Say Dios Labat so Makapangisalba ed Dalin
Say Dios Labat so Makapangisalba ed Dalin
“SAY MANKIRLAP A MABLIN BATO A KOLOR ASUL TAN AMPUTI.” Ontan so impaneskribe na astronaut a si Edgar Mitchell ed planetan dalin legan ton sankabantag itan a mabitabitar ed ambilunget a liwang.
Impreparan maong na Dios so dalin a panayaman tayo. Lapud saray palsa to, apakiwas iray anghel ya oneyag ‘ed liket.’ (Job 38:7) Ontan met so nalikna tayo sano naaralan tayo so makapakelkelaw iran bengatla ed sayan planeta. Dakdakel iray komplikadon sistema ed kaliberliber tayo (ecosystem) a manggawan posible a mantultuloy so bilay ed dalin. Diad sakey a kabkabat a sistema, saray birdin tanaman et manguusar na sinag na agew, carbon dioxide, tan danum pian makapawala iray naakan da. Say sakey nin papawalaen na satan a proseso et say oksiheno a makanakana ed bilay tayo.
Ipapanengneng na Biblia ya impudir na Dios ed totoo so pangasikaso ed dalin. (Genesis 1:28; 2:15) Anggaman ontan, pian mansiansian balanse so ekolohya, nakaukolan a nawalaan so totoo na dugan awawey. On, nepeg tayon aroen iyan ayaman tayon dalin. Nakaukolan a walay panlabay tayon pansiansiaen iya a marakdakep. Bangbalet say too et naikdan na bulos a panagdesisyon, kanian walay posibilidad a pilien to a deralen tan abusoen so dalin. Et ontan a mismo so ginawa to. Talagan mapeligro so epekto na ag-inkamaalwar tan inkaagum na too.
Niraya so pigara ed saray problema: (1) Say pakakaupot na kakiewan so mangaapekta ed abilidad na dalin a manepsep na carbon dioxide, kanian magmamaliw a sobran mauran odino sobran ampetang so panaon. (2) Say alabas a panangusar na pesticide so manguupot ed saray insekto a walaay makana iran betang ed ekolohya, kalaktip lay polinasyon. (3) Say alabas a panagsigay pati say polusyon ed dayat tan ilog et manreresulta ed idaraiset na sira. (4) Lapud maagum a panangusar ed natural a kaykayamanan na dalin, ngalngalin anggapo lay natilak parad onsublay iran henerasyon tan nayarin satan so makasengeg no akin a mas onloloor so ipepetang na globo odino global warming. Ibabaga na pigaran environmentalist a say katutunaw na angkakabaleg a yelo ed Arctic tan Antarctic et ebidensya na global warming.
Lapud mas ondarakel so nagagawan kalamidad, nayarin ikuan na arum ya ombabawi lay dalin, kanian papairapen toy totoo. Inter na Dios iyan dalin a libren panayaman tayo. (Genesis 1:26-29) Anggaman ontan, say kaplesan iran nagagawa ed mundo et mangipapanengneng ya anggapoy pilalek na dakel a totoo a mantinien iyan marakdakep ya ayaman da. Andi lay piimano ra et saray makasarilin pilalek tan kimey da. Kanian nibagan say totoo et nagmaliw a mauges a miaayam, a diad Apocalipsis 11:8 et sikaray adeskribin “mamabagbag [odino, manederal] ed dalin.”
Ipapanengneng na propesiya ed Biblia a say Makapanyarin-amin a Dios, si Jehova, say Manamalsa na saray sistema ed kaliberliber a manusustuni ed bilay diad dalin, so angiyabawag a sinmabi lay panaon pian “paekalen” iray mauges a manaayam. (Sofonias 1:14; Apocalipsis 19:11-15) Antis nin sigpot a naderal na totoo iyan planeta, tampol ya onkiwas so Dios, a mas masasakbay ni nen say iilaloan tayo. * (Mateo 24:44) On, talagan say Dios labat so makapangisalba ed dalin.
[Paimano ed leksab]
^ par. 7 Parad kaaruman ya impormasyon nipaakar ed inkaganatan lay panaon, nengnengen so brosyur a Mantultuloy a Manbantay! ya impalapag na saray Tasi nen Jehova.