Eqqartuussisoq tamatigut naapertuilluartumik iliortartoq
Guutimut palligunniarit
Eqqartuussisoq tamatigut naapertuilluartumik iliortartoq
Mosesimik allakkat siulliit 18:22-32
NAAPERTUILLUASSUSEQ. Ingasaassinianngitsuuneq. Kinaassusersiortuunnginneq. Pissutsit nersornangaartut tamakku kajungernarput, ilaa? Uagut inuit inunnguutsitsinnit naapertuilluartumik pineqarnissarput pisariaqartipparput. Ajoraluartumik ullumikkut silarsuaq naapertuilluannginnermik ulikkaarpoq. Eqqartuussisoqarporli tatigisinnaasatsinnik — tassa Jehova Guuti. Tamatigut naapertuilluartumik iliortarpoq. Jehovap Aaperaallu oqaloqatigiinneranni, Mosesimik allakkat siulliit 18:22-32-mi oqaluttuarineqartumi, tamanna erseqqippoq. *
Jehovap oqarfigimmani Sodomami Gomorramilu pissutsinik misissuiniarluni Aaperaap iluartunik illoqarfinni taakkunaniittoqaratarsinnaanera isumakuluutigaa, ilaatigut jornguni Loti. Aaperaap Jehova ima kimigiiserfigaa: ‘Ilumut iluartut piiassanerpigit iluaatsunut ilanngullugit? Immaqa iluartunik 50-inik illoqarfimmi tassaniittoqarpoq. Ilumut illoqarfik taanna isumakkeerfigiumanngiliuk uffa 50-inik iluartortaqartoq?’ (Versit 23, 24) Guuti akivoq illoqarfiit nungutinniarnagit taakkunani 50-iinnarnik iluartoqarpat. Aaperaap suli tallimariarluni Jehova kimigiiserfigaa quliinnanngornissaasa tungaanut. Aperigaangat Guuti oqartarpoq illoqarfinni taama amerlatigisunik iluartoqarpat illoqarfiit nungutinniarnagit.
Aaperaap Guuti naqqissorpaa? Naamerluinnaq! Taamaappat kannguttaannerussagaluarpoq ingasattoq! Aaperaalli ataqqinnittumik maniguuttumillu oqaluppoq. Issuinnaanerarlunilu arsaannaanerarpoq. (Versi 27) Aammattaaq Aaperaap oqaasiini erserpoq Jehovap ingasaassinianngitsuunera qularutiginngikkaa. Jehovap iluartunik iluaatsunut ilanngullugit nungutitsiniarnera Aaperaap ataasiaannarani marloriarlunili ajornarnerarpaa. Aamma ima aperivoq: “Nunarsuarmik tamarmik eqqartuussisuusoq eqqortuliussannginnerpa?” — Versi 25.
Aaperaap oqaasii ilumoorpat? Apeqqut taanna akineqarsinnaavoq aappimik naaggamillu. Tassami Sodomami Gomorramilu minnerpaamik qulinik iluartoqartoq isumaqarami kukkuvoq. Ilumoorluinnarporli oqarami Guuti ‘iluartunik iluaatsunut ilanngullugit piiaanngisaannartoq’. Kingusinerusukkut Guutip illoqarfiit guutiitsuuffiusut taakku piuneerummagit Loti iluartuusoq taassumalu panii marluk inngilinit ikiorneqarlutik annapput. — 2 Petrusi 2:7-9.
Oqaluttuaq tamanna Jehova pillugu sumik ilinniarfigaarput? Jehovap Aaperaat oqaluttuukkamiuk illoqarfinnik pineqartunik misissuinissaminik Aaperaat isummaminik saqqummiussinissaanut kajumissaarpaalusooq. Taavalu Jehovap ikinngutini Aaperaat uumammiuminik aniatitsinerani naammagittarluni tusarnaarpaa. (Esaja 41:8) Tamatumani nuannersumik paasivarput Jehova Guutiusoq maniguuttoq kiffaminik nunamiittunik pingaartitsisoq ataqqinnittorlu. Aap, Jehovamik, eqqartuussisumik tamatigut naapertuilluartumik iliortartumik, tatiginnilluinnarnissatsinnut pissutissaqarluarpugut. (wp09 01/01-E)
[Quppernerup ataani ilanngussaq]
^ imm. 1 Taamani Jehovap inngili, sinnerluni oqaaseqartartoq, sinniisigaa. Assersuutissaq alla Mosesimik allakkat siulliit 16:7-11, 13-mi allaatigineqarpoq.
[Qupp. 29-mi assiliartaq]
Aaperaap Jehova kimigiiserfigaa Sodomamut Gomorramullu tunngatillugu