Na o Boifa Bahu?

BATHO ba bantši ba ka araba potšišo ye ka gore, “Aowa. Ke ka baka la’ng ke swanetše go ba boifa?” Ba dumela gore bahu ba hwile e le ka kgonthe. Lega go le bjalo, batho ba dimilione ba kgodišegile gore bahu ba tšwela pele go phela e le meoya.

Kua Benin, ka Bodikela bja Afrika, batho ba bantši ba dumela gore bahu ba ka boa gomme ba bolaya ditho tša malapa a bona. Batho ba rekiša dithoto tša bona goba ba dira dikoloto e le gore ba lefelele dihlabelo tša diphoofolo le meletlo ya go homotša ba leloko bao ba hwilego. Ba bangwe ba diragalelwa ke dilo tšeo di boifišago tšeo ba naganago gore di bakwa ke tutuetšo ya meoya ya bahu.

Motho yo mongwe yo a diragaletšwego ke selo se bjalo ke Agboola, e lego monna yo a dulago kgaufsi le mollwane wa Benin le Nigeria. O re: “Go dirišana le meoya ke karolo ya bophelo bja letšatši le letšatši motseng wa gabo rena. Ke mo go tlwaelegilego gore batho ba hlapiše ditopo e le gore ba di lokišeletše lefase la meoya. Gantši ke be ke kgoboketša mašaledi a sesepe seo se dirišwago go hlapiša ditopo gomme ke a tswaka le matlakala a itšego. Ke moka, ge ke tlotša sethunya sa-ka sa go tsoma ka motswako woo, ke be ke bolela ka go hlaboša mohuta wa phoofolo yeo ke nyakago go e thuntšha. Metlwae ya mohuta wo e tlwaelegile gomme go bonala e be e tloga e atlega. Lega go le bjalo, dibopego tše dingwe tša go dirišana le meoya di be di boifiša.

“Ge barwa ba-ka ba babedi ba e-hwa ka tsela e sa kwešišegego, ke ile ka belaela gore go na le motho yo a ntoyago. E le gore ke kwešiše gore go direga eng, ke ile ka ya go mokgalabje yo mongwe yoo a tsebjago ka matla a gagwe a go dirišana le meoya. O ile a kgonthišetša gore seo ke se belaelago ke therešo. Se sebe le go feta, o ile a hlalosa gore ga bjale barwa ba-ka ba lefaseng la meoya gomme ba letetše mmolai wa bona gore ba tlo ba makgoba a gagwe ge a e-hwa. Mokgalabje yoo o ile a bolela gape gore morwa wa-ka wa boraro le yena o tla diragalelwa ke selo se swanago. Matšatši a sego kae ka morago, morwa yoo le yena o ile a hwa.”

Ke moka Agboola o ile a kopana le John, e lego yo mongwe wa Dihlatse tša Jehofa yo a tšwago nageng ya kgaufsi ya Nigeria. Tlhaloso ya John ya boemo bja bahu e be e theilwe Beibeleng. Tlhaloso yeo e ile ya fetoša bophelo bja Agboola. Le wena e ka fetoša bophelo bja gago.

Na Bahu ba a Phela?

Ke mang yo a ka arabago potšišo ye ka tsela e kaone? Ga se motho le ge e le ofe, go sa šetšwe gore o tsebja gakaakang. Go e na le moo, Jehofa, Mmopi wa dilo ka moka tše phelago “magodimong le lefaseng, . . . dilo tše di bonagalago le dilo tše di sa bonagalego,” ke yena a ka kgonago go e araba. (Bakolose 1:16) O bopile barongwa gore ba phele legodimong gomme batho ba phele mo lefaseng. (Psalme 104:4, 23, 24) Selo se sengwe le se sengwe seo se phelago se ithekgile ka yena. (Kutollo 4:11) Le gona, ela hloko seo Lentšu la Modimo, e lego Beibele, le se bolelago ka lehu.

Jehofa ke motho wa pele wa go bolela ka lehu. O ile a lemoša Adama le Efa gore ba tla hwa ge e ba ba sa mo kwe. (Genesi 2:17) Seo se be se bolela’ng? Jehofa o hlalositše gore: “O lerole; ’me sa xaxo ké xo boêla leroleng.” (Genesi 3:19) Ge motho a e-hwa, mmele o a bola; o boela leroleng. Bophelo bo kgaotša go ba gona.

Adama le Efa ba ile ba se kwe Modimo ka boomo gomme ka baka leo ba ile ba ahlolelwa lehu. Lega go le bjalo, e be e se batho ba mathomo ba go hwa. Morwa wa bona e lego Abele e bile motho wa mathomo wa go hwa. Mogolo’agwe e  lego Kaine o ile a mmolaya. (Genesi 4:8) Kaine o be a sa boife gore ngwanabo yo a hwilego a ka itefeletša. Go e na le moo, Kaine o be a boifa seo batho ba phelago ba ka mo dirago sona.—Genesi 4:10-16.

Nywaga-kgolong e mentši ka morago, Kgoši Heroda o ile a galefa ge balepi ba dinaledi ba be ba mmotša gore go belegwe “kgoši ya Bajuda” nageng ya gagwe. Ka ge a be a ikemišeditše go fediša ngwana yo yoo a bego a tla ba kgoši, Heroda o ile a loga leano la gore bašemanyana ka moka ba nywaga e mebedi le ka tlase ga moo ba bolawe. Eupša morongwa o ile a lemoša Josefa gore a tšee Jesu le Maria gomme “[a] tšhabele Egipita.”—Mateo 2:1-16.

Ge Heroda a e-hwa, morongwa o ile a botša Josefa gore a boele Isiraele, “gobane bao ba bego ba tsoma moya wa ngwana yo monyenyane ba [be ba] hwile.” (Mateo 2:19, 20) Morongwa, yoo ka boyena e bego e le sebopiwa sa moya, o be a tseba gore Heroda a ka se sa hlwa a gobatša Jesu. Josefa o be a se sa boifa Kgoši Heroda yo a hwilego. Lega go le bjalo, Josefa o be a boifa seo morwa yo sehlogo wa Heroda e lego Archelaus a bego a ka se dira. Ka gona, Josefa o ile a iša lapa la gagwe kua Galilea, ka ntle ga tikologo yeo e lego pušong ya Archelaus.—Mateo 2:22.

Dipego tše di re thuša go bona gore bahu ga ba na matla. Lega go le bjalo, dilo tšeo di diragaletšego Agboola di ka hlaloswa bjang?

“Batemona” goba Meoya e sa Hlwekago

Ge e be e le motho yo mogolo, Jesu o ile a kopana le dibopiwa tše kgopo tša moya. Di ile tša lemoga Jesu gomme tša mmitša “Morwa wa Modimo.” Jesu le yena o be a tseba gore dibopiwa tšeo tše kgopo tša moya ke bomang. E be e se meoya ya batho ba hwilego. Go e na le moo, Jesu o ile a di bitša “batemona” goba meoya e sa hlwekago.—Mateo 8:29-31; 10:8; Mareka 5:8.

Beibele e bolela ka dibopiwa tša moya tšeo di botegelago Modimo le tšeo di ilego tša rabela. Puku ya Genesi e re ge Jehofa a be a raka Adama le Efa tšhemong ya Edene, o ile a bea bakerubi goba barongwa ka bohlabela bja tšhemo go thibela motho le ge e le ofe go tsena. (Genesi 3:24) Go bonala le e be e le lekga la mathomo batho ba bona dibopiwa tša moya.

Nako e itšego ka morago, barongwa ba mmalwa ba ile ba tla lefaseng gomme ba iphetoša batho. Jehofa o be a sa ba laela go tla go phetha kabelo le ge e le efe mo lefaseng. Go e na le moo, ba ile ba “[tlogela] bodulo bja bona bjo bo swanetšego” legodimong. (Juda 6) Ba be ba e-na le mabaka a boithati. Ba ile ba tšea basadi bao ba ilego ba belega bana ba bitšwago Banefilimi bao e bego e le motswako wa batho le barongwa. Banefilimi le bo-tatago bona ba marabele ba ile ba tlatša lefase ka bošoro gotee le mehuta a mengwe e mentši ya bobe. (Genesi 6:1-5) Jehofa o ile a lokiša boemo bjoo ka go tliša Meetse-fula a lefase ka bophara mehleng ya Noa. Meetse ao a ile a fediša banna le basadi ba kgopo gotee le bana bao ba tswakanego le barongwa. Go ile gwa direga’ng ka barongwa bao?

Meetse-fula a ile a ba gapeletša gore ba boele legodimong. Lega go le bjalo, Jehofa o ile a ba thibela go boela ‘boemong bja bona bja pele.’ (Juda 6) Beibele e re: ‘Modimo ga se a ka a lesa go otla barongwa ba ilego ba dira sebe, eupša ka go ba lahlela Tatarase, o ba gafetše meleteng ya lefsifsi la kgampi gore ba bolokelwe kahlolo.’—2 Petro 2:4.

Tatarase ga se lefelo le itšego; ke boemo bjo bjalo  ka kgolego, boemo bja go nyatšega bjoo bo thibelago marabele a go dira mediro e itšego. Batemona ga ba sa kgona go iphetoša batho, eupša ba sa dutše ba e-na le matla a magolo gomme ba kgona go tutuetša batho le menagano ya bona. Ba kgona go laola batho le diphoofolo. (Mateo 12:43-45; Luka 8:27-33) Le gona, ba fora batho ka go iphetoša meoya ya batho ba hwilego. Ka baka la’ng? E le gore ba thibele batho go rapela Jehofa ka tsela yeo a e amogelago le go dira gore ba se kwešiše boemo bja kgonthe bja bahu.

Kamoo o ka Fenyago Poifo ya Bahu

Agboola o ile a lemoga go ba ga tlhaologanyo ga ditlhaloso tša Beibele tša mabapi le lehu le gore batemona ke bomang. O ile a lemoga gore o swanetše go ithuta ka mo go oketšegilego. O ile a thoma go bala Beibele le dikgatišo tše theilwego Beibeleng a thušwa ke John. Agboola o ile a homotšwa ke go tseba gore barwa ba gagwe ba robetše mabitleng, ga ba lefaseng la meoya moo ba tlago go ba makgoba a mmolai wa bona.—Johane 11:11-13.

Agboola o ile a lemoga gape gore o swanetše go kgaotša mekgwa ya go dirišana le meoya ka mo go feletšego. O ile a tšhuma dilo ka moka tšeo a bego a e-na le tšona tšeo di sepedišanago le go dirišana le meoya. (Ditiro 19:19) Ba bangwe motseng wa gabo ba ile ba mo lemoša gore meoya ya bahu e be e ka se thabe. Eupša Agboola o be a sa e boife. O ile a latela keletšo e lego go Baefeso 6:11, 12 e rego: ‘Aparang ditlhamo tše feletšego tše di tšwago go Modimo gobane re kakadipana le mebušo le madira a kgopo a moya.’ Ditlhamo tše tše tšwago go Modimo di akaretša therešo, toko, ditaba tše dibotse tša khutšo, tumelo le tšhoša ya moya e lego Lentšu la Modimo. Ditlhamo tše bjalo di matla!

Agboola o ile a se sa ratwa ke bagwera ba bangwe ba gagwe le ba leloko ge a be a tlogela metlwae yeo e bego e sepedišana le go dirišana le meoya. Lega go le bjalo, o ile a hwetša bagwera ba bafsa Holong ya Mmušo ya Dihlatse tša Jehofa ya lefelong la gabo, bao ba dumelago seo Beibele e se rutago.

Ga bjale Agboola o a tseba gore kgaufsinyane Jehofa o tla fediša bokgopo mo lefaseng gaešita le go kgaotša mediro ya batemona. Mafelelong, o tla ba fediša. (Kutollo 20:1, 2, 10) “Bohle bao ba lego mabitleng a kgopotšo,” Modimo o tla ba tsoša mo lefaseng. (Johane 5:28, 29) Ba tla akaretša Abele, bana ba se nago molato bao Kgoši Heroda a ba bolailego gotee le ba bangwe ba dimilione. Agboola o na le tumelo ya gore barwa ba gagwe ba bararo ba tla ba gare ga bona. Baratiwa ba gago bao ba hwilego le bona ba ka ba gare ga bona. Bohle bao ba tsošitšwego ba tla kgonthišetša gore go tloga nakong ya ge ba e-hwa go fihla ge ba tsošwa ba be ba sa kwe selo—ba sa lemoge meletlo yeo ba bego ba e direlwa.

Ga o na lebaka la go boifa bahu. Go e na le moo, o ka fagahlela go boelanywa le baratiwa ba gago ba hwilego. Ge o sa letile seo, ke ka baka la’ng o sa ithute Beibele gore o matlafatše tumelo ya gago? Kopanela le bao ba dumelago seo Beibele e se rutago. Ge e ba o dirišana le meoya, kgaotša gatee-tee. Itšhireletše batemoneng ka go apara “ditlhamo tše feletšego tše di tšwago go Modimo.” (Baefeso 6:11) Dihlatse tša Jehofa di tla thabela go go thuša. Di nea batho thuto ya Beibele e sa lefelelwego di diriša puku e rego Ke Eng Seo ge e le Gabotse Beibele e se Rutago? *

Agboola ga a sa boifa bahu gomme o ithutile kamoo a ka ganetšago batemona ka gona. O re: “Ga ke tsebe gore ke mang yo a bolailego barwa ba-ka ba bararo. Eupša ga e sa le ke thomile go hlankela Jehofa, ke bile le bana ba bangwe gape ba šupa. Ga go motho le ge e le ofe lefaseng la meoya yo a kilego a ba gobatša.”

[Mongwalo wa tlase]

[Ntlhakgolo go letlakala 13]

Agboola ga a sa boifa bahu gomme o ithutile kamoo a ka ganetšago batemona ka gona

[Seswantšho go letlakala 12]

Kaine o be a sa boife gore ngwanabo yo a hwilego a ka itefeletša