Myanda Mikatampe ya mu Mikanda ya Yoano ne Yude
Mwanda wa Yehova I Mūmi
Myanda Mikatampe ya mu Mikanda ya Yoano ne Yude
MOBIMWEKELA mikanda isatu ya mutumibwa Yoano, yasonekelwe mu 98 K.K. mu Efisesa, ibadilwa mu mikanda ya ku mfulo ya Bisonekwa bya ku bukomo bwa mushipiditu. Mikanda ibidi imbajinji ikankamika Bene Kidishitu banangile nyeke mu mwinya bapele ne kukomena bupondo. Mu mukanda wa busatu, Yoano kesambilangapo enka pa kunangila mu bubinebine, ehe, ino ukankamikanga Bene Kidishitu bengidile pamo.
Yude, mwanabo na Yesu wa munda mwa inandi, udyumuna banababo Bene Kidishitu ku babi bekujije mu kipwilo, ne kwibapa madingi a mwa kulwila na luno lupusa lubi mu mukanda wasonekēle mu Paleshitina, kubwipi kwa mu mwaka wa 65 K.K. Kuta mutyima ku musapu wa ino mikanda isatu ya Yoano ne owa wa Yude kuketukwasha twikale nyeke bakomo mu lwitabijo nansha ke mu bikambija mwine.—Bah. 4:12.
ENDELELA KUNANGILA MU MWINYA, MU BUSWE, NE MU LWITABIJO
Mukanda umbajinji wa Yoano byousonekelwe Bene Kidishitu bonso badi umbumo na Kidishitu, uletanga madingi a tunangu a kwibakwasha bakomene bupondo ne kwimanija mu bubinebine ne mu boloke. Unena ukoma mvubu ya kunangila mu mwinya, mu buswe, ne mu lwitabijo.
Yoano usoneka’mba: “Wivwane tunangile mu mwinya monka mwikele aye mwine [Leza] mu mwinya, nankyo tudi ne na kipwano bātwe bene na bene.” Leza byadi Nsulo ya buswe, mutumibwa unena’mba: “Twiswe bātwe bene na bene.” Eyo, “kusanswa Leza” ko kwitutonona “kulama binenwa byandi,” amba tumone kunekenya ntanda pa “lwitabijo lwetu” mudi Yehova Leza, mu Kinenwa kyandi, ne mudi wandi Mwana.—1 Yoa. 1:7; 4:7; 5:3, 4, MB.
Bipangujo bya mu Bisonekwa Bilondolwelwe:
2:2; 4:10—Lelo Yesu i ‘kitapwa kya kipwanino’ mu buluji’ka? Kupwanya kushintulula “kutalaja” nansha “kutūkija bulobo.” Yesu wāpēne būmi bwandi bu kitapwa kya kipwanino mu buluji bwa kutalaja nansha kufikidija pa bisakibwa bya boloke bubwaninine. I ponka pa kino kitapwa pakafwila Leza lusa boba betabija Yesu, ne kwibalekela bubi bwabo.—Yoa. 3:16; Loma 6:23.
2:7, 8—Lelo kijila kitela Yoano bu “kya kala” ne bu ‘kipya’ i kijila’ka? Yoano wisambilanga pa kijila kya buswe bwa kufwila banabetu. (Yoa. 13:34) Wikitela bu “kya kala” mwanda Yesu wēkiletele myaka 60 kumeso kwa Yoano kusoneka mukanda wandi umbajinji wa ku bukomo bwa mushipiditu. O mwanda betabije baivwene’kyo kala “ne kungalwilo” kwa būmi bwabo bwa Bwine Kidishitu. Kadi kino kijila i ‘kipya’ mwanda kekimaninepo enka pa ‘kuswa mukwenu mowisanshilwe,’ ino kilomba ne buswe bwa kufwila bakwabo.—Levi 19:18; Yoa. 15:12, 13.
3:2—Le i bika “kebyasokwelwepo” ku Bene Kidishitu bashingwe māni, ne i ani obakamona “mwāikadile”? Byobya kebyasokwelwepo kobadi i mobakekadila pobakasangulwa na imbidi ya ku mushipiditu momwa mūlu. (Fid. 3:20, 21) Inoko kyobayukile i kino amba ‘pakasokolwa Leza bakamwifwana; ke-bantu bakamumonanga mwaikadile,’ amba i “Mushipiditu.”—2 Kod. 3:17, 18.
5:5-8—Lelo i muswelo’ka usapula bukamoni mema, mashi, ne mushipiditu amba “Yesu i Mwana Leza?” Mema āsapwile bukamoni mwanda Yesu pa kubatyijibwa mu mema, Yehova aye mwine wāmwitabije amba i wami Mwana. (Mat. 3:17) Mashi a Yesu, ke būmi bwandi kadi, āmwangilwe “ke kikūlwa kya bonsololo,” nao ālombwele amba Yesu i Mwanā Leza. (1 Tem. 2:5, 6) Mushipiditu sandu nao wāsapwile bukamoni amba Yesu i Mwanā Leza powāmutūkile paābatyijibwe, ne kumukunkuja “kaenda ulonga biyampe, ūndapa bonso bakususulwa kudi dyabola.”—Yoa. 1:29-34; Bil. 10:38.
Ñeni Yotuboila’ko:
2:9-11; 3:15. Shi Mwine Kidishitu waleka kintu nansha muntu ye-yense ona buswe bwaswele banababo, nabya unangilanga mu fukutu ya ku mushipiditu, kayukilepo kwaenda.
ENDELELAI ‘KUNANGILA MU BUBINEBINE’
Yoano ushilula mukanda wandi wa bubidi na kunena’mba: “Mukulumpe kudi Ndona mutongibwe ne bāna bandi.” Usangala pa kumona amba “bamobamo bāna [bandi] banangila mu byabinebine.”—2 Yoa. 1, 4.
Pa kupwa kwibakankamika batamije buswe, Yoano wasoneka’mba: “Kadi luno lo lusa, lwa’mba tunangile mwendele bijila byandi.” Kadi Yoano wibadyumuna ku “ñongojani ne [ku] antekidishitu.”—2 Yoa. 5-7.
Bipangujo bya mu Bisonekwa Bilondolwelwe:
1, 13—Lelo “Ndona mutongibwe” i ani? Yoano wādi padi wisambila pa mwana-mukaji kampanda watelele bu Kyria mu Kingidiki, ko kunena’mba “Ndona,” nansha amba “mwana-mukaji.” Pakwabo padi wādi wingidija muneneno wa kyelekejo pa kutela kipwilo kampanda mwa kufila’kyo ku boba bebapangapanga. Shi bikale nabya, bandi bana i Bene Kidishitu ba mu kyokya kipwilo kadi ne “bāna ba mwanenu mwana-mukaji mutongibwe” i Bene Kidishitu ba mu kipwilo kikwabo.
7—Lelo Yoano wisambila pa ‘kwiya’ka’ kwa Yesu, ne bañongojani ‘kebetabije’kopo’ namani? Kuno ‘kwiya’ ke kwiyapo kukaya Yesu, kwa kumeso, kwampikwa kumweka, anha. Ino i kwiya kwaāile mu ngitu ne kushingwa māni bu Kidishitu. (1 Yoa. 4:2) Bañongojani kebetabijepo kuno kwiya kwa Yesu mu ngitu. Padi bādi bapela amba Yesu kābutwilwepo, nansha amba kāshingilwepo māni a mushipiditu sandu.
Ñeni Yotuboila’ko:
2, 4. Kuyuka kotuyukile ‘bubinebine’—bufundiji bonsololo bwa Bwine Kidishitu butanwa mu Bible—ne kwibwitabija byo bintu biketupandija.—3 Yoa. 3, 4.
8-11. Shi ketusakilepo kujimija ‘buntu, ne kanye, ne ndoe, bīya kudi Leza Tata, ne kudi Yesu Kidishitu,’ pamo ne kisense kya buswe pamo na banabetu betabije, tufwaninwe ‘kwidyumuka’ ku mushipiditu ne kupela boba “bapitaila kwikala mu lufundijo lwa Kidishitu mpika.”—2 Yoa. 3.
IKALAI “BAKWABO BAKWINGILA NABO MU BYABINEBINE”
Yoano watumina mulunda nandi Ngaiusa mukanda wandi wa busatu. Wasoneka’mba: “Nkidipo na tusepo tupityile buya pa tuno, twa kwivwana’mba, bāna bami banangila mu byabinebine.”—3 Yoa. 4.
Yoano wafwija’ko Ngaiusa mwanda wa “mīngilo milumbuluke [yalonga]” ya kukwasha banabetu bapempudi. “E po kitufwaninwe’mba, tusepelele badi namino, amba twikale bakwabo bakwingila nabo mu byabinebine.”—3 Yoa. 5-8.
Bipangujo bya mu Bisonekwa Bilondolwelwe:
11—Mwanda waka bamo baloñanga bibi? Bamo pa kubulwa kupya ku mushipiditu, kebamonangapo Leza na meso abo a mutyima. Byokebakokejapo kumumona na meso, baloñanga bintu pamo bwa aye Leza nandi kebamwenepo.—Ezek. 9:9.
14—Lelo i bāni batelelwe bu “balunda”? Pano kishima “balunda” kekifunkilapo enka pa bantu bapwene bininge. Yoano wingidije’kyo pa kwisambila pa banababo bonso betabije.
Ñeni Yotuboila’ko:
4. Bantu bapye ku mushipiditu mu kipwilo basangalanga bininge pobamona bankasampe “banangila mu byabinebine.” Kadi bambutwile bo bene basangala’po kashā pa kumona lutundu lwabo lutama ku mushipiditu.
5-8. Mu boba baputumina mu mingilo ya kukwasha banababo na buswe bobeswele ne bobaswele Yehova mubadilwa batadi bendakana, bamishonele, boba bengila ku Betele, ne bapania. Lwitabijo lwabo lufwaninwe kwiulwa, kadi tufwaninwe kwibakwatakanya.
9-12. Tufwaninwe kwiula kimfwa kya kikōkeji kya Demeteusa, pa kyaba kya kwiula Deotefese wa mibotakanya ne wa lunsamfwakanwa.
“ILAMEI MU BUSWE BWA LEZA”
Yude ulombola mutwelele mu kipwilo boba “bēuningauninga bakukataja, bakunangila mwendele bilokoloko byabo.” Kadi “(byakanwa byabo bīsamba bikatampe byonka byakwitatula) balemekela bantu.”—Yude 4, 16.
Le Bene Kidishitu bakalwa namani na luno lupusa lubi? Yuda usoneka’mba: “Baswebwe, vulukai yoya myanda yanenenwe kala kudi batumibwa ba Mfumwetu Yesu Kidishitu.” Ubweja’ko amba: “Ilamei mu buswe bwa Leza.”—Yude 17-21, BB.
Bipangujo bya mu Bisonekwa Bilondolwelwe:
3, 4—Mwanda waka Yude wisāshila Bene Kidishitu “kulwila nakampata kuno kwitabija”? Mwanda ‘bantu bambulwa bwine Leza bādi bekuje mu kipwilo.’ Bano bantu bādi ‘bālamuna buntu bwa Leza ke bya kulondalonda bya mutyima umbi.’
20, 21—Lelo i muswelo’ka otukokeja ‘kwilama mu buswe bwa Leza’? Tukelama’mo mu miswelo isatu: (1) na kutamija ‘lwitabijo lwetu lukola,’ na kwifunda na kusumininwa Kinenwa kya Leza ne kupyasakena mu mwingilo wa busapudi; (2) na kulombela “mu mushipiditu sandu,” nansha kuludikwa nao; ne (3) na kwitabija mu byobya bibwanya kwituletela būmi bwa nyeke—kitapwa kya kikūlwa kya Yesu Kidishitu.—Yoa. 3:16, 36.
Ñeni Yotuboila’ko:
5-7. Lelo babi bakokeja kwepa butyibi bwa Yehova? Mungya bimfwa bisatu bitudyumuna bitelele Yuda, kebibwanikapo nansha dimo.
8-10. Tulondei kimfwa kya Mikele mwikeulu mukatampe nabya tulēmeke lupusa lutūdile’ko Leza.
12. Batupondo ba buswe bwa kukanwa bitupu baletanga kyaka ku lwitabijo lwetu pamo bwa mabwe mafyame mu mema alobeja byombo ne kutapa bantu basumba mu mema. Bafundiji ba bubela babwanya kumweka bu ba buntu, inoko badi bwa makumbi ampikwa mvula mwanda ku mushipiditu, kebadipo na kintu nansha kimo. Kebapepo bipa pamo bwa mityi myūmu ya bushipo. Bakonakanibwanga, bwa mityi mijulwe. I kya tunangu shi tunyeme batupondo.
22, 23. Bene Kidishitu ba bine bashikilwe bibi. Mwanda wa kopola “bamobamo balangalanga” mu mudilo wa konakanibwa kwa nyeke, Bene Kidishitu bapye pa kipwilo—nakampata batadi batongelwe—bebakwashanga ku mushipiditu.
[Kifwatulo pa paje 30]
Mema, mushipiditu, ne mashi byāsapwile bukamoni amba “Yesu i Mwana Leza”