Abasi Ikpọn̄ Ekeme Ndinyan̄a Isọn̄

“N̄KPỌUTO EMI EDIDE BLUBLU ONYỤN̄ ỌDỌN̄ỌDE N̄KEM.” Edgar Mitchell emi edide aka-ọfiọn̄ ọkọdọhọ ke isọn̄ nnyịn etie ntre ke ini enye akadade ke enyọn̄ okụt isọn̄.

Abasi ama enen̄ede ada ini etịm isọn̄ ọnọ owo nte ebietidụn̄. Mme angel ẹma ‘ẹsio n̄kpo’ idara ke ini ẹkebotde isọn̄. (Job 38:7) Ke ima ikokụt mme ndyọ ndyọ n̄kpọ oro ẹdude ke ekondo emi, nnyịn n̄ko imenyene ntak ndisio n̄kpo idara. Ediwak awak-n̄kukọhọ ndutịm ẹdu emi ẹnamde uwem aka iso ke isọn̄. Ediwak owo ẹnen̄ede ẹmehe ye kiet ke otu ndutịm emi, utọ nte awawa ikọn̄ ndida un̄wana utịn, ofụm emi ẹkotde carbon dioxide, ye mmọn̄, nnam udia mmọ. Nte mmọ ẹnamde emi, mmọ ẹsision̄o ofụm emi ẹkotde oxygen, emi nnyịn isin̄wekde idu uwem, ẹdọn̄ ke ekondo.

Bible owụt ke Abasi ọkọdọhọ owo ekpeme isọn̄. (Genesis 1:28; 2:15) Nte ededi, man mme ndutịm ke ekondo ẹka iso ẹda ẹfọn, akana owo enyene eti edu. Ke nditịm ntịn̄, akana enye ama isọn̄ emi enye odụn̄de. Akana ọdọn̄ enye nditịm enye n̄kama ediye ediye. Edi ẹma ẹnọ owo ifụre ndimek se enye amade, ntre enye ekeme ndimek nditahade nnyụn̄ ndiọk ndikama isọn̄. Ndien ata ukem ukem se enye anamde edi oro. Utịp nditen̄ ye idiọkitọn̄ owo enyene ndịk.

Yak isiak ndusụk mfịna emi: (1) Ndiwot akai iyakke isọn̄ enen̄ede enyene aba ukeme ndibọ carbon dioxide, ndien emi ekeme nditiene nnam eyo ada akaha m̀mê edịm edep akaha. (2) Ediduọk ibọk uwot utan̄kpọ awak akaha owot n̄kpri unam oro ẹsinamde nti utom, emi esịnede edin̄wam mme eto ẹn̄wụm mfri. (3) Edikọ n̄kpọ n̄kaha ye edisabade inyan̄ ye akpa iyakke iyak odu aba ke mmọn̄. (4) Edidia inyene isọn̄ ke en̄weme iyakke n̄kpọ ẹsụhọ ẹnọ mme emana ini iso, ndien ẹdọhọ ke emi n̄ko anam ererimbot ofiop akaha. Ndusụk mme andikpep n̄kpọ mban̄a isọn̄ ẹdọhọ ke ata ikpọ ebok ice nditara ye ikpọ ebok ice ndibehede ke Ata Edem Edere ye ke Ata Edem Usụk ẹwụt ke ererimbot ofiop akaha.

Sia mme oto-obot afanikọn̄ ẹkade-ka iso ndiwak, ndusụk owo ẹkeme ndidọhọ ke isọn̄ ayat esịt onyụn̄ anam afanikọn̄ esịm owo. Abasi ọkọdọhọ nnyịn idụn̄ ke isọn̄ ke mfọn. (Genesis 1:26-29) Nte ededi, mme n̄kpọntịbe ndondo emi ẹwụt ke mme owo inyeneke udọn̄ nditịm ediye isọn̄ ebietidụn̄ mmọ n̄kama. Utu ke oro, mmọ ẹsịn idem ẹnam se idọn̄de mmọ. Ke nditịm ntịn̄, ndiọi owo emi ẹdụn̄de ke isọn̄ emi ‘ẹsobo isọn̄,’ nte ẹkebemde iso ẹtịn̄ ke Ediyarade 11:18.

Ntịn̄nnịm ikọ Bible owụt ke Jehovah, Ata Ọkpọsọn̄ Abasi, Andinam mme ndutịm oro ẹnamde uwem ẹka iso ẹdu ke isọn̄, ọmọnọ uyo ete ke ini emekem ndision̄o ndiọi owo mfep ke isọn̄. (Zephaniah 1:14; Ediyarade 19:11-15) Mbemiso owo abiatde isọn̄ ofụri ofụri, Abasi ọmọn̄ anam n̄kpọ—ndien emi ekeme ndisọp n̄kan nte ikerede. * (Matthew 24:44) Ke akpanikọ, Abasi ikpọn̄ ekeme ndinyan̄a isọn̄.

[Ikọ Idakisọn̄]