Nzambi Kaka Olenda Vuluza O Ntoto

“MA KIANKEZIMI KIAVINDUMUKA KINA YE SE KI’EBUNDI YE MPEMBE.” I wau kayikila o ntoto eto Edgar Mitchell on’olongokanga oma ma ntetembwa vava kamona e nswaswani vana vena o ntoto ye tombe kina muna ngambwila.

Nzambi mayingi kavanga mu kubika o ntoto kimana wantu bazingila vo. O nsem’andi wafila ambasi mu yengoloka ye “kiese.” (Yobi 38:7) Avo tulongokele mavangu m’esivi mena ova ntoto, oyeto mpe tulenda yengoloka ye kiese. Vena ye lekwa yayingi ya mpimpita muna nsema isadisanga zingu mu nungunuka ova ntoto. Kimosi muna lekwa yayi, i titi yankunzu ivwang’o mfunu a ntemo a mwini, dióxido de carbono itukanga muna tembwa ye maza mesadilwanga mu lamba madia. E lekwa yayi isadisanga mu vaikisa e tembwa eki kina vo kiamfunu kikilu muna zingu kieto.

Nkand’a Nzambi usonganga vo Nzambi wavana muntu e kiyekwa kia lunga-lunga o ntoto. (Etuku 1:28; 2:15) O ntoto muna sala e nsala yambote, ufwete lungwa-lungwa kwa muntu. Dialudi vo o muntu kafwete zola e ntoto. Kafwete vava vo walungwa-lungwa mu mpil’ambote. Kansi, wau vo muntu wavangwa ye nswa wa kisolela, ediadi disonganga vo olenda wo lunga-lunga yovo fwasa wo. I wau kikilu kavanga o muntu, wafwasa wo. O lembi lunga-lunga o ntoto ye fu ki’eloko mfwilu miayingi kitwasanga.

E miaka mfwilu i miami: (1) O fwasa e mfinda, mu kulula kwina e ngolo za ntoto za mina e tembwa kiambi. Evangu diadi, i diyivisanga e nsungi. (2) Wantu besadilanga yovo sia nlongo mu vonda mikolobi muna mpatu, kansi e nlongo miami mivondanga má yawonso yamoyo eyi ivanganga salu kiamfunu kia savulwisa o ntoto. (3) O lowa kwayingi ye nsafulwa ya mbu ye nkoko, mu fukisa yina e mbizi za maza. (4) O sadila lusalu lwa ntoto mu mpil’ambi, mfwilu ditwasanga, muna kuma kiaki e mbandu yilanda ke yiwana lekwa yambote ko. E vangu diadi, diwokesanga e ngyanduka ya tembwa ova ntoto. Akaka mun’awana belongokanga oma ma nsema, bevovanga vo, e matadi manzizi mu zeloka mena, ekiaki i kuma tumwenanga e ngyanduka yasaka ya tembwa ova ntoto.

Wau vo e sumbula yampwena mu wokela kaka ina, akaka nanga balenda vova vo o ntoto usinga nwana diaka yo twasa mpasi kwa wantu. Nzambi watuvana ntoto twazingila vo e ngovo. Tuna nze muntu ozingilanga mu nzo angani lembi lombwa vo kafuta. (Etuku 1:26-29) Kieleka, oma mevangamanga ova nza mesonganga vo ulolo wa wantu ke bena ye luzolo lwa lunga-lunga ntoto ko. Kadi, o muntu olutidi kivana mu mavangu m’eloko ye zolela ya yandi kibeni. Elo, o muntu ke mfutidi a nzo ambote ko. ‘Ofwasang’e nza’ nze una watekwa yikwa muna Lusengomono 11:18.

Ungunza wa Nkand’a Nzambi usonganga vo Yave wa Nzambi a Mpungu-ngolo una vo i Mvangi, olunga-lunganga mioyo miawonso ova ntoto, wavova vo vekala ye ntangwa kekwiza “yinga” afutidi ambi a nzo. (Sefaniya 1:14; Lusengomono 19:11-15) Una muntu kafwasidi mvimba ko o ntoto, Nzambi osinga vanga diambu muna ntangwa ina ke tuyindula nkutu ko. * (Matai 24:44) Elo, Nzambi kaka olenda vuluza o ntoto.

[Mvovo Vana Yand’a lukaya]