Ñandejára añoite ikatu osalva ñande yvy

“MOROTĨ HA HOVY HA OJAJÁI ASY.” Pe astronáuta Edgar Mitchell heʼi péicha ojehechaha ñande yvy ñamañáramo hese mombyry guive.

Ñandejára ningo heta ombaʼapovaʼekue ko yvýre ikatu hag̃uáicha yvyporakuéra oiko ipype. Ohechávo upe hembiapokue umi ánhel ojepopetepa vyʼágui (Job 38:7). Ha ñande avei ñañeñandu péicha jahechávo umi mbaʼe porãita oĩva ko yvýpe. Oĩ ningo hetaiterei mbaʼe oipytyvõva ojeiko hag̃ua ipype. Pór ehémplo umi plánta oiporu kuarahy, y ha dióxido de carbono onohẽva yvytúgui, ha ojapo chugui oikotevẽva okakuaa hag̃ua. Upekuévo opoi oxígeno ñande jarrespiráva.

Ñañeporandumína: Mávapa oñangarekovaʼerã ko yvýre? La Biblia ohechauka Ñandejára omoĩ hague yvyporakuérape oñangareko hag̃ua hese (Génesis 1:28; 2:15). Ojapo hag̃ua upéva haʼekuéra oipotavaʼerã ko yvy iporã asy ha ohayhuvaʼerã avei. Jaikuaa entéro yvypóra orekoha liverta oiporavo hag̃ua ojapótava. Upéicharõ ikatu odesidi vai ha ombyai ko yvy. Ha upeichaite oiko. Yvyporakuéra itaryrýi ha noñatendeporãi rupi ko yvýre, oñehundipaitéma ohóvo.

Pór ehémplo: 1) Ojeityetereígui umi yvyra máta, pe yvytu ndaikatuvéima ipotĩ porã ha ndojeiporãvéima chugui pe dióxido de carbono. Upévare heta lugárpe okyeterei, ou séka térã oiko umi torménta vai. 2) Ojeporuetereígui venéno oñepohãno hag̃ua plantakuéra, ojejukapa umi vichoʼi iporãva ko yvýpe g̃uarã, ijapytépe umi oipytyvõva umi plánta hiʼa hag̃ua. 3) Umi már ha rríope ojepeskaiterei ha oñemongyʼapa, upéicha rupi saʼipaitéma hemby umi pira. 4) Ojeporu vaipa umi mbaʼe porã oĩva ñande yvýpe. Upévare saʼíma hemby oiporu hag̃ua umi mitã onasétava amo gotyove. Ojeʼe avei upévare káda áño hakuveha ohóvo. Oĩ espesialísta heʼíva upéicha rupi hykupaha umi iélo guasu oĩva Ártico ha Antártidape.

Hetave rupi umi torménta vai ha umichagua sarambi guasu oĩ heʼíva ko yvy ombouha jey yvyporakuérape umi mbaʼe vai ojapóva hese. Añetehápe ningo ko yvy Ñandejára mbaʼe, ha haʼe oheja jaiko ipype ojerureʼỹre mbaʼeve hekovia (Génesis 1:​26-29). Péro umi mbaʼe oikóvare jahecha heta hénte noñangarekoseiha ko yvy porãitére. Upéva rangue, haʼekuéra opensa ijehénte ha ombaʼapo ijupe g̃uarãnte. Noñangarekoporãi pe óga oñemeʼẽvare chupekuéra, ‘ombyai’ guei heʼiháicha Apocalipsis 11:18 [ÑÑB].

La Biblia ohechauka Ñandejára Ipuʼakapáva, ñande Apohare Jehová, ojapo hague ko yvy ha opa mbaʼe oĩva ipype. Upévare Haʼe omosẽta entéro noñangarekoséivape ko yvýre (Sofonías 1:14; Apocalipsis [Revelación] 19:​11-15). Upéicharõ yvyporakuéra ohundiete mboyve ko yvy Ñandejára ojokóta chupekuéra (Mateo 24:44). a Añetehápe Ñandejára añoite ikatu osalva ko yvy.

[Nóta]