Ioane Bona Iuda Edia Revareva Edia Hereva Badadia
Iehova Ena Hereva be Ia Mauri Noho
Ioane Bona Iuda Edia Revareva Edia Hereva Badadia
LAGANI 98 C.E. bamona ai, Efeso dekenai, aposetolo Ioane ese revareva toi ia torea, bona unai revareva be Baibel ena buka ginigabedia. Ioane ena revareva ginigunana bona iharuana be Keristani taudia ia hagoadaia diari ai idia raka noho bona aposteit taudia idia dadaraia totona. Ioane ena revareva ihatoina ai, Ioane ese Keristani taudia ia hagoadaia hereva momokani ena dala ai idia raka bona idia gaukara hebou totona.
Reana lagani 65 C.E. ai, Palestine dekenai Iesu ena tadina Iuda be ia torea revarevana amo Keristani taudia ia hadibaia, Dirava badinaia lasi taudia haida be kongrigeisen lalonai idia vareai. Unai dainai Keristani taudia ia sisiba henia unai bamona taudia edia kara idia dadaraia totona. Ioane ena revareva toi bona Iuda ena revareva ita duahia neganai, unai ese ita do ia durua iseda abidadama ai ita gini goada bona hekwakwanai idauidau ita hanaia totona.—Heb. 4:12.
DIARI ENA DALA AI OI RAKA, BONA LALOKAU BONA ABIDADAMA HAHEDINARAIA NOHO
Ioane ena revareva ginigunana be Keristani taudia ibounai dekenai ia siaia, bona idia ia hagoadaia aposteit taudia idia dadaraia, bona hereva momokani bona kara maoromaoro idia badinaia noho totona. Idia ia hagoadaia diari ena dala dekenai idia raka bona lalokau bona abidadama idia hahedinaraia noho totona.
Ioane ia gwau: “Bema diari lalonai ita raka noho, Dirava hegeregerena, ita be orea tamona taudia.” Bona Dirava be lalokau ena Badina dainai, aposetolo Ioane ia gwau: “Ita ta ta dekenai ita lalokau henia be namo.” Ita be “Dirava ita lalokau henia” dainai, iena ‘taravatu ita badinaia.’ Iehova Dirava, iena Hereva bona iena Natuna ita “abidadama henia” dainai inai tanobada ena kara ita halusia.—1 Ioa. 1:7; 4:7; 5:3, 4.
Baibel Henanadaidia Edia Haere:
2:7, 8—Ioane be taravatu “gunana” bona “matamatana” ia gwauraia neganai, ia be edena taravatu ia herevalaia? Ioane be iseda tadikaka dekenai ita hahedinaraia lalokauna, anina be sibona eda namo ita laloa lasi to iseda tadikaka edia namo ita laloa bada, ia herevalaia. (Ioa. 13:34) Ia gwau unai taravatu be “gunana,” badina iena revareva ginigunana ia do torea lasi neganai, lagani 60 gunanai Iesu be unai taravatu ia gwauraia. Unai dainai, Keristani taudia ese unai taravatu be idia kamonai vadaeni. Danu ia be “matamata,” badina ta ese ena dekena tauna do ia lalokau henia sibona ia lalokau henia hegeregerena, bona sibona ena namo do ia tahua lasi, to haida edia namo do ia tahua guna.—Lev. 19:18; Ioa. 15:12, 13.
5:5-8—Edena dala ai ranu, rara bona lauma helaga ese idia hamomokania, “Iesu be Dirava ena Natuna”? Badina Iesu be ranu ai ia bapatiso neganai, Iehova sibona ia gwau, Iena Natuna ia lalonamo henia. (Mat. 3:17) Iesu be ena rara o mauri ia henia, unai amo “taunimanima ibounai ese mauri do idia davaria,” unai ese ia hahedinaraia Iesu be Dirava ena Natuna. (1 Tim. 2:5, 6) Bona Iesu ia bapatiso murinai, lauma helaga be ia dekenai ia hedinarai, bona ia hasiahua dainai, “ia lao gabu idauidau, kara namodia ia karaia, bona ia ese Diabolo ia hadikaia taudia ibounai ia hanamodia,” unai ese ia hamomokania ia be Dirava ena Natuna.—Ioa. 1:29-34; Kara 10:38.
Ita Dibaia Gaudia:
2:9-11; 3:15. Bema Keristani tauna ta be gau ta o tau ta dainai ena lalokau ena tadikaka dekenai ia hadikaia, vadaeni ia be dibura lalonai ia noho bamona, bona ia diba lasi edeseni ia lao noho.
‘HEREVA MOMOKANI ENA DALA DEKENAI OI RAKA NOHO’
Ioane ena revareva iharuana ena matamanai ia gwau: “Lau ekalesia ena gunalaia tauna ese, Dirava ese ia abia hidi hahinena mai oiemu natuna taudia danu inai revareva umui dekenai lau torea inai.” Ioane ia moale badina ia kamonai “natuna haida ese hereva momokani ena dala dekenai idia raka noho.”—2 Ioa. 1, 4.
Ioane be Keristani taudia ia hagoadaia edia lalokau idia habadaia totona. Unai murinai ia gwau: “Lalokau ena anina be inai: Dirava ena taravatu do ita badinaia.” Danu Ioane ia gwau, namona be “koikoi taudia, bona Keriso idia tuari henia noho” taudia dainai do idia naria namonamo.—2 Ioa. 5- 7.
Baibel Henanadaidia Edia Haere:
1, 13—“Dirava ese ia abia hidi hahinena” be daika? Reana Ioane be hahine ta ladana Kyria ia tore henia, Greek gado ai unai ladana ena anina be “hahine.” Eiava reana dagedage taudia idia daradara totona, ia be laulau dalanai kongrigeisen ia herevalaia. Bema unai bamona, vadaeni reana unai hahine ena natudia be kongrigeisen taudia bona ena tadina, “Dirava ese ia abia hidi hahinena” ma ta, ena natudia be kongrigeisen ma ta ai idia noho taudia.
Ita Dibaia Gaudia:
2, 4. Hahemauri ita abia totona “hereva momokani”—Baibel ai idia noho Keristani hahediba hereva ibounai—ita diba bona badinaia namonamo be mai anina bada.—3 Ioa. 3, 4.
8-11. Bema ita ura Dirava bona ena Natuna, Iesu Keriso edia “hariharibada, bogahisihisi bona maino” ita abia noho bona iseda tadikaka edia hebamo karana ita reaia lasi, namona be hereva momokani ita “naria namonamo” bona ‘Keriso ena hadibaia hereva idia badinaia lasi’ taudia ita dadaraia.—2 Ioa. 3.
“DIRAVA ENA HEREVA MOMOKANI DURUA TOTONA DO ITA GAUKARA HEBOU”
Ioane ese ia torea revareva ihatoina be iena turana Gaio dekenai ia torea. Ia gwau: “Bema lau kamonai, egu natuna Keristani taudia ese Dirava ena hereva momokani ena dala dekenai idia raka noho, vadaeni lau moale bada herea. Moale ta ese unai moale ia hereaia diba lasi.”—3 Ioa. 4.
Ioane ese Gaio ia hanamoa badina tadikaka idia vadivadi neganai, idia ia durua karana dekenai “gaukara namo herea” ia karaia. Aposetolo Ioane ia gwau: “Ita Keristani taudia ese inai bamona taudia ita durua be namo. Badina unai dekena amo, Dirava ena hereva momokani durua totona do ita gaukara hebou namonamo.”—3 Ioa. 5-8.
Baibel Henanadaidia Edia Haere:
11—Dahaka dainai haida be kara dika idia karaia? Badina idia be hereva momokani idia laloa bada lasi dainai, edia lalona ena matana amo Dirava idia itaia diba lasi. Unai dainai kara dika idia karaia neganai, idia laloa Dirava be idia ia itaia lasi.—Ese. 9:9.
15—Ioane ese ia gwauraia “turana” be daika? Inai hereva “turana” ese ma ta ida ita tura namonamo karana ia hahedinaraia. To danu, Ioane be ena abidadama tamona taudia ibounai ia gwauraia iena turadia.
Ita Dibaia Gaudia:
4. Kongrigeisen lalonai lo tadikaka taihu idia itaia matamata taudia be “hereva momokani ena dala dekenai idia raka noho” neganai, idia moale bada. Danu, tama sina be edia natudia idia durua bona Iehova ena hesiai taudia ai idia lao neganai, idia moale bada!
5-8. Loaloa naria taudia, misinari taudia, Betele ai idia gaukara taudia, bona painia gaukara idia karaia taudia be edia tadikaka bona Iehova idia lalokau henia dainai idia gaukara goada. Unai taudia edia abidadama ita tohotohoa bona mai lalokau ida idia ita durua be namo.
9-12. Namona be abidadama tauna Demetrio ena haheitalai namona ita tohotohoa, to Diotrepe, ladana hadikaia tauna ena koikoi karadia ita dadaraia.
“DIRAVA ENA LALOKAU LALONAI DO UMUI NOHO”
Iuda ia gwau kongrigeisen taudia haida idia hakaua kerere taudia be “haida edia kara idia maumauraia noho, bona ma haida idia gwauraia kerere. Idia ese edia ura dikadia sibona idia karaia noho. Mai hekokoroku danu edia kara idia herevalaia, bona idia ese haida idia hanamoa koikoi.”—Iuda 4, 16.
Keristani taudia be edena dala ai hebamo dikadia do idia dadaraia? Iuda ia gwau: “Lauegu lalokau taudia e, iseda Lohiabada Iesu Keriso ena aposetolo taudia ese umui idia hadibaia hereva do umui laloatao.” Ma ia gwau: “Dirava ena lalokau lalonai do umui noho.”—Iuda 17-21.
Baibel Henanadaidia Edia Haere:
3, 4—Dahaka dainai Iuda ese Keristani taudia ia hadibaia ‘edia abidadama lalonai do idia gini goada’? Badina ‘Dirava idia badinaia lasi taudia’ haida be kongrigeisen lalonai idia vareai. Bona “edia lebulebu karadia,” dainai “Dirava ena hariharibada” karana idia hadibaia kerere.
20, 21—Edena dala ai ita be ‘Dirava ena lalokau lalonai do ita noho’ diba? Dala toi amo unai ita karaia diba: (1) Baibel ita stadilaia bona haroro gaukara ita karaia goadagoada amo iseda “abidadama helagana” ita hagoadaia; (2) “lauma helaga ena siahu” amo ita guriguri; bona (3) mauri hanaihanai abia totona, Iesu ena mauri davalaia boubouna ita abidadama henia be gau badana.—Ioa. 3:16, 36.
Ita Dibaia Gaudia:
5-7. Kara dika taudia be Iehova ena Kota Badana Dinana amo idia roho mauri diba, a? Iuda ese sivarai toi ia gwauraia, unai amo ita ia hadibaia kara dika taudia be Iehova ena Kota Badana Dinana amo idia roho mauri diba lasi.
8-10. Namona be aneru badana Mikaela ena kara ita tohotohoa, bona Iehova ese ia abia hidi taudia ita matauraia.
12. Aposteit taudia be edia koikoi karadia amo iseda abidadama idia hadikaia diba. Idia hahedinaraia idia be taunimanima idia lalokau henia, kara namodia idia karaia, bona taunimanima idia durua, to edia kara korikori idia hunia. Toana be hahediba koikoi taudia be taunimanima idia durua, to idia be “ori koremakorema, lai ese ia hodaia bamona,” hereva momokani idia abia dae lasi. Unai bamona taudia be “au dikadia bamona, edia huahua ena nega korikori be huahua idia atoa lasi.” Unai au be taunimanima ese tano amo edia ramu idia kokia bamona, aposteit taudia be dika do idia davaria. Unai dainai aposteit taudia ita dadaraia be aonega karana.
22, 23. Keristani momokani taudia be kara dika idia inai henia. Lo tadikaka taihu bona kongrigeisen idia naria tadikaka be idia gaukara goada, “abidadama goada lasi taudia” be dika amo idia hamauria, anina be idia durua edia abidadama idia hagoadaia totona.
[Pictures on page 28]
Ranu, lauma helaga, bona rara ese idia hamomokania “Iesu be Dirava ena Natuna”