Nahadlok Ka Bala sa Patay?

MADAMO ang magasabat sa sini nga pamangkot sing, “Wala. Ngaa abi mahadlok ako?” Nagapati sila nga ang patay, patay na. Apang minilyon ang nagapati nga ang mga patay padayon nga nagakabuhi bilang mga espiritu.

Sa Benin, West Africa, kag sa mga pungsod nga nagahambal sing Espanyol, madamo ang nagapati nga ang patay makabalik agod patyon ang iban nga miembro sang iya pamilya. Ginapamaligya sang iban ang ila pagkabutang ukon nagakautangan para may igasto sila sa halad nga mga sapat kag mga seremonya agod pahamut-an ang ila patay nga mga paryente. Ang iban nagapakigbahin sa espiritismo kay nagapati sila nga may espiritu ang mga patay nga makapakig-angot sa mga buhi. May makakulugmat nga eksperiensia naman ang iban nga ginapabangod nila sa mga espiritu sang patay.

Naeksperiensiahan ini ni Agboola nga nagaistar malapit sa dulunan sang Benin kag Nigeria. Nagsiling sia: “Ang espiritismo may daku nga impluwensia sa amon pagkabuhi. Kinabatasan na nga ginahugasan ang bangkay agod ihanda ini para sa iya pagsaylo sa duog sang mga espiritu. Pirme ko ginatipon ang nagamit na nga mga habon sa seremonya kag ginasamo ini sa ginpangalap nga mga dahondahon. Nian, samtang ginapahid ko ini sa akon armas sa pagpangayam, ginahambal ko sing matunog kon ano nga sapat ang gusto ko madakpan. Madamo ang nagahimo sini nga kinabatasan kag daw maayo man ang resulta. Apang, may pila ka buhat sang espiritismo nga makakulugmat.

“Sang ang akon duha ka anak nga lalaki napatay sa indi mapaathag nga rason, may panagupnop ako nga may nagahiwit sa amon pamilya. Agod mapat-od ini, nagkadto ako sa isa ka kilala nga tigulang nga espiritista. Nagsiling sia nga matuod ang akon panagupnop. Ang malain pa gid, nagdugang sia nga ang akon mga anak ato na sa duog sang mga espiritu kag mangin suluguon sila sang nagpapatay sa ila kon mapatay na ini sa ulihi. Nagsiling pa gid ang espiritista nga mapatay man ang akon ikatlo nga anak. Pagligad sang pila ka adlaw, napatay gid ang akon anak.”

Nakilala ni Agboola si John, isa sa mga Saksi ni Jehova nga taga-Nigeria. Ginpaathag ni John ang matuod nga kahimtangan sang mga patay suno sa Biblia. Ini nga paathag nagpabag-o sa kabuhi ni Agboola. Mahimo man sini bag-uhon ang imo kabuhi.

Nagakabuhi Bala ang mga Patay?

Sin-o ang makahatag sing makaalayaw nga sabat sa sini nga pamangkot? Indi ang tawo, bisan pa ang kilala nga mga espiritista. Sa baylo, si Jehova amo lamang ang makahatag sing sabat, kay sia ang Manunuga sang tanan nga nagakabuhi “sa langit kag sa duta, ang mga butang nga makita kag ang mga butang nga di-makita.” (Colosas 1:16) Gintuga niya ang mga anghel agod magpuyo sa duog sang mga espiritu kag ang mga tawo kag sapat agod magpuyo sa duta. (Salmo 104:4, 23, 24) Ang tanan nga kabuhi nasandig sa Iya. (Bugna 4:11) Kon amo, binagbinaga ang ginasiling sang Pulong sang Dios, ang Biblia, tuhoy sa kamatayon.

Si Jehova ang una nga nagsambit sang kamatayon. Ginpaandaman niya sanday Adan kag Eva nga mapatay sila kon lalison nila Sia. (Genesis 2:17) Ano ang buot silingon sini? Ginpaathag ni Jehova: “Yab-ok ka, kag sa yab-ok magabalik ka.” (Genesis 3:19) Kon mapatay, ang lawas nagakadunot; nagabalik ini sa yab-ok. Buot silingon, nagauntat ang kabuhi.

Hungod nga naglalis sanday Adan kag Eva gani ginpamatbatan sila sing kamatayon. Apang indi sila ang una nga napatay, kundi ang ila anak nga si Abel kay ginpatay ini sang iya magulang nga si Cain. (Genesis 4:8) Wala nahadlok si Cain nga timalusan sang iya utod nga napatay. Sa baylo, ginkahadlukan  niya ang puede himuon sang buhi nga mga tawo sa iya.—Genesis 4:10-16.

Madamo nga siglo sang ulihi, natublag gid si Hari Herodes sang ginsugiran sia sang mga astrologo nga ang “hari sang mga Judiyo” natawo sa duog nga iya nasakupan. Determinado gid si Herodes nga ipapatay ining bata nga mahimo mag-agaw sang iya trono, gani ginpapatay niya ang tanan nga bata nga lalaki sa Betlehem nga nagaedad sing duha ka tuig paubos. Apang ginsilingan sang anghel si Jose nga ipalagyo sanday Jesus kag Maria “pakadto sa Egipto.”—Mateo 2:1-16.

Sang patay na si Herodes, ginsilingan sang anghel si Jose nga magbalik sa Israel, “kay ang mga nagahingabot sa kabuhi sang bata patay na.” (Mateo 2:19, 20) Ang anghel nga isa mismo ka espiritu nakahibalo nga indi na mahalitan ni Herodes si Jesus. Wala nahadlok si Jose sa patay na nga si Herodes. Sa baylo, ginkahadlukan niya ang posible himuon sang mapiguson nga anak ni Herodes nga si Arquelao. Gani nagpuyo sanday Jose sa Galilea, nga indi sakop ni Arquelao.—Mateo 2:22.

Ginapakita sini nga wala na sing mahimo ang mga patay. Kon amo, paano mapaathag ang eksperiensia ni Agboola kag sang iban pa?

“Mga Demonyo,” Ukon Di-matinlo nga mga Espiritu

Sang hamtong na si Jesus, nakasumalang man sia sing malaut nga mga espiritu. Kilala nila si Jesus kag gintawag nila sia nga “Anak sang Dios.” Kilala man sila ni Jesus kag nahibaluan niya nga indi sila mga espiritu sang patay nga mga tawo. Sa baylo, gintawag sila ni Jesus nga “mga demonyo,” ukon di-matinlo nga mga espiritu.—Mateo 8:29-31; 10:8; Marcos 5:8.

Ginsambit sa Biblia ang mga espiritu nga mainunungon sa Dios kag ang mga espiritu nga nagrebelde sa Iya. Ang tulun-an sang Genesis nagsugid nga sang gintabog ni Jehova ang malalison nga sanday Adan kag Eva sa hardin sang Eden, nagbutang sia sing mga kerubin, ukon mga anghel, sa sidlangan sang hardin agod wala sing makasulod sa sini. (Genesis 3:24) Mahimo nga una ini nga tion nga nakita sang mga tawo ang mga espiritu.

Sang ulihi, may mga anghel nga nagpanaug sa duta kag nagmateryalisar subong tawo. Apang wala sing asaynment nga ginsugo si Jehova sa ila nga himuon diri sa duta. Sa baylo, ginbiyaan nila ang “ila nagakaigo nga puluy-an” sa duog sang mga espiritu. (Judas 6) Ginhimo nila ini bangod sang ila maiyaiyahon nga handum. Nagpinagusto sila sa pagpangasawa kag nangin amay sang higante nga mga anak nga ginatawag Nefilim. Ining mga Nefilim kag ang ila rebelyuso nga mga amay nagpuno sang duta sing kasingki kag kalautan. (Genesis 6:1-5) Gintadlong ni Jehova ini nga kahimtangan paagi sa bug-os kalibutan nga Anaw sang adlaw ni Noe. Nagkalalumos ang malaut nga mga lalaki kag mga babayi lakip ang mga higante. Ano naman ang natabo sa mga anghel?

Napilitan sila nga magbalik sa duog sang mga espiritu bangod sa Anaw. Apang, wala na sila ginpabalik ni Jehova “sa ila orihinal nga kahimtangan.” (Judas 6) Ang Biblia nagasiling: “Ang Dios wala gid magpugong sa pagsilot sa mga anghel nga nakasala, kundi paagi sa paghaboy sa ila sa Tartaro, ginhunong sila sa mga buho sang mangitungito nga kadudulman agod itigana sa paghukom.”—2 Pedro 2:4.

Ang Tartaro indi isa ka partikular nga duog; kaangay ini sa ginbilanggo ukon ginpaubos nga kahimtangan sa diin indi na makapagusto ang mga ginahaboy sa sini. Ang mga demonyo indi na makamateryalisar subong tawo, apang may gahom gihapon sila kag makaimpluwensia sila sa aton hunahuna kag kabuhi. Makontrol nila ang mga tawo kag sapat. (Mateo 12:43-45; Lucas 8:27-33) Malimbungan  man nila ang mga tawo paagi sa pagpakunokuno subong mga espiritu sang patay. Ngaa? Agod indi masimba sang mga tawo si Jehova sa paagi nga nahamut-an Niya kag agod gamuhon ang ila hunahuna tuhoy sa matuod nga kahimtangan sang mga patay.

Kon Paano Daugon ang Kahadlok

Nahantop ni Agboola nga makatarunganon ang paathag sang Biblia tuhoy sa kamatayon kag matuod nga identidad sang mga espiritu. Nahangpan niya nga dapat sia magtuon sing dugang pa. Nagsugod sia sa pagtuon sing Biblia kag pasad-sa-Biblia nga mga publikasyon upod kay John. Nalugpayan si Agboola nga mahibaluan nga ang iya mga anak daw nagakatulog lang sa lulubngan, tuhay sa ginsiling sa iya nga nagahulat sila sa duog sang mga espiritu agod mangin suluguon sang nagpapatay sa ila.—Juan 11:11-13.

Narealisar man ni Agboola nga dapat niya untatan ang tanan nga kinabatasan nga may labot sa espiritismo. Ginsunog niya ang tanan niya nga pagkabutang nga naangot sa sini. (Binuhatan 19:19) Bangod sini ginpahog kag ginpaandaman sia sang mga tawo sa ila komunidad nga halitan gid sia sang mga espiritu. Apang wala na nahadlok sa sini si Agboola. Ginsunod niya ang laygay sa Efeso 6:11, 12: “Isuklob ang kompleto nga hinganib gikan sa Dios . . . bangod nagapakigdumog kita . . . batok sa malaut nga mga puersa nga espiritu.” Nalakip sa sining espirituwal nga hinganib ang kamatuoran, pagkamatarong, maayong balita sang paghidait, pagtuo, kag ang espada sang espiritu nga amo ang Pulong sang Dios. Ini nga hinganib naghalin sa Dios kag gamhanan gid!

Wala na ginsapak si Agboola sang iya mga abyan kag mga paryente sang wala na sia makigbahin sa mga kostumbre nga may labot sa espiritismo. Apang, sa Kingdom Hall sang mga Saksi ni Jehova sa ila duog, nakakita sia sing bag-o nga mga abyan nga nagapati sa ginatudlo sang Biblia.

Nahibaluan na karon ni Agboola nga sa indi madugay dulaon ni Jehova ang tanan nga kalautan sa duta kag indi na makapanghalit ang mga demonyo. Sa ulihi, laglagon Niya sila. (Bugna 20:1, 2, 10) Banhawon man sang Dios diri sa duta “ang tanan nga yara sa handumanan nga mga lulubngan.” (Juan 5:28, 29) Lakip sa ila si Abel, subong man ang inosente nga mga bata nga ginpapatay ni Hari Herodes, kag ang minilyon pa nga nagkalamatay. Nagatuo man si Agboola nga malakip ang iya tatlo ka anak sa mga pagabanhawon. Mahimo nga nalakip man sa ila ang imo mga hinigugma nga napatay. Ining tanan nga pagabanhawon amo mismo ang magasugid nga sugod sang napatay sila tubtob nga nabanhaw, wala gid sila sing hinalung-ong bisan pa gani sang mga seremonya nga ginhimo para sa ila.

Wala gid sing rason nga kahadlukan ang patay. Sa baylo, malauman mo nga makaupod liwat ang imo hinigugma nga napatay. Samtang wala pa ina, ngaa indi mo pagtun-an ang Biblia agod magbakod ang imo pagtuo? Makig-upod sa mga nagapati kon ano gid ang ginatudlo sang Biblia. Kon nagapakigbahin ka sa espiritismo, untati ini gilayon. Amligi ang imo kaugalingon batok sa mga demonyo paagi sa pagsuklob sing “kompleto nga hinganib gikan sa Dios.” (Efeso 6:11) Nalipay ang mga Saksi ni Jehova sa pagbulig sa imo. Nagatanyag sila sing wala bayad nga pagtuon sa Biblia sa puluy-an, sa bulig sang libro nga Ano Gid ang Ginatudlo Sang Biblia? *

Wala na nahadlok sa patay si Agboola, kag natun-an na niya kon paano pakigbatuan ang mga demonyo. Nagsiling sia: “Wala ako makahibalo kon ngaa napatay ang akon tatlo ka anak. Apang sugod sang nag-alagad ako kay Jehova, nadugangan pa sing pito ang akon mga anak. Wala na sila ginhalitan sang malaut nga mga espiritu.”

[Nota]

[Blurb sa pahina 13]

Wala na nahadlok sa patay si Agboola, kag natun-an na niya kon paano pakigbatuan ang mga demonyo

[Retrato sa pahina 12]

Wala nahadlok si Cain nga timalusan sang iya utod nga napatay