Ki Mulimu Feela ya Kona ku Sileleza Lifasi

“NTO YE NDE KA KU FITISISA YE BENYA, YA MUBALA O MUSWEU NI WA NDILU.” Kona mwa naa taluselize Edgar Mitchell, caziba wa za mbyumbyulu, kuli kona mo li bonahalela lifasi la luna ha naa li talimela mwa lififi la mwa mbyumbyulu.

Mulimu naa ezize misebezi ye mituna hahulu ha naa bupa lifasi kuli batu ba pile ku lona. Ku bupiwa kwa lifasi ne ku tahisize kuli mangeloi a ‘luluweze.’ (Jobo 38:7) Ni luna ha lu ituta lika ze komokisa ze mwa lifasi le, lu susuezwa ku itumela. Ku na ni lika ze ñata ze komokisa ili ze tahisa kuli libupiwa li kone ku pila fa lifasi. Ye ñwi ya lituto ze zibahala hahulu i bonisa kuli limela ze tala li itusisanga liseli la lizazi, moya o bizwa carbon dioxide, ni mezi kwa ku panga lico. Limela ha li panganga lico cwalo, li panganga ni moya o bizwa oxygen mwa mbyumbyulu, ili o lu konisa ku zwelapili ku pila.

Bibele i bonisa kuli Mulimu naa file batu musebezi wa ku babalela lifasi. (Genese 1:28; 2:15) Niteñi, batu ne ba swanela ku ba ni pabalelo kuli lika za butokwa mwa lifasi li zwelepili ku ba teñi ka sipimo se si swanela. Mane ne ba swanela ku lata lifasi le ba pila ku lona. Ne ba swanela ku itatela ku bukeleza bunde bwa lona. Kono batu ne ba filwe tukuluho ya ku eza mo ba batela, kacwalo ne ba kona ku iketela ku sinya lifasi ni ku sa li babalela. Mi luli batu se ba iketezi ki ku sinya lifasi. Ku tokwa pabalelo kwa batu ku tahisize sinyeho ye tuna.

Ki a matata a sikai e ba tahisize batu: (1) Ku lemaka mishitu ye miñata ku palelwisa lifasi ku ba ni maata a ku anya moya o bizwa carbon dioxide, ili moya o ekeza kwa ku tahisa kuli ku cise hahulu. (2) Milyani ye miñata hahulu ye itusiswa mwa njimo i feza tukokwani to tu eza misebezi ya butokwa mwa pupo, ku kopanyeleza cwalo ni musebezi wa ku nunisa licalo ka muuku o zwa kwa lipalisa za licalo ze ñwi. (3) Ku yamba hahulu litapi ni ku silafaza mawate ni linuka ku sweli ku feza hahulu litapi. (4) Ku itusisa hahulu lika za ka taho za lifasi ku tahisa kuli masika aa sa taha a si ke a fumana lika zeo mi ku ekeza kwa ku cisa hahulu kwa lifasi. Bocaziba ba ba bona za pupo ba bulela kuli, bikoto bye bituna bya mezi a kangezi bye bi mwa mawate ni kwa mafelelezo a mawate, bi shengunukiswa ki ku cisa kwa lifasi.

Bakeñisa kuli likozi za ka taho li sweli za ekezeha, batu ba bañwi ba kana ba bulela kuli lifasi li kutisa misuha ka ku tahiseza batu bumai. Mulimu naa lumelelize batu ku pila mwa lifasi ku si na tifo. (Genese 1:26-29) Niteñi, ze ezahala kacenu mwa lifasi li bonisa kuli batu ba bañata ha ba na takazo ya ku babalela lifasi le linde le ba pila ku lona. Kono batu ba patehile feela ku peta litakazo za bona za buitati ni misebezi ya bona. Batu ba bonisize kuli ki bayahi ba ba maswe—ba “ba shandaula lifasi,” sina mo ku polofitezwi kwa Sinulo 11:18.

Bupolofita bwa Bibele bu bonisa kuli Mulimu Ya Maata Ote, yena Jehova, ya li Mubupi wa pupo ye konahalisa bupilo ku ba teñi, u shaezi kuli nako ki kale i fita ya ku “leleka” bayahi ba ba maswe. (Zefania 1:14; Sinulo 19:11-15) Pili batu ba si ka sinyeleza kale lifasi, Mulimu u ka nga muhato honafa, luna lu si ka libelela. * (Mateu 24:44) Kaniti, ki Mulimu feela ya kona ku sileleza lifasi.

[Litaluso za kwatasi]