Mudimu waMariya muNkeñelu yaNzambi

HAMPINJI yadiñayi Yesu mumudimu wakushimwina, mumbanda wumu wabidikili nañovu hakachi kezaza dawantu hadiña ipumba nindi: “Ivumu dakuvweli, nimayeli waamwini anakooleki!” Neyi Yesu wakeñeleña nindi antu amulemesheña mama yindi, haniyi mpinji wadiña nakukooleka kweneni kwakuyileja nindi amufukamineña. Ilaña wahosheli nindi: ‘Inehi, antu akutiya mazu aNzambi hiyakwilamu, anakooleki.’—Luka 11:27, 28.

Yesu hamulemesheli mama yindi munjila yidi yejima yadimenaku; nawa hayilejeli atumbanji twindi nindi amulemesheñaku. Indi chumichi chinesekani ñahi nakalemesha kamwinkañawu Mariya kudi akwakwitiya alala amavulu? Tushinshikenu chahosha Bayibolu kutalisha hantañishilu yaya mpuhu hadi mama yaYesu.

‘Anakutiyili luwi lwabadika,’ ‘Wakooleka Hakachi Kawakwenu Ambanda’

Kañelu Gabireli wamulejeli Mariya mudimu wakazatayi kwesekeja nankeñelu yaNzambi. Hayina mpinji wamwimushili Mariya nindi: “Kolaku, eyi anakutiyili luwi lwakubadika, Yehova wudi naneyi.” (Luka 1:28) Hashimbwili wanyi, Elizabeta wamwimushili Mariya namazu akwila nawu: “Yeyi wunakooleki hakachi kawakwenu ambanda, niwakafuma mwivumu deyi nakooleki.” (Luka 1:42) Komana awa mazu hiyanakumwekesha chikupu nawu Mariya atela kumulemesha chikupuku?

Kwakulehi. Hela chakwila awa mazu ayihoshaña mukulomba kwalombañawu aKatolika kudi Mariya, Bayibolu hiyahosha nawu Mariya atela kumulombaku. Gabireli naElizabeta elukili kukooleka kweneni kwadiña naMariya nawu diyi wakavwala Mesiya, ilaña Bayibolu hiyashimuna nawu antu atela kumulomba Mariyaku. Kwambukaku, chelili atumbanji twaYesu amwili nawu yoyidizishi chakulomba, Yesu washimwini nindi atela kulomba kudi Tata yindi. Kafwampi, kulomba kwaYesu kwaya mpuhu nawa kwachitalilu kwatachika namazu akwila nawu: ‘Tata yetu wekala mwiwulu.’—Matewu 6:9.

Mariya Wekala Hakachi kawaNyuli

Ntañishilu yikwawu yatanda kutalisha hadi Mariya yidi yakwila nawu chayinu mpinji “hiMwanta wamumbanda mwiwulu.” Hela chochu, Bayibolu hiyamwinka chifulu chamuchidiwuku. Ilaña yashimuna nawu wukweti iluña dalema munfulumendi yaNzambi yamwiwulu. Hiiluñanyi?

Yesu washimwini nindi atumbanji twindi amakwawu ashinshika akayula nindi muWanta windi. (Luka 22:28-30) Yesu wamba kayinka antu atondayi ñovu yakukalakala neyi ‘anyanta niatupristu aNzambi; akayula hamaseki.’ (Chimwekeshu 5:10) Bayibolu yatuleja hatooka nawu Mariya wekala hakachi kawantu enkawu kukooleka kweneni. Muloñadi wutunahosheli mwenimu?

Munateli kwanuka nenu chelili Yesu nasañuki dehi, Mariya ‘wakakeleli mbe-e mukulomba’ hamu nawatumbanji twaYesu niana kwindi. Antu akushika ku 120 apompeli nakulomba, kushilahu ‘niambanda amakwawu.’ (Yililu 1:12-15) Bayibolu yahosha nawu, chelili mpinji ‘yachawija chaPentekosta yinashiki dehi, wejima wawu adiñi hamu mwomumu,’ spiritu yajila yaNzambi yechikilili hadi wena nakuyinka wuswa wakuhosha madimi acheñi.—Yililu 2:1-4.

Chineli Mariya wadiña hakachi kawantu yechililuwu spiritu yajila, hiwunsahu wunakumwekesha nawu niyena amutondeli kwikala hakachi kawakwakuyula hamu naYesu muWanta windi wamwiwulu. Dichi iwu hiwunsahu wunakumwekesha nawu chayinu mpinji Mariya wudi naYesu mukulema kwindi kwamwiwulu. (Aroma 8:14-17) Toñojokenu cheñi hakukooleka kukwawu kukekala naMariya niakwakuyula hamu naYesu amakwawu hakushikija nkeñelu yaNzambi.

 Kuleta Nkisu Yabadika Kuwaha

Mukanda wamuBayibolu waChimwekeshu wahosha nawu a 144,000 akayisañula kuwumi wamwiwulu wakulema kulonda kukalakala hamu naYesu neyi atupristu, ansompeshi nawa anyanta. (Chimwekeshu 14:1, 4; 20:4, 6) Chineli hiyatupristu, akazatila hamu hakuzatisha nkisu yamulambu waYesu kudi antu ejima ovwahila, nakuyilisha kwikala awanina muwulunda wawu naNzambi, muyililu, nikumujimba. (Chimwekeshu 21:1-4) Akwakudifukula aYehova ovwahila akekala nakukooleka kweneni kwakudiluñisha iyi mpinji yayiwahi. *

Mariya wadiña nawa wuchidi namudimu hakushikija nkeñelu yaYehova. Hamuloña wakudizoza kwindi, chikuhwelelu, kwovwahila nikudihana neyi mama yawantu, sweje-e dinu kuumika kweseka, twatelela kumwimbujola. Twatela cheñi kumulemesha muloña wazatili mudimu wakuvwala Mesiya nikuleta nkisu yahaya nyaka kudi antu.

Hela chochu, chuma chasweja kulema chitunadizili kudi Mariya chakwila nawu, yena niambuña aNzambi amakwawu ashinshika adifukulaña kudi Yehova, bayi nzambi mukwawuku. Mariya hamu nawanyuli amakwawu aKristu amwiwulu abidikaña nawu: ‘Ninkisu, nimpuhu, nikulema, niwanta, yiikali yawashakama hetanda dawanta [Yehova Nzambi], niyaMwana kaMukoku [Yesu Kristu], haya nyaka nanyaka.’—Chimwekeshu 5:13; 19:10.

[Tumazu twaheshina]

[[Mazu ekoku adi hefu 4]

Twatela kwimbujola kudizoza, chikuhwelelu nikwovwahila kwaMariya