Ababelenga Ino Magazini Balepusha Ukuti

Cinshi Lesa Ashasukila Amapepo Yamo?

Lesa taifinya. Nga filya fine umufyashi umusuma atemwa nga ca kuti abana bakwe balelanda kuli ena ukwabula umwenso, e fyo na Yehova Lesa afwaisha ukukutika ku mapepo yesu. Lelo nga filya fine umufyashi wa mano acita, Lesa na o alikwata umulandu ashicitila fimo ifyo abantu bamulomba. Bushe Lesa alitufisa icalenga ukuti alecita ifi nelyo alitweba muli Baibolo umulandu acitile fyo?

Umutumwa Yohane alondolwele ukuti: “Kabili uku e kucetekela uko twamucetekela, ukuti conse ico twalomba, cikulu fye nacilingana no kufwaya kwakwe, alatumfwa.” (1 Yohane 5:14) Ifyo tulelomba fifwile ukulingana ne fyo Lesa afwaya. Bamo bapepela ifintu ifishilingana no kufwaya kwa kwa Lesa, pamo nga ukupepela ukuti bacimfye mu fyangalo fya kushitikapo indalama. Bambi nabo bapepa ukuti ifintu fyende bwino lintu balecita ifyabipa. Umusambi Yakobo alisokelepo pa kubomfya bubi bubi ipepo muli uyo musango, atile: “Mulalomba, lelo tamupokelela, pantu mulomba bubi bubi, pa kuti mufibomfye ku kuisansamusha fye mwe bene.”—Yakobo 4:3.

Elenganyeni amabumba yabili aya bakateya wa mupila. Amabumba yonse yabili yalepepa ukuti yacimfye. Te kuti twenekele Lesa ukwasuka amapepo ya kulwishanya aya musango yo. Cimo cine na mapepo bapepa ino nshita aya kuti aba mu fyalo fibili bonse balepepa ukuti bacimfye abanabo mu nkondo.

Abashikonka amafunde ya kwa Lesa, amapepo yabo tayasukwa. Inshita imo Yehova aebele bakapepa ba cimbepa ati: “Nangu ca kuti mulafusha amapepo yenu, ine nshumfwa; iminwe yenu yaisulamo fye ukusumya umulopa.” (Esaya 1:15) Baibolo itila: “Uushifwaya ukumfwa amafunde—ne pepo lyakwe line lya bunani.”—Amapinda 28:9.

Lelo Yehova, lyonse alasuka amapepo ya bakapepa bakwe ababombesha ukufwaya ukumubombela ukulingana ne fyo umwine afwaya. Nomba bushe ico calola mu kuti alabapela fye conse ico bamulomba? Awe. Moneni ifilangililo fimo ifyalembwa mu Baibolo.

Mose aleumfwana sana na Lesa; nomba na o wine alelomba ‘ukulingana no kufwaya kwa kwa Lesa.’ Mose inshita imo alilombele Lesa icishalingene no kufwaya kwakwe, apapeete ukuti Lesa amusuminishe ukwingila mu calo ca Kanaani, atile: “Lekeni mpite no kumona icalo cisuma icili bushilya bwa Yordani.” Nomba pa mulandu no lubembu Mose acitile pa kubala, Lesa amwebele ukuti takengile muli cilya calo. Yehova tasuminishe Mose ifyo alombele, aishilemweba fye ukuti: “Fyafula ifyo wasosa! Wibwekeshapo ukulanda kuli ine pali uyu mulandu.”—Amalango 3:25, 26; 32:51.

Umutumwa Paulo apapeete ukuti Lesa amwafwe ukufumya ico aitile ati “umuunga mu mubili.” (2 Abena Korinti 12:7) Uyu “muunga” nalimo wali bulwele bwa menso alwele ubushalepola, nelyo ni filya balemucusha ku balekaanya umulimo alebomba e lyo na “bwananyina ba bufi.” (2 Abena Korinti 11:26; Abena Galatia 4:14, 15) Paulo alembele ukuti: “Napapeete Shikulu imiku itatu ukuti amfumye uyu muunga.” Lelo Lesa alishibe ukuti nga ca kuti Paulo alitwalilile ukushimikila te mulandu no bu bwafya bukalamba ubwa “muunga mu mubili,” ali no kwishiba amaka ya kwa Lesa kabili ali no kumucetekela sana. Lesa tacitile ifyo Paulo alombele, lelo amwebele ukuti: “Mu kunaka kobe e mo amaka yandi yamonekesha.”—2 Abena Korinti 12:8, 9.

Ca cine, Lesa alishiba ifintu ukutucila kabili alamona nga ca kuti ico twalomba kuti catuwamina. Yehova lyonse alatupeela ifyo tulefwaya nga amona ukuti fisuma, cikulu fye fileumfwana no kufwaya kwakwe ukwalembwa mu Baibolo.