Johannesip allagaanit Judasillu allagaanit pingaarnersat
Jehovap oqaasia uumavoq
Johannesip allagaanit Judasillu allagaanit pingaarnersat
JOHANNESIP allagai pingasut ukiumi 98-imi Efesosimi allanneqarsimagunarput allakkanilu isumassarsiarititaasuni allagaallutik kingulliit ilaat. Allagaani marlunni siullerni kristumiut kajumissaarneqarput qaamasumi inuujuaqqullugit tunussisoqarneruleraluttuinnarneranillu akiueqqullugit. Johannesip allakkami pingajuanni sallusuissummi inuuneq allaatigiinnarnagu aammali kristumiut suleqatigeeqqullugit kajumissaarpai.
Judasip allagai Palæstinami Jiisusip affarmik qatanngutaanit Judasimit ukiumi 65-imiugunartoq allanneqarput. Taassuma allakkamini kristumioqatini inunnut guutiitsunut ilagiinnut ilaliussimasunut mianersoqquai, aamma qanoq ajortumik sunnertinnaveersaartoqarsinnaanera pillugu siunnersuivoq. Johannesip allagaani pingasuni Judasillu allagaani allassimasunik eqqumaffiginninneq ajornartorsioraluarluni upperluartuarnissamut iluaqutaasinnaavoq. — Hebræerit 4:12.
QAAMASUMI, ASANNINNERMI UPPERNERMILU INUUJUARITSI
Johannesip allagai siulliit Kristusimik ataasioqatiginnittunut tamanut allagaasut pitsaasunik siunnersuutitaqarput kristumiut tunussinermik akiuinissamut aamma sallusuissummik naapertuilluarnermillu aalajangiusimanninnissamut iluaqutigisinnaasaannik. Johannesip qaamasumi, asanninnermi uppernermilu inuujuarnissap pingaaruteqassusia erseqqissarpaa.
Johannesi ima allappoq: „Qaamasumi inuugutta, soorlu aamma [Guuti] qaamasumiittoq, taava peqatigiissaagut.“ Aamma asanninneq Jehovamik pilerfeqarmat apustili ima allappoq: „Asaqatigiinniarta.“ „Guutimut asanninneq“ kajumississutigalugu ’inassutai maleruartarpavut’, Jehovamulli Guutimut erneranullu uppernitsigut oqaasianillu upperinninnitsigut silarsuaq ajugaaffigisarparput. — 1 Johannesi 1:7; 4:7; 5:3,4.
Allassimaffiit pillugit apeqqutinut akissutit:
2:2; 4:10 — Jiisusip ’pilliutitut saammaannartitsissutaanera’ qanoq paasisariaqarpa? Saammaannartitsineq ’saammarsaanertut’ imaluunniit ’saammaassinertut’ paasisariaqarpoq. Jiisusi inuunerminik saammaannartitsissutitut pilliutiginnippoq, ima paasillugu naapertuilluarluinnarnissamik piumasaqaammik naammassinninnermigut saammaateqatigiissitsilluni. Pilliut tamanna tunngavigalugu Guuti nallittuisinnaavoq Jiisusimullu uppertut ajortuliaannik isumakkeerfiginnissinnaalluni. — Johannesi 3:16; Romamiut 6:23.
2:7, 8 — Inassut sunaana Johannesip ’nutaatut’ ’pisoqqatullu’ eqqartoraa? Johannesip imminut pilliutigeriaannaalluni qatanngutigiittut asaqatigiinnissamik inassut eqqartorpaa. (Johannesi 13:34) ’Pisoqqatut’ eqqartorpaa Jiisusip tamanna inassutigimmagu, Johannesip allakkaminik isumassarsiarititaasunik siullernik allannera ukiut 60-it sinnerlugit sioqqullugu. Tassa uppertut inassut tamanna kristumiutut inuunermik ’pileqqaarneranniilli’ pigisimavaat. Inassut ’nutaajuvoq’ ima paasillugu ’tullermik immisut asanninnissamik’ piumasaqaatitaqaannarani, aammali imminut pilliutigeriaannaalluni asanninnissamik piumasaqaatitaqarami. — 3 Mosesi 19:18; Johannesi 15:12,13.
3:2 — Sunaana kristumiunut tanitanut ’saqqummersinneqanngitsoq’, aamma kia „pissusivia“ takussavaat? Taakkununnga saqqummersinneqanngitsoq tassaavoq qilammi inuunermut makititaagunik timaasa anersaakkut ittut qanoq ikkumaarnissaat. (Filippimiut 3:20, 21) Ilisimasaalli tassaavoq ’Guuti saqqummersinneqarpat taassumatut iliumaarnertik pissusivia takujumaaramikku’, tassa ’Anersaajunera’. — 2 Korinthimiut 3:17, 18.
5:5-8 — Imeq, aak anersaarlu „Jiisusip Guutimut erneruneranik“ qanoq nalunaajaappat? Imeq nalunaajaavoq, Jiisusimi imermi kuisimmat Guutip nammineq ernerminik akuerinninnini ersersippaa. (Matthæusi 3:17) Jiisusip aava, imaluunniit inuunera, „inuit tamarmik utertitaassutissaannik“ tunniunneqartoq, aamma Jiisusip Guutimut erneruneranut ersiutaavoq. (1 Timotheusi 2:5, 6) Aamma anersaaq illernartoq Jiisusip kuisinnerani qulaanut aqqarmat, aamma taanna taassuma Guutimut erneruneranik nalunaajaavoq. Jiisusi anersaamit illernartumit ’tamani angalaarsinnaanngortinneqarpoq ajunngitsuliorluni Diaavulumillu naalagaaffigineqartut kikkut tamaasa ajorunnaarsillugit’. — Johannesi 1:29-34; Apustilit Suliaat 10:38.
Ilinniarfigisinnaasavut:
2:9-11; 3:15. Kristumiu arlaannik qatanngumminik asannikkunnaassuteqaruni anersaakkut taarsiussaaq, sumukarnerluni nalullugu.
’SALLUSUISSUMMI INUUJUARITSI’
Johannesip allakkami aappaat ima aallartippaa: „Utoqqaanertamit. Arnamut qinigaasumut qitornaanullu.“ Taassuma ’qitornaasa ilaasa sallusuissummi inuunerat’ nuannaarutiginerarpaa. — 2 Johannesi 1, 4.
Asanninnermik ineriartortitsinissamik kajumissaarereerluni Johannesi ima allappoq: „Asanninneq imaappoq inassutaa malillugu inuussasugut.“ Johannesi aamma „peqquserluttoq Kristusimillu akerartuisoq“ pillugu mianersoqqusivoq. — 2 Johannesi 5-7.
Allassimaffiit pillugit apeqqutinut akissutit:
1, 13 — ’Arnaq qinigaasoq’ kinaava? Johannesip allagaa immaqa arnamut Keeriamik, grækerisut „nuliaq“-mik isumalimmik, taaneqartartumut allagaavoq. Immaqaluunniit ilagiinnut aalajangersimasunut allagarai malersuisullu paatsiveerutitinniarlugit oqaatsit assersuutaasumik atorlugit. Taamaassimassappat ’qitornai’ tassaasimassapput ilagiinnut taakkununnga ilaasortaasut, ’qatanngutaatalu arnap qinigaasup qitornai’ tassaasimassapput ilagiinnut allanut ilaasortaasut.
7 — Johannesi qanoruna isumaqartoq oqarami ’uinikkut tikiuttoq’, peqquserluttullu tamanna qanoq ’nassuerutiginngilaat’? Matumani Jiisusip takussaanani tikiunnissaa pineqanngilaq, pineqartorli tassaavoq Jiisusip inuttut tikiunnera Kristusitullu taninneqarnera. (1 Johannesi 4:2) Peqquserluttut Jiisusi ’uinikkut tikiussimasutut’ nassuerutiginngilaat. Immaqa Jiisusi inuusimannginnerarpaat imaluunniit anersaamik illernartumik taninneqarsimanera akuersaanngilaat.
Ilinniarfigisinnaasavut:
2, 4. Annaanneqarsinnaajumalluta sallusuissut — kristumiut ajoqersuutaat tamaasa Biibilimiittut — pillugit ilinniartariaqarpugut sallusuissullu tamanna aalajangiusimasariaqarlugu. — 3 Johannesi 3, 4.
8-11. ’Saammaanneq, nallittuineq eqqissinerlu Guutimit Ataatamit Jiisusi-Kristusimillu pisut’ pigiuarumagutsigit, uppeqatitsinnullu ajunngitsumik attaveqartuarumagutta ’Kristusip ajoqersuutaanik aalajangiussinngitsut’ itigartittariaqarpavut anersaakkullu ’mianersortariaqarluta’. — 2 Johannesi 3.
’SULEQATAALERIT SALLUSUISSUTIP SIAMMARTINNIARNERANI’
Johannesip allakkami pingajui ikinngutiminut Gajusimut allagarai. „Qitornakka sallusuissummi inuusut tusarlugit tassa tamanit uannut nuannernerpaaq.“ — 3 Johannesi 4.
Johannesip Gajusi nersualaarpaa qatanngutit tikeraartut ikiornerisigut ’ilumoorluni sulissuttarmagit’. Apustili Johannesi ima allappoq: „Uagut isumagisariaqarpavut taamaalillutalu taakkununnga suleqataalerluta sallusuissutip siammartinniarnerani.“ — 3 Johannesi 5-8.
Allassimaffiit pillugit apeqqutinut akissutit:
11 — Sooq ilaat ajortumik iliortarpat? Inuit ilaasa anersaakkut paasisimasakinneq akornutigaat Guutip silaqassutsip isaanik takunissaanut. Guuti isivimminnik takusinnaannginnamikku taassumannga takuneqarsinnaanngitsutut pissusilersorput. — Ezekieli 9:9.
15 — Kikkunuku ’ikinngutitut’ eqqartorneqartut? Oqaaseq „ikinngutit“ qanittumik attaveqarfigisanik isumaqaannanngilaq. Johannesip oqaaseq uppeqatinut tamanut tunngatillugu atorpaa.
Ilinniarfigisinnaasavut:
4. Kristumiut anersaakkut inersimalluartut inuusuttut ’sallusuissummi inuujuartut’ takullugit nuannaarutigingaartarpaat. Aamma angajoqqaat qitornaminnik Jehovamut kiffanngornissamut ikiuinerminni iluatsissimasut nuannaarnerat nalissaqanngilaq!
5-8. Qatanngutimik iluaqutissaannik suleruloortunut, Jehovamillu uppeqatiminnillu asanninnerminnik kajumississuteqarlutik taamaaliortunut, ilaapput nakkutilliisut angalasartut, ajoqersuiartortitat, Betelini immikkoortortaqarfinnilu kiffartortut pionerillu. Taakku uppernerat maligassaalluarpoq, uagullu taakku asannittumik tapersersortariaqarpavut.
9-12. Demetriosi aalajaatsoq, Diotrefesi makkuluinnartoq mamarliisartoq pinnagu, ilaartariaqarparput.
’GUUTIP ASANNINNERANIITTUINNARITSI’
Judasip ilagiinnut ilaliuttut ’naammagittaalliorlutik atugarisaminnik ajorneraasutut uffali namminneq pilerissutsitik maliinnarlugit inuusutut’ allaatigai. Taakku ’pingaakujullutik oqaluttarput inuit qujanarniarfigigaangamikkit’. — Judasi 4, 16.
Kristumiut ajortumik sunnerniarneqarnertik qanoq akiorsinnaavaat? Judasi ima allappoq: „Ilissi asasakka, Naalakkatta Jiisusi-Kristusip apustiliisa oqaasereriigaat eqqaaniarisigit.“ Taava nangilluni allappoq ’Guutip asanninneraniittuinnaqqulluta’. — Judasi 17-21.
Allassimaffiit pillugit apeqqutinut akissutit:
3, 4 — Sooq Judasip kristumiut kajumissaarpai ’upperisaq sorsuutigeqqullugu’? ’Inuit iluaatsuusut’ ilagiinnut ’ilaliussimammata’. Taakku ’Guutimit saammaannersiaq atornerluppaat soqqusaassusinngortillugu’.
20, 21 — Qanoq ililluta ’Guutip asanninneraniittuinnarsinnaavugut’? Pingasut uku iluaqutigisinnaavavut: (1) Guutip oqaasianik peqqissaartumik atuaqqissaarnitsigut oqaluussinermilu aallussilluarnitsigut ’uppernitsigut illernartukkut’ imminut ineriartortilluta; (2) „Anersaakkut Illernartukkut“ qinusarluta imaluunniit tamatumannga kajumissisinneqarnerput naapertorlugu iliortarluta; aamma (3) Jiisusip Kristusip utertitsissutitut pilliutaa — naassaanngitsumik inuusinnaalersitsisoq — upperalutigu. — Johannesi 3:16, 36.
Ilinniarfigisinnaasavut:
5-7. Iluaatsut, imaluunniit guutiitsut, Jehovamit eqqartuunneqanngitsoorsinnaappat? Oqaluttuat mianersoqqussutaasut pingasut Judasip eqqaasai naapertorlugit taamaattoqarsinnaanngilaq.
8-10. Soorlu inngiliuneq Mikaeli Jehovap eqqartuussinissamut oqartussaassuseqarneranik ataqqinnittoq, uaguttaaq Jehovap ullumikkut oqartussaassuseqartitai ataqqisariaqarpavut.
12. Tunussisut ilumoortuusaarlutik asanninnerat ikkarluup tinugunneq ajortup umiarsuarmut naluttumulluunniit ulorianartigineratut uppernitsinnut ulorianartigaaq. Immaqa eqqunngitsumik ajoqersuisut tukkortoorpasipput, anersaakkulli ittunik tunniussassaqannginnamik nuissatut sialuttaqanngitsutut ipput. Ukiap naalernerani orpittut toqungasutut inerititaqanngillat. Orpittut sorlai ilanngullugit nusunneqartutut suujunnaarsinneqassapput. Taamaattumik tunussisunik ingalassimanninneq silatusaarnerussaaq.
22, 23. Kristumiut ilumoortut ajortunik uumiginnipput. „Qulartut“ innerup naassaanngitsumik suujunnaarsitsisinnaaneranit annaanniarsaralugit kristumiut inersimalluartut — pingaartumik nakkutilliisut toqqakkat — taakkuninnga anersaakkut ikiuisinnaapput. (w08 12/15-E)
[Qupp. 20-mi assiliartaq]
Imeq, anersaaq aallu „Jiisusip Guutimut erneruneranik“ nalunaajaasuupput