Diyos Lamang ang Makaluwas sa Yuta

“NAGGILAKGILAK NGA ASUL UG PUTI NGA MUTYA.” Mao kanay paghubit sa astronot nga si Edgar Mitchell sa yuta samtang iya kining gitan-aw taliwala sa mangitngit nga kawanangan.

Giandam pag-ayo sa Diyos ang yuta aron puy-an sa mga tawo. Tungod niini, ang mga anghel misinggit “sa pagdayeg.” (Job 38:7) Kon atong tun-an ang katingalahang mga butang sa atong planeta, kita usab makadayeg niini. Dunay daghang kuti kaayo nga mga proseso nga nagsustento sa kinabuhi dinhi sa yuta. Usa sa labing iladong proseso mao ang paggamit sa berdeng mga tanom ug kahayag gikan sa adlaw, carbon dioxide gikan sa hangin, ug tubig aron makahimog pagkaon. Kini nga proseso magpatunghag oxygen diha sa atmospera—nga gikinahanglan aron kita mabuhi.

Gipadayag sa Bibliya nga gipiyalan sa Diyos ang tawo sa pag-atiman sa yuta. (Genesis 1:28; 2:15) Apan, gikinahanglan nga ang tawo hustog tinamdan aron magpabilin ang maayong kahimtang sa kinaiyahan. Sa pagkatinuod, angay niyang mahalon ang planeta nga iyang gipuy-an. Gikinahanglan usab nga siya determinado sa pagmentinar sa kanindot niini. Apan ang tawo dunay kagawasan, busa posible nga gamiton niya kini sa pag-abuso sa yuta. Ug mao gayod kanay gihimo sa tawo karon. Tungod sa pagpasagad ug kawalay pagpakabana sa mga tawo, ang yuta grabeng nadaot.

Ang pipila niini mao: (1) Ang pagpamuril sa kalasangan nakaapektar sa katakos sa yuta sa pagsuhop sa carbon dioxide, ug miresultag pagkadaot sa klima. (2) Ang sobrang paggamit ug mga kemikal nakapuo sa daghang insekto, nga makatabang unta sa pagpabunga sa mga tanom. (3) Ang sobrang pagpangisda ug ang polusyon sa mga dagat ug sapa nakapakunhod pag-ayo sa gidaghanon sa mga isda. (4) Tungod sa hinakog nga paggamit sa kahinguhaan sa yuta, halos wala nay mahibilin alang sa umaabot nga mga henerasyon ug kini gituohan nga maoy nakapasamot sa pag-init sa klima. Ang mga eksperto sa kinaiyahan nagtuo nga ang pag-init sa klima maoy hinungdan sa pagkatunaw ug pagkatipak sa dagko kaayong mga yelo sa Artiko ug Antartika.

Tungod sa nagkadaghang kalamidad, ang pipila nagtuo nga ang yuta nanimalos ug nagpahinabog kadaot sa mga tawo. Gipapuyo sa Diyos ang tawo sa yuta nga walay bayad ug Iya kining gipiyal kanila. (Genesis 1:26-29) Apan, ang mga panghitabo sa kalibotan karon nagpakita nga daghang tawo ang walay pagpakabana sa pagmentinar sa kaanindot sa yuta. Hinunoa, ang tawo puliki sa iyang hinakog nga mga tinguha ug mga buluhaton. Sa pagkatinuod, siya dili maayong piniyalan—nga “nagalaglag sa yuta,” sumala sa Pinadayag 11:18.

Sumala sa mga tagna sa Bibliya, ang Labing Gamhanang Diyos, si Jehova, ang Maglalalang sa yuta nga may katakos sa pagsustento sa kinabuhi, nagpahayag nga sa dili madugay iyang “wagtangon” ang maong mga tawo. (Sofonias 1:14; Pinadayag 19:11-15) Sa dili pa bug-os nga madaot sa tawo ang yuta, ang Diyos molihok na—ug kini hapit na gayong mahitabo. a (Mateo 24:44) Sa pagkatinuod, Diyos lamang ang makaluwas sa yuta.

[Footnote]