Ke mla ta el bo mchelebangel a meringel el omelsemai me a lechub e ngngerachel? Ke mla ta el bo molechesukau el mesaul a bedengem el di melasem el mengereker e di olengesonges a ududem? Me a lechub e ke ta er a rebetok el milliol el mle kirem el melukl el mo er a ta er a beluu me ngkora di rrau a rengum e medakt? E techang er kid a dirkak a ta el bo el chelebangel a ringel er a uriul er a loridii a betik er a rengul?

KAU ke medengei el kmo a Maria, el delal a Jesus, a dirrek el mlo chelebangel a osisiu el omelsemai? Engdi nguluutekangel e mlo sebechel el mo mesisiich er ngii el rokui! Ngera sebeched el suubii er a kerebai er ngii?

A rechad er a beluulechad a medengelii a chisel a Maria. Me ngkmal diak el mechas a rengud e le ngii el rirellii a ileakl el ureor el mo otutii a moktek er a Dios. Me a lmuut el tang, a rebetok el milliol el chad a kmal mengull er a Maria. A Ikelesia er a Katolik a omes er ngii el ua betik a rengul el Chedil e ungil el kerebai el kirel a klaumerang, me a omelatk, me a ungil el omeruul el mo er a rebebil. Te betok a mla suubii el kmo ngii el Maria a omekrael er a rechad el mo er a Dios.

Ngua ngerang a osengem el kirel a delal a Jesus? Me a lmuut el klou a ultutelel, ngua ngerang a osengel a Dios el kirel?

A Ileakl el Ngerachel

A Maria, el ngelekel a Heli, a bliongel er a kebliil er a Juda. A kot el omesodel a ngklel a medung el ngar er a Biblia el kirel a ileakl el tekoi el dilubech. A anghel a mlo duum er ngii e dilu el kmo: “Ak uuetkeu er kau, kau el mler kau a grazia, a Rubak chobengkem.” A kot e a Maria a “kmal mlo ouedikel a rengul er tial omelekoi, me ngulemdasu el kmo, ‘Ngkol ngera blkul tial sus?’” Me a anghel a silebedii el kmo ngmla mengilt el mo meruul er a ileakl el ngerachel el mo dioll e mo omechell e dirrek el omekeroul er a Ngelekel a Dios.​—Lukas 1:26-33.

Ngera el ngerachel a lengiluu ngika el mesobil el ekebil? Me ngmilekerang? Ngulterekokl el millatk el kmo ngtecha sebechel el oumerang er tia el kldiull er ngii. Me tia el kldiull ngsebechel el mo uchul a dertel a deluill er ngii me a chad el kirel el mo bechil el ngii a mo uchul a terached? (Duteronomi 22:20-24) Me ngkmal dimlak el omai er a rengul el mo meruul er tia el ileakl el ngerachel.

A mesisiich el klaumerang er a Maria a mlo uchul e ngmle mereched el kongei er a soal a Dios, el Jehovah. Nguluumerang el kmo a Dios a mo omekerreu er ngii. Ngmillekoi el kmo: “Mesang, ngak a mesiungel a Rubak; bo ltaut er ngak el ua ikel molekoi.” Ngkilengei el mo chelebangel a ngii di el omelsemai e le ngmle medengei el kmo tia el ileakl el ngerachel a mo uchul a odanges el mo er a Dios.—Lukas 1:38.

Sera louchais er a Josef el kmo ngdillang e a Josef a millatk el di berrotel e merort er a chebechiielir. Tiang a ulterekokl el kmal mle meringel el tekoi el kirir. A Biblia a diak losaod el kmo ngmle ua ngerang a klemengetel tia el meringel el taem. Engdi a Maria me a Josef a locha kmal mlo ungil a rengrir er sera bo el duum er a Josef  a anghel er a Jehovah. Ngike el anghel a mileketeklii el mo er a Maria el kmo tia el ileakl el kldiull er ngii a diak el klengit, e dilu er a Josef me lenguu el mo er a blil e mo bechil.​—Matteus 1:19-24.

A Meringel el Taem

Chelecha el taem e a rebetok el redil el dioll a mengoit a betok el buil el kirel a cherellel a ngelekir, me a Maria a ulterekokl el mirruul er a osisiu el tekoi. Ngikang a ketengel el ngelekel. Engdi ngmla er ngii a betok el chetituokel el tekoi el dilubech. A Kaiser el Augustus a ultebedii a meirei er ngii el soal a lemengai a ocherengir a rechad er a rengedel. Misei a uchul e a Josef a ultekir a Maria el mle etiu el bilel er a donkey e merael el bekord el 90 el mael el mo er a Bethlehem. E tia el beluu a mle meseked, e a Maria a socherang er a cheroll e di mle ta el blil a charm a mle sebechir el mo er ngii. Me ngngar er a chelsel tia el blil a charm e ngmilechellii a ngelekel, me tia el blekeradel a ulterekokl el kmal mle metacherbesul er ngii.

Ngar er tia el chetituokel el taem er a klengar er ngii, e a Maria a locha milluluuch el mo er a Jehovah e uluumerang el kmo a Jehovah a mo omekerreu er ngii me a ngelekel. E a uriul, e a rebebil el mengkar a sib a mle duum el omes er a tolechoi. Te uluuchais el kmo a rechanghel a ulemekedong er ngika el ngalek el kmo “Chosobel el . . . Kristus el Rubak.” E kede menguiu el kmo: “Ma Maria a silchedekl ra rengul a ikal tekoi el rokui, e kmal mellebedebek.” Me aike el tekoi a kmal millisiich er ngii.​—Lukas 2:11, 16-19.

E kid a kuk mekerang? Kede dirrek el mo chelebangel a ringel er a klengar. Me a lmuut el tang, a Biblia a ochotii el kmo “a taem ma techall a mor a re bek el chad,” me a ringel me a omelsemai a mei er kid el rokui. (Olisechakl 9:11) Sel bo el uaisei a blekeradel, e kid kede mo oltelechakl er a Dios? Ngbai ungil a doukerebai er a blekerdelel a Maria e dolekeed er kid er a Dios el oeak sel dosuub er a Tekingel, el Biblia, e dolebedebek aike el desuub. A doruul el uaisei e ngulterekokl el ngosukid el mo outekangel a ngii di el omelsemai.

Ngchebuul e Mlo Cheroid er a Belual

A Maria a dirrek el mlo chelebangel a betok el ringel—el uldimukl er a chelebuul e dirrek el mle kirel el chemiis er a belual. Kau ke mla ta el bo mchebangel choua aika el tekoi? A doltirakl er a chais, e a “tedobech er a beluulechad​—el bekord el edei el billiol el chad—​a kiei el ngesonges er a teblo el kluk a ududir er a ta el sils,” e a rebetok el milliol el chad a melasem el mengereker e dirrek el di olengesonges a ududir, alta e te kiei er a merau el beluu. E kau a kuk mekerang? A urerem er a bek el sils el mesiou er a telungalek er kau, ngdirrek el rullau el mo mesaul, a lebebil er a taem?

A Biblia a ochotii el kmo a Josef me a Maria a dirrek el mle chebuul. E kede mekerang e medengei? A ta er a tekoi el louchais er ngii a Evangkelio​—el Matteus, me a Markus, me a Lukas, me a Johanes—​a ouchais el kirir tirka el obekel el kmo a 40 el klebesei er a uriul er a lemechell a Maria, e ngii me a Josef a mlo er a templo e mle kirir el mo melenget “a klbael el belochel ra ked, malechub e ngteblol ngelekel a ulekeroul el belochel.” a (Lukas 2:22-24) Tia el tenget a di mle kirir tirke el mechebuul el diak el sebechir el melenget a sechal el ngelekel a sib. A techerelbesrir a uchul me ngmle meringel a klengar er a Josef me a Maria. Me nguaisei, engdi te mle kaubltikerreng el telungalek. Ngulterekokl a tekoi er a klereng el mle kot el tekoi er a chelsel a klengar er tir.​—Duteronomi 6:6, 7.

Telkib er a uriul er a lemechell a Jesus, e a klengar er a Maria a kmal mlengodech. A anghel a dilu er a Josef me lenguu a telungalek er ngii e lechiis el mo er a Ekipten. (Matteus 2:13-15) Tiang a ongeru el taem el Maria a mle kirel el melukl el mo cheroid er a belual, engdi chelechang e ngmocha kirel el mo er a ngodech el beluu. Ngmla er ngii a rebetok el chad er a Judea el kiliei er a Ekipten, me a Maria me a Josef a mle sebechir el kiei er a delongelir. Me nguaisei, engdi a ngodech el beluu el lekiei er ngii a mle sebechel el mo uchul a omelsemai me a ringel. E kau me a telungalek er kau, kom dirrek el teloi er a rebetok el milliol el chiloit a rekebelurir, e melukl el mo er a ta er a beluu el kirel a klungiolir a rengelekiu, me a lechub e kom chiliis er a uldikel? Me a leuaisei, e ke locha dirrek el melechesuar a berraod el ble lechelebangel er ngii a Maria er a beluu er a Ekipten.

Blak a Rengul el Bechiil el Redil e Chedil

Ngdi kedeb a cheldecheduch el kirel a Maria er a  chelsel a Evangkelio, el obengkel a cheldecheduch el kirel a cherellel a Jesus. Engdi kede medengei el kmo a Maria me a Josef a dirrek el mla er ngii a retelolelm el ngelekir. Nglocha mo mechas a rengum er tia el tekoi. Engdi ka me bo domes aike el lolekoi a Evangkelio.

A Josef a uleba klou el omengull el kirel tia el techellel a Maria el mo omechell er a Ngelekel a Dios. Misei a uchul me ngdimlak el bo lobengkel el mo lmuut er a lemechell a Jesus. A Matteus 1:25 a melekoi el kirel a Josef el kmo “ngdi dimlak bo lobengkel ngiil dil el mo lmuut ra le mechella ngalek el sechal.” A tekoi el “mo lmuut” el ngar er tia el bades a meketeklii el kmo a uriul er a cherellel a Jesus, e a Josef me a Maria a mlo sebechir el meruul a durs el ua rebechiil el chad. Me seikid e a Evangkelio a ouchais el kmo ngmlo er ngii a rengelekel a Josef me a Maria el sechal me a redil, el Jakobus me a Josef me a Simon me a Judas, el tir a ochellel a Jesus, me a reteru el ochederir.​—Matteus 13:55, 56.

A Maria a mle chad el mesisiich er a tekoi er a klereng. Me alta e a Llach a dimlak lolisiich er a redil el mo mengedaol er a ungil el klebesei er a Baskua, engdi ngmle siukang er a Maria el obengkel a Josef el mo er a Jerusalem er a bek el rak. (Lukas 2:41) Tiang a belkul a kmo ngmle kirir el merael er a 190 el mael el mong e mei er a bek el rak​—el obeteterir a rengelekir! Engdi ngulterekokl aika el omerollir el mle uchul a deurreng er tir el telungalek.

Te betok el redil er a chelechang a oukerebai er sel ungil el kerebil a Maria. Te meringel el oureor el mo oltaut a ngerechelir el oltirakl a Bades. Tirka el blak a rengrir el bechiil el redil a mera el olecholt a kllourreng me a ducherreng me a klengareourreng! Sel lolebedebek aike el blekerdelel a Maria e ngngosuterir el mo ngmai a tekoi er a klereng el mo er a uchei er aike el sorir el tekoi. Te medengei el ua Maria el kmo, a omengull er tir el mo er a Dios el obengterir a rebecherir me a rengelekir a kmal melisiich, e dirrek el oldak er a telungalek er tir.

Sel taem er a lluut el mo remei a Maria me a Josef er a uriul er a ungil el klebesei er a Jerusalem​—el obeteterir a rengelekir—​e te mlo medengei el kmo a 12 a rekil el Jesus a dimlak el obengterir. Ngsebechem el melechesuar a sebekrreng er a Maria er a chelsel aike el edei el klebesei el ulsiik er a ngelekel? Sera bo lebetik er ngii a Josef me a Maria el ngar er a templo, e a Jesus a dilu el kmo: “Ngdimlak modengei el kmo ngkirek el ngara blil a Demak?” Me a cheldecheduch a lmuut el melekoi el kmo a Maria a “silchedekl ra rengul a ikal tekoi el rokui.” Tiakid a ta er a olechotel a kmo a Maria a kmal mle mesisiich er a tekoi er a klereng, e le ngmle blechoel el kerekikl el melebedebek aike el tekoi el dilubech el kirel a Jesus. Betok el rak er a uriul, e nguluuchais aike el tekoi el silechedekl er a rengul, me a lmuut el bebil er a tekoi el dilubech er a klengar er Jesus, el mo er tirke el milluches er a Evangkelio.​—Lukas 2:41-52.

Nguluutekangel a Ringel me a Kodellel a Betik er a Rengul

Ngera dilubech el mo er a Josef, el demal a Jesus? A uriul er a omesodel sel taem er a lebetik er a Jesus el ngar er a templo, e a cheldecheduch er a Evangkelio a dimlekea lluut el mesaod el kirel a Josef. A rebebil a omes er tia el tekoi el kmo a Josef a mlad er a uchei er a lomuchel er a omesiungel a Jesus. b Me a ngii di el tekoi el dilubech, engdi ngsebeched el mesang el kmo a Maria a mlo mellakl el dil er a ulebongel er a omesiungel a Jesus. Me a uchei er a kodellel a Jesus, e ngulterekeklii a delal er a apostol el Johanes. (Johanes 19:26, 27) A Jesus a ulterekokl el dimlak loruul er tia el tekoi a lsekum e a Josef a dirk kiliei.

A Maria me a Josef a chillebangel a kmal betok el tekoi! A rechanghel a mlo duum er tir, e te dirrek el chiliis er a mekngit el merreder, e millukl el betok el taem, e ulemekeroul er a klou el telungalek. Ka molatk aike el betok el taem el ledengchokl a lekebesesengei e mesaod er a Jesus, e millatk el kmo ngmo ua ngerang a ngar er a medal el klebesei me a melemalt el rolel a lolisechakl er ngii. E chelechang e ngmocha di ngii el tang a Maria.

 Kau ke mla oridii a betik er a rengum er a kodall? Ke dirk melechesuar a ringel, e melechesukau el di kau el tang el betok el rak? Ngulterekokl a Maria el mle mechelaod e le ngklaumerang er ngii me a klemedengei er ngii el kirel a okiis a uchul. c (Johanes 5:28, 29) Choua aika el ongelaod a dimlak lerellii a Maria el mo diak a mondai er ngii. Me ngdi ua rebetok el mesobil el chedil er a chelecha el taem, ngdirrek el uluutekangel a omelsemai e omekerreu er a rengelekel.

Ngmelemalt a bo doumerang el kmo a Jesus a mlo mesiou er a delengcheklel er sera lemad a Josef. Me sel bo el meklou a ruchellel e ngkuk mo sebechir el olengeseu er a telungalek er tir. Sera bocha el “okedei a rekil” a Jesus, e ngtilobed er a delengcheklel e ulemuchel er a omesiungel. (Lukas 3:23) A rebetok el chedam me a rechedil a mo betok a tekoi el lomdasu sel letobed a rengelekir er a delengchokl. Betok el taem e a omeruul me a uldasu a loleketek el kirir a rengelekir, me ngmo uchul me te melechesuterir el sabisi sel lorael a rengelekir. Kau ngngar er ngii a rengelekem el mla tuobed er a delengcheklem el mo melibech a klengar er tir? Kau ngdmeu a rengum el kirir, e a osisiu el taem e ke oureng er tir? Me a leuaisei, e ngsebechem el melechesuar a blekeradel el lebla er ngii a Maria er sera letobed a Jesus er a delengcheklel.

A Omelsemai el Dimlak Lomdasu el Kmo Ngmo er Ngii

A Maria a mlo chelebangel er a ta er a omelsemai el dimlak lomdasu el kmo ngmo er ngii. A rebetok a mlo oltirakl er a Jesus el oeak a osisecheklel—engdi a ruchellel a dimlak. A Bades a kmo: “Ar uchellel a dirrek el dimlak loumera er ngii.” (Johanes 7:5) Ngulterekokl a Maria el luluuchais er tir el kirel a tekoi el ledilu er ngii a anghel el kmo a Jesus a “Ngelekel a Dios.” (Lukas 1:35) Engdi ngar er a osengel a Jakobus me a Josef me a Simon me a Judas, e a Jesus a di obekrir e merekong. Misei e a Maria a kiliei er a chelsel a telungalek el kakerous a klaumerang er tir.

Me a Maria ngmlo mechitechut a rengul el kirel tia el tekoi? Ngkmal dimlak! A ta er a taem el lullisechakl er a beluu er a Galilea a Jesus, e ngmlo omengur er a ta er a obliil e a seked a mlo kldibel el orrenges er ngii. Te rua techang a mlo osiik er ngii? A Maria me a ruchellel a Jesus. Me sera bo lekeed er a blil, e a Maria a ngiltiterir a rengelekel e ulekiuellel el millatk el kmo alta e bo el sebechir el ngmodech a uldesuir el bedul a Jesus.​—Matteus 12:46, 47.

Kau me ke locha dirrek el mo chelebangel a osisiu el tekoi sel molasem el oltirakl er a Jesus, engdi a rechad er a blim a chetirir a tekoi el moruul er ngii. Lak bo el mechitechut a rengum! Te betok a ua Maria el uluutekangel el melisiich a telungalek er tir el betok el rak er a uchei er a lemengodech a blekeradel. Me a bo lorrenges a rechad me lak, engdi tia el ducherreng a kmal mekreos er a osengel a Dios.​—1 Petrus 3:1, 2.

A Kot el Meringel el Omelsemai

A ulebongel el omelsemai el lechilebengelii a Maria el ua lolecholt er ngii a Bades, a kot el mle meringel el tekoi er a uldesuel me a rengul. Ngulemes er a betik er a rengul el ngelekel el mo mad er a meringel el kodall er a uriul er a lotngeklii a rechedal. Sel lemad a ngelekel a chad, a leklou me a lekekerei, me ngii a “kot el klou el ringel” e dirrek el “kot el meringel el kodall.” El ua meldung er a ulaoch er a betok el rak er a uchei, e a Maria a ulemelechesiu er tia el tekoi el ua oles el merus er a reng er ngii.​—Lukas 2:34, 35.

A Maria ngmilecherei tia el ulebongel el omelsemai el mo mengitechut er a rengul me a klaumerang er ngii el mo er a Jehovah? Ngdimlak. A ongingil el cheldecheduch el kirel a Maria el ngar er a Biblia, e kede metik er ngii el obengterir a redisaiplo er a Jesus el “blak a rengrir el meluluuch.” Me ngdimlak el di ngii el tang e le sel taem e a rebebil el ngelekel a mocha omuchel el oba klaumerang er tir el mo er a obekrir. Me tia el omeruul a kmal milengelaod er a Maria!—Rellir 1:14.

A klengar er a Maria a kmal mle mui er a deurreng e le ngmle blak a rengul el redil, e ungil el bechiil, e dirrek el mle ungil el chedil. Ngmle betok a ungil el tekoi el leriruul er a omesiungel el mo er a Dios. Ngdirrek el mlo sebechel el mo mesisiich er a betok el ringel me a omelsemai. Me kid sel bo dechelebangel a omelsemai el dimlak domdasu el kmo ngmo duubech, e ngsebeched el mesuub er sel ungil el kerebai er a blakerreng me a ducherreng er a Maria.​—Hebru 10:36.

[Footnote]

[Siasing er a 5 el llel]

Ngchiliis el mo er a Ekipten