Zeova, son Parol ek son Garson.—1 Zan 1:7; 4:7; 5:3, 4.
Larepons pour bann kestyon lo Labib:
2:2; 4:10—Dan ki fason Zezi i en “sakrifis ki permet nou ganny pardon nou pese”? Zezi ti donn son lavi konman en sakrifis ki ti ouver semen pour nou ganny pardonnen nou pese e sa i annakor avek lazistis parfe Bondye. Lo baz sa sakrifis, Bondye i kapab demontre mizerikord plis ankor e i kapab pardonn pese bann dimoun ki demontre lafwa dan Zezi.—Zan 3:16; Rom. 6:23.
2:7, 8—Lekel sa komannman ki “nouvo” e an menm tan “vye” ki Zan ti koz lo la? Zan ti pe koz lo sa komannman konsernan sa lanmour ki pare pour fer sakrifis ki devret egziste ant bann frer ek ser Kretyen. (Zan 13:34) I ti dir ki sa komannman i “vye” akoz Zezi ti pronons li plis ki 60 an avan ki Zan ti ekrir son premye let enspire. Alor, bann krwayan ti annan sa komannman “depi o[]konmansman” zot lavi konman Kretyen. Sa komannman i osi “nouvo” dan sa sans ki i al pli lwen ki zis ‘kontan nou prosen parey nou menm’ e i enplik en lanmour ki pare pour fer sakrifis.—Lev. 19:18; Zan 15:12, 13.
5:5-8—Ki mannyer delo, disan ek lespri i temwen ki “Zezi i Garson Bondye”? Delo ti vin temwen akoz ler Zezi ti ganny batize dan delo, Zeova ti eksprim Son laprouvasyon pour Zezi e i ti apel li Son Garson. (Mat. 3:17) Vi ki Zezi ti donn son disan ouswa lavi konman “pri pour sov limanite,” sa ti osi montre ki Kris i Garson Bondye. (1 Tim. 2:5, 6) Lespri sen ti konfirmen ki Zezi i Garson Bondye kan i ti desann lo li zour son batenm e sa ti permet li “fer dibyen e geri tou bann dimoun ki ti anba pouvwar dyab” partou kot i ti ale.—Zan 1:29-34; Akt 10:38.
Leson pour nou:
2:9-11; 3:15. Si en Kretyen i les okenn keksoz ouswa dimoun detrir sa lanmour ki i annan pour son bann frer ek ser, i pe mars dan fernwanr spirityel, i pa pou konnen kot i pe ale.
KONTINYEN “VIV DAN LAVERITE”
Zan i konmans son dezyenm let an dizan: “Delapar Lansyen, a sa Madanm swazi[r] . . . ek son bann zanfan.” I ti eksprim gran lazwa pour vwar ki ‘en pe son bann zanfan ti pe viv dan laverite.’—2 Zan 1, 4.
Apre ki i ti’n ankouraz zot pour devlop lanmour, Zan ti ekrir: “Sa se lanmour: ki nou swiv son bann k[o]mannman.” Zan ti osi averti kont “tronper e Lennmi Kris.”—2 Zan 5-7.
Larepons pour bann kestyon lo Labib:
1, 13—Lekel sa “Madanm”? I kapab ki Zan ti pe ekrir en madanm ki apel Kyria ki an Grek i vedir “madanm.” Ouswa, i kapab ki i ti pe servi en lekspresyon senbolik pour adres en serten kongregasyon pour ki i kapab konfiz bann persekiter. Si sa ti leka, son bann zanfan ti pou bann manm sa kongregasyon e “bann zanfan [son] ser” ti pou bann manm dan en lot kongregasyon.
Leson pour nou:
2, 4. Konn “laverite,” setadir konn tou bann lansennyman Kretyen ki dan Labib e reste atase avek zot, i enportan pour nou delivrans.—3 Zan 3, 4.
8-11. Si nou pa anvi perdi “lagras, pardon ek lape” sorti kot Bondye ek Zezi Kri, ensi ki sa lasosyasyon ranpli avek lanmour avek nou bann frer ek ser Kretyen, nou bezwen “fer byen atansyon” avek nou lekor spirityelman e reziste sa bann ki pa “reste dan lansennyman Kris.”—2 Zan 3.
“PARTISIP DAN TRAVAY POUR LAVERITE”
Zan ti adres son trwazyenm let pour son bon zanmi Gayis. I ti ekrir: “Napa en pli gran lazwa pour mwan ki ler mon tande ki mon bann zanfan i swiv laverite.”—3 Zan 4.
Zan ti felisit Gayis pour lapenn i ti fidelman “rann servis” bann frer ki ti vizit li. Sa zapot ti dir: “Nou devre ed bann zonm koumsa, pour ki nou osi nou partisip dan travay pour laverite.”—3 Zan 5-8.
Larepons pour bann kestyon lo Labib:
11—Akoz serten i annan en move kondwit? Vi ki zot feb spirityelman, serten i fer konmsi Bondye pa la. Lefet ki zot pa kapab vwar li avek zot de lizye, zot azir konmsi Bondye pa pe vwar zot.—Ezek. 9:9.
15—Lekel ki pe ganny refer avek konman “bann zanmi”? Sa mo “bann zanmi” isi i enplik plis ki zis bann ki annan en relasyon pros avek kanmarad. Zan i servi sa mo pour refer avek bann frer ek ser Kretyen an zeneral.
Leson pour nou:
4. Bann dimoun dan kongregasyon ki matir spirityelman i eksperyans en gran lazwa kan zot vwar bann zenn ki pe kontinyen “swiv laverite.” Bann paran osi i ganny en lazwa ki pa kapab ganny konpare kan zot reisi ed zot zanfan vin bann serviter Zeova.
5-8. Bann sirveyan rezyonal e distrik, misyonner, bann ki pe servi dan bann Betel oubyen biro brans ensi ki bann ki dan servis pionye i parmi bann ki travay dir akoz zot lanmour ki zot annan pour Zeova e pour zot frer ek ser. I byen pour imit zot lafwa e zot merite ganny nou sipor ranpli avek lanmour.
9-12. Nou devret imit legzanp Demetriis ki ti fidel e non pa Dyotref ki ti kontan fer kalonmni.
“RESTE DAN LANMOUR BONDYE”
(Zid 1-25)
Zid ti dekrir bann ki ti’n antre dan kongregasyon an sekre konman bann “zonm ki touzour mekontan e pe touzour plennyen, zot pe viv an donnan satisfaksyon a zot bann move dezir. Zot koz gros-dan, e zot flat dimoun.”—Zid 4, 16.
Ki mannyer bann Kretyen i kapab rezet bann move lenfliyans? Zid ti ekrir: “Mon bann byenneme, rapel zot bann prediksyon ki depi lontan par bann zapot nou Senyer Zezi-Kri.” I ti azoute: “Reste dan lanmour Bondye.”—Zid 17-21.
Larepons pour bann kestyon lo Labib:
3, 4—Akoz Zid ti ankouraz bann Kretyen pour “lite . . . pour lafwa”? Sa ti akoz ‘bann zonm ki ti napa respe pour Bondye ti’n antre an sekre dan kongregasyon.’ Sa bann zonm ti pe ‘deform lansennyman konsernan lagras Bondye, pour zistifye zot lavi imoral.’
20, 21—Ki mannyer nou kapab “reste dan lanmour Bondye”? Nou kapab fer sa dan trwa fason: (1) par batir nou lekor lo nou “lafwa ki tre sen” atraver letid o profon dan Parol Bondye e par partisip aktivman dan predikasyon; (2) priye “par Sent-Espri” ouswa annakor avek son lenfliyans; e (3) demontre lafwa dan sa ki fer li posib pour nou ganny lavi eternel e sa se dan sakrifis Zezi Kri.—Zan 3:16, 36.
Leson pour nou:
5-7. Eski bann move dimoun i kapab evit zizman Zeova? Dapre sa trwa legzanp lavertisman ki Zid ti servi, i enposib.
8-10. Nou devret swiv legzanp sef bann lanz, Misel e demontre respe anver bann ki Zeova i donn lotorite.
12. Bann aposta ki kasyet sa ki zot ete e pretann ki zot annan lanmour i danzere pour nou lafwa zis parey bann ros anba delo i danzere pour bann bato ek nazer. Bann fo ansennyan i kapab paret zenere, me zot parey bann nyaz ki pa anmenn delo dan sa sans ki zot vid spirityelman. Sa bann kalite dimoun pa raport okenn fri zis parey bann pye dibwa avan liver i konmanse. Zot ganny detrir zis parey bann pye dibwa ki ganny derasinen. Nou pou saz si nou rezet bann aposta.
22, 23. Bann vre Kretyen i ay sa ki move. Dan zot zefor pour sov “serten ki annan dout” avek sa destriksyon eternel, bann ki matir dan kongregasyon, sirtou bann sirveyan, i ed zot pour rebatir zot lafwa.
[Portre lo paz 30]
Delo, lespri ek disan i temwen ki “Zezi i garson Bondye”