Saji ni Mɛi ni Kaneɔ lɛ Biɔ

Mɛni Hewɔ Ahaaa Sɔlemɔi Komɛi Ahetoo Lɛ?

Nyɔŋmɔ ji mɔ ko ni anyɛɔ abɛŋkɛɔ lɛ waa. Taakɛ tsɛ ni yɔɔ suɔmɔ lɛ sumɔɔ ni ebii kɛ lɛ awie kɛjɛ amɛtsuiiaŋ lɛ, nakai nɔŋŋ hu Yehowa Nyɔŋmɔ sumɔɔ ni wɔtsi wɔbɛŋkɛ lɛ yɛ sɔlemɔ mli. Shi taakɛ eji yɛ tsɛ fɛɛ tsɛ ni yɔɔ nilee lɛ gbɛfaŋ lɛ, Yehowa yɛ yiŋtoi kpakpai ahewɔ ni ehaaa wɔnibimɔi komɛi ahetoo lɛ. Shi ani wɔnyɛŋ wɔle yiŋtoi nɛɛ, aloo ejie yiŋtoi nɛɛ akpo yɛ Biblia lɛ mli?

Bɔfo Yohane gbala mli akɛ: ‘Enɛ ji ekãa ni wɔyɔɔ yɛ ehiɛ lɛ, akɛ, kɛji wɔba nɔ ko yɛ esuɔmɔ naa lɛ, eboɔ wɔ toi.’ (1 Yohane 5:14) Esa akɛ wɔnibimɔi lɛ kɛ Nyɔŋmɔ suɔmɔnaa nii akpã gbee. Mɛi komɛi sɔleɔ kɛbiɔ nibii ni eyɛ faŋŋ akɛ amɛjeee Nyɔŋmɔ suɔmɔnaa nii—ákɛ nɔkwɛmɔnɔ lɛ, koni amɛye loto, loo koni amɛye kunim yɛ asɔshwɛmɔ ko mli. Mɛi krokomɛi hu sɔleɔ kɛ yiŋtoi ni ejaaa. Kaselɔ Yakobo bɔ kɔkɔ eshi sɔlemɔi ni asɔleɔ yɛ gbɛ ni ejaaa nɔ lɛ akɛ: “Nyɛkpaa fai hu, ni nyɛnaaa, ejaakɛ fai fɔŋ nyɛkpaa, koni nyɛkpata nii lɛ ahiɛ yɛ nyɛkɔnɔi amli.”—Yakobo 4:3.

Ákɛ nɔkwɛmɔnɔ lɛ, ŋɔɔ lɛ akɛ, bɔɔltswalɔi akui enyɔ ni kɛ amɛhe yaatswa bɔɔl lɛ ateŋ kuu fɛɛ kuu sɔle koni eye kunim. Nilee yɛ mli akɛ wɔɔmu sane naa akɛ Nyɔŋmɔ haŋ sɔlemɔi enyɔ ni kɛ amɛhe kpãaa gbee nɛɛ ahetoo. Nakai nɔŋŋ wɔbaanyɛ wɔkɛɛ yɛ ŋmɛnɛŋmɛnɛ beaŋ tai ni awuɔ, ni afãi enyɔ lɛ fɛɛ sɔleɔ ni amɛye kunim lɛ ahe.

Nyɔŋmɔ boŋ mɛi ni kpoɔ akɛ amɛkɛ emlai lɛ aaatsu nii lɛ asɔlemɔi atoi. Be ko lɛ, ehe bahia ni Yehowa akɛɛ osato jálɔi komɛi akɛ: “Kɛ́ nyɛsɔle babaoo tete lɛ, miboŋ nyɛ toi: nyɛniji ahe eyimɔ kɛ lá!” (Yesaia 1:15) Biblia lɛ kɛɔ akɛ: “Mɔ ni jieɔ etoi yɛ mla toiboo nɔ lɛ, esɔlemɔ tete lɛ nihiinii ni.”—Abɛi 28:9.

Nɔ ni tamɔɔɔ nakai lɛ, Yehowa baabo sɔlemɔi ni ejálɔi ni bɔɔ mɔdɛŋ fɛɛ ni amɛaanyɛ akɛ amɛbaafee esuɔmɔnaa nii lɛ jɛɔ amɛtsuiiaŋ amɛsɔleɔ lɛ atoi be fɛɛ be. Shi ani enɛ tsɔɔ akɛ ebaaha amɛnibimɔi lɛ eko fɛɛ eko hetoo? Dabi. Susumɔ Ŋmalɛ mli nɔkwɛmɔnii komɛi ahe okwɛ.

Mose ji mɔ ko ni no mli lɛ, wekukpãa ni mli wa waa kã ekɛ Nyɔŋmɔ teŋ; kɛlɛ, lɛ hu esa akɛ esɔle kɛbi nii yɛ “[Nyɔŋmɔ] suɔmɔ naa.” Mose kpa Nyɔŋmɔ fai koni eŋmɛ lɛ gbɛ ni eya Kanaan shikpɔŋ lɛ nɔ, shi enɛ kɛ Nyɔŋmɔ yiŋtoo kpãaa gbee. Mose kɛɛ akɛ: “Miikpao fai, ha ni mi hu mafo mli kɛya, ní mayana shikpɔŋ kpakpa ni yɔɔ Yordan sɛɛ lɛ.” Shi yɛ esha ni Mose fee be ko ni eho lɛ hewɔ lɛ, akɛɛ lɛ akɛ, eyaŋ nakai shikpɔŋ lɛ nɔ. No hewɔ lɛ, yɛ nɔ najiaŋ ni Yehowa aaatsu Mose nibimɔ lɛ he nii eha lɛ lɛ, ekɛɛ Mose akɛ: “Efá, okɛ mi akawie nɛkɛ sane nɛɛ he dɔŋŋ!”—5 Mose 3:25, 26; 32:51.

Bɔfo Paulo sɔle ni ajie nɔ ni etsɛ lɛ akɛ, “ŋmei ko yɛ miheloo mli” lɛ kɛjɛ emli. (2 Korintobii 12:7) Eeenyɛ efee akɛ “ŋmei” nɛɛ ji hiŋmɛi hela ko ni anyɛŋ atsa ni eye loo shiteekɛwolɔi kɛ “amale nyɛmimɛi” ni tee nɔ amɛhao lɛ lɛ. (2 Korintobii 11:26; Galatabii 4:14, 15) Paulo ŋma akɛ: “Mikpa Nuŋtsɔ lɛ fai shii etɛ sɔŋŋ, koni eje minɔ.” Shi Nyɔŋmɔ le akɛ kɛ́ Paulo tee nɔ eshiɛ yɛ be mli ni “ŋmei” ni yɔɔ ‘eheloo mli’ lɛ miiya nɔ eegba enaa lɛ, no baaha efee faŋŋ akɛ Nyɔŋmɔ hewalɛ naa Paulo nyɛɔ eshiɛɔ lɛ, ni akɛ Paulo muɔ efɔ̃ɔ Nyɔŋmɔ nɔ kwraa. No hewɔ lɛ, yɛ nɔ najiaŋ ni Nyɔŋmɔ aaatsu Paulo nibimɔ lɛ he nii eha lɛ lɛ, ekɛɛ Paulo akɛ: “Mihewalɛ lɛ, gbedeefeemɔ mli eyeɔ emuu yɛ.”—2 Korintobii 12:8, 9.

Hɛɛ, Nyɔŋmɔ le wɔnibimɔi lɛ ateŋ nɔ ni kɛ́ etsu he nii eha wɔ lɛ, ebaahi eha wɔ, fe bɔ ni wɔle. Yehowa haa wɔ hetoo ni hi kɛha wɔ be fɛɛ be, koni ekɛ eyiŋtoi ni suɔmɔ yɔɔ mli ni aŋma yɛ Biblia lɛ mli lɛ akpã gbee.—w09 01/01-E.