Seo Mohlala wa Maria o ka re Rutago Sona

Na o kile wa ikwa o nolegile moko ka baka la tlhohlo goba boikarabelo bjo bo sa letelwago? Na o lapišitšwe ke go katana letšatši le letšatši e le gore o iphediše? Mohlomongwe o yo mongwe wa batho ba dimilione bao ba ikwago ba gakanegile e bile ba boifa ka gobane ba ile ba swanelwa ke go tloga nageng ya gabo bona e le bafaladi. Le gona, ke mang gare ga rena yo a sa kago a kwa bohloko bjo bo tseneletšego le go lewa ke bodutu ka morago ga go lahlegelwa ke moratiwa lehung?

NA O be o tseba gore Maria mmago Jesu o ile a lebeletšana le mathata ao ka moka? Go feta moo, o ile a lebeletšana le ona ka katlego! Ke’ng seo re ka ithutago sona mohlaleng wa gagwe?

Ka kgonthe, Maria o a tsebja lefaseng ka bophara. Le gona, seo ga se makatše ka gobane o bapetše karolo ya moswana-noši go phethagatšeng merero ya Modimo. Go feta moo, Maria o rapelwa ke batho ba dimilione. Kereke ya Katholika e mo rapela bjalo ka Mma yo a rategago e bile e le mohlala wa tumelo, kholofelo le botho. Ba bantši ba rutilwe gore Maria o lebiša batho go Modimo.

O lebelela mmago Jesu bjang? Sa bohlokwa le go feta, Modimo o mo lebelela bjang?

Kabelo ya Moswana-noši

Maria, e lego morwedi wa Heli, o be a e-tšwa molokong wa Isiraele wa Juda. Lekga la pele leo go bolelwago ka yena ka Beibeleng ke mabapi le tiragalo e sa tlwaelegago. Morongwa o ile a mo etela gomme a re: “Dumela, wena yo a ratilwego kudu, Jehofa o na le wena.” Mathomong Maria o ile a gakanega gomme “a thoma go eleletša gore ye ke tumedišo ya mohuta mang.” Ka gona, morongwa o ile a mmotša gore o kgethetšwe kabelo e makatšago eupša e le e bohlokwa kudu ya go ima, go belega le go godiša Morwa wa Modimo.—Luka 1:26-33.

Ruri kgarebe ye yeo e sego ya nyalwa e be e neilwe boikarabelo bjo bogolo kudu! E ile ya arabela bjang? Maria a ka ba a ile a ipotšiša gore ke mang yo a bego a tla dumela taba yeo. Na go ima mo go bjalo go be go tla dira gore a kgaogane le lesogana leo le bego le mmeeleditše, e lego Josefa, goba na go be go tla dira gore a nyatšwe ke setšhaba? (Doiteronomio 22:20-24) Ga se a ka a dika-dika go amogela kabelo ye e boima.

Tumelo ya Maria e tiilego e ile ya mo thuša go ikokobeletša thato ya Modimo wa gagwe, Jehofa. O be a kgodišegile gore o tla mo hlokomela. Ka gona, o ile a goeletša ka gore: “Bona! lekgobagadi la Jehofa! A go ntiragalele go ya ka polelo ya gago.” Maria o be a ikemišeditše go lebeletšana le ditlhohlo tšeo di bego di letše ka pele ka gobane o be a tšeela godimo kabelo yeo a bego a e neilwe ke Modimo.—Luka 1:38.

Ge Maria a botša Josefa gore o imile, Josefa o be a ikemišeditše go kgaogana le yena. Yeo e swanetše go ba e be e le nako e gateletšago kudu go bona ka babedi. Beibele ga e bolele  gore nako ye e thata e bile e kaakang. Lega go le bjalo, Maria le Josefa ba swanetše go ba ba ile ba ikwa ba imologile kudu ge morongwa wa Jehofa a tšwelela go Josefa. Morongwa a hlalosa gore go tlile bjang gore Maria a ime ka tsela e sa tlwaelegago gomme a laela Josefa gore a mo nyale.—Mateo 1:19-24.

Dinako tše Thata

Lehono, basadi ba bantši ba imilego ba fetša dikgwedi ba itokišeletša go belegwa ga masea a bona gomme Maria le yena a ka ba a ile a dira se swanago. Yo e be e tla ba ngwana wa gagwe wa pele. Lega go le bjalo, maemo a sa letelwago a ile a hlaka-hlakanya dithulaganyo tša gagwe. Kesara Augustose o ile a laela gore setšhaba se balwe, e lego seo se bego se nyaka gore batho ka moka ba ye go ngwadišwa metseng yeo ba belegetšwego go yona. Ka gona, Josefa o ile a sepela le Maria, yo ga bjale a bego a e-na le dikgwedi tše senyane a imile, leetong la dikhilomithara tše ka bago 150, mohlomongwe a nameditše Maria pokolo. Betlelehema e be e tletše batho gomme Maria o be a nyaka lefelo le se nago batho e le gore a belegele go lona, eupša lefelo leo le bego le hwetšagala e be e le setala. Go swanetše go ba go be go le boima go Maria go belegela ka setaleng. Mohlomongwe o be a lewa ke dihlong e bile a boifa.

Ka kgonthe, Maria o ile a tšhollela pelo ya gagwe go Jehofa dinakong tše tše thata tša bophelo bja gagwe, a holofela gore o tla mo hlokomela gotee le lesea la gagwe. Ka morago, badiši ba bangwe ba ile ba fihla ba fagahletše go bona lesea. Ba ile bega gore barongwa ba biditše lesea le “Mophološi, yo e lego Kriste Morena.” Ke moka re bala gore: “Maria a thoma go boloka dipolelo tše ka moka, a akanya ka tšona pelong ya gagwe.” O ile a naganišiša ka mantšu a gomme a mo matlafatša.—Luka 2:11, 16-19.

Go thwe’ng ka rena? Go ka direga gore le rena re diragalelwe ke dilo tše kwešago bohloko. Go oketša moo, Beibele o bontšha gore  “nako le ditiragalo tšeo di sa letelwago” di ka wela yo mongwe le yo mongwe wa rena gomme tša re bakela mathata a fapa-fapanego. (Mmoledi 9:11, NW) Ge e ba seo se direga, na re a galefa gomme ra bea Modimo molato? Na go be go ka se be kaone gore re ekiše boemo bja Maria bja kgopolo gomme re batamele kgaufsi le Jehofa Modimo ka go ithuta Lentšu la gagwe e lego Beibele, ke moka re naganišiše ka seo re ithutilego sona? Ka kgonthe, go dira bjalo go tla re thuša go kgotlelela diteko.

O be a Diila e Bile e le Mofaladi

Maria o ile a lebana le mathata a mangwe gape—go akaretša bodiidi le go gapeletšega go ngwega nageng ya gabo. Na o ile wa lebeletšana le mathata a swanago le a? Go ya ka pego e nngwe, “seripa sa baagi ba lefase—mo e ka bago batho ba dimilione tše dikete tše tharo—ba phela ka tšhelete ya ka tlase ga ditolara tše pedi ka letšatši” gomme ba bangwe ba dimilione ba thatafalelwa ke go iphediša gaešita le ge ba phela dinageng tšeo go thwego di humile. Go thweng ka wena? Na maiteko a letšatši le letšatši a go fepa lapa la gago ka dijo, diaparo le legae a go lapiša ka mo go feteletšego?

Beibele e bontšha gore Maria le Josefa ba be ba diila. Bjang? Gare ga ditherešo tše sego kae tšeo Diebangedi—tša Mateo, Mareka, Luka le Johane—di di utollago ka banyalani ba ke gore matšatši 40 ka morago ga gore Maria a belege, yena le Josefa ba ile ba ya tempeleng bakeng sa go neela sehlabelo seo bego se nyakega—“maebakgorwana a mabedi goba mekurwana e mebedi.” * (Luka 2:22-24) Sehlabelo se se be se dumelelwa feela batho bao ba diilago kudu go ka neela kgapa e nyenyane. Ka gona, go ka direga gore Maria le Josefa ba be thatafalelwa ke go iphediša. Lega go le bjalo, ba ile ba atlega go ageng lapa le nago le lerato. Go molaleng gore dilo tšeo di tswalanago le borapedi bja bona go Modimo di be di e-tla pele maphelong a bona.—Doiteronomio 6:6, 7. 

Nakwana ka morago ga go belegwa ga Jesu, bophelo bja Maria bo ile bja fetoga gape ka mo go feletšego. Morongwa o ile a botša Josefa gore a tšee lapa la gagwe gomme ba tšhabele Egipita. (Mateo 2:13-15) Le e be e le lekga la bobedi Maria a swanetše go tloga tikologong yeo a bego a e tlwaetše, eupša mo nakong ye o be a swanetše go ya nageng e šele. Go be go e na le Bajuda ba bantši bao ba bego ba dula Egipita, ka gona go ka direga gore Maria le Josefa ba ile ba kgona go dula le batho ba gabo bona. Lega go le bjalo, go dula nageng e šele go ka ba thata gaešita le go gakantšha. Na wena le ba lapa leno le gare ga batho ba dimilione tše dintši bao ba tlogilego dinageng tša gabo bona, mohlomongwe e le gore ba kgone go hlokomela bana ba bona goba ba tšhabele kotsi? Ga e ba go le bjalo, o ka kwešiša gabotse mathata a mangwe ao Maria a ka bego a ile a lebeletšana le ona kua Egipita.

E be e le Mosadi le Mma yo a Ineetšego

Ka ntle le dipegong tša go belegwa le go gola ga Jesu, ga go bolelwe gakaalo ka Maria ka Diebangeding. Lega go le bjalo, re a tseba gore bonyenyane Maria le Josefa ba bile le bana ba bangwe gape ba tshela. Mohlomongwe se se ka go makatša. Lega go le bjalo, ela hloko seo Diebangedi di se bolelago.

Josefa o be a tloga a hlompha kabelo ya Maria e kgethegilego ya go belega Morwa wa Modimo. Ka baka leo, ga se a ka a robala le Maria pele Jesu a belegwa. Mateo 1:25 e re Josefa “ga se a ka a ba le kopano ya botona le botshadi le yena go fihla a belega morwa.” Polelwana “go fihla” mo temaneng ye e bontšha gore ka morago ga go belegwa ga Jesu, Josefa le Maria ba bile le thobalano e tlwaelegilego bjalo ka monna le mosadi. Dipego tša Diebangedi di bolela gore ka baka leo, Maria le Josefa ba bile le bana, ba bašemane le banenyana. Jakobo, Josefa, Simone le Judase e be e le bana babo Jesu ka Maria. Bonyenyane o bile le barwedi ba babedi.  (Mateo 13:55, 56) Lega go le bjalo, bana ba ka moka ba imilwe ka tsela e tlwaelegilego. *

Maria o be tšeela godimo tswalano ya gagwe le Modimo. Gaešita le ge Molao o be o sa gapeletše basadi gore ba ye monyanyeng wa Paseka, Maria o be a tlwaetše go tšea leeto la ngwaga le ngwaga la go ya Jerusalema le Josefa. (Luka 2:41) Seo se ka ba se be se akaretša leeto la go ya le go boa la dikhilomithara tše ka bago 300 ngwaga le ngwaga—a e-na le lapa leo le golago! Eupša ga go pelaelo gore maeto a bjalo e be e le dinako tše thabišago bakeng sa lapa.

Basadi ba bantši lehono ba ekiša mohlala o mobotse wa Maria. Ba šoma ka thata gomme ba phethagatša boikarabelo bja bona bja Mangwalo ka tsela e se nago boithati. Gantši basadi ba ba ineetšego ba bontšha go se fele pelo, kgotlelelo le boikokobetšo bjo bogolo. Go naganišiša ka boemo bja kgopolo bja Maria go ba thuša go boloka dilo tšeo di tswalanago le Modimo di e-tla pele ga kganyogo ya bona ya go phela ka boiketlo le lethabo. Ba a tseba, go etša ge Maria le yena ka ntle le pelaelo a be a tseba, gore go rapela Modimo ba e-na le banna ba bona le bana ba bona go matlafatša lapa gaešita le go dira gore le be le botee.

Nakong e nngwe ge Maria le Josefa ba be ba boa monyanyeng kua Jerusalema—mohlomongwe lebakeng le ba e-na le bana ba mmalwa—ba ile ba lemoga gore Jesu yo a bego a e-na le nywaga e 12 o be a se gona. Na o ka akanya kamoo Maria a bego a gateletšegile ka gona ge ba be ba nyaka morwa wa gagwe ka matšatši a mararo? Ge yena le Josefa mafelelong ba mo hwetša ka tempeleng, Jesu o ile a re: “Na le be le sa tsebe gore ke swanetše go ba ntlong ya Tate?” Pego e bontšha gape gore Maria  “a boloka dipolelo tše ka moka pelong ya gagwe ka kelohloko.” Ye ke pontšho e nngwe ya gore Maria o be a tšeela godimo pono ya Modimo ka dilo. O ile a naganišiša ka kelohloko ka dilo ka moka tšeo di diragetšego mabapi le Jesu. Go na le kgonagalo ya gore nywageng e mentši ka morago, o ile a laodišetša bangwadi ba Diebangedi ditaba ka botlalo tša mabapi le tiragalo ye gotee le tše dingwe tša bophelo bja Jesu ge e be e sa le ngwana.—Luka 2:41-52.

Go Kgotlelela ge a Lebeletšane le Tlaišego le Tahlegelo

Go diragetše’ng ka Josefa e lego tatago Jesu wa mogodiši? Ka morago ga gore go bolelwe ganyenyane ka yena tiragalong yeo ya bophelo bja Jesu e sa le mofsa, ga go sa bolelwa ka Josefa dipegong tša Diebangedi. Ba bangwe ba lebelela go se tšwelele mo ga Josefa ka dipegong tša Diebangedi e le pontšho ya gore o hwile nako e itšego pele bodiredi bja Jesu bo thoma. * Go sa šetšwe seo se diregilego, go bonala eka Maria e be e le mohlologadi mafelelong a bodiredi bja Jesu. Nakong ya lehu la gagwe, Jesu o ile a nea moapostola Johane boikarabelo bja go hlokomela Maria. (Johane 19:26, 27) Jesu o be a ka se dire bjalo ge e ba Josefa a be a sa phela.

Maria le Josefa ba ile ba lebeletšana le maemo a mantši. Ba ile ba etelwa ke barongwa, ba tšhabela mmuši yo sehlogo, ba huduga ka makga a mmalwa gomme ba godiša lapa le legolo. Ruri ba swanetše go ba ba ile ba fetša mašego a mantši ba dutše gotee gomme ba bolela ka Jesu, ba ipotšiša gore o tla lebeletšana le eng nakong e tlago le ge e ba ba mo tlwaeditše ka tsela ya maleba! Ke moka, Maria o ikhwetša a le noši go sa letelwa.

Na o lahlegetšwe ke molekane ka lehu? Na o sa dutše o e-kwa bohloko le bodutu bjo bo bakwago ke tahlegelo e bjalo gaešita le ge go fetile nywaga e mentši? Ga go pelaelo gore Maria o ile a homotšwa ke tumelo ya gagwe gotee le tsebo ya gore go tla ba le tsogo. * (Johane 5:28, 29) Lega go le bjalo, dikgopolo tše bjalo tše homotšago ga se tša ka tša fediša mathata a Maria. Go etša bo-mma ba bantši  ba se nago balekane lehono, o ile a lebeletšana le tlhohlo ya go hlokomela bana ba gagwe ka ntle le thušo ya monna.

Ke ga tlhaologanyo go dumela gore Jesu o ile a rwala boikarabelo bja go hlokomela lapa ge Josefa a e-hwa. Ge bana babo Jesu ba gola, le bona ba be ba tla amogela boikarabelo bja bona. Ge Jesu “[a] be a e-na le nywaga e ka bago e masome-tharo,” o ile a tloga gae gomme a thoma bodiredi bja gagwe. (Luka 3:23) Batswadi ba bantši ba ba le maikwelo a lethabo le manyami ge morwa goba morwedi yo a godilego a tloga gae. Ba feditše nako e ntši le go dira maiteko a magolo ge ba godiša bana ba bona moo ba bilego le tswalano ya kgaufsi kudu le bona gomme se se ka dira gore ba ikwe ba lewa ke bodutu ge bana ba bona ba tloga gae. Na go na le barwa goba barwedi ba gago bao ba tlogilego gae go yo phegelela dilo tšeo ba nyakago go di fihlelela bophelong? Na o ikgantšha ka bona, eupša ka dinako tše dingwe o duma eka ba ka ba ba le kgaufsi le wena? Ge e ba go le bjalo, o ka akanya kamoo Maria a ka bego a ile a ikwa ka gona ge Jesu a be a tloga gae.

Diteko tše sa Letelwago

E nngwe ya diteko tša Maria ke yeo mohlomongwe a bego a sa e letela le ka mohla. Ge Jesu a be a ruta, ba bantši ba ile ba mo latela—eupša e sego bana babo. Mangwalo a re: “Ge e le gabotse, bana babo ba be ba sa dumele go yena.” (Johane 7:5) Ga go pelaelo gore Maria o ile a ba botša seo morongwa a mmoditšego sona—gore Jesu e be e le “Morwa wa Modimo.” (Luka 1:35) Lega go le bjalo, go Jakobo, Josefa, Simone le Judase, Jesu e be e fo ba mogolo’a bona. Ka gona, Maria o ile a ikhwetša a dula lapeng leo le aroganego go tša bodumedi.

Na Maria o ile a nyama gomme a ineela boemong bjo? Ga go bjalo le gatee! Lebakeng le lengwe ge Jesu a be a ruta kua Galilea, o ile a tsena ka ntlong e itšego go yo ja gomme lešaba le ile la kgobokana moo go tlo mo theetša. Ke bomang bao ba bego ba le ka ntle ba mo nyaka? E be e le Maria le bana babo Jesu. Ka gona, ge Jesu a be a le kgaufsi le ga gabo, Maria o ile a mo latela gomme go bonala a ile a tšea bana ba gagwe ba bangwe, mohlomongwe a holofela gore ba tla fetoša tsela yeo ba lebelelago Jesu ka yona.—Mateo 12:46, 47.

Mohlomongwe le wena o lebeletšane le tlhohlo ya go katanela go latela Jesu mola ditho tše dingwe tša lapa leno di sa nyake go dira bjalo. O se ke wa nyama gomme wa kgaotša go latela Jesu. Ba bantši, go etša Maria, ba kgothaditše ditho tša malapa a bona ka nywaga e mentši ba sa fele pelo pele ba bona phetogo le ge e le efe ya kgonthe. Kgotlelelo e bjalo ke ya bohlokwa go Modimo go sa šetšwe gore batho ba bangwe ba a arabela goba aowa.—1 Petro 3:1, 2.

 Tlhohlo e Thata Kudu

Ga go pelaelo gore teko ya mafelelo ya Maria, go etša ge e ngwadilwe ka Mangwalong, e be e le e gateletšago kudu. O ile a bona morwa wa gagwe yo a ratwago a e-hwa lehu le bohloko ka morago ga go lahlwa ke setšhaba sa gabo. Go hwelwa ke ngwana go hlalositšwe e le “tahlegelo e kgolo kudu” le “lehu le kwešago bohloko kudu,” go sa šetšwe gore ngwana yoo e sa le yo monyenyane kudu goba ke motho yo mogolo. Go etša ge go be go boletšwe e sa le pele nywaga-kgolong e mentši e fetilego, Maria o ile a ikwa eka o hlabilwe ka tšhoša.—Luka 2:34, 35.

Na Maria o ile a dumelela teko ye ya mafelelo e mo gobatša maikwelong goba e fokodiša tumelo ya gagwe go Jehofa? Le gatee. Nako e latelago ge go bolelwa ka Maria pegong ya Beibele, re mo hwetša a e-na le barutiwa ba Jesu a ‘phegelela le bona thapelong.’ Le gona o be a se noši. Barwa ba bangwe ba gagwe, bao mo nakong ye ba bego ba thomile go bontšha tumelo go mogolo’a bona, ba be ba e-na le yena. Ruri seo se swanetše go ba se ile sa kgothatša Maria! *—Ditiro 1:14.

Maria o be a phela bophelo bjo thabišago le bjo kgotsofatšago bjalo ka mosadi le mma yo botegago. O bile le ditiragalo tše dintši tše putsago tirelong ya gagwe go Modimo. O ile a fenya diteko tše dintši. Ge re lebeletšane le ditlhohlo tše sa letelwago goba re tshwenyegile ka mathata a lapa, re ka ithuta mohlaleng wa gagwe wa go kgotlelela ka tumelo.—Baheberu 10:36.

Lega go le bjalo, go ka thwe’ng ka go rapelwa ga Maria ka tsela e kgethegilego? Na pego ya Beibele ya mabapi le karolo e kgethegilego ya Maria e lokafatša taba ya gore a rapelwe?

[Mengwalo ya tlase]

[Lepokisi/​Seswantšho go letlakala 6]

 Na Jesu o be a E-na le Bana Babo le Dikgaetšedi?

Ee, o be a e-na le bona. Bo-rathutatumelo ba bangwe ba lekile go phegiša therešo ye, gaešita le ge Diebangedi di e utolla ka mo go kwagalago ka makga a mmalwa. (Mateo 12:46, 47; 13:54-56; Mareka 6:3) Lega go le bjalo, diithuti tša Beibele di boletše dilo tše pedi mabapi le ditaba tša boikgopolelo tša gore Maria ga se a ka a belega bana ba bangwe. Taba ya pele ke gore go na le lebaka leo le tutuetšago ditaba tše bjalo tša boikgopolelo—go thekga thuto yeo e ilego ya tšwelela ka morago yeo go yona kereke e bego e ruta gore Maria o ile a dula e le kgarebe bophelo bja gagwe ka moka. Ya bobedi ke gore ditaba tšeo tša boikgopolelo ka botšona ga di kgodiše.

Ka mohlala, taba e nngwe e bjalo ya boikgopolelo e šišinya gore bao go bolelwago ka bona e le bana babo Jesu e be e le bana babo bao e sego ba madi—barwa ba Josefa go tšwa lenyalong la mathomo. Kgopolo ye ga e na motheo ka gobane e ganetša Jesu tshwanelo ya molao ya go ba leitšibolo e le gore e be mojabohwa wa bogoši bja Dafida.—2 Samuele 7:12, 13.

Taba e nngwe ya boikgopolelo ke ya gore bao go thwego ke bana babo ge e le gabotse e be e le bo-motswala ba Jesu, gaešita le ge Mangwalo a Segerika a diriša mantšu a fapanego bakeng sa “ngwanešo,” “motswala” le “wa leloko.” Ka baka leo, seithuti Frank E. Gaebelein o re ditaba tše bjalo tša boikgopolelo “ga di kgonege.” O phetha ka gore: “Tsela e kaone ya go kwešiša bao go thwego ke bana babo . . . ke gore polelwana ye e šupa bana ba Maria le Josefa bao ka go rialo e lego bana babo Jesu ka Maria.”

[Lepokisi go letlakala 7]

 O Ile a ba le Sebete sa go Fetoša Bodumedi bja Gagwe

Maria o belegetšwe lapeng la Bajuda gomme o be a latela bodumedi bja Sejuda. O be a e-ya sinagogeng ya lefelong la gabo, go etša ge lefelo la Bajuda la borapedi le be le bitšwa bjalo e bile a e-ya tempeleng kua Jerusalema. Lega go le bjalo, ge tsebo ya Maria ka merero ya Modimo e oketšega, o ile a lemoga gore Modimo o be a se sa hlwa a amogela metlwae ya bagologolo ba gagwe. Baetapele ba bodumedi ba Bajuda ba ile ba bolaya Morwa wa gagwe e lego Mesia. Pele seo se direga, Jesu o ile a ba tsebiša gore: “Bonang! Le tlogeletšwe ntlo ya lena.” (Mateo 23:38) Modimo o ile a tloša tšhegofatšo ya gagwe tshepedišong ya bodumedi yeo Maria a bego a godišeditšwe go yona.—Bagalatia 2:15, 16.

Ge phuthego ya Bokriste e be e thewa, Maria a ka ba a be a e-na le nywaga e 50. O be a tla dira’ng? Na o ile a phega kgang ka gore o belegetšwe tshepedišong ya bodumedi ya Sejuda le gore o be a nyaka go botegela metlwae ya bagologolo ba gagwe? Na o ile a re o tšofetše kudu gore a ka dira diphetogo? Ga go bjalo le gatee! Maria o ile a kwešiša gore ga bjale Modimo o be a šegofatša phuthego ya Bokriste, ka gona o ile a ba le tumelo le sebete sa go fetoša bodumedi bja gagwe.

[Seswantšho go letlakala 5]

Go tšhabela Egipita e le bafaladi

[Seswantšho go letlakala 8]

Tiragalo e bohloko kudu yeo mma a ka lebeletšanago le yona