Izu daYehova daDumi Yikuma Yamaneni Kufuma muNyikanda yaYowanu niYuda
Izu daYehova daDumi Yikuma Yamaneni Kufuma muNyikanda yaYowanu niYuda
NYIKANDA yaYowanu yisatu yekala hakachi kanyikanda yakukumishaku yamuNyikanda yonenawu nawa chakubula nikujinoka ayisonekeli muchaaka cha 98 C.E. muEfwesesa. Nyikanda yiyedi yakusambila yakolesha akwaKristu kutwalekahu kwenda muchejeji nikudikaña nantañishilu yawakwakusekesha. Mumukanda wamuchisatu, Yowanu wahosheli hakwenda munsañu yalala nawa wakolesha cheñi akwaKristu kutiyashana.
Mumukanda windi wasonekeleliyi muPalestine, hekwawu mu 65 C.E., Yuda mana kwaYesu wakuwanamu, wababesheli akwaKristu kutalisha hadi antu atama eñilili muchipompelu chovu-chovu nawa wafumbili akwaKristu chakudikaña nayililu yatama. Kusha kashinshi kunsañu yekala munyikanda yisatu yaYowanu nimukanda waYuda kunateli kutukwasha kwikala nachikuhwelelu chakola neyi tumona kukala.—Aheberu 4:12.
TWALEKENUHU KWENDA MUCHEJEJI NIMUKUKEÑA NAWA NACHIKUHWELELU
Yowanu wasonekeleli mukanda windi watachi kuchipompelu chejima chadinuña naKristu, nawa wukweti kufumba kwakuwahi kwatela kukwasha akwaKristu kudikaña nantañishilu yawakwakusekesha nakutwalekahu kushakama munsañu yalala nimukuloña. Wakonkomweneni kulema kwakutwalekahu kwenda muchejeji nimukukeña nawa nachikuhwelelu.
Yowanu wasonekeli nindi, “Neyi twendaña muchejeji, neyi chekalayi [Nzambi] muchejeji, twakundañanaña wumu namukwawu.” Nawa chineli Nzambi diyi nsulu yakukeña, kapostolu wahosheli nindi: “Tukeñañanenu.” Chineli “kumukeña Nzambi” kwatuleñelaña “kwila mwatulejañayi,” twemikaña mpata yamunu mwishina mushindu ‘nakukuhwelela kwetu’ mudi Yehova Nzambi, Izu dindi, niMwanindi.—1 Yowanu 1:7; 4:7; 5:3, 4.
Malwihu amuNsona Anayakuli:
2:7, 8—Lushimbinyi lwashimwiniyi Yowanu nindi ‘lwalukulu’ cheñi nindi ‘lwaluha’? Yowanu wateneneña halushimbi lwatalisha hakukeña amana kwetu chakufuma hamuchima. (Yowanu 13:34) Waluteneni nindi ‘lwalukulu’ muloña mwahitili yaaka 60 kufuma mpinji yaluheniyi Yesu henohu Yowanu kanda yasoneki mukanda windi watachi. Dikwila nawu akwakwitiya elukili ilu lushimbi “kufumisha kutachi” muchihandilu chawu hamu neyi akwaKristu. Ilu lushimbi lwekala cheñi ‘lwaluha’ muloña lwakeñekaña ‘kukeña akwetu neyi etu aweni’ nawa lwakeñekaña kukeña kwakufuma hamuchima.—Alevi 19:18; Yowanu 15:12, 13.
3:2—Chumanyi chichidi “kanda chimwekanuku” kudi akwaKristu awayishewa, nawa hinyi yakamonawu “chekalayi”? Chuma chichidi kanda chimwekanuku hichakekalawu neyi anayisañwili kuwumi wamwiwulu nanyijimba yakuspiritu. (Afwilipi 3:20, 21) Ilaña chuma chelukawu chakwila nawu ‘chakamwekanayi Nzambi akekala neyi yena, muloña akamumona chekalayi,’ dikwila nawu ‘Spiritu.’—2 Akorinda 3:17, 18.
5:5-8—Indi menji, mashi, nispiritu yaheni ñahi wunsahu wakwila nawu “Yesu diyi Mwana kaNzambi”? Menji ashimwini wunsahu muloña hampinji yamupapatishiluwu Yesu mumenji, Yehova yomweni wahosheli mazu akumwiteja nindi hiMwanindi. (Matewu 3:17) Mashi hela wumi wahenuwu hamu neyi “wakukuula nachu antu ejima,” amwekeshaña cheñi nawu Yesu hiMwana kaNzambi. (1 Timotewu 2:5, 6) Spiritu yajila yaheni wunsahu wakwila nawu Yesu hiMwana kaNzambi chiyasulukilili hadi yena hampinji yamupapatishiluwu, nakumukwasha kuya ‘nakuhitañana nakwila yayiwahi, nakukolesha antu ejima akabishileñawu kudi Diyabolu.’—Yowanu 1:29-34; Yililu 10:38.
Yuma Yitukudizilaku:
_______
2:9-11; 3:15. Neyi mukwaKristu yeteja chuma chidi chejima hela muntu wudi wejima kukisañana kukeña kwakeñayi ana kwindi, nakwenda mumwidima wakuspiritu, haneluki kunakuyayuku.
TWALEKENUHU “KWENDA MWAYA NSAÑU YALALA”
Yowanu watachika mukanda windi wamuchiyedi kuhitila mukuhosha nindi: “Ami mukulumpi nidi nakusoneka mukanda weyeyi mama watondewa, nawanyaneyi.” Wazañaleli hakumona ‘anyanindi amakwawu hiyakwenda mwaya nsañu yalala.’—2 Yowanu 1, 4.
Hanyima yakuyikolesha kwikala nakukeña, Yowanu wasonekeli nindi: “Kukeña yowu kwenda mwatulejañayi mwejima.” Yowanu wababesheli cheñi hadi ‘mukwakudimbana nimukwankunyi naKristu.’—2 Yowanu 5-7.
Malwihu amuNsona Anayakuli:
1, 13—Indi “mama watondewa” hinyi? Yowanu wahosheleña hadi mumbanda wumu wateneniyi nindi Kiriya, izu dachiGriki dalumbuluka nawu “mama.” Hela wazatishileña nkinji hakutena chipompelu chimu kulonda kuluwañesha akwakukabishana. Neyi nsañu yakukumisha diyi yalala, dikushimuna nawu anyanindi hiyantu amuchipompelu nawa “anyana kamana [kwindi] wamumbanda” adiña antu amuchipompelu chikwawu.
7—‘Kwinzanyi’ kwaYesu kwateneniyi Yowanu ahanu, nawa akwakudimbana ‘abulaña kwiteja’ munjilanyi? Bayi neyi ‘hikwinza’ kwaYesu kwakumbidi kwakubula kumwekanaku. Ilaña hikwinza kwakumujimba nikumuwayisha hamu neyi Kristu. (1 Yowanu 4:2) Akwakudimbana hiyetejaña iku kwinza kwakumujimbaku. Hadaha akaanaña nawu Yesu wadiñaku wanyi hela kukaana nawu hiyamuwayishili naspiritu yajilaku.
Yuma Yitukudizilaku:
2, 4. Chineli tuneluki “nsañu yalala,” ntañishilu yejima yawakwaKristu yekala muBayibolu, nawa kwovwahila nsañu yeniyi chalema hakwila nawu tukapuluki.—3 Yowanu 3, 4.
8-11. Neyi hitunakukeña kujimbesha ‘luwi lwasweja, nikwanakena, nikuwunda kwafumaña kudi Nzambi Tata, nikudi Yesu Kristu,’ hamu tuhu nawulunda wawuwahi wawakwetu akwakwitiyaku, twatela ‘kubabala’ kuspiritu nakukaana antu ‘abulaña kushakama mwatulejeliyi Kristu.’—2 Yowanu 3.
IKALENU “AKWAKUKALAKALA HAMU NANSAÑU YALALA”
Mukanda wamuchisatu waYowanu wasonekeleli ibwambu dindi Gayusi. Wasonekeli nindi, “Hinikweti muzañalu wakubadika weniwu, wakutiya nawu anyanami endaña mwaya nsañu yalalaku.”—3 Yowanu 4.
Yowanu wamuhamekeli Gayusi hamuloña ‘wakukalakala mudimu wakashinshi’ hakukwasha ana kwetu adiña nakuhempula. Kapostolu wahosheli nindi, “Twadi kutambula antu adi ochu, kulonda twikali akwakukalakala hamu nansañu yalala.”—3 Yowanu 5-8.
Malwihu amuNsona Anayakuli:
11—Muloñadi antu amakwawu chakoñelañawu yuma yatama? Muloña wakukañanya kulemesha ntañishilu yawakwaKristu, antu amakwawu hiyamumonaña Nzambi namesu akwilukaku. Chineli hiyanateli kumumona namesu kapuku, akoñaña yuma neyi kwiji Nzambi wayimonaña wanyi.—Ezekeli 9:9.
14—Anyi atenawu nawu “akwetu”? Izu dakwila nawu “akwetu” bayi neyi datalisha hohu kudi antu adikunda chikupuku. Yowanu wadizatishili hakutena akwetu akakwitiya ejima.
Yuma Yitukudizilaku:
4. Ana kwetu niahela akuluka yitembi muchipompelu atiyaña kuwaha neyi amona atwansi “endaña mwaya nsañu yalala.” Nawa anvwali atiyaña kuwaha chikupu neyi atwesha kukwasha anyanawu kwikala ambuña aYehova.
5-8. Hakachi kawantu azatilaña ana kwawu nañovu hamuloña wakukeña kwakeñawu akwawu niYehova hiyankoñi endaña, amishonali, antu azatilaña haBeteli hela hatusanji twamutayi, niantu adi mumudimu wawupayiniya. Twatela kwimbujola chikuhwelelu chawu chachiwahi, nawa twatela kuyikwasha chakufuma kumuchima.
9-12. Twatela kwimbujola chakutalilahu chaDemeterusa washinshika bayi chaDiyotefwesi watavwileña akwawu nawa wadiña mukwakutwamba.
‘SHAKAMENU MUKUKEÑA KWANZAMBI’
Yuda wayilumbulwili ana adiña nakwendesha chipompelu nindi “hiyakwakunyinyita, hiyakwakutoba, endaña mwaya kufwila kwawu kwatama.” Nindi ‘ahoshaña mazu atiyakana akudinka wanta; alemeshaña antu kumesu.’—Yuda 4, 16.
Indi akwaKristu atela kudikaña ñahi nayililu yatama? Yuda wasonekeli nindi, “Akwetu yitwakeña, anukenu mazu ahosheluwu dehi apostolu aMwanta wetu Yesu Kristu.” Wabombeleluhu nindi: ‘Shakamenu mukukeña kwaNzambi.’—Yuda 17-21.
Malwihu amuNsona Anayakuli:
3, 4—Muloñadi Yuda chakonkomweneniyi akwaKristu ‘kulwa nañovu kwitiya kwakukuhwelela’? Muloña ‘antu abula kujila eñilili muchipompelu.’ Awa antu adiña ‘nakubalumuna luwi lwaNzambi lwasweja kulonda lwikali kubajama.’
20, 21—Tunateli ‘kushakama ñahi mukukeña kwaNzambi’? Tunateli kwila mwenimu munjila jisatu: (1) kuhitila mukudituña ‘muchikuhwelelu chabadika kujila’ kuhitila mukudiza Izu daNzambi nikudikita chikupu mumudimu wakushimwina; (2) kuhitila mukulomba ‘naspiritu yajila,’ hela kwesekeja nawukwashu wachu; ni (3) kuhitila mukukuhwelela chuma chaletesha wumi wahaya nyaka wikaluku—mulambu wefutu danyiloña waYesu Kristu.—Yowanu 3:16, 36.
Yuma Yitukudizilaku:
5-7. Komana antu atama anateli kutemuka wunsompeshi waYehova? Kwesekeja nayakutalilahu yisatu yashimwiniyi Yuda, hiyakutweshaku.
8-10. Twatela kwimbujola chakutalilahu chaMikeli mukulumpi wawañelu nikulemesha antu enkawu ñovu kudi Yehova.
12. Akwakusekesha amwekanaña neyi akweti kukeña afwana chikupu kuchikuhwelelu chetu neyi malola aswama mwishina damenji kudi akwakuwela hela jimbopolu. Antañishi akutwamba atela kumwekana neyi ahanaña chikupu, ilaña adi neyi mavu akadi menji muloña hiyeluka yuma yakuspirituku. Antu amuchidiwu adi neyi nyitondu yakadi nyikabu, yafwa yamunoña. Akayijilumuna neyi chabwitañawu nyitondu. Twatela kwikala ababala kulonda kutondolwela akwakusekesha.
22, 23. AkwaKristu alala ahela yuma yatama. Hakufwila kupulwisha “amu ajinokaña” kukesi kakujilumuna chahaya nyaka, antu apama amuchipompelu, sweje-e aeluda, ayikwashaña antu wenawa kwikala cheñi nachikuhwelelu.
[Nyevulu yidi hefu 30]
Menji, spiritu, nimashi aheni wunsahu nawu “Yesu diyi Mwana kaNzambi”