Komana Mwachinaña Afu?

ANTU amavulu akulaña ilu lwihu nawu, “Inehi. Nukuchininadi?” Akuhwelela nawu muntu chafwayi, chalala nafwi. Hela chochu, yihita yawantu akuhwelela nawu afu atwalekañahu kuhanda neyi aspiritu.

MuBenin kuMujika waAfrica, antu amavulu akuhwelela nawu afu anateli kufunta nakujaha antaña jawu. Antu alandishaña hela kusondama mali kulonda alandi yimuna yakulambula nikwila yidika kulonda kuzañalesha antaña jawu afwa. Antu amakwawu apeshaña nakutoñojoka nawu spiritu yamuntu yahandaña neyi muntu nafwi nawa nateli kuhanjeka nawantu amomi. Amakwawu amonahu dehi yuma yakuchinisha yaletesha atoñojokeña nawu aspiritu awafu diwu akojejaña yumiyi.

Agboola washakamaña muñinza yaBenin naNigeria watoñojokeleña mwenimu. Wahosheli nindi: “Kupesha hichuma chelukawu chikupu antu amwiluña detu. Chekala hichisemwa kuwelesha afu kuhitila mukulondela tushidikilu hakuyiloñesha kulonda ayi muwanta wawaspiritu. Kakavulu nadiña nakukuñujola njapawu yashalileñaku hakuwelesha afu nakuyibomba namafu amutondu wumu. Kufumahu nakwitileña mpelu yeniyi kuwuta wami nakusansa mukunyi hakutena kanyama inakukeña kujaha. Yaaku yamuchidiwu yatanda nawa yamwekanaña neyi yazatikaña chiwahi. Ilaña, yililu yikwawu yakupesha yatiyishileña woma.

“Chelili anyanami ayedi awamayala afwi chakuhayamisha, natoñojokeli nami kudi muntu wapanda wunakunjahila nyana. Hakwila nawu niluki wayiloweli, nayili kudi kashinakaji weyala waya mpuhu munsañu jakupanda. Wanlejeli neyi chochinatoñojokeleña. Chantiyishili kutama, walenjeli nindi anyanami adiña nakuhembelela mwituña dawaspiritu kulonda akekali añamba jamuntu wayijahili neyi nafwi. Iwu kashinakaji wanlejeli cheñi nindi mwanami wamuchisatu weyala niyena wukufwa. Chimwahitili mafuku antesha ona mwana niyena wafwili.”

Kufumahu, Agboola wadiweni naJohn, Chinsahu chaYehova wakuñinza naNigeria. John wamulumbulwilili chekalawu afu kushindamena haBayibolu. Iyi nsañu yahimpili chihandilu chaAgboola. Yinateli kuhimpa chihandilu chenu nawa.

Komana Afu Amomi?

Hinyi watela kwakula chiwahi ilu lwihu? Bayi neyi muntu waya mpuhu munsañu jakupandaku. Ilaña Yehova, Nleñi wayuma yejima yikweti wumi “niyamumawulu niyahamaseki; niyuma yamonewaña, niyuma yakamonewaña,” diyi watela kwakula. (Akolose 1:16) Waleñeli añelu kulonda ashakameña muwanta wawaspiritu, muntu niatunyama kulonda ashakameña hamaseki. (Masamu 104:4, 23, 24) Yuma yejima yikweti wumi yashindamena hadi Yena. (Chimwekeshu 4:11) Hanu dinu, shinshikenu chahosha Izu daNzambi Bayibolu kutalisha hakufwa.

Yehova diyi wasambilili kuhosha hansañu yakufwa. Wasoñamishili nindi Adama niEvu akafwa neyi abula kumwovwahila. (Kutachika 2:17) Chumichi chatalishili mudihi? Yehova walumbulwili nindi: “Eyi wulunkuñu, nochu wakafunta cheñi mwomulunkuñu.” (Kutachika 3:19) Neyi muntu nafwi mujimba watokaña; wafuntaña cheñi kulunkuñu. Wumi walekaña kuzatika.

Adama niEvu adikañili mukudikeñela, dichi ayitoñweleli kufwa. Hela chochu, hidiwu adiña atachi kufwaku. Mwanawu Abeli diyi wasambilili kufwa. Mana kwindi wamukulumpi Kena diyi wamujahili. (Kutachika 4:8) Kena hachinini nindi  akumutenda kudi mana kwindi wunafwiku. Ilaña Kena wachinineña antu amomi nindi anateli kumwila chuma chatama.—Kutachika 4:10-16.

Chimwahitili yaaka yayivulu, Mwanta Herodi wahilili chikupu chamulejeluwu kudi akwakutala tutumbwa nawu “mwanta wawaYudeya” navwaliki muwanta windi. Hakufwila kukisañana mwana wakekala mwanta, Herodi wafuukwiluhu kujaha anyana awamayala ejima muBetelemi adiña nanyaka yiyedi niabulili kushikija nyaka yiyedi. Ilaña kañelu wamubabesheli Yosefu kusenda Yesu niMariya kulonda ‘atemukili kuEjipitu.’—Matewu 2:1-16.

Chafwiliyi Herodi, kañelu wamulejeli Yosefu kufunta kuIsarela, “muloña antu akeñeli kujaha iwu mwana wanyanya [adiña] afwa dehi.” (Matewu 2:19, 20) Kañelu, spiritu hindi welukili nindi Herodi hakutwesha kumukisañana Yesuku. Yosefu hamuchinini Mwanta Herodi chafwiliyuku. Ilaña Yosefu watiyili woma chuma chadi kwilayi mwana kaHerodi wawukatu, Akelawusi. Dichi Yosefu washakamini muÑaliliya nachisaka chindi, kwakulehi neluña daAkelawusi.—Matewu 2:22.

Iji nsañu jatukwashaña kwiluka netu afu hiyakweti ñovuku. Hanu dinu, yuma yamweniyi Agboola niyikwawu atela kuyilumbulula ñahi?

‘Andemoni,’ Hela Aspiritu Azonda

Yesu chakuliliyi wamweni yileñaleña yazonda yakuspiritu. Yamwilukili Yesu nakumutena nawu “Mwana kaNzambi.” Yesu niyena wayilukili. Hiyadiña aspiritu awantu afwaku. Ilaña Yesu wayiteneni nindi ‘andemoni,’ hela aspiritu azonda.—Matewu 8:29-31; 10:8; Maku 5:8.

Bayibolu yahosha hadi aspiritu amwovwahila Nzambi ninowu adikaña nindi. Mukanda waKutachika wahosha nawu Yehova chayitemwiniyi Adama niEvu mwitempa daEdeni hampinji yadikañiluwu, washili akerubi hela añelu kumusela wetempa kulonda kukañesha wudi wejima kwiñilamu. (Kutachika 3:24) Chakubula nikujinoka iyi diyi yadiña mpinji yatachi aspiritu kumwekana kumesu awantu.

Chimwahitili yaaka, añelu amavulu enjili hamaseki nakuvwala nyijimba yawuntu. Yehova hayitemesheli nindi azati mudimu wudi wejima hamasekuku. Ilaña ‘afumini mwawu mwashakamineñawu’ muwanta wawaspiritu. (Yuda 6) Yitoñojoka yawu yadiña yalwisu. Asumbwili ambanda avweli nyana yasweja kutaluka yateneneñawu nawu aNefwili. A Nefwili niatata jawu adikañili enzesheli hamaseki madombu nikutama kukwawu kwasweja. (Kutachika 6:1-5) Yehova wamanishili iku kutama kuhitila mukuleta Dibaji mumafuku aNowa. Meji adibaji ajilumwini amayala niambanda atama kushilahu niantu asweja kutaluka. Chumanyi chamwekeneni añelu?

Dibaji dayiletesheli adikakeji kufunta muwanta wawaspiritu. Hela chochu, Yehova hayitejeli kutachika cheñi ‘kuhemba wanta wawuku.’ (Yuda 6) Bayibolu yahosha nawu: “Nzambi walekeli kwanakena añelu havulumwinuwu, hakuyumbila mukaluña kachinana [muTatarasi] nakuyisha mumena amwidima wabwi, kulonda kuyisweka akashiki kukusompesha.”—2 Petulu 2:4.

Bayi neyi Tatarasi hiluñaku; ilaña hikukasa kwadifwana nakaleya kwakukañesha nyidimu yanawa añelu ahañawu. Andemoni hiyanateli kuvwala cheñi nyijimba yawuntuku, ilaña achidi  nañovu yeneni yakuluwañesha antu niyitoñojoka. Akweti ñovu yakuluwañesha antu nianyama. (Matewu 12:43-45; Luka 8:27-33) Adimbaña cheñi antu kuhitila mukudifwikija neyi hiyaspiritu awafu. Muloñadi? Kulonda kukañesha antu kudifukula kudi Yehova munjila yamuzañaleshaña nikuluwañesha antu kutalisha hachekalawu afu.

Chakushinda Woma

Agboola welukili Bayibolu chiyalumbulula chachiwahi kutalisha hansañu yakufwa nichekalawu aspiritu. Welukili nindi wateleli kudiza yuma yayivulu. Watachikili kudiza Bayibolu ninyikanda yashindamena haBayibolu naJohn. Chamukundejeli Agboola hakwiluka nindi anyanindi adiña akaama mwijamu, bayi neyi adiña nakuhembela muwanta wawaspiritu nakwikala añamba jamuntu wayijahiluku.—Yowanu 11:11-13.

Agboola welukili cheñi nindi watela kuleka chikupu yililu yakupesha. Wocheli yuma yindi yejima yakupesha nachu. (Yililu 19:19) Antu amakwawu mumukala amusoñamishili nawu aspiritu akumwila chatama. Ilaña Agboola hachininuku. Wovwahilili kufumba kwekala haAefwesesa 6:11, 12 kwakwila nawu: “Manyekenu yitwa yaNzambi yejima . . . Muloña . . . twalwishaña . . . nawaspiritu atama.” Iyi yitwa yakuspiritu yabombelamu nsañu yalala, kuloña, nsañu yayiwahi yakuwunda, chikuhwelelu, nimpoku yakabali yakuspiritu, Izu daNzambi. Iyi yitwa yafuma kudi Nzambi nawa yikweti ñovu chikupu.

Agboola amuheleli kudi amabwambu jindi amakwawu niantaña chelili yaleki tushidikilu twakundama kukupesha. Hela chochu, wawanini amabwambu amaha Hetala daWanta dawaYinsahu jaYehova akuhwelela chuma chatañishaña Bayibolu.

Chayinu mpinji Agboola weluka nindi Yehova keña yafumishuhu kutama hamaseki nikumanisha chikupu nyidimu yawandemoni yejima. Nkumininaku, Wakayijilumuna. (Chimwekeshu 20:1, 2, 10) Nzambi wamba kasañula ‘ejima adi mumajamu achanukishu.’ (Yowanu 5:28, 29) Kushilahu niAbeli, anyana abula muloña ajahiliyi Mwanta Herodi, niyihita yawantu amakwawu. Agboola wakuhwelela nindi anyanindi asatu awamayala niwena akayisañula. Ataña jenu imwakeña afwa niwena atela kwikala hakachi kanawa akasañulawu. Antu ejima akasañulawu akashimuna nawu kufuma hampinji yafwiluwu nakushika hampinji yakasañukawu, hiyelukiluhu chumaku—hiyelukili yidika yidi yejima yayikoñeleleñawuku.

Dichi bayi muchinaña afuku. Ilaña, mwatela kutalila mpinji yimwakekala cheñi hamu nawantaña jenu yimwakeña afwa dehi. Chayinu mpinji, mwatela kudiza Bayibolu kulonda mukoleshi chikuhwelelu, netuku? Dikundenu nawantu akuhwelela yuma yatañishaña Bayibolu. Hela chakwila himwapeshaña nankashuku, lekenu chochichi. Dikiñenu kudi andemoni kuhitila mukuvwala “yitwa yaNzambi yejima.” (Aefwesesa 6:11) A Yinsahu jaYehova akutiya kuwaha kuyikwashaku. Adizishaña Bayibolu hetala chawaana kuzatisha mukanda Chumanyi Chacheni Chatañishaña Bayibolu? *

Chayinu mpinji, Agboola hachinaña afu cheñuku, nawa nadizi chakudikaña nawandemoni. Wahosheli nindi: “Namwiluka wanyi wanjahilili anyanami asatu awamayala. Ilaña kufuma mpinji yinatachikili kumukalakela Yehova, nikweti nyana yikwawu yitanu nayiyedi. Kwosi niwumu wahadi andemoni wunayileteli yihuñu.”

[Tumazu twaheshina]

[Mwevulu wudi hefu 27]

Kena hachinini nindi mana kwindi wafwili watela kumutendaku

[Mazu ekoku adi hefu 28]

Chayinu mpinji, Agboola hachinaña afu cheñuku, nawa nadizi chakudikaña nawandemoni