Suku Eye Lika O Pondola Oku Teyuila Ilu Lieve

“OMOTA YI KUETE EVALA LI TEKÃVELUA KUENDA ELI LI YELA.” Ulume umue onoño o tukuiwa hati Edgar Mitchell, eye wa vangula olondaka evi poku tukula oku litepa ku kasi pokati kilu, longongo.

Suku wa lulika ongongo lesanju lialua oco omanu va tungemo. Upange waco wa vetiya ovangelo oku kaluka ‘lonjolela.’ (Yovi 38:⁠7) Noke lioku konomuisa oku fina kuilu lieve, tu vetiyiwavo oku yolela. Kilu lieve kuli oviluvo vialua vi komõhisa. Ovikũla vialua vi sukila utanya, ofela kuenda ovava oco vime apako. Handi vali, ovikũla vi yelisa ofela ya lĩha okuti ci tu kuatisa oku kala lomuenyo.

Embimbiliya li lekisa okuti Suku wa eca komunu watete ocikele coku tata ongongo. (Efetikilo 1:28; 2:​15) Oco ovina kilu lieve vi talavaye ciwa omunu waco, wa sukilile oku kuata ovituwa via sunguluka. Eye wa sukilile oku sola ongongo ndonjo yaye, loku yi tata ciwa. Pole, omo okuti omanu va kuete elianjo lioku li nõlela ovo muẽle eci va yongola, va siata oku tata lãvi ongongo. Eci oco ca siata oku pita tunde kosimbu. Kuenje omo liocipululu kuenda usambinja, omanu va siata oku kuata ovitangi vialua.

Tu konomuisi ovitangi vimue: (1) Oku nyõliwa kuovisenge ku kasi oku koka owuya walua, kuenda ku tateka ongongo oku kuata ovovo awa. (2) Ovihemba via siata oku kapiwa kovikũla vi ponda otuvipuka tu kuete upange woku yelisa ongongo kuenda oku tuta onuto kovikũla. (3) Oku sĩlisa ovava o vo kalunga kuenda o volondui, lupange woku pipa u kasi oku lingiwa kolonepa viosi, ku kasi oku tepulula ombisi voluali. (4) Omo liocipululu, ovokuasi oluali a kasi oku tepuluka, kuenje ovitumbulukila vi keya kovaso vika kuata ovitangi vialua. Olonoño vialua via limbuka okuti oluali lu kasi kohele, momo ocikokoto ci sangiwa vokalunga ko Artiku lo Antartida ci kasi oku yenguluka lowuya.

Omo lioku li vokiya kuovilemawe, vamue va siata oku popia hati ongongo yi kasi oku kokela ovitangi komanu. Suku wa lulika omunu oco a kale vongongo lelianjo lioku linga eci a panga. (Efetikilo 1:​26-​29) Pole, ovolandu a lekisa okuti omanu valua ka va yongola okuti ilu lieve li amamako luwa walio. Ovo va yongola lika oku linga ovipango viavo muẽle. Kuenje, va linga olonungi vĩvi kuenda “va nyõla ilu lieve,” ndomo ca popiwa kelivulu Liesituluilo 11:⁠18.

Ovitumasuku vi lekisa okuti Suku Tõlo, Yehova, Ululiki wovina viosi kilu lieve, wa sokiya otembo yoku “nyõla” olonungi viosi vĩvi. (Sofoniya 1:14; Esituluilo 19:​11-​15) Suku ka ka ecelela okuti omanu va nyõla oluali. * (Mateo 24:​44) Omo liaco, Suku eye lika o tẽla oku teyuila ilu lieve.

[Atosi pombuelo yamẽla]