Kwoj Mijõk ke Ro Remij?

ELÕÑ rej uak im ba, “Jaab, ijjab abwinmõke kin ro remij.” Rej ba men in kinke rej tõmak bwe relukkun mij. Bõtab, elõñ million armij ro rej tõmak bwe meñe remij ak rej wõnmanlok wõt im mour einwõt juõn jitõb.

Ilo Benin, ej ber ilo Africa, armij ro ie rej tõmak bwe dri mij ro remaroñ mõn ro nukiir. Armij ro rej wiakake men ko mweieir ak kõmõn elap muri bwe ren wia menin mour ko ñõn air katok kaki im kõmõn kwojkwoj ko ñõn air mirik ro nukiir remij. Jet rej kõmõn anijnij ko me rej kitibuj melele eo bwe jitõb eo iben armij ro ej mour manlok wõt meñe armij eo emij, im emaroñ konono iben ro remour. Jet rej mijõk kin men ko rar walok ñõn ir kinke rar lemnok bwe jitõb an ro remij rar kõmõne men kein.

Juõn iair kar Agboola, ear jokwe ilo juõn jikin ej ber ikõtan Benin im Nigeria. Ej ba: “Anijnij ej mõtõn mõnit eo an armij ro ilo jikin eo ij jokwe ie. Ej juõn mõnit ñõn kwale enbwinin dri mij ro ñõn keboj ir ñõn jikin jitõb ro. Ekkã aõ bõk bween joob ko kar kwale enbwinin dri mij eo kaki im kobaiki iben jet bwilik. Inem, ke ij iri bu eo aõ kin men kein, ij ba ilo juõn ainiken elaj menin mour rot ikõnan. Ekkã air kõmõni mõnit kein im rej watõki emõn im or tokjeir. Bõtab, eor jet wãwen anijnij iar mijõki.

“Ke ladrik ro ruo nejiõ rar mij, iar lemnok bwe juõn ear kapãl iõ. Ñõn aõ lukkun jela, iar etal ñõn iben juõn lõlap, dri anijnij. Ear kamole lemnok eo aõ. Elaplok jen men in, ear kemelele bwe ladrik ro nejiõ rar ber ilo jikin jitõb ro im kõtar mae ien eo emij armij eo ear mõn ir bwe ren jerbal ñõn e. Lõlap in ear bareinwõt ba bwe ladrik eo kein kajilu nejiõ enaj bar mij, emol jejjo ran ko tokelik ear mij.”

Tokelik, Agboola ear iion Jon, juõn ian dri Kennan ro an Jeova jen Nigeria. Melele ko Jon ear kemelele kaki kin ber eo an ro remij rar berber wõt ion Baibel eo. Kemelele ko an rar ukot mour eo an Agboola. Emaroñ ukot mour eo am bareinwõt.

Ro Remij Remour Ke?

Wõn eo wõt emaroñ uake kajitõk in ilo jime? Jab armij, jekron ewi joñõn an buñbuñ im meletlet. Ak, Jeova, eo ear kõmõnmõn men otemjej “i lõñ kab men ko ion lõl, ko jej loi im ko je jab loi.” (Kolosse 1:​16) Ear kõmõnmõn enjel ro bwe ren ber ilõñ im armij im menin mour ko ren mour ion lõl. (Sam 104:​4, 23, 24) Mour otemjej rej wawa ion Jeova ñõn air mour. (Reveles̃õn 4:​11) Lale ta eo Baibel eo ej ba kin mij.

Kar Jeova eo moktata ear konono kin mij. Ear kakkõl Adam im Iv bwe renaj mij elañe rejjab bokake e. (Jenesis 2:17) Ta kar melelen men in? Jeova ear kemelele: “Brij kwe, im ñõn brij kwo naj jeblak.” (Jenesis 3:​19) Ñe emij juõn armij, enbwinin ej oktõk im brij, im mour eo an ejemlok.

Adam im Iv rar jab bokake im kin men in rar mij. Bõtab, ejjab ir eo moktata rar mij. Kar leo nejir, Ebel. Leo jein, Kein, ear mõn e. (Jenesis 4:8) Meñe emij leo jãtin, Kein  ear jab mijõk bwe enaj irenwõne kin men eo ear kõmõne ñõn e. Jen men in, Kein ear lemnok ta eo armij ro remour renaj kar kõmõn ñõn e.​—Jenesis 4:​10-​16.

Elõñ buki yiõ ko tokelik, Kiñ Herõd ear mijõk ke dri jedjed iju ro rar ba ñõn e bwe elotak “kiñ an dri Ju ro” ilo jikin eo ear iroij ie. Kin men in, ear beek ilo buruen ñõn an mõn aolep ladrik ro ruo air yiõ im driklok, ilo Betleem. Ak juõn enjel ear kakkõl Josep bwe en bõk Jisõs im Meri im “ko ñõn Ijipt.”​—Matu 2:​1-​16.

Elikin an Herõd mij, enjel eo ear ba ñõn Josep, “re mij ro r’ar kõnan mõn ladrik ne,” inem ren jeblak ñõn Israel. (Matu 2:​19, 20) Enjel in ear jela bwe Herõd ear jab maroñ mõn Jisõs. Josep ear jab mijõk Kiñ Herõd kinke ear mij. Bõtab, Josep ear mijõk ta eo leo nejin Herõd, Arkileõs, emaroñ kar kõmõne. Kin men in, Josep ear bõklok baamle eo an ñõn Galili, jikin eo ejjab ber iomin iroij eo an Arkileõs.​—Matu 2:22.

Bwebwenato kein rej jibõñ kij ñõn lo bwe ro remij ejelok air kajur. Inem, ewi wãwen jemaroñ kemelele kin wãwen eo ear walok ñõn Agboola im ro jet?

“Dimon,” ak Jitõb ro Retton

Ke Jisõs ear ridto, elõñ jitõb ro renana rar jelmaiki. Im rar jela kajen im naetan “Nejin Anij.” Jisõs bareinwõt ear jela kajeir. Rar jab itok jen ro remij. Jen an eindrein, Jisõs ear naetair dimõn, ak jitõb ro retton.​—Matu 8:​29-31; 10:8; Mark 5:8.

Baibel eo ej konono kin jitõb ro rej tiljek ñõn Anij im ro rar jumae e. Buk in Jenesis ej ba bwe ke Jeova ear kadrioijlok Adam im Iv jen jikin kallip in Iden kin air jab bokake e, ear likit ruo kerub ak ruo enjel iturear in jikin kallip eo bwe ren jab bar relõñ iloan. (Jenesis 3:​24) Eñin kar jinointata in an armij lo jitõb ro.

Ien ko tokelik, elõñ enjel ro rar wõnlõltak ñõn lõl im kõnõk enbwinin armij. Jeova ear jab kamelim ir ñõn air jerbal ijin ion lõl. Bõtab, rar “illok jen jikiir” ilõñ. (Jud 6) Rein rar bukot wõt kõnan ko air mõke. Rar belele, im or nejiir dri inea. Dri inea rein im dri jumae ro jemeir rar kobrõk lõl kin lej im kowaroñ. (Jenesis 6:​1-5) Jeova ear kamarmire wãwen kein ilo an kar bõktok ibijliplip eo ion aolepen lõl in ilo ran ko an Noa im kokkure armij ro renana ekoba dri inea ro. Ak ta eo ear walok ñõn enjel ro?

Rar kõnõk enbwinin jitõb im jeblak ñõn lõñ. Bõtab, Jeova ear bõprae ir jen air ber ilo ijo “jikiir” kar mokta ilo lõñ. (Jud 6) Baibel eo ej ba: “Anij ear jab lomoren enjel ro rar jerawiwi, ak ear jolok ir na ilo Hell, ijo emwij liãbe ir ilo marok, bwe ren kõttar Ran in Ekajet eo.”​—2 Piter 2:4, UBS.

Ilo kajin Grik, nan eo hell ilo eon in ej Tartarus, im ejjab lukkun juõn jikin ak ej nan in kõkkar ñõn jikin kalbuj, ijo ej kadriklok jerbal ko an dri jumae rein. Dimon ro rejjab maroñ kõnõk enbwinin armij kiõ ak eor air kajur ñõn kareel lemnok im mour an armij. Remaroñ miok ñõn enbwinin armij ro im menin mour ko.  (Mat. 12:43-​45; Luk 8:​27-​33) Rej bareinwõt mone armij ro ilo air kejakilkil ir einwõt armij ro remij. Etke? Ñõn kõmõn bwe armij ro ren jab kabuñ ñõn Jeova ilo wãwen eo ejime im kõmõn bwe ren bwok kin wãwen ber eo an ro remij.

Wãwen Anjo ion Mijõk

Agboola ear kile jime in kemelele eo jen Baibel kin mij im wõn ro rej jitõb ro. Ear kile bwe ear aikwij kalaplok an jela kin men in. Ear jino riit Baibel im buk ko rej wawa ion Baibel iben Jon. Agboola ear bõk kainemõn kin an jela bwe ladrik ro nejin remij im rejjab kõtar ilo jikin jitõb ro bwe ren jerbal ñõn armij eo ear mõn ir.​—Jon 11:11-​13.

Agboola ear bareinwõt kile bwe ear aikwij bwijrõk jen aolep mõnit ko rej mõntin anijnij. Ear tile aolep kein anijnij ko an. (Jerbal 19:19) Jet armij ilo jikin eo an rar kakkõl e bwe jitõb ro renaj illu iben, ak Agboola ear jab mijõk. Ear lor wõt nan in kakabilek ko ilo Dri Epesõs 6:​11, 12: “Komin kõnõk aolepen ken tõrinae an Anij, . . . Bwe aruij oktak . . .[ej] iben jaran jitõb.” Ken tõrinae an Anij ej kitibuj mol, wãnik, gospel in ainemõn, tõmak, im Nan in Anij. Kinke ken tõrinae kein rej an Anij, rej lukkun kajur.

Jet ian ro mõtõn im ro nukin Agboola rar drike e, ke ear jolok mõntin anijnij. Bõtab, ilo Kingdom Hall eo an Dri Kennan ro an Jeova, ear lo ro mõtõn rekãl, me rej tõmak kin katak ko remol jen Baibel eo.

Kiõ Agboola ejela bwe mõtõn jidrik Jeova enaj karreoik lõl in jen nana otemjej im kabwijrõk aolep jerbal ko an dimõn ro. Ilo jemlokõn, E naj kokkure ir aolep. (Reveles̃õn 20:​1, 2, 10) “Ro otemjej rej ber ilo lũp ko” me rej ber ilo ememej eo an Anij, enaj kajerkakbijeik ir bwe ren mour ion lõl. (Jon 5:​28, 29) Ekoba Ebel, aolep ajiri ro Kiñ Herõd ear mõn ir, im million ro jet. Agboola ej tõmak bareinwõt bwe ladrik ro jilu nejin renaj bar mour. Enaj bar eindrein ñõn ro rejitenburu ibõm me rar mij. Ñe aolep armij rein renaj jerkakbiji, renaj kalikar bwe ke rar mij rar jab jela kin jabrewõt men, ekoba men ko armij ro rar kõmõni ñõn koutiej ir.

Ejelok unin am mijõk ro remij. Jen men in, kwon reimanlok ñõn ien eo ñe kwonaj kobalok iben ro renaj jerkakbiji. Mae ien eo, kwon wõnmanlok im katak kin Baibel eo ñõn kakajur tõmak eo am. Kobalok iben ro rej tõmak kin ta eo Baibel ej katakin. Mõkõj im bwijrõk jen am kõmõn menin anijnij ko. Kejbãrok yuk jen dimõn ro ikijen am “kõnõk aolepen ken tõrinae an Anij.” (Epesõs 6:​11) Dri Kennan ro an Jeova renaj mõnõnõ in jibõñ yuk ilo air katak Baibel ibõm ilo ejelok wõnan, ilo air kajerbal buk eo etan, Ta eo Baibel Ej Lukkun Katakin? *

Agboola ejjab mijõk ro remij kiõ, im emwij an katak kilen jumae dimõn ro. Ej ba: “Ijjab jela wõn eo ear mõn ladrik ro jilu nejiõ. Ak, jen ke iar korijer ñõn Jeova, eor jiljilimjuõn ro nejiõ, im ejelok jitõb ro renana rar kejorran ir.”

[Kamelele ko itulal]

[Naan ko ilo peij 14]

Meñe emij leo jãtin, Kein ear jab mijõk bwe enaj irenwõne kin men eo ear kõmõne ñõn e

[Pija eo ilo peij 15]

Agboola ejjab mijõk ro remij kiõ, im emwij an katak kilen jumae dimõn ro