Yuvu Y’atangi eto

Ekuma Yaka Sambu ke Ivaninwanga Mvutu ko?

Nzambi kena vala ko ye konso muntu mu yeto. Nze una se dianzodi kevavilanga vo wan’andi bamokena yandi kondwa wonga ye nsoni, Yave wa Nzambi ovavanga vo twamokenanga yandi muna sambu. Kansi, wau vo ese dia ngangu, Nzambi ovwidi kuma kiasikila kalembi vaninang’e mvutu za yaka sambu. Nga Nzambi watusweka ekuma kalembi wo vangilanga ovo Nkand’a Nzambi ulenda kutusadisa mu zaya ekuma yaka sambu ke ivaninwanga mvutu ko?

Yoane wa ntumwa wavova vo: “I zau zizi e nkabu twina zau oku kwa yandi, ovo, konso una tulombela muna luzolo luandi, wa kekutuwá.” (1 Yoane 5:​14) E sambu yeto ifwete kalang’e ngwizani ye luzolo lwa Nzambi. Akaka e sambu yau ke ikalanga ngwizani ko ye luzolo lwa Nzambi. Kasikil’owu, besambanga mu sunda muna nsaka za mpanza. Akaka ke besambanga ye makani mambote ko. Yakobo walukisa mu kuma kia ndomba zazi zambi vo: “Nulomba, yo lembi tambula, e kuma nulomba ndomb’ambi, nwafunka kio muna mawete meno.”​—⁠Yakobo 4:⁠3.

Muna bong’e nona, buka yole betang’e somba basambidi kimana basunda. Ke diangangu ko diavingila vo Nzambi kavana e mvutu za sambu ya mpila yayi. Diau adimosi mpe tulenda yika mu kuma kia vita za tandu kiaki, vava besambanga vo basunda e vita.

Awana ke belemvokelanga nsiku mia Nzambi ko ke balendi vingila mvutu ko muna sambu yau. Yave wavova kw’asambidi akivunina vo: “Ovo nusamba nsamba zayingi, kiwa kwame ko: o moko meno mazele yo menga.” (Yesaya 1:​15) Nkand’a Nzambi uvovanga vo: “On’ovengomona matu muna wila nsiku, kana sambu kiandi nkutu, kiangemi.”​—⁠Ngana 28:⁠9.

Kuna diak’e sambu, Yave owanga e sambu ya ziku y’asambidi andi ana bevanganga mawonso mu kunsadila mun’owu wa luzolo lwandi. Nga diadi disonganga vo okubavananga e mvutu za konso má belombanga? Ve. Badika eyak’e nona ya Nkand’a Nzambi.

Kana una vo Mose ngwizani ambote kakala yau yo Nzambi; diavavanga vo kalombanga ‘mun’owu wa luzolo lwa [Nzambi.]’ Mose wadodokela Nzambi kimana kakota muna nsi a Kenani, kansi e ndomba zandi ke zakala ngwizani ko ye luzolo lwa Nzambi. Wavova vo: “Yambula yasauka yamona nsi ambote ina kun’esimu dia Yodani.” Kansi, mu kuma ki’esumu diandi, Nzambi wavovesa Mose vo ke kota ko muna nsi yayina. Vana fulu kia wa e ndomba za Mose, Yave wamvovesa vo: “Sia wowo; kungikila diaka diambu diodio ko.”​—⁠Nsiku 3:​25, 26; 32:51.

Paulu wa ntumwa walomba vo Nzambi kamvevola muna ‘lusende lwandi muna nitu.’ (2 Korinto 12:⁠7) O “lusende” lwalu nanga kimbevo kia meso kilembi sasuka kiakala yovo mpasi kamweswanga kw’atantu andi ye kwa “mpangi zaluvunu.” (2 Korinto 11:26; Ngalatia 4:​14, 15) Paulu wasoneka vo: “Ndodokela tatu yadodokela Mfumu, luankatukila.” Kansi, kana una vo wakala ye “lusende muna nitu,” Nzambi wazaya wo vo, avo Paulu ozindalele samun’e nsangu zambote, ediadi disonga o nkum’a Nzambi ye vuvu kiasikila kakala kiau muna Yandi. Vana fulu kia vana mvutu muna ndomba za Paulu, Nzambi wamvovesa vo: “Nkum’ame uzikukila muna lutovoko.”​—⁠2 Korinto 12:​8, 9.

Elo, Nzambi otomene zaya ke mu yeto ko, e ntangwa kalenda vana e mvutu muna wete dieto. Yave ovananga e mvutu muna wete dieto, mun’owu w’ekani diandi, nze una tutanganga muna Nkand’a Nzambi.