Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Anji tangila ni udi mua kuandamuna nkonko idi ilonda eyi:

• Mmunyi mutudi mua kuakula ‘muakulu mulengejibue’ udi muikale bulelela budi butangila Nzambi ne malu adiye mulongolole bimpe? (Sef. 3:9)

Anu bu mutubi bua miakulu yonso, bua kuakula ‘muakulu mulengejibue’ tudi ne bua kuteleja ne ntema, kuidikija badi baumanye, kukuata mêna a mikanda ya mu Bible ne imue mvese mu mutu, kuambulula malu atudi tulonga, kuabala ne dîyi dikole, kulamata ku tshidikijilu tshia bulelela, kuya kumpala, kuikala ne dîba dia kudilongela ne kudienzeja bua kuikala “kuakula” muakulu mulengejibue.​—15/8, dibeji 21-25.

• Mmunyi mudi dibaka dikale ‘mionji isatu milukakaja’?

Badi bafuanyikija dibaka ne ‘mionji isatu milukakaja.’ (Muam. 4:12) Padibu bakula bua dibaka, mionji isatu eyi idi ileja mulume ne mukajende badi benza mionji ibidi ne Nzambi udi muikale munkatshi muabu. Padi Nzambi muikale ne muaba mu dibaka, bidi biambuluisha mulume ne mukaji bua kuikala bakole mu ditabuja ne kutantamena ntatu bua kusombabu bimpe.​—15/9, dibeji 16.

• Ebelu 6:2 udi wakula bua ‘ditentekela bantu bianza’ kayi?

Kena wakula anu bua disungula dia bakulu to, kadi udi mua kuikala wakula kabidi bua ditentekela dia bantu bianza bua kubapesha bipedi bia nyuma muimpe. (Bien. 8:14-17; 19:6)​—15/9, dibeji 32.

• Mmunyi mudi bakulu mua kunemeka bakuabu?

Mukulu udi unemeka bena Kristo nende padiye kayi ubambila bua kuenza malu adiye yeye muine kayi mua kuenza. Udi kabidi ne bua kumvuija bantu tshidiye ubalombela bua kuenza bualu kampanda anyi mushindu udibu ne bua kubuenza.​—15/10, dibeji 22.

• Ntshinyi tshidi mukulu muena Kristo mua kulongela ku mushindu uvua mulami wa mikoko wa mu Isalele wenza mudimu ne mutshi wende?

Mulami wa mikoko uvua uludika mikoko yende ne mutshi. Uvua ubala nawu mikoko pavuayi ipatuka anyi ibuela mu tshikumbi. (Lew. 27:32) Bia muomumue, mukulu udi ne bua kumanya mukoko wonso bimpe ne kumanya tshidi tshiwenzekele.​—15/11, dibeji 9.