Ñañemoag̃uíkena Ñandejárare

Haʼe ningo peteĩ Hués ojapóva hekoitépe opa mbaʼe

Génesis 18:​22-32, ÑÑB

HEKOJOJA ha ndoporoporavói... Ajépa jaguerohory peichagua tapichápe! Enterovénte ningo jaipota ñande rapichakuéra ñandetrata porã, péro koʼág̃a rupi ndaipóri upéva. Upéicharõ jepe, oĩ gueteri peteĩ Hués ikatúva jajerovia hese ha katuete ojapo opa mbaʼe hekopete. Mávapa hína upéva? Ñandejára Jehová. Jahechamína peteĩ istória omombeʼúva la Biblia ha ohechaukáva koʼã mbaʼe jaʼéva. Upe istória jatopa Génesis 18:​22-32-pe. Upépe omombeʼu mbaʼéichapa Jehová oñemongeta Abrahán ndive. a

Jehová heʼírõ guare Abrahánpe ohunditaha Sodoma ha Gomorra, haʼe ojepyʼapyeterei umi tapicha hekopotĩvare oikóva upépe, pór ehémplo isovríno Lot. Upévare oporandu Ñandejárape: ‘Añete piko rehundipáta hekopotĩva hekovaíva ndive? Ikatu oĩ 50 hekopotĩva pe távape, rehundíta piko avei ha nereperdonamoʼãi pe táva umi 50 hekopotĩva rayhupápe?’ (versíkulo 23, 24). Ñandejára opromete Abrahánpe nohundimoʼãiha Sodoma ha Gomorra oĩramo upépe 50 tapicha hekopotĩva. Upéicharõ jepe, cinco vése voi Abrahán oporandu jey jey Jehovápe. Amo ipahápe katu heʼi chupe ohundítapa umi siuda oĩramo 10 tapicha hekopotĩva upépe. Ha Jehová heʼi jey chupe nohundimoʼãiha.

Ojapóvo péicha, Abrahán ndahaʼéi ndojeroviáiva Ñandejárare hekojojaha. Haʼe ningo noñemombaʼeguasúi ha ohechauka orrespetaitereiha Jehovápe oñeʼẽ jave hendive. Abrahán ningo heʼi ijehe haʼe ‘yvy timbo ha tanimbunteha’ voi. Ha heʼi jepi avei Jehovápe: “Aníkena ndepochýtei” (versíkulo 27, 30-32). Abrahán ohechauka avei ojeroviaitereiha Jehová hekojojaha. Upévare dos vése voi heʼi “arakaʼeve” Ñandejára nohundimoʼãi hekopotĩva umi iñañáva ndive. Abrahán ojeroviaiterei “ko yvy Ñembojovakehára” ndojapomoʼãiha mbaʼeve “hekopeʼỹ” (versíkulo 25).

Oĩ porãpa opa mbaʼe Abrahán heʼivaʼekue? Heta mbaʼe heʼivaʼekue oĩ porã, péro heta mbaʼépe ojavy avei. Haʼe ningo tuichaiterei ojavýkuri heʼírõ guare Sodoma ha Gomórrape oĩne hag̃ua 10 tapicha hekopotĩva. Péro ndojavyiete heʼírõ guare Ñandejára ‘arakaʼeve nohundimoʼãiha hekopotĩva iñañáva ndive’. Upévare voi Jehová ohundítarõ guare Sodoma ha Gomorra, omondo mokõi ánhel oguenohẽ hag̃ua upégui Lot ha itajyrakuérape (2 Pedro 2:​7-9).

Mbaʼépa jaikuaave Jehovágui ko istória rupive? Jahechakuaa Jehová oguerohoryha iñamígo Abrahánpe. Upévarente Haʼe omombeʼu chupe mbaʼépa ojapotahína ha oheja Abrahánpe heʼi mbaʼépa opensa upévare. Avei Jehová ohendu porãnte Abrahánpe heʼírõ guare mbaʼépa oipyʼapy chupe (Isaías 41:8). Péicha jahecha Jehová noñemombaʼeguasuiha, oguerohory ha omombaʼe katu hembiguaikuérape. Upévare ikatu jajerovia hese, Haʼe ningo pe Hués ojapóva hekoitépe opa mbaʼe.

[Nóta]

[Nóta oĩva taʼanga ndive páhina 24]

Abrahán ojerure Jehovápe oiporiahuverekomi hag̃ua umi tapicha hekopotĩvape, oikóva Sodoma ha Gomórrape