Mbaʼe mbaʼépa ñanemboʼe Juan ha Judas kuatiañeʼẽ
Jehová Ñeʼẽ ningo oikove
Mbaʼe mbaʼépa ñanemboʼe Juan ha Judas kuatiañeʼẽ
APÓSTOL Juan ohaivaʼekue mbohapy kárta oĩrõ guare táva Éfesope áño 98-pe. Koʼãva oñemoĩ Ñandejára Ñeʼẽ opakuévo. Umi mokõi tenondeguápe omokyreʼỹ umi kristiánope akóinte oguata hag̃ua Ñandejára rapére ha oñemoĩ hag̃ua umi omboykévare Jehovápe. Pe mbohapyhápe katu Juan omokyreʼỹ jey chupekuéra ojerovia hag̃ua Ñandejárare ha avei oñopytyvõ hag̃ua.
Judas ningo Jesús ermanoanga ha ohai ikuatiañeʼẽ Palestínape áño 65-pe. Haʼe heʼi umi ermánope oñatende hag̃ua, oĩgui heta tekove aña oikéva kongregasiónpe. Avei heʼi chupekuéra mbaʼéichapa ikatu ojehekýi umi júnta vaígui. Katuete ningo Juan ha Judas kuatiañeʼẽ ñanepytyvõta jajerovia mbarete hag̃ua Ñandejárare jahasa asýramo jepe (Heb. 4:12).
PEIKÓKENA ÑANDEJÁRA RAPÉRE MBORAYHU HA JEROVIÁPE
Juan ohai ikuatiañeʼẽ tenondegua umi kristiáno ohótavape yvágape ha oñemoñeʼẽ chupekuéra oñemoĩ hag̃ua umi omboykévare Jehovápe. Avei omokyreʼỹ chupekuéra odefende hag̃ua Ñandejára ñanemboʼéva ha pe tekojoja. Haʼe ohechauka mbaʼérepa tekotevẽ jaiko Ñandejára rapére mborayhu ha jeroviápe.
Juan ohai: ‘Jaikóramo tesapeha rendýpe, upéicharõ ñaime oñondive’. Ñandejáragui ningo ou mborayhu, upévare apóstol Juan heʼi: “Jajoayhuvaʼerã”. ‘Jahayhúgui Ñandejárape’ ningo ‘jajapo iléi heʼíva’, ha ‘jajerovia’ rupi Jehováre, Iñeʼẽre ha Itaʼýrare ñandepuʼaka ko múndore (1 Juan 1:7; 4:7; 5:3, 4).
Porandukuéra:
2:2; 4:10. Mbaʼéichapa Jesús sakrifísio rupive “ojeheja rei ñandéve ñane rembiapo vaikue”? Ko sakrifísio rupive ningo ikatu ñañemoĩ porã jey Jehovándi. Jesús omanóvo ñanderehehápe omeʼẽ Jehová hustísia ojeruréva. Ha upe sakrifísio rupive Ñandejára oiporiahuvereko ha operdona umi ojeroviávape Jesús rehe (Juan 3:16; Rom. 6:23).
2:7, 8, BNP. Mbaʼe mandamiéntore piko Juan heʼi ‘ipyahu’ ha ‘yma guareha’? Juan ningo oñeʼẽ pe mandamiénto heʼívare jajoayhuvaʼerãha oñoermánoicha ha ñamotenonde ñande rapichápe (Juan 13:34). Heʼi hese ‘yma guareha’ ojapómagui 60 áño rupi Jesús omeʼẽ hague ko mandamiénto hemimboʼekuérape. Upéicha rupi umi kristiáno oikuaa ko mandamiénto ‘oñepyrũ guive’ oservi Jehovápe. Péro ikatu avei ojeʼe ‘ipyahuha’ pórke ndeʼivéima umi kristiáno ‘ohayhuvaʼerãha hapichápe haʼekuéra ojehayhuháicha’. Heʼi voi katu ojesakrifikavaʼerãha hikuái hapichakuéra rehehápe (Lev. 19:18, ÑÑB; Juan 15:12, 13).
3:2, BNP. Mbaʼépa pe ‘ndojehechaukáiva gueteri’ umi ungídope, ha mávapepa ohecháta hikuái ‘haʼe haʼehaichaite’? Umi ungido ningo ndoikuaái mbaʼéichatapa hikuái oñemoingove jey vove chupekuéra espírituicha oiko hag̃ua yvágape (Fili. 3:20, 21). Upéicharamo jepe oikuaa hikuái ‘Ñandejára ojehechaukaha ára oikotaha chuguikuéra Haʼeichagua, ohecháta chupe haʼe haʼehaichaite’, ha Jehová ningo peteĩ ‘espíritu’ (2 Cor. 3:17, 18).
5:5-8. Mbaʼéichapa pe y, tuguy ha espíritu sánto ohechauka ‘Jesús Ñandejára Raʼyha’? Pe y ohechauka upéva pórke Jesús ojevautisárõ guare, Jehová heʼi hese: Kóva haʼe che raʼy (Mat. 3:17). Pe tuguy orrepresenta Jesús rekove, haʼe omeʼẽvaʼekue ‘opavave rehehápe’. Upéva ohechauka Jesús haʼeha Jehová Raʼy (1 Tim. 2:5, 6). Espíritu sánto ohechauka avei ko mbaʼe oguejýrõ guare Jesús akã ári ojevautisárõ guare, upéva rupi Jesús ‘ojapo iporãva ha omonguera opa ohasa asývape Satanás poguýpe’ (Juan 1:29-34; Hech. 10:38).
Mbaʼépa ñanemboʼe:
2:9-11; 3:15. Peteĩ kristiáno ndohayhuvéiramo iñermánope, haʼetéta oikóva pytũmbýpe ha ndoikuaáiva mamópa oho.
PEGUATÁKENA “PE AÑETEGUA RAPÉRE”
Péicha oñepyrũ Juan kuatiañeʼẽ mokõiha: ‘Che, pe ansiáno, ahai ko kuatiañeʼẽ pe kuñakaraípe Ñandejára oiporavovaʼekue, ha imembykuérape g̃uarã’. Haʼe ovyʼa oikuaávo pe kuñakarai ‘membykuéra apytépe oĩha umi oguatáva pe añetegua rapére’ (2 Juan 1, 4, ÑÑB).
Omokyreʼỹ rire umi ermánope ojoayhu hag̃ua Juan ohai: ‘Pe mborayhu ningo kóva: tajaiko Ñandejára heʼi haguéicha’. Heʼi avei chupekuéra oñatende hag̃ua cháke oĩhína ‘pe oporombotavýva ha pe anticristo’ (2 Juan 5-7, BNP).
Porandukuéra:
1, 13, BNP. Mávapa hína ‘pe kuñakarai Ñandejára oiporavovaʼekue’? Ikatu oime Juan oñeʼẽraʼe peteĩ kuñáre ha ohenói chupe Kiria (griégope heʼiséva “kuñakarai”). Térã ombojoja pe kongregasión peteĩ kuñakaraíre ombotavy hag̃ua umi ndaijaʼéivape hesekuéra. Upéicharõ umi imembykuéra hína ermanokuéra upe kongregasionpegua, ha ‘iñermána membykuéra’ katu ambue kongregasionpegua (2 Juan 1, 13).
7. Mbaʼéichapa ou Jesús ha umi oporombotavýva ndohechakuaaséi upéva? Koʼápe Juan ndeʼíri Jesús ou jeytaha tenonderãme ha avave ndohechamoʼãiha chupe. Oñeʼẽ guei Jesús rehe oúrõ guare yvypóraicha ha oiko chugui Mesías térã Cristo (1 Juan 4:2). Umi oporombotavýva heʼi Jesús ndoúi hague kuimbaʼéicha. Oĩ heʼíva haʼe ndoúi hague ko yvy ape ári térã ndojeporavói hague chupe espíritu sánto rupi.
Mbaʼépa ñanemboʼe:
2, 4. Jajesalva hag̃ua tekotevẽ jaikuaa porã la Biblia heʼíva ha jajapo (3 Juan 3, 4).
8-11. Ñañatende porã vaʼerã ani jajei Jesús ñanemboʼevaʼekuégui. Upéicharamo ndojeimoʼãi ñandehegui Ñandejára ha Jesucristo ‘mbaʼeporãngue, iporiahuvereko ha ipyʼaguapy’, ha akóinte ñaiméta ñane ermanokuéra jahayhuetéva ndive. Tekotevẽ avei ñamboyke ‘umi nomboʼéivape Jesucristo omboʼevaʼekue’ (2 Juan 3).
‘ÑAIPYTYVÕKENA AÑETEGUA ÑEMOHERAKUÃME’
Juan ohai iñamígo Gáyope ikuatiañeʼẽ mbohapyha, ha heʼi: “Mbaʼe chembovyʼavéva niko pe aikuaa mbaʼéichapa umi che raʼýicha arekóva, oiko pe añeteguápe” (3 Juan 4).
Juan oguerohory Gáyope oipytyvõ haguére “hekopete” umi ermáno ovisitávape upe kongregasión. Apóstol Juan heʼi: ‘Ñande ñamog̃uahẽvaʼerã chupekuéra ñaipytyvõ hag̃ua pe añetegua ñemoherakuãme’ (3 Juan 5-8, BNP).
Porandukuéra:
11. Mbaʼérepa oĩ hembiapo vaíva? Ijerovia ikangýgui umíva hesarái Ñandejára omañaha hesekuéra. Ha ndaikatúi rupi jahecha Jehovápe oiko hikuái Ñandejára ohechaʼỹrõguáicha chupekuéra (Eze. 9:9).
15, JMP [14, NM]. Mávapa hína umi “angirũnguéra” koʼápe oñeñeʼẽha? Koʼápe Juan noñeʼẽi umi oñoamigoitévare. Haʼe oñeʼẽhína entéro kristiánore.
Mbaʼépa ñanemboʼe:
4. Umi ermáno aréma oservíva Jehovápe ningo ovyʼaiterei ohechávo umi imitãva “oiko pe añeteguápe”. Ha umi tuvakuéra katu ovyʼaitevéntema oipytyvõvo ifamiliakuérape oservi hag̃ua Jehovápe.
5-8. Oĩ heta oñemeʼẽmbaitéva oipytyvõ hag̃ua ñane ermanokuérape. Koʼãva apytépe umi superintendénte, misionéro, umi ombaʼapóva Betélpe ha prekursorkuéra. Haʼekuéra ningo ohayhu Jehovápe ha hapichakuérape. Upévare ehémplo iporãva ñandéve g̃uarã ha ñañehaʼãvaʼerã ñaipytyvõ chupekuéra.
9-12. Ñañehaʼãvaʼerã jajogua Demétriope, ha ani Diótrefespe. Haʼe ningo oñeʼẽmba rei ha okopi hapicháre.
‘PEIKÓKENA ÑANDEJÁRA MBORAYHÚPE’
Judas heʼi kongregasiónpe oikeha ‘tekove chiʼõ oñeʼẽ vaíva hapicháre, oikóva oikoseháicha’. Umíva “tekove juru guasu, oporombojuru heʼẽva” (Judas 4, 16, BNP).
Mbaʼépa ojapokuaa kristianokuéra ani hag̃ua ombyai chupekuéra umi júnta vai? Judas heʼi: ‘Che ermanokuéra ahayhuetéva, penemanduʼáke umi Jesucristo apostolkuéra heʼimavaʼekue rehe’. Heʼi avei: ‘Peikókena Ñandejára mborayhúpe’ (Judas 17-21, BNP).
Porandukuéra:
3, 4. Mbaʼérepa Judas omokyreʼỹ umi kristiánope ‘oñehaʼãmbaite hag̃ua ijeroviáre’? Ojapo upéva oĩgui kuimbaʼe aña “oikevaʼekue apeguypegua reheve” kongregasiónpe. Umíva ‘oiporu Ñandejára pyʼaporã omoʼã hag̃ua hekokyʼa’.
20, 21, BNP. Mbaʼéichapa ikatu ‘jaiko Ñandejára mborayhúpe’? Upearã jajapovaʼerã koʼã mbohapy mbaʼe: 1) ‘ñamombarete mbareteve ñande jerovia’ jastudiávo Ñandejára Ñeʼẽ ha ñasẽ memévo japredika, 2) ‘ñañemboʼe espíritu sánto rupi’, péva heʼise jahejaha Ñandejára espíritu ñanesãmbyhy, ha 3) jajerovia Jesucristo sakrifísiore, upéva rupive ikatúta jaikove opa árare (Juan 3:16, 36).
Mbaʼépa ñanemboʼe:
5-7. Ikatúnepa umi iñañáva ojehekýi Jehová kastígogui? Umi mbohapy ehémplo omeʼẽva Judas ohechauka ni mbaʼevéicharõ ndaikatumoʼãiha.
8-10. Jajapovaʼerã pe arkánhel Miguel ojapo haguéicha ha jarrespeta umi autorida Jehová omoĩva.
12. Umi apóstata ningo ojepyʼapy guaʼu ñanderehe ha upéva ipeligróso. Haʼete ita oĩva ýpe ha ikatúva omboʼyguy várko térã olastima umi oytávape. Umi mboʼehára japu ningo imbaʼeporãiterei guaʼu péro haʼete arai ndoguerúiva ama, ndoikuaái hikuái mbaʼeve Jehovágui. Ojogua yvyra máta pirukuépe. Ha umíva ojehapoʼoháicha oñehundi hag̃ua, upéicha avei oñehundíta umi apóstata. Upévare iporãvénte ñañemomombyry chuguikuéra.
22, 23, ÑÑB. Umi kristiáno tee ndaijaʼéi ivaívare. Osalva hag̃ua umi “ipyʼahetávape”, umi ermáno ikatupyrýva ha ansianokuéra oñehaʼã oipytyvõ chupekuéra omombarete hag̃ua ijerovia.
[Nóta oĩva taʼanga ndive páhina 28]
Pe y, tuguy ha espíritu sánto ohechauka ‘Jesús Ñandejára Raʼyha’