Palameni Kuli Lesa

Kapingula Uucita Ifyalungama Lyonse

Ukutendeka 18:22-32

BUSHE batini tamutemwa nga mwamona umuntu uwaba ne mibele iisuma pamo ngo mulinganya kabili uushaba na kapaatulula? Fwe bantunse tatufwaya ukutufyenga. Lelo, ica bulanda ca kuti muno calo lelo muli sana ulufyengo. Nomba kwaliba Kapingula uo tulingile ukucetekela, no yu ni Yehova Lesa. Lyonse alacita ifyalungama. Kuti twaumfwikisha bwino ici nga twabelenga ifyo Yehova alanshenye na Abrahamu, ifyalembwa pa Ukutendeka 18:22-32. *

Ilyo Yehova aebele Abrahamu ukuti alefwaya ukuyamona ifyo ifintu fyali mu Sodomu na mu Gomora, Abrahamu alitiinine ukuti abantu balungama, ukubikako na Lote umwana wa kwa munyina, bali no kufwilamo. Abrahamu apapeete Yehova ati: ‘Bushe cine cine umulungami na o mukamonawila kumo no mubifi? Tutile mu musumba muli abalungami amakumi yasano (50), bushe tamwakabelele ulya musumba uluse pa mulandu wa balungami amakumi yasano abalimo?’ (Ifikomo 23, 24) Lesa atile tali no konaula imisumba nga mwali no kusangwa abalungami 50. Abrahamu apapeete Yehova imiku isano na kabili, mpaka aipusha Lesa nga kuti aonaula umusumba nga mwasangwa fye abalungami 10. Imiku yonse iyi, Lesa atile tali no konaula iyi misumba nga ca kuti mwasangilwe abalungami abafula ifi.

Bushe Abrahamu alepaashanya na Lesa? Awe nakalya! Nga ca kuti alepaashanya na Lesa, nga alangile ukuti ali wa cilumba icine cine. Inshila Abrahamu alelandilamo yalangile ukuti alicindike Lesa kabili ali-icefeshe. Umwine atile ali “lukungu fye kabili imito.” Pa kulanda na Lesa limo aleti “mukwai.” (VeIfikomo 27, 30-32) Kabili amashiwi ya kwa Abrahamu yalangile ukuti alicetekele ukuti Yehova wa mulinganya. Imiku ibili Abrahamu atile Lesa te kuti onawile abalungami pamo na babifi. Uyu muntu wa cishinka alandile ifyo acetekele ukuti “Kapingula wa pano calo ponse” akacita “icalungama.”—Icikomo 25.

Bushe ifi Abrahamu alandile fyali fya cine? Kwena fimo fyali fya cine e lyo fimbi fyena tafyali fya cine iyo. Alilubile ilyo atile mu Sodomu na mu Gomora mwali abalungama ukucila pali 10. Lelo alilungike ilyo atile Lesa te kuti ‘onawile umulungami kumo no mubifi.’ Ilyo Lesa aonawile iyi misumba umo abantu balecita ifyabipa, Lote uwali umulungami e lyo na bana bakwe abanakashi babili balipuswike ilyo bamalaika babafwile.—2 Petro 2:7-9.

Bushe cinshi ili lyashi litusambilisha pali Yehova? Ilyo Yehova aebele Abrahamu ukuti alefwaya ukuyamona ifyo ifintu fyali muli iyi misumba, alefwaya ukuti Abrahamu na o alandepo. E lyo Lesa alikutike ilyo cibusa wakwe Abrahamu alelanda ifyali ku mutima. (Esaya 41:8) Ili lyashi lilatusambilisha bwino ukuti Yehova ni Lesa uwaicefya, uushisuula ababomfi bakwe aba pa calo lelo alabacindika! Ca cine, tufwile ukucetekela Yehova ne mitima yonse, pantu ni Kapingula uucita ifyalungama lyonse.

[Futunoti]

[Icikope pe bula 24]

Abrahamu alipapeete Yehova pali Sodomu na Gomora