Alla Biss Jistaʼ Jsalva l-Art
“ĠOJJELL ILEQQ ABJAD U BLU.” Dan hu l-mod kif l-astronawta Edgar Mitchell iddeskriva d-dinja tagħna hekk kif ħares lejha bil-kuntrast taʼ l-ispazju mudlam warajha.
Alla għamel sforz kbir biex jipprepara l-art bħala dar għall-bniedem. Il-ħolqien taʼ l-art qanqal lill-anġli biex jgħajtu “b’tifħir.” (Ġob 38:7) Wara li nistudjaw l-għeġubijiet taʼ din il-pjaneta, aħna wkoll ikollna għalxiex nagħtu tifħir. Hemm ħafna ekosistemi komplikati li jippermettu li l-ħajja tiffjorixxi fuq l-art. Il-veġetazzjoni ħadra tuża d-dawl tax-xemx, il-karbonju dijossidu mill-arja, u l-ilma biex tagħmel l-ikel f’waħda mill-iktar sistemi magħrufin. Xi ħaġa li toħroġ minn dan il-proċess hija l-ħruġ taʼ l-ossiġnu fl-atmosfera—li hu vitali għall-eżistenza tagħna.
Il-Bibbja turi li Alla fada lill-bniedem biex jieħu ħsieb l-art. (Ġenesi 1:28; 2:15) Biex l-ekoloġija taʼ l-art tibqaʼ bilanċjata, però, il-bniedem ried ikollu attitudni xierqa. Fil-fatt, hu kellu jħobb l-art li hi d-dar tiegħu. Hu kellu jkun irid iżommha fi stat mill-isbaħ. Imma l-bniedem ġie mżejjen bil-libertà taʼ l-għażla, allura kien hemm iċ-ċans li hu jagħżel li jisfrutta l-art u jimmaniġġaha ħażin. U dan hu eżatt dak li għamel. Ir-riżultati tat-traskuraġni u r-regħba tal-bniedem huma devastanti.
Biex insemmu biss ftit mill-problemi: (1) It-tqaċċit tal-foresti qed jeffettwa l-abbiltà taʼ l-art li tassorbi l-karbonju dijossidu li, mill-banda l-oħra, jistaʼ jikkontribwixxi għal kundizzjonijiet tat-temp iktar estremi. (2) L-użu eċċessiv taʼ pestiċidi qed jeqred popolazzjonijiet taʼ insetti li għandhom irwoli ekoloġiċi vitali, inkluż li jdakkru l-uċuħ tar-rabaʼ. (3) Is-sajd eċċessiv u t-tinġis taʼ l-ibħra u x-xmajjar qed inaqqsu drastikament il-popolazzjonijiet tal-ħut. (4) Minħabba li r-riżorsi naturali taʼ l-art qed jintużaw b’mod rgħib, ftit qed jibqaʼ minn dawn ir-riżorsi għall-ġenerazzjonijiet futuri u hemm min qed jaħseb li dan qed jgħaġġel il-proċess tas-sħana globali. Bħala evidenza tas-sħana globali li qed tiżdied, xi ambjentalisti jsemmu l-glaċieri tas-silġ li qed jiċkienu u l-blokok tas-silġ fil-baħar li qed jinqalgħu mill-Artiku u l-Antartiku.
Minħabba li d-diżastri naturali qed jiżdiedu, xi wħud għandhom mnejn jgħidu li l-art qed tiġġieled lura, u tikkaġuna miżerja lill-bniedem. Alla tana l-art mingħajr ħlas. Fil-fatt, il-bniedem jgħix fiha mingħajr ma jħallas xi kera. (Ġenesi 1:26-29) Madankollu, il-ġrajjiet li qed iseħħu bħalissa fid-dinja juru li ħafna nies m’għandhom ebda xewqa li jieħdu ħsieb l-art li hi d-dar meraviljuża tagħhom. Minflok, il-bniedem jinsab okkupat bix-xewqat u l-attivitajiet egoistiċi tiegħu stess. Hu fil-fatt wera li hu okkupant ħażin taʼ l-art—‘qed jeqred l-art,’ kif inhu mbassar f’Rivelazzjoni 11:18.
Il-profezija tal-Bibbja turi li Alla li Jistaʼ Kollox, Ġeħova, il-Ħallieq tas-sistemi ekoloġiċi li jsostnu l-ħajja fuq l-art, ħareġ digriet li wasal il-waqt li “jkeċċi” l-okkupanti l-ħżiena. (Sofonija 1:14; Rivelazzjoni 19:11-15) Qabel ma l-bniedem jeqred l-art, Alla se jaġixxi—forsi qabel ma nistennew aħna. a (Mattew 24:44) Tabilħaqq, Alla biss jistaʼ jsalva l-art.
[Nota taʼ taħt]
a Għal iktar informazzjoni dwar l-urġenza taż-żminijiet, ara l-browxer Ibqaʼ Għassa! pubblikat mix-Xhieda taʼ Ġeħova.