Yu e frede den dedewan?

EFU YU ben o aksi sma a sani disi, dan furu fu den ben o piki: „Nôno. Fu san ede mi musu frede den?” Den sma disi e bribi taki den dedewan dede trutru. Ma milyunmilyun sma e bribi trutru taki te wan sma dede a e libi go doro leki wan yeye.

Furu sma na ini a kondre Benin na West Afrika, e bribi taki dedesma kan kon baka fu kiri tra sma na ini a famiri fu den. Den sma drape e seri den gudu fu den, noso den e poti densrefi na paiman, fu di den musu bai meti fu gi leki ofrandi na den dede famiriman fu den, noso fu di den musu du tra sani fu meki den dedewan firi bun. Son sma e du afkodrei, fu di den e denki taki libisma abi wan yeye di e tan libi go doro baka te a sma dede, èn taki a yeye dati man taki nanga den libiwan. Trawan ondrofeni wan lo takru sani èn den e bribi taki na den yeye fu dedesma du dati.

Wan fu den sma disi na Agboola, wan man di e libi leti na mindri Benin nanga Nigeria. A taki: „Afkodrei na wan aladei sani na ini a birti pe mi e tan. Sma abi ala sortu gwenti fu wasi den dedeskin èn fu sreka den fu go na yeye kondre. Te sma ben wasi wan dedeskin èn sopo ben tan abra, dan mi ben gwenti fu teki dati èn moksi en nanga wan tu wiwiri. Dan mi ben e poti en na mi ontigon aladi mi ben e taki nanga wan tranga sten sortu meti mi ben wani sutu. Sma gwenti fu du den sortu sani disi èn a ben e gersi leki den sani dati e wroko trutru. Ma son sani di abi fu du nanga afkodrei ben meki mi frede srefisrefi.

Di tu manpikin fu mi dede èn nowan sma sabi fu san ede, mi bigin denki taki sma wisi den. Fu di mi ben wani de seiker taki na wisi den wisi mi manpikin, meki mi go na wan owru man di sma ben sabi leki wan bun bonuman. Ne a taigi mi taki sma wisi den manpikin fu mi trutru. Ma a ben abi moro takru nyunsu. A taigi mi taki den manpikin fu mi de na yeye kondre e wakti a kiriman fu den. Te a sma dati ben o dede, dan den manpikin fu mi ben o tron futuboi fu en. A bonuman taigi mi tu taki a di fu dri manpikin fu mi ben o dede tu. Baka wan tu dei a manpikin dati dede trutru.”

Bakaten, Agboola miti John, wan Kotoigi fu Yehovah di e libi na Nigeria. Ne John fruteri en san e pasa nanga den dedewan, soleki fa Bijbel e sori. Agboola en libi kenki di a kon sabi san e pasa nanga den dedewan trutru. Yu libi kan kenki tu efu yu kon sabi disi.

Den dedewan e libi ete?

Suma kan gi a trutru piki tapu na aksi disi? Nowan sma, awinsi sortu koni a sma dati abi. Na Yehovah wawan man du dati. En na a Mekiman fu ala libisani „na hemel èn na grontapu, iya, den sani di sma man si, nanga den sani di sma no man si” (Kolosesma 1:16). A ben meki engel fu tan na hemel, èn libisma nanga meti fu tan na grontapu (Psalm 104:4, 23, 24). Ala libisani abi En fanowdu fu man tan na libi (Openbaring 4:11). Fu dati ede, meki wi go luku san Gado en eigi Wortu, Bijbel, e taki fu dede.

Yehovah ben de a fosi sma di taki fu dede. A ben warskow Adam nanga Eva taki den ben o dede efu den trangayesi en (Genesis 2:17). San disi ben wani taki? Yehovah ben taki: „Fu doti yu meki, èn na doti yu o tron baka” (Genesis 3:19). Te wan sma dede, en skin e pori. Na so a e tron doti baka. A no e libi moro.

Fu espresi Adam nanga Eva trangayesi Gado. A strafu fu dati ben de dede. Ma den no ben de den fosi sma di dede. Abel, a manpikin fu den,  ben de a fosiwan. En bigi brada Kain kiri en (Genesis 4:8). Ma Kain no ben frede taki en dede brada Abel ben o kon du en ogri. Na presi fu dati, Kain ben e frede taki na den libiwan ben o du en ogri.​—Genesis 4:10-16.

Furu hondrohondro yari baka dati, Kownu Herodes ben kon bruya di wan tu lukuman taigi en taki wan sma gebore na ini en kondre di ben o tron „kownu fu den Dyu”. Fu di Herodes ben de nomonomo taki a ben musu kiri a sma dati, meki a seni sma fu kiri ala den boi fu tu yari noso moro yongu na ini Betlehem. Ma wan engel ben warskow Yosef fu teki Yesus nanga Maria èn fu „lowe go na Egepte”.​—Mateyus 2:1-16.

Di Herodes dede, na engel taigi Yosef fu drai go baka na Israel, „bika den sma di ben suku fu kiri a yongu pikin, [ben] dede” (Mateyus 2:19, 20). Na engel, di ben de wan yeye tu, ben sabi taki Herodes no ben man du Yesus ogri moro. Yosef no ben abi fu frede a dede Kownu Herodes moro. Ma Yosef ben frede san Arkela-us, na ogri-ati manpikin fu Herodes, ben kan du nanga den ete. Dati meki Yosef nanga en osofamiri go tan na Galilea, pe Arkela-us no ben abi tirimakti.​—Mateyus 2:22.

Den tori disi e yepi wi fu frustan taki den dedewan no abi makti. Ma fa a de dan nanga den sani di Agboola nanga tra sma ondrofeni?

Suma na den „ogri yeye”?

Di Yesus ben de wan bigisma, a ben kisi fu du nanga ogri yeye. Den ben sabi Yesus èn den ben kari en a „Manpikin fu Gado”. Yesus ben sabi den tu. Den no ben de yeye fu libisma di dede. Na presi fu dati, Yesus ben kari den „ogri yeye”.​—Mateyus 8:29-31; 10:8; Markus 5:8.

Bijbel e taki dati yu abi yeye di e gi yesi na Gado èn yeye di ben opo densrefi teige Gado. A buku Genesis e taki dati Yehovah ben yagi Adam nanga Eva komoto na ini a dyari fu Eden fu di den ben trangayesi en. Dan Yehovah poti engel na owstusei fu a dyari fu tapu iniwan sma fu go na ini (Genesis 3:24). Soleki fa a sori, dan disi na a fosi leisi di libisma si yeye.

Baka wan pisi ten, wan lo engel kon na grontapu èn den kenki densrefi kon tron leki libisma. Yehovah no ben seni den fu du wan sani na grontapu. Ma toku, den „gowe libi a reti tanpresi fu den” na hemel (Yudas 6). Den ben wani du san den srefi wani. Ne den teki wefi èn den meki basra pikin di sma ben kari Neifilim. Den Neifilim nanga den ogri papa fu den ben furu grontapu nanga wan lo ogridu (Genesis 6:1-5). Fu tyari wan kaba kon na a situwâsi disi, Yehovah meki wan bigi frudu kon na heri grontapu na ini a ten fu Noa. Boiti den ogriman nanga uma, a frudu kiri den Neifilim tu. Ma san pasa nanga den engel dan?

Fu di a frudu ben sungu heri grontapu, meki den ben abi fu drai go baka na hemel. Ma Yehovah tapu den fu kon baka na „a presi di den ben abi na ini a bigin” (Yudas 6). Bijbel e taki: „Gado no ben hori ensrefi fu strafu den engel di ben sondu, ma a trowe den go na ini Tartarus meki den tan na ini peti pe blaka dungru de, teleki a sa krutu den.”​—2 Petrus 2:4.

Tartarus a no wan spesrutu presi, ma na a situwâsi fu den ogri engel disi. A de neleki den de na ini wan strafu-oso pe den no man du ala san den wani. Aladi den ogri yeye no man kenki densrefi kon tron leki libisma moro, toku den  abi furu makti ete èn den kan abi krakti tapu a frustan nanga a libi fu libisma. Den man basi libisma nanga meti (Mateyus 12:43-45; Lukas 8:27-33). Den e kori sma tu, fu di den e meki sma denki taki den na den yeye fu sma di dede kaba. Fu san ede den e du dati? Na fu di den no wani taki libisma anbegi Yehovah na a fasi di e plisi en, èn fu di den wani bruya libisma, so taki den no sabi san e pasa nanga den dedewan trutru.

San yu kan du fu no frede moro?

Agboola ben kon si taki Bijbel e gi krin piki tapu aksi di abi fu du nanga dede, èn taki Bijbel e sori tu san na den sani noso den yeye di sma e si son leisi. A kon frustan tu taki a ben musu leri moro. Makandra nanga John a bigin leisi Bijbel nanga tra buku di abi fu du nanga Bijbel. Agboola kisi trowstu tu di a kon sabi taki den manpikin fu en de na ini den grebi. A de leki den e sribi. Den no e wakti na yeye kondre fu tron futuboi fu a sma di kiri den.—Yohanes 11:11-13.

Agboola kon frustan tu taki a no musu abi noti fu du moro nanga afkodrei. A bron ala den afkodrei sani fu en (Tori fu den Apostel 19:19). Son birtisma fu en ben warskow en taki den yeye ben o du en ogri. Ma Agboola no ben e frede. A du san skrifi na ini Efeisesma 6:11, 12: „Sorgu taki unu abi ala den sani di Gado gi unu fu feti, . . . bika wi . . . e feti nanga den ogri yeye.” Den sani disi di Gado gi wi fu feti na sani di tru, retidu, a bun nyunsu fu vrede, bribi, nanga a feti-owru fu a yeye, dati na Gado Wortu. Den fetisani disi e komoto fu Gado èn den e wroko heri bun!

Son mati nanga famiriman fu Agboola no ben wani bumui nanga en moro di a tapu nanga den gwenti di abi fu du nanga afkodrei. Ma na ini a birti wan Kownukondre zaal fu Yehovah Kotoigi ben de èn drape a feni nyun mati di e bribi san Bijbel e leri.

Agboola sabi now taki heri esi Yehovah o puru ala ogridu na grontapu èn a o sorgu taki den ogri yeye no man du noti moro. Te fu kaba A o kiri den (Openbaring 20:1, 2, 10). Dyaso na grontapu, Gado o gi „ala den sma di de na ini den grebi” wan opobaka (Yohanes 5:28, 29). Disi wani taki dati a o wiki Abel, den pikin di Kownu Herodes kiri fu soso, nanga milyunmilyun tra sma. Agboola abi a bribi taki Gado o gi den dri manpikin fu en wan opobaka tu. Kande den lobiwan fu yu di dede o kisi wan opobaka tu. Ala den sma disi di o kisi wan opobaka o taigi yu taki den no ben sabi notinoti, fu a ten di den dede teleki den opo baka. Den no o sabi san sma ben du gi den di den dede.

Yu no abi fu frede den dedewan kwetikweti. Na presi fu dati, yu kan abi a howpu taki yu o miti den lobiwan fu yu baka. Ma now, fosi a ten dati doro, a ben o bun fu studeri Bijbel, so taki yu kan kisi wan moro tranga bribi. Suku mati di e bribi san Bijbel e leri. Efu yu e du afkodrei, awinsi na pikinso nomo, dan yu musu tapu nanga dati wantewante. Yu musu abi ’ala den sani di Gado gi yu fu feti’, so taki yu kan kibri yusrefi gi ogri yeye (Efeisesma 6:11). Yehovah Kotoigi o breiti fu yepi yu. Nanga yepi fu a buku San Bijbel e leri wi trutru?, * den e yepi sma fu studeri Bijbel na oso sondro taki den abi fu pai gi dati.

Agboola no e frede den dedewan moro, èn a sabi now fa fu kakafutu gi ogri yeye. A taki: „Mi no sabi suma meki taki den dri manpikin fu mi kon dede. Ma baka di mi bigin dini Yehovah, mi kisi ete seibi pikin. Nowan yeye du den wan ogri.”

[Futuwortu]

[Prenspari pisi na tapu bladzijde 13]

Agboola no e frede den dedewan moro, èn a sabi now fa fu kakafutu gi ogri yeye

[Prenki na tapu bladzijde 12]

Kain no ben frede taki en dede brada ben o kon du en ogri