Ang Dios Lamang ang Makasalbar sang Duta

“NAGAINGGAT NGA ASUL KAG PUTI NGA HIYAS.” Amo sini ang paglaragway sa duta sang isa ka astronot nga si Edgar Mitchell samtang ginalantaw niya ini sa tunga sang mangitungito nga kahawaan.

Ginhanda gid sing maayo sang Dios ang duta agod mangin puluy-an sang tawo. Ang iya pagpanuga nagpahulag sa mga anghel nga ‘maghugyaw.’ (Job 38:7) Ang dalayawon nga pagkahuman sang duta nagahatag man sa aton sing rason nga maghugyaw. Madamo sing masibod nga sistema sa aton palibot nga nagasakdag sang kabuhi sa duta. Ang isa ka sistema nga pamilyar sa aton amo ang paggamit sang mga tanom sang silak sang adlaw, carbon dioxide gikan sa hangin, kag tubig agod makapatubas sing pagkaon. Ini nga sistema nagapatubas man sang oksiheno nga kinahanglanon gid agod mabuhi kita.

Ginapakita sang Biblia nga gintugyan sang Dios sa tawo ang pagbantay sa duta. (Genesis 1:28; 2:15) Apang agod indi maguba ining masibod nga mga sistema sa duta, dapat nga maayo ang panimuot sang tawo. Kinahanglan nga higugmaon niya ang iya puluy-an nga duta. Dapat nga gusto man niya nga atipanon ini sing maayo agod indi ini maguba. Apang bangod may kahilwayan ang tawo sa paghimo sang iya gusto, puede niya abusuhan ang duta kag balewalaon ang iya salabton. Kag amo gid sini ang ginhimo sang tawo. Ang pagpabaya kag kakagod sang tawo nagresulta sa tuman nga kahalitan.

Ang pila sa makahalalit nga mga problema amo: (1) Ang patarasak nga pagpamulod sang mga kahoy nga amo ang nagakontrol sa kadamuon sang carbon dioxide sa atmospera sang duta, nagresulta sa pagbuang sang klima. (2) Ang sobra nga paggamit sang mga hilo nagpapas sang mga insekto nga may importante nga mga papel sa aton palibot, lakip ang polinasyon sang tanom. (3) Ang sobra nga pagpangisda kag polusyon sa kadagatan kag mga suba nga amo ang rason sa pagkaubos sang mga isda. (4) Ang wala kontrol nga paggamit sing kinaugali nga manggad sang duta halos nag-ubos sini. Diutay na lang ang nabilin para sa masunod nga henerasyon kag ginapatihan man nga amo ini ang kabangdanan sang pag-init sang globo. Madamo sa mga nagatuon tuhoy sa palibot ang nagasiling nga ang pagkatunaw kag pagkatiphag sang mga yelo sa Arctic kag sa Antarctica pamatuod sang pag-init sang globo.

Ginahambal sang iban nga nagabalos ang duta paagi sa mga kalamidad nga nagahalit sa mga tawo. Wala kita ginasukot sang Dios sa aton pagpuyo sa duta. (Genesis 1:26-29) Apang ginapakita sang mga nagakatabo subong sa kalibutan nga madamo nga tawo ang wala sing luyag nga atipanon ang iya puluy-an nga duta. Sa baylo, ang igtalupangod sang mga tawo nasentro sa makagod nga handum kag mga hilikuton. Gani maathag nga ang mga tawo indi maayo nga mga pumuluyo kay ‘ginalaglag nila ang duta,’ subong sang ginsiling sa Bugna 11:18.

Ang Labing Gamhanan nga Dios nga si Jehova amo ang Manunuga sang mga sistema sa palibot nga nagasakdag sang kabuhi sa duta. Nagtagna sia sa Biblia nga “pahalinon” niya ang indi maayo nga mga pumuluyo. (Sofonias 1:14; Bugna 19:11-15) Antes pa man bug-os nga mahalitan sang mga tawo ang duta, mapat-od naton nga magapasilabot gid ang Dios. Malapit na niya ini himuon. * (Mateo 24:44) Huo, Dios lamang ang makasalbar sang duta.

[Nota]