Isi Ihe Ndị Sitere n’Akwụkwọ Ozi Jọn na Jud
Okwu Jehova Dị Ndụ
Isi Ihe Ndị Sitere n’Akwụkwọ Ozi Jọn na Jud
AKWỤKWỌ ozi atọ Jọn onyeozi dere so n’akwụkwọ ndị ikpeazụ dị n’Akwụkwọ Nsọ e dere site n’ike mmụọ nsọ, bụ́ ndị ọ ga-abụ na o dere ha n’Efesọs n’ihe dị ka n’afọ 98 O.A. Akwụkwọ ozi abụọ ndị mbụ gbara Ndị Kraịst ume ka ha nọgide na-eje ije n’ìhè ahụ nakwa ka ha ghara ikwe ka ndị si n’ezi ofufe dapụ nwata ha. Ọ bụghị naanị banyere ije ije n’eziokwu ahụ ka Jọn kwuru okwu ya n’akwụkwọ ozi ya nke atọ kama ọ gbakwara Ndị Kraịst ume ka ha na-emekọ ihe ọnụ.
N’akwụkwọ ozi Jud, bụ́ onye otu nne ji ya na Jizọs, nọ na Palestine dee n’ihe dị ka n’afọ 65 O.A., ọ dọrọ Ndị Kraịst ibe ya aka ná ntị banyere ndị ọjọọ gbebatara n’ọgbakọ, nyekwa ha ndụmọdụ otú ha ga-esi zere ndị na-akpa àgwà ọjọọ. Ime ihe ndị e kwuru n’akwụkwọ ozi atọ Jọn dere na nke Jud, nwere ike inyere anyị aka ịnọgidesi ike n’okwukwe n’agbanyeghị ihe ndị ga-achọ igbochi anyị ime otú ahụ.—Hib. 4:12.
NỌGIDE NA-EJE IJE N’ÌHÈ AHỤ, N’ỊHỤNANYA NAKWA N’OKWUKWE
Ndị e bu n’obi dee akwụkwọ ozi mbụ Jọn bụ ndị niile ha na Kraịst dị n’otu. Akwụkwọ ozi ahụ nwere ndụmọdụ ndị bụ́ ịgba, ndị e dere iji nyere Ndị Kraịst aka ịghara ikwe ka ndị si n’ezi ofufe dapụ nwata ha, nakwa iji mee ka ha nọgidesie ike n’eziokwu ahụ ma na-eme ihe ziri ezi. Jọn kwusiri okwu ike banyere mkpa ọ dị ka anyị nọgide na-eje ije n’ìhè ahụ, n’ịhụnanya, na n’okwukwe.
Jọn dere, sị: “Ọ bụrụ na anyị na-eje ije n’ìhè ahụ, dị ka [Chineke] onwe ya nọ n’ìhè ahụ, anyị na ibe anyị na-emekọrịta ihe.” Ebe ọ bụkwanụ na ịhụnanya si n’aka Chineke, onyeozi ahụ kwuru, sị: “Ka anyị na-ahụrịta ibe anyị n’anya.” Ọ bụ ezie na “ịhụ Chineke n’anya” na-akpali anyị ịdị “na-edebe ihe o nyere n’iwu,” ọ bụ okwukwe anyị nwere na Jehova Chineke, n’Okwu ya, na n’Ọkpara ya ka anyị ji emeri ụwa.—1 Jọn 1:7; 4:7; 5:3, 4.
Azịza nke Ajụjụ Ndị Dabeere n’Akwụkwọ Nsọ:
2:2; 4:10—Olee otú o si bụrụ na Jizọs bụ “àjà ime udo”? Ime udo pụtara ime ka iwe “dajụọ,” ma ọ bụ ime ka obi “jụrụ.” Jizọs nyere ndụ ya ka àjà ime udo n’echiche bụ́ na site n’ime nke a, ọ ga-emezu ihe iwu zuru okè chọrọ. Dabere n’àjà ahụ ọ chụrụ, Chineke nwere ike imere anyị ebere, nweekwa ike ịgbaghara ndị nwere okwukwe na Jizọs mmehie ha.—Jọn 3:16; Rom 6:23.
2:7, 8—Olee iwu Jọn na-ekwu na ọ bụ iwu “ochie” nakwa iwu “ọhụrụ”? Jọn na-ekwu banyere iwu ahụ e nyere ka anyị gosi ụmụnna anyị ụdị ịhụnanya nwere ike ime ka anyị dị njikere ịnwụ n’ihi ha. (Jọn 13:34) Ọ kpọrọ ya nke “ochie” n’ihi na Jizọs nyere ya ihe karịrị iri afọ isii tupu Jọn edee akwụkwọ ozi ya mbụ o dere n’ike mmụọ nsọ. N’ihi ya, ndị kwere ekwe nụrụ ya n’oge ha ‘malitere’ ịghọ Ndị Kraịst. Ihe mekwara e ji kpọọ iwu ahụ nke “ọhụrụ” bụ na ihe e kwuru n’ime ya abụghị naanị ‘mmadụ ịhụ mmadụ ibe ya n’anya dị ka onwe ya,’ kama ọ chọkwara ka mmadụ nwee ụdị ịhụnanya nwere ike ime ka ọ dị njikere ịnwụ n’ihi onye ọzọ.—Lev. 19:18; Jọn 15:12, 13.
3:2—Olee ihe ‘a na-emebeghị’ ka Ndị Kraịst e tere mmanụ mara, ònyekwa ka ha ‘ga-ahụ otú ọ dị’? Ihe a na-emebeghị ka ha mara bụ otú ha ga-adị mgbe a kpọlitere ha n’ọnwụ ha agaa eluigwe dị ka ndị bụ́ mmụọ. (Fil. 3:20, 21) Ma, ihe ha maara bụ na “mgbe ọ bụla e mere ka [Chineke] pụta ìhè [ha] ga-adị ka ya, n’ihi na [ha] ga-ahụ ya otú ọ dị,” ya bụ, dị ka “Mmụọ ahụ.”—2 Kọr. 3:17, 18.
5:5-8—Olee otú mmiri, ọbara, na mmụọ nsọ si gbaa àmà n’eziokwu ahụ bụ́ na “Jizọs bụ Ọkpara Chineke”? Mmiri gbara àmà n’ihi na mgbe e mere Jizọs baptizim, Jehova n’onwe ya kwuru na ọ bụ Ọkpara ya. (Mat. 3:17) Ọbara ma ọ bụ ndụ Jizọs, bụ́ nke o nyere ka “ọ bụrụ ihe mgbapụta kwekọrọ ekwekọ maka mmadụ niile,” gosikwara na Jizọs bụ Ọkpara Chineke. (1 Tim. 2:5, 6) Mmụọ nsọ gbakwara àmà na Jizọs bụ Ọkpara Chineke mgbe ọ nọkwasịrị Jizọs n’isi oge a na-eme ya baptizim, bụ́ nke mere ka o nwee ike ‘ịgazu ala ahụ na-eme ihe ọma ma na-agwọ ndị niile Ekwensu na-emekpọ ọnụ.’—Jọn 1:29-34; Ọrụ 10:38.
Ihe Ndị Anyị Mụtara:
2:9-11; 3:15. Ọ bụrụ na Onye Kraịst ekwere ka ihe ọ bụla ma ọ bụ onye ọ bụla mee ka ọ kwụsị ịhụ ụmụnna ya n’anya, ọ na-ejegharị n’ọchịchịrị, ọ maghịkwa ebe ọ na-aga.
NỌGIDE “NA-EJE IJE N’EZIOKWU AHỤ”
Jọn malitere akwụkwọ ozi ya nke abụọ site n’ikwu, sị: “Mụ onwe m bụ́ okenye na-edegara nwaanyị ahụ a họọrọ akwụkwọ, tinyere ụmụ ya.” O nwere obi ụtọ mgbe ọ hụrụ “ụfọdụ n’ime ụmụ [nwaanyị ahụ] ka ha na-eje ije n’eziokwu ahụ.”—2 Jọn 1, 4.
Mgbe Jọn gbachara ume ka e nwee ịhụnanya, o dere, sị: “Nke a bụkwa ihe ịhụnanya pụtara, ka anyị na-eje ije dị ka ihe ndị o nyere n’iwu si dị.” Jọn dọkwara aka ná ntị banyere “onye nduhie ahụ na onye ahụ na-emegide Kraịst.”—2 Jọn 5-7.
Azịza nke Ajụjụ Ndị Dabeere n’Akwụkwọ Nsọ:
1, 13—Ònye bụ “nwaanyị ahụ a họọrọ”? Ọ ga-abụ na Jọn na-ekwu banyere otu nwaanyị a kpọrọ Kyria, bụ́ ihe ndị Grik na-akpọ “nwaanyị.” Ma ọ bụkwanụ ya abụrụ na o ji ya na-anọchi anya otu ọgbakọ ọ na-agwa okwu, iji mee ka ndị mmegide ghara ịghọta ihe ọ na-ekwu. Ya bụrụ na ọ bụ nke a ka o bu n’uche, ụmụ ya ga-abụ ndị nọ n’ọgbakọ ahụ ọ na-agwa okwu, “ụmụ nwanne [nwaanyị ahụ]” ga-abụkwa ndị nọ n’ọgbakọ ọzọ.
7—Olee ‘ọbịbịa’ Jizọs nke Jọn na-ekwu okwu ya ebe a, oleekwa otú o si bụrụ na ndị nduhie ‘adịghị ekwupụta’ ya? ‘Ọbịbịa’ a abụghị ọbịbịa Jizọs gaje ịbịa n’ụzọ a na-adịghị ahụ anya. Kama, ọ bụ ọbịbịa Jizọs n’anụ ahụ́ nakwa otite a ga-ete ya mmanụ dị ka Kraịst. (1 Jọn 4:2) Ndị nduhie ekwetaghị na Jizọs bịara n’anụ ahụ́. Ikekwe ha ekweghị na e nwetụla mgbe e nwere onye dị ka Jizọs ma ọ bụ ha ekweghị na e jiri mmụọ nsọ tee ya mmanụ.
Ihe Ndị Anyị Mụtara:
2, 4. Mmata anyị matara “eziokwu ahụ,” nke bụ́ ozizi niile nke Ndị Kraịst, bụ́ nke dị na Baịbụl, ma na-eme ha, dị nnọọ mkpa maka nzọpụta anyị.—3 Jọn 3, 4.
8-11. Ọ bụrụ na anyị chọrọ ịnọgide na-enwe “obiọma na-erughịrị mmadụ na ebere na udo nke si n’aka Chineke bụ́ Nna nakwa n’aka Jizọs Kraịst,” nakwa mkpakọrịta ịhụnanya na-adị n’etiti anyị na ndị kwere ekwe ibe anyị, anyị kwesịrị ‘ilezi onwe anyị anya’ iji hụ na anyị nọgidere n’ozizi nke Kraịst ma zere ndị ‘na-anọgideghị na ya.’—2 Jọn 3.
GHỌỌNỤ ‘NDỊ NA-ARỤKỌ ỌRỤ N’EZIOKWU AHỤ’
Onye Jọn degaara akwụkwọ ozi ya nke atọ bụ enyi ya bụ́ Geyọs. O dere, sị: “Ọ dịghị ihe ọzọ ga-eme ka m nwee obi ekele karịa ihe a, ya bụ, na m ga na-anụ na ụmụ m na-eje ije n’eziokwu ahụ.”—3 Jọn 4.
Jọn jara Geyọs mma n’ihi ịrụ “ọrụ kwesịrị ntụkwasị obi” n’inyere ụmụnna si esi bịa aka. Onyeozi ahụ kwuru sị: “Anyị ji ụgwọ ịnabata ndị dị otú ahụ nke ọma, ka anyị wee ghọọ ndị ha na ha na-arụkọ ọrụ n’eziokwu ahụ.”—3 Jọn 5-8.
Azịza nke Ajụjụ Ndị Dabeere n’Akwụkwọ Nsọ:
11—Gịnị mere ụfọdụ ji akpa àgwà ọjọọ? N’ihi ejighị ihe gbasara Chineke kpọrọ ihe, ụfọdụ adịghị ahụ Chineke, n’ụdị na ha adịghị aghọta na ọ dị. Ebe ọ bụ na ha enweghị ike iji anya nkịtị hụ Chineke, ha na-akpa àgwà ka à ga-asị na ọ dịghị ahụ ha.—Ezik. 9:9.
14—Olee ndị ka a kpọrọ “ndị enyị”? “Ndị enyi” e kwuru okwu ha n’ebe a abụghị naanị ndị ha na mmadụ dị n’ezigbo mma. Ndị Jọn na-ekwu okwu ha ebe a bụ ndị kwere ekwe ibe anyị niile.
Ihe Ndị Anyị Mụtara:
4. Ndị nọterela aka n’ọgbakọ na-enwe obi ụtọ dị ukwuu ma ha hụ ka ndị batara ọhụrụ “na-eje ije n’eziokwu ahụ.” Ndị nne na nna na-enwekwa obi ụtọ dị ukwuu ma ha nwelie ike inyere ụmụ ha aka ịghọ ndị ohu Jehova!
5-8. Ndị nlekọta na-ejegharị ejegharị, ndị ozi ala ọzọ, ndị na-eje ozi na Betel, na ndị ọsụ ụzọ socha ná ndị na-arụsi ọrụ ike maka ụmụnna ha n’ihi na ha hụrụ ụmụnna ha na Jehova n’anya. Anyị kwesịrị iṅomi okwukwe ha, kwesịkwa iji ịhụnanya na-akwado ha.
9-12. Anyị kwesịrị iṅomi Dimitriọs, bụ́ onye kwesịrị ntụkwasị obi, ọ bụghị onye ekwurekwu bụ́ Dayọtrefis, nke na-ekwutọkarị ndị ọzọ.
“NỌRỌNỤ N’ỊHỤNANYA CHINEKE”
(Jud 1-25)
Jud kọwara ndị gbebatara n’ọgbakọ dị ka “ndị na-atamu ntamu, ndị na-eme mkpesa banyere ọnọdụ ha ná ndụ, ndị na-agbaso ọchịchọ nke onwe ha.” Ha ‘na-etu ọnụ, ebe ha na-enwe mmasị n’ihe ndị mmadụ bụ n’ihi uru ha ga-erite.’—Jud 4, 16.
Olee otú Ndị Kraịst ga-esi zere ndị na-akpa àgwà ọjọọ? Jud dere, sị: “Ndị m hụrụ n’anya, chetanụ okwu e kwuru na mbụ site n’ọnụ ndịozi Onyenwe anyị Jizọs Kraịst.” O kwukwara sị: “Nọrọnụ n’ịhụnanya Chineke.”—Jud 17-21.
Azịza nke Ajụjụ Ndị Dabeere n’Akwụkwọ Nsọ:
3, 4—Gịnị mere Jud ji gwa Ndị Kraịst ka ha “lụsie ọgụ ike maka okwukwe ahụ”? Ọ bụ n’ihi na ‘ndị na-adịghị asọpụrụ Chineke egbebatala n’ọgbakọ.’ Ha ‘na-eme ka obiọma Chineke nke na-erughịrị mmadụ bụrụ ihe ngọpụ maka omume rụrụ arụ.’
20, 21—Olee otú anyị nwere ike isi “nọrọ n’ịhụnanya Chineke”? Ọ dị ụzọ atọ anyị nwere ike isi mee nke a: (1) site n’iwuli onwe anyị elu ‘n’okwukwe anyị kasị nsọ,’ bụ́ nke anyị na-eme site n’ịmụchi Okwu Chineke anya nakwa ịgachi ozi ọma anya; (2) site n’ikpe ekpere “site na mmụọ nsọ,” ma ọ bụ n’ụzọ kwekọrọ n’otú o si arụ ọrụ; na (3) site n’inwe okwukwe n’àjà mgbapụta Jizọs Kraịst, bụ́ ihe ahụ mere ọ ga-eji kwe anyị omume inweta ndụ ebighị ebi.—Jọn 3:16, 36.
Ihe Ndị Anyị Mụtara:
5-7. Ndị ajọ omume, hà nwere ike ịgbanahụ ikpe Jehova? Ihe atụ atọ ndị ahụ Jud ji dọọ anyị aka ná ntị gosiri na ọ gaghị ekwe omume.
8-10. Anyị kwesịrị iṅomi Maịkel, bụ́ onyeisi ndị mmụọ ozi, ma kwanyere ndị Jehova nyere ikike ùgwù.
12. Ndị si n’ezi ofufe dapụ, bụ́ ndị na-eme ka à ga-asị na ha hụrụ anyị n’anya, nwere ike ịla okwukwe anyị n’iyi dị nnọọ ka okwute nọ n’ala ala mmiri nwere ike isi gbawaa ụgbọ mmiri ma ọ bụ merụọ onye na-egwu mmiri ahụ́. Ndị nkụzi ụgha nwere ike ịdị na-eme ka hà na-emesapụ aka, ma ha dị ka ígwé ojii nke mmiri na-adịghị, n’ụdị na ha enweghị eziokwu ọ bụla ha ga-akụzi. Ndị dị otú a amịghị mkpụrụ ọ bụla, ha dị ka osisi kpọnwụrụ akpọnwụ nke na-amịghị mkpụrụ n’oge ya. A ga-ala ha n’iyi dị ka osisi ndị a bụturu abụtu. Anyị ga-egosi na anyị maara ihe ma ọ bụrụ na anyị ajụ ndị si n’ezi ofufe dapụ.
22, 23. Ezi Ndị Kraịst kpọrọ ihe ọjọọ asị. Iji chebe “ụfọdụ ndị nwere obi abụọ” pụọ n’ọkụ nke na-anọchi anya mbibi ebighị ebi, ndị tozuru okè n’ọgbakọ—karịsịa ndị okenye—na-enyere ha aka eme ka ha na Jehova dịkwuo ná mma.
[Foto ndị dị na peeji nke 28]
Mmiri, mmụọ nsọ, na ọbara na-agba àmà na “Jizọs bụ Ọkpara Chineke”