Mangin Suod sa Dios

Isa ka Hukom nga Nagapadapat sing Hustisya sa Tanan nga Tion

Genesis 18:22-32

HUSTISYA. Pagkamatarong. Pagkawalay nadampigan. Indi bala nga nanamian ka sa sining maayo nga mga kinaiya? Natural lang nga luyag naton ang patas nga pagtratar. Apang, makapasubo nga talagsa na lang makita ang hustisya sa kalibutan subong. Sa pihak nga bahin, may isa ka Hukom nga masaligan gid naton, si Jehova nga Dios. Ginahimo niya ang husto sa tanan nga tion. Maathag ini sa paghambalanay ni Jehova kag ni Abraham, nga narekord sa Genesis 18:22-32. *

Sang ginsugid ni Jehova kay Abraham ang Iya desisyon nga usisaon ang kahimtangan sa Sodoma kag Gomorra, nabalaka si Abraham sa kaluwasan sang mga matarong nga nagapuyo didto, lakip na sang iya hinablos nga si Lot. Nakitluoy si Abraham kay Jehova: “Papason mo bala ang matarung upud sa malauton? Pananglit may kalim-an ka matarung sa sulud sang banwa; papason mo bala kag indi papaiwayon ang duug tungud sa kalim-an ka matarung nga yara sa sulud niya?” (Bersikulo 23, 24) Nagsiling ang Dios nga indi niya paglaglagon ang siudad kon may 50 ka matarong nga tawo didto. Lima pa ka beses nga nakitluoy si Abraham kay Jehova tubtob nga ang 50 nangin 10 na lang. Sa kada pakitluoy ni Abraham, nagasiling ang Dios nga indi sia manglaglag kon may amo sadto nga kadamuon sang mga matarong nga masapwan sa siudad.

Ginbais bala ni Abraham ang Dios? Wala. Mangin wala sing pagtahod si Abraham kon ginbais niya ang Dios. Ang tono sang panghambal ni Abraham nagapakita sing pagrespeto kag pagpaubos. Gintawag pa gani niya ang iya kaugalingon nga “yab-ok kag abo” lamang. (Bersikulo 27) Dugang pa, ginapakita sang mga tinaga ni Abraham ang iya pagsalig sa pagkamakatarunganon ni Jehova. Indi lang isa kundi duha ka beses nga nagsiling si Abraham nga ‘malayo sa Dios’ nga laglagon ang mga matarong upod sa mga malaut. Ginpabutyag ni Abraham ang iya pagsalig nga magahimo “sing matarung ang Hukom sang bug-os nga duta.”—Bersikulo 25.

Husto bala si Abraham? Huo kag indi. Nagsayop sia sa paghunahuna nga may yara bisan napulo na lang ka matarong nga tawo sa Sodoma kag Gomorra. Apang husto sia sa pagsiling nga indi gid matabo nga patyon sang Dios ang “matarung upud sa malauton.” Sang ginlaglag sang ulihi sang Dios ining malaut nga mga siudad, ang matarong nga si Lot kag ang iya duha ka anak nga babayi naluwas sa bulig sang anghel.—2 Pedro 2:7-9.

Ano ang matun-an naton tuhoy kay Jehova sa sini nga hitabo? Paagi sa pagpahibalo kay Abraham sang iya tuyo nga usisaon ang mga siudad, daw kaangay lang nga gin-agda sia ni Jehova nga makighambal sa Iya. Nian mapailubon nga namati si Jehova samtang ginapabutyag sang iya abyan nga si Abraham ang iya mga kabalaka. (Isaias 41:8) Ginatudluan kita sini nga si Jehova isa ka mapainubuson nga Dios, nga nagapadungog sang iya mga alagad. Gani, makasalig gid kita sing bug-os kay Jehova, ang Hukom nga nagapadapat sing hustisya sa tanan nga tion.

[Nota]

[Retrato sa pahina 24]

Nakitluoy si Abraham kay Jehova tuhoy sa Sodoma kag Gomorra