Anu Nzambi ke udi mua kupandisha buloba

“MBIJU BIDI BIBALAKANA NE DIKALA DITOKE DISAMBAKANE NE DIA BLE.” Mêyi aa ngakamba Edgar Mitchell (muena ngendu ya mulu mu mabulungu) bua kumvuija muvuaye umona buloba mu mîdima ya mu tshibuashibuashi.

Nzambi uvua muenze bivule bua kulongoluela bantu buloba bua kuikalabu tshisombelu tshiabu. Difukibua diabu diakasaka banjelu bua kuela mbila “bua disanka.” (Yobo 38:7) Patudi tujikija petu kulonga malu a kukema a buloba buetu ebu, tudi petu ne bua kututa nkashi ya disanka. Kudi bintu bia bungi bidi biteke biambulangane pa buloba apa bidi bituambuluisha bua kuikala anu ne muoyo. Tshimue tshia ku bintu ebi tshidi tshimanyike bimpe ntshia mudi mitshi ne bisonsa biangata nsese ya dîba ne kapepa ka munda mua bantu ne mua nyama ne mâyi, bibitata bua kutupatuila bia kudia. Bishadile bia ku mudimu udi mitshi yenza eu bitu bilua kupatuka bu kapepele kimpe katudi tueyela bua kushala ne muoyo.

Bible udi wamba ne: Nzambi wakapesha muntu mudimu wa kulama buloba. (Genese 1:28; 2:15) Kadi bua bintu bionso bidi pa buloba kuendabi bimpe mu diumvuangana, muntu uvua ne bua kuanji kuikala ne meji mimpe. Tuambe ne: muntu uvua ne bua kunanga buloba budiye musombele. Uvua ne bua kujinga mua kubulama buimpe bulenga kumona. Kadi muakalua muntu ne tshipedi tshia kudisunguila malu, uvua nansha mua kusungula bua kubupawula ne kubunyangakaja. Ke tshiakenzaye menemene. Bulamavi bua muntu bua buloba ne lukuka luende mbibuvuambule.

Tshilejilu: 1) Dibutula dia metu si didi dipangisha buloba bua kumina kapepa ka munda mua bantu ne nyama, bidi mua kunyangakaja luendu lua luya ne mashika pa buloba bibi. 2) Dipitshisha manga a dishipa tuishi si nditukepeshe, patu tutu tuambuluisha buloba bikole, bu mudi bua kufikisha bikunyibua ku diela mamuma bimpe. 3) Diloba dinekesha ne diela milungu mu mâyi a misulu ne mbuu ndikepeshishe bungi bua mishipa bikole. 4) Lumpukusu bua mabanji a muinshi mua buloba ludi lushiya palu bana ba bikondo bitshilualua kabayi tshintu; kabidi bantu mbamone ne: malu aa mmafuane kubandisha luya pa buloba ne lukasa. Bamue bamanyi ba malu a buloba badi bamba ne: dienguluka dia mikuna ya neige ivua mikuatakane ne dia mabue a mashika a ku Nord kua buloba ne a ku Sud kuabu ntshijadiki tshia mudi buloba bukuate mudilu.

Bu mudi bipupu bienda anu bivule, bamue bantu badi mua kuamba ne: buloba budi buluisha bantu bubakebela anu makenga. Nzambi wakatupesha buloba tshianana bua kusombapu. (Genese 1:26-29) Kadi, malu adi enzeka lelu pa buloba adi aleja ne: bantu ba bungi kabena ne dijinga dia kulama buloba muaba muimpe wa kusombela. Muntu mmuditue anu mu didikebela diende disanka ne malu ende nkayende. Muntu mmudileja mudiye mufutshidi mubi udi ‘ubutula buloba’ anu muvuabi bileja mu Buakabuluibua 11:18.

Bible udi wakula mêyi a tshiprofete ne: Yehowa Nzambi wa Bukole buonso, Mufuki wa bintu bionso bidi biambuluisha bua kuikala ne muoyo pa buloba, udi wamba ne: tshikondo tshiakumbanyi tshia “kumbusha” bantu bonso badi banyanga buloba. (Sefanya 1:14; Buakabuluibua 19:11-15) Kumpala kua bantu kunyangabu buloba bonso nkong, Nzambi neadiangatshile malu ende mu bianza. Mu matuku makese emu neakumbaje bualu ebu pa dîba ditudi katuyi batekemene. * (Matayo 24:44) Bushuwa, anu Nzambi nkayende ke udi mua kusungila buloba.

[Mêyi adi kuinshi]