Puntonan Sobresaliente di e Kartanan di Juan i di Hudas
E Palabra di Yehova Ta Bibu
Puntonan Sobresaliente di e Kartanan di Juan i di Hudas
PROBABLEMENTE apòstel Juan a skirbi su tres kartanan na Efesio na aña 98 di nos era; nan ta entre e último bukinan di e Skritura inspirá. E promé dos kartanan ta animá kristiannan pa sigui kana den lus i pa resistí apostasia. Den e di tres karta, Juan no solamente ta papia di kana den e bèrdat sino tambe ta animá kristiannan pa koperá ku otro.
Den su karta ku el a skirbi na Palestina, probablemente na aña 65 di nos era, Hesus su mitar ruman Hudas ta spièrta kompañeronan kristian tokante hende malbado ku a slùip drenta den e kongregashon i ta duna konseho enkuanto kon pa resistí mal influensia. Ora nos presta atenshon na e mensahe di e tres kartanan di Juan i e karta di Hudas, esei por yuda nos keda firme den fe apesar di opstákulo.—Heb. 4:12.
SIGUI KANA DEN LUS, DEN AMOR I PA MEDIO DI FE
E promé karta ku Juan a skirbi pa henter e hermandat den union ku Kristu ta duna konseho balioso pa yuda kristiannan resistí apostasia i keda firme den e bèrdat i na fabor di hustisia. E ta enfatisá e importansia di keda kana den lus, den amor i pa medio di fe.
Juan a skirbi: “Si nos ta kana den lus meskos ku [Dios] mes ta den lus, nos tin komunion ku otro.” I ya ku Dios ta e Fuente di amor, e apòstel a bisa: “Laga nos stima otro.” Siendo ku “e amor di Dios” ta konmové nos pa “warda su mandamentunan,” nos ta vense mundu mediante “nos fe” den Yehova Dios, su Palabra i su Yu.—1 Juan 1:7; 4:7; 5:3, 4.
Kontesta Riba Pregunta Bíbliko:
2:2; 4:10—Den ki sentido Hesus ta un sakrifisio di “propisiashon”? E palabra propisiashon ta nifiká rekonsiliashon. Hesus a duna su bida komo un sakrifisio di propisiashon den e sentido ku el a rekonsiliá nos ku Dios, i asina a kumpli ku e rekisito di hustisia perfekto. Ta a base di e sakrifisio ei, Dios por a ekstendé miserikòrdia i pordoná piká di hende ku tin fe den Hesus.—Juan 3:16; Rom. 6:23.
2:7, 8—Ta kua mandamentu Juan a bisa tabata tantu “bieu” komo “nobo”? Juan tabata papiando di e mandamentu tokante amor di sakrifisio propio entre e kristiannan. (Juan 13:34) El a referí na dje komo algu “bieu” pasobra Hesus a duna e mandamentu akí mas ku 60 aña promé ku Juan a skirbi su promé karta inspirá. Pues, kreyentenan tabatin e mandamentu akí “for di prinsipio” di nan bida komo kristian. I e mandamentu tabata “nobo” den e sentido ku e no solamente a nifiká “stima bo próhimo manera bo mes,” pero a bai mas leu. El a enbolbé tambe amor di sakrifisio propio.—Lev. 19:18; Juan 15:12, 13.
3:2—Kiko “no a wòrdu revelá” na kristiannan ungí, i ken nan lo mira “manera e ta”? Loke no a wòrdu revelá na nan ta kon nan lo ta ora nan ser resusitá ku un kurpa spiritual pa bai den shelu. (Fil. 3:20, 21) Sinembargo, loke sí nan sa ta ku ‘ora Dios aparesé, nan lo ta meskos kuné, pasobra nan lo mir’é manera e ta,’ komo “e Spiritu.”—2 Kor. 3:17, 18.
5:5-8—Kon awa, sanger i spiritu ta duna testimonio ku “Hesus ta e Yu di Dios”? Awa a duna testimonio di esei pasobra ora Hesus a batisá den awa, Yehova mes a ekspresá ku E ta aprobá di dje komo Su Yu. (Mat. 3:17) Hesus su sanger òf bida, ku el a duna komo “e preis di reskate pa tur hende,” tambe ta mustra ku Hesus ta Yu di Dios. (1 Tim. 2:5, 6) I spiritu santu a duna testimonio ku Hesus ta e Yu di Dios ora el a baha riba Hesus durante su boutismo; esei a hasi posibel ku e por a pasa den tur e tera “hasiendo bon i kurando tur ku tabata bou di poder di Diabel.”—Juan 1:29-34; Echo. 10:38.
Lès pa Nos:
2:9-11; 3:15. Si un kristian laga kiko ku ta òf ken ku ta kaba ku su amor fraternal, e ta kanando den skuridat, sin sa na unda e ta bayendo.
SIGUI ‘KANA DEN E BÈRDAT’
Juan a kuminsá su di dos karta bisando: “E ansiano, na e señora skohí i su yunan.” Juan a ekspresá alegria ora el a haña “algun di [e señora su] yunan ta kana den bèrdat.”—2 Juan 1, 4.
Despues di duna animashon pa kultivá amor, Juan a skirbi: “Esaki ta amor, ku nos mester kana segun su mandamentunan.” Tambe Juan a duna spièrtamentu tokante “e gañadó i e antikristu.”—2 Juan 5-7.
Kontesta Riba Pregunta Bíbliko:
1, 13—Ken ta “e señora skohí”? Ta posibel ku Juan tabata referí na un hende muhé ku yama Kiria, loke ta nifiká “señora” na griego. Òf kisas, el a usa lenguahe simbóliko pa dirigí su mes na un sierto kongregashon i di e manera ei konfundí persiguidónan. Si e último ei tabata e kaso, su yunan lo ta miembronan di e kongregashon ei, i “e yunan di [su] ruman muhé” lo ta miembronan di un otro kongregashon.
7—Kon asina gañadónan “no ta rekonosé” ku Hesus a bini? Gañadónan no ta rekonosé ku Hesus a bini den karni. Kisas nan ta nenga ku Hesus a yega di biba òf nan ta rechasá e echo ku el a wòrdu ungí ku spiritu santu.
Lès pa Nos:
2, 4. E echo ku nos a konosé “e bèrdat”—tur e siñansanan kristian den Beibel—i ta sigui e siñansanan akí ta masha importante pa nos haña salbashon.—3 Juan 3, 4.
8-11. Si nos no ke pèrdè “grasia, miserikòrdia i pas . . . di Dios Tata i di Hesukristu” ni e amor di rumannan den fe, nos mester rechasá esnan ku “no ta permanesé den e siñansa di Kristu” i “mira bon” pa nos keda den e siñansa ei.—2 Juan 3.
BIRA “KOLABORADÓNAN PA E BÈRDAT”
E di tres karta di Juan ta dirigí na su bon amigu Gayo. Juan a skirbi: “No tin goso mas grandi pa mi ku di tende ku mi yunan ta kana den e bèrdat.”—3 Juan 4.
Juan a elogiá Gayo pa e echo ku el a “aktua fielmente” den yuda rumannan bishitante. E apòstel a bisa: “Nos mester sostené hòmbernan asina [dor di mustra nan hospitalidat], pa nos por ta kolaboradónan pa e bèrdat.”—3 Juan 5-8.
Kontesta Riba Pregunta Bíbliko:
11—Dikon algun hende ta hasi malu? Debí na falta di spiritualidat, algun hende no konosé Dios i no ta komprondé ken e ta. Siendo ku nan no por mir’é ku nan wowo literal, nan ta aktua komo si fuera e no ta mira nan.—Eze. 9:9.
14—Ta ken ta e “amigunan” ku Juan ta referí na dje? Ora Juan a usa e palabra “amigunan,” e no a referí solamente na esnan ku tabatin un relashon será ku otro, sino tambe na e rumannan den fe en general.
Lès pa Nos:
4. Rumannan spiritualmente maduro den kongregashon ta sinti un gran goso ora nan mira ku e miembronan hóben ta sigui “kana den e bèrdat.” I ki un goso inkomparabel mayornan ta sinti ora nan logra yuda nan yunan bira sirbidó di Yehova!
5-8. Superintendentenan biahero, misioneronan, esnan ku ta sirbi na kasnan di Bètel òf na sukursalnan i esnan ku ta den sirbishi di pionero, entre otro, ta traha duru na fabor di nan rumannan, debí ku nan ta stima nan rumannan i Yehova. Ta bale la pena pa nos imitá nan fe i duna nan nos sosten amoroso.
9-12. Ta bon pa imitá e ehèmpel di fiel Demetrio, pero no e ehèmpel di Diótrefes ku tabata un hasidó di redu i un kalumniadó ku tabata gusta kritiká.
“KONSERBÁ BOSO MES DEN E AMOR DI DIOS”
Hudas a deskribí esnan ku a slùip drenta den e kongregashon komo “murmuradónan ku ta gusta keha, ku ta sigui tras di nan mes pashonnan.” Nan “ta papia ku arogansia, i ta labia hende pa nan saka probecho.”—Hudas 4, 16.
Kon kristiannan por resistí mal influensia? Hudas a skirbi: “Rumannan stimá, . . . kòrda e palabranan ku a wòrdu papiá di antemano dor di e apòstelnan di nos Señor Hesukristu.” El a agregá: “Konserbá boso mes den e amor di Dios.”—Hudas 17-22.
Kontesta Riba Pregunta Bíbliko:
3, 4—Dikon Hudas a konsehá kristiannan pa “lucha seriamente pa e fe”? Pasobra ‘hendenan impio a slùip drenta’ den e kongregashon. E hendenan malbado akí ‘a kambia e grasia di Dios den libertinahe.’
20, 21—Kon nos por “konserbá [nos] mes den e amor di Dios”? Tin tres manera pa nos logra esei: (1) edifiká nos mes den nos “santísimo fe” mediante estudio diligente di e Palabra di Dios i partisipá ku zelo den e trabou di prediká; (2) hasi orashon “den spiritu santu,” òf na armonia ku su influensia; i (3) ehersé fe den loke ta hasi bida eterno posibel, esta, e sakrifisio di reskate di Hesukristu.—Juan 3:16, 36.
Lès pa Nos:
5-7. E malbadonan por skapa di Yehova su huisio? Segun e tres ehèmpelnan di atvertensia ku Hudas ta menshoná, esei ta imposibel.
8-10. Nos mester sigui e ehèmpel di Miguel, e arkangel, i mustra rèspèt pa esnan ku Dios a duna outoridat.
12. Apóstatanan ku ta fingi di ta amoroso ta forma un peliger pa nos fe. Nan ta maestronan falsu ku ta parse di ta generoso, òf gusta duna, pero nan ta manera nubia sin awa den e sentido ku nan ta spiritualmente bashí. E personanan ei ta infruktífero, manera palu morto na fin di hèrfst. Loke ta spera nan ta destrukshon, meskos ku den kaso di palu ranká ku rais. Ta sabí di nos parti pa evitá hende apóstata.
22, 23. Kristiannan berdadero ta odia loke ta malu. Pa logra salba “algun ku tin duda” for di kandela di destrukshon eterno, esnan maduro den e kongregashon—spesialmente e superintendentenan—ta duna nan yudansa spiritual.
[Plachinan na página 30]
Awa, spiritu i sanger ta duna testimonio ku “Hesus ta e Yu di Dios”