An Dios Sana an Makakapagligtas sa Daga

“SARONG NAGKIKINANG NA ASUL ASIN PUTING MUTYA.” Siring kaiyan an pagkaladawan kan astronaut na si Edgar Mitchell sa satong daga mantang tinatanaw nia iyan sa madiklomon na espasyo.

An Dios naggibo nin dakulang paghihingoa sa pag-andam kan daga bilang istaran nin tawo. An pagkalalang kaiyan nagpahiro sa mga anghel na magkururahaw “sa pag-omaw.” (Job 38:7) Pakatapos na pag-adalan an mga ngangalasan sa planetang ini, may dahelan man kita na mag-omaw. Igwa nin dakol na komplikadong sistema nin ekolohiya na nagpapangyari na magkaigwa nin buhay digdi sa daga. Sa saro sa pinakaaram na mga sistemang iyan, an berdeng mga pananom naggagamit nin liwanag kan saldang, carbon dioxide sa aire, asin tubig tanganing makagibo nin kakanon. An sekondaryong nagigibo kan prosesong ini iyo an oksiheno na ilinuluwas pasiring sa atmospera​—na mahalagang marhay tanganing kita mabuhay.

Ipinapaheling kan Biblia na ipinagkatiwala nin Dios sa tawo an pangangataman sa daga. (Genesis 1:28; 2:15) Minsan siring, tanganing magdanay na balanse an ekolohiya kan daga, kaipuhan nin tawo an tamang kaisipan. Sa katunayan, kaipuhan niang mamotan an saiyang istaran na daga. Dapat na gustohon niang papagdanayon iyan na magayon. Alagad an tawo tinawan nin sadiring kabotan, kaya may posibilidad na tibaad aprobetsaran nia an daga asin gamiton iyan sa salang paagi. Asin iyan mismo an ginigibo nia. An resulta kan kadaihan nin pag-iingat asin kahanaban nin tawo nagin nakakadestroso.

Sa pagsambit sana nin nagkapira sa mga problema: (1) An pagpalod sa mga kadlagan nakakaapektar sa kakayahan kan daga na gamiton an carbon dioxide, na puede man na magin dahelan nin bako nanggad normal na mga kamugtakan nin panahon. (2) An sobrang paggamit nin kemikal na panglaban sa peste minagadan sa mga insekto na may mahalagang marhay na papel sa ekolohiya, kaiba an pagdara nin pollen sa mga pananom. (3) An sobrang paninira asin polusyon sa kadagatan saka mga salog nakakapadikit na gayo sa mga sira. (4) An mahanab na paggamit sa natural na mga rekurso kan daga nagpapangyari na dikit na sana an natatada para sa masurunod na henerasyon asin hinohona na nagpaparikas sa pag-init kan globo. Sinasabi nin nagkapirang espesyalista sa ekolohiya na an pagkatunaw nin mga glesyer asin an pagkatipak nin darakulang yelo sa Artiko asin Antartika ebidensia nin pag-init kan globo.

Huling nagdadakol an natural na kalamidad, tibaad may mga nagsasabi na an daga garo baga nagbabalos, na huli kaiyan nagsasakit an tawo. Itinao sa sato nin Dios an daga na mayong bayad. An tawo garo man sana tinawan nin libreng istaran. (Genesis 1:26-29) Minsan siring, ipinapaheling kan mga pangyayari sa kinaban ngonyan na dakol na tawo an mayong pagmawot na manteneron an saindang magayon na istaran na daga. Imbes, an tawo sibot sa saiya mismong paslong mga kamawotan asin aktibidad. Sa katunayan, sia nagin maraot na nag-iistar dian​—na “nagraraot sa daga,” siring kan ihinula sa Kapahayagan 11:18.

Ipinapaheling kan hula sa Biblia na ipinagboot kan Makakamhan sa Gabos na Dios, si Jehova​—an Kaglalang kan mga sistema nin ekolohiya na nagsusustenir sa buhay sa daga—​na nag-abot na an panahon tanganing “pahaleon” an maraot na mga nag-iistar dian. (Sofonias 1:14; Kapahayagan 19:11-15) Bago pa biyong raoton nin tawo an daga, an Dios mahiro​—na mas amay kisa sa tibaad inaasahan niato. * (Mateo 24:44) Totoo nanggad, an Dios sana an makakapagligtas sa daga.

[Nota sa Ibaba]