E Mea Ora te Tuatua a Iehova

Au Manako Maata mei te Au Reta a Ioane Raua ko Iuda

KARE e kore e i tataia i te mataiti 98 T.N. mei Ephesia mai, ko te au reta e toru a te apotetoro ko Ioane tetai i roto i te au puka openga i roto i te au Tuatua Tapu akauruia. Te nga reta mua e rua te akamaroiroi maira i te au Kerititiano kia aere ua rai na roto i te marama e kia patoi atu i te au apoteiti kia kore e o mai ki roto i te putuputuanga. I roto i te toru o te reta, te tuatua ra a Ioane no runga i te aere anga na roto i te tuatua mou, e te akamaroiroi katoa i te au Kerititiano kia taokotai.

I roto i tana reta tei tataia mei Paretaina mai, penei e i te mataiti 65 T.N., te akamatakite maira te teina o Iesu ko Iuda i te au taeake Kerititiano no runga i te aronga kino tei akao mai ia ratou ki roto i te putuputuanga, e kua oronga aia i te akoanga e ka akapeea i te patoi anga i te au akakeuanga kino. Na te akarongo meitaki anga ki te karere o te au reta e toru a Ioane e i te epititore a Iuda, e tauturu ia tatou kia vai ngaueue kore ua i roto i te akarongo noatu te au arairaianga.​—Ebe. 4:12.

KIA AERE UA RAI NA ROTO I TE MARAMA E TE AROA E TE AKARONGO

(1 Ioa. 1:1–​5:21)

Akakoroia no te putuputuanga katoa o te aronga i roto ia Karaiti, te oronga maira te reta mua a Ioane i te au akoanga tau tei akatakaia ei tauturu i te au Kerititiano kia patoi atu i te apoteiti e kia vai ngaueue kore ua i roto i te tuatua mou e no te tuatua tika. Te akapakari maira aia i te anoano kia aere ua rai na roto i te marama, e te aroa e te akarongo.

“Kia aere ra tatou na te mārama, mei [te Atua] i roto i te mārama ra,” i tata ai a Ioane, “te tau nei tatou ia tatou uaorai.” E i te mea e ko te Atua te Tumu o te aroa, te na ko maira te apotetoro e: “E aroa tatou ia tatou uaorai.” I te mea e te akakeuia ra tatou e “te inangaro i te Atua” kia “akono i tana au akauenga,” ka autu tatou i teianei ao na roto i “to tatou akarongo” i roto i te Atua ko Iehova, tana Tuatua, e tana Tamaiti.​—1 Ioa. 1:7; 4:7; 5:3, 4.

Pauia te Au Uianga Tuatua Tapu:

2:2; 4:10​—Akapeea a Iesu i riro ei ei atinga “tarangaara”? Ko te aiteanga o te tarangaara koia oki kia “akamaru,” me kore kia “akana.” Kua oronga a Iesu i tona oraanga ei atinga tarangaara i roto i te tu e na te rave anga i te reira, kua akamaru aia me kore kua akatupu aia i te umuumuanga no te tu tika apa kore. Akatumuia ki runga i taua atinga ra, kua rauka i te Atua i te akatuera atu i tona aroa takinga meitaki, e kia akakore atu i te ara a te aronga tei taangaanga i te akarongo i roto ia Iesu.​—Ioa. 3:16; Roma 6:23.

2:7, 8​—Eaa te akauenga ta Ioane e tuatua ra e e mea “taito” e e mea “ou”? Te tuatua ra a Ioane no runga i te akauenga no runga i te aroa akaatinga uaorai no te taeake. (Ioa. 13:34) Te tuatua ra aia i te reira ei mea “taito” no te mea kua oronga a Iesu i te reira e 60 tuma mataiti i mua ake ka tata ai a Ioane i tana reta mua tei akauruia. No reira, kua rauka ke ana te reira i te aronga irinaki “mei muatangana mairai” i to ratou oraanga ei au Kerititiano. E mea “ou” katoa te akauenga i roto i te tu e i aere mamao roa atu te reira i ‘te aroa anga i te tangata tupu mei te aroa ia koe uaorai’ e te anoanoia ra te aroa akaatinga uaorai.​—Levi. 19:18; Ioa. 15:12, 13.

3:2​—Eaa ra tei ‘kare e kiteaia ra’ e te au Kerititiano akatainuia, e koai ta ratou ka kite i roto “i tona tu tikai”? Ko tei kore i kiteaia ana e ratou koia oki, mei teaa ra to ratou tu me akatuakaouia ratou ki te rangi ei au vaerua.  (Phili. 3:20, 21) Ko ta ratou ra i kite, koia oki “kia mama mai [te Atua] ra, e riro [ratou] mei iaia katoa te tu; e kite oki [ratou] iaia i tona tu tikai,” koia oki, te “Vaerua.”​—2 Kori. 3:17, 18.

5:5-8​—I akapeea te vai, te toto, e te vaerua i riro ei ei kite no runga i te tika e “ko Iesu te Tamaiti a te Atua”? Kua riro te vai ei kite no te mea i te papetitoia anga a Iesu i roto i te vai, kua akakite mai a Iehova uaorai i Tona mareka iaia ei Tamaiti Nana. (Mata. 3:17) To Iesu toto me kore tona oraanga tei orongaia “ei oko arite no te katoatoa,” kua akaari katoa mai te reira e e Tamaiti a Iesu na te Atua. (1 Timo. 2:5, 6, NW) E kua akapapu mai te vaerua tapu e ko Iesu te Tamaiti a te Atua i te eke anga mai te reira ki rungao iaia i tona papetitoia anga, i te turuturu anga iaia kia “takinga-meitaki aere ra, e te akaora anga i te aronga ravarai i teiaa i te rave kino a te diabolo.”​—Ioa. 1:29-34; Anga. 10:38.

Au Apiianga no Tatou:

2:9-11; 3:15. Me ka akatika tetai Kerititiano i tetai ua atu apinga me kore i tetai ua atu tangata kia takore i tona aroa taeake, te aere ra aia na roto i te poiri pae vaerua, ma te kite kore e te aere ra aia kiea.

‘AKONO MARIE ANGA I TE TUATUA-MOU’

(2 Ioane 1-13)

Kua akamata a Ioane i te rua o tana reta i te na ko anga e: “Te orometua ra ko Ioane i te vaine i ikiia ra, e tana katoa au tamariki.” Kua akakite aia i tona rekareka i te kite anga i “tetai aronga [o tana] tamariki i te akono anga i te tuatua-mou.”​—2 Ioa. 1, 4.

Muri ake i te oronga anga i te akamaroiroianga kia akatupu i te aroa, kua tata a Ioane e: “Teia oki taua aroa nei, kia akono tatou i tana au akauenga.” Kua akamatakite katoa atu a Ioane no runga i ‘taua pikikaa ra e, e Akakakore Mesia ïa.’​—2 Ioa. 5-7.

Pauia te Au Uianga Tuatua Tapu:

1, 13​—Koai ra “te vaine ikiia ra”? Penei e te taiku ra a Ioane i tetai vaine tei tuatuaia atu e ko Kyria, e reo Ereni teia no te “vaine.” Me kore ra penei te taangaanga ra aia i te tuatua akatutu i te tuatua atu anga ki tetai putuputuanga ei akaoripu ua i te manako o te aronga e takinokino maira. Me ko te manako openga te tu, e au mema i reira tana au tamariki no taua putuputuanga ra, e ko “te au tamariki a [tona] taeake” te tuatua ra i reira no te au mema o tetai putuputuanga ke mai.

Au Apiianga no Tatou:

2, 4. To tatou kite mai anga i “te tuatua-mou”​—te au apiianga Kerititiano katoatoa tei riro mai ei tuanga no te Pipiria ​—e te akono anga i te reira e mea puapinga tikai no to tatou ora.​—3 Ioa. 3, 4.

8-11. Me kare tatou e inangaro kia ngere i “te aroa ua, te takinga-meitaki, e te au, no ko mai i te Atua Metua ra, e no te Atu ra oki no Iesu Mesia,” pera katoa te taokotaianga aroa o te au taeake irinaki, kia “matakite” tatou uaorai e kia akapapu e kia vai ua rai i roto i te apiianga a Karaiti e kia patoi atu i te aronga “kare i tāpu tamou tikai i te tuatua a te Mesia ra.”​—2 Ioa. 3.

“EI ARONGA RAVE ANGAANGA KATOA I TE TUATUA-MOU”

(3 Ioa. 1-14)

Kua tata a Ioane i te toru o tana reta ki tona uaorai oa ko Gaio. “Kare oku e rekareka anga maata atu,” i tata ai aia, “kia kite au e, te aere ra taku au tamariki na te tuatua-mou.”​—3 Ioa. 4.

 Kua akameitaki a Ioane ia Gaio no te ‘mea tika tana i rave’ i te tauturu anga i te au taeake tei atoro mai ia ratou. “Kia āriki oki tatou mei te reira te tu e tikaʼi,” i karanga ai te apotetoro, “kia riro tatou ei aronga rave angaanga katoa i te tuatua-mou nei.”​—3 Ioa. 5-8.

Pauia te Au Uianga Tuatua Tapu:

11​—Eaa ra tetai aronga e rave ei i te au tu kino? No te kare e maroiroi ana i roto i te tuatua mou, kare tetai aronga e marama ana i te Atua. I te mea e kare ratou e kite mata ana iaia, te akaari ra ratou na roto i ta ratou e rave ra e kare aia e akara mai ana ia ratou.​—Eze. 9:9.

14​—Koai ma te tuatuaia ra ei “au oa”? Ko te tuatua “au oa” i konei e maata atu te o maira i te aronga ua e rekareka ra i tetai pirianga vaitata ki tetai e tetai. I te taangaanga anga i te reira te tuatua ra a Ioane i tona au taeake irinaki katoatoa.

Au Apiianga no Tatou:

4. E maata te au taeake e te au tuaine tukatau i te pae vaerua e rekareka ana me kite ratou i te au mema mapu o te putuputuanga ‘e aere ra na te tuatua-mou.’ E kare e aiteia te rekareka ta te au metua e kite ana me puapingaia ratou i te tauturu anga i ta ratou tamariki kia riro mai ei au tavini no Iehova!

5-8. I roto i te aronga e angaanga pakari ra no to ratou au taeake, no to ratou inangaro ia ratou e ia Iehova koia oki, ko te au akaaere tutaka, te au mitinari, te aronga e tavini ra i Betela me kore i roto i te au opati manga, e te aronga i roto i te angaanga painia. Kua tau tikai kia aru tatou i to ratou akarongo, e kua tau rai ta tatou turuturuanga aroa ia ratou.

9-12. E tau kia aru tatou i te akaraanga o te tangata akarongo mou ko Demeterio, eiaa ra i to te tangata kikite tuatua ko Dioterepe, e tangata pikikaa.

“TAMOU TIKAI KOTOU I TO KOTOU UAORAI INANGARO I TE ATUA”

(Iuda 1-25)

Kua akataka mai a Iuda no runga i te aronga e tomo maira ki roto i te putuputuanga “e aronga urutoe ratou, e mareka kore, i te aru anga i to ratou uaorai au inangaro.” Te “tuatua mamaata akatietie ra [ratou], e te akarekareka anga i te tangata.”​—Iuda 4, 16.

Ka akapeea te au Kerititiano me patoi atu i te au akakeuanga kino? “Ka akamaara ra kotou, e aku au akaperepere e,” e tata maira a Iuda, “i te tuatua i tuatuaia mai i muatangana e te au aposetolo a to tatou Atu ra a Iesu Mesia.” Kua kapiti atu aia e: “Tamou tikai kotou i to kotou uaorai inangaro i te Atua.”​—Iuda 17-21.

Pauia te Au Uianga Tuatua Tapu:

3, 4​—Eaa ra a Iuda i raurau atu ei i te au Kerititiano ‘kia taumāro tikai i te akarongo’? No te mea ‘kua akao poiri ua mai oki tetai aronga akono kore i te Atua’ ki roto i te putuputuanga. Ko teia au tangata nei kua “ruri ke i te aroa ua o te Atua ei kanga anga.”

20, 21​—Ka akapeea e rauka ai ia tatou i te “tamou tikai i [to tatou uaorai] inangaro i te Atua”? E toru au mataara ka rauka ia tatou i te rave i teia. (1) na te akamatutu anga ia tatou i roto i to tatou “akarongo tapu maata” na roto i te apii maroiroi anga i te Tuatua a te Atua e na te piri maroiroi atu anga ki roto i te angaanga tutuanga; (2) na te pure anga no te ‘vaerua tapu,’ me kore na te akarotai anga ki ta te reira akakeuanga; e (3) na te taangaanga anga i te akarongo i roto i te mea e rauka ai te ora mutu kore​—koia oki te atinga oko o Iesu Karaiti.​—Ioa. 3:16, 36.

Au Apiianga no Tatou:

5-7. Ka ora ainei te aronga kino i te akavaanga a Iehova? Kia tau ki te au akamatakiteanga e toru ta Iuda i tare mai, kare ratou e ora.

8-10. E mea tau kia aru tatou i te akaraanga o Mikaela te angera maata e kia akaari i te akangateiteianga no te aronga ta Iehova i akamana.

12. Ko te au apoteiti e akaari pikikaa ua ra i to ratou aroa, e kino ta ratou ka akatupu ki to tatou akarongo. Kua aite rai ratou ki te au tumurangi vai kore i roto i te tu e kua ngere ratou i te pae vaerua. Te aro atura ratou i te mate mei te au pu rakau rai tei kiriti tumuia. E tu pakari tikai kia kopae tatou i te au apoteiti.

[Au Tutu i te kapi 28]

Ko te vai, ko te vaerua, e te toto, te kite e “ko Iesu te Tamaiti a te Atua”