Tepet na Saray Manbabasa

Akin ya Ag-eebatan na Dios so Arum a Pikakasi?

Say Dios et main-inomay ya asinggeran. No panon a say maaron ama et naliliketan no mabulbulos ya ibesngaw na ananak to so liknaan da, ontan met si Jehova a labay ton manpikasi itayo ed sikato. Anggaman ontan, singa met ed makabat ya ama, walaan so Dios na maabig iran rason no akin ya agto eebatan so arum a kerew tayo. Kasin agtayo natalosan iray rason to, odino walaray alimbawa diad Biblia a makatulong ed sikatayon natalosan iratan?

Oniay inkuan nen apostol Juan: “Saya so katalkan tayo ed sikato, a no mankerew itayo na bengatla unong ed linawa to, sikato dengelen to itayo.” (1 Juan 5:14) Saray kerew tayo et nepeg a mipakna ed linawa na Dios. Say ipipikasi na arum a totoo et malinlinew a mikontraan ed panlabayan na Dios​—singa bilang say panalo ed lotto, odino ed pustaan. Saray arum balet et aliway motibo ra. Amasakbay so disipulo a si Santiago nipaakar ed ontan a lingon panangusar ed pikakasi, ya oniay inkuan to: “Onkerew kayo et agkayo mangawat, lapu ed mauges so ikekerew yo, pian ikana yo ed saray kalikaliktan na laman yo.”​—Santiago 4:3.

Isipen pa a diad sakey ya isport et manpipikasin manalo so nantupag a grupo. Siempre, agtayo nailaloan ya ebatan na Dios so ontan iran mankontraan a pikakasi. Anggapoy pidumaan na saya ed saray nagagawan guerra ed panaon tayo, sano manpipikasi so mankalaban a grupo pian manalo.

Saramay manusumlang ed ganggan na Dios et agmakailalon naebatan iray pikakasi ra. Aminsan et oniay kaukolan ya ibaga nen Jehova ed saray mansimpisimpitan a managdayew: “Sano manggawa kayo na dakel a pikakasi, agak ondengel, saray lima yo napno ra na dala.” (Isaias 1:15) Onia ni ibabaga na Biblia: “Say mangiyarawi ed layag to manlapud pandengel ed tunong, anggan say pikakasi to sikato so makapadimla.”​—Uliran 28:9.

Diad biek a dapag, si Jehova et lawas ya ontatalineng ed masimoon a pikakasi na saray managdayew to a manggagaway anggaay nayarian dan manlingkor ed sikato unong ed panlabayan to. Ingen, kasin kabaliksan na saya ya amin a kerewen da et iter to? Andi. Imanoen so pigaran alimbawa ed Biblia.

Si Moises et walaan na maap-apit a relasyon ed Dios. Ingen, kaukolan to met so onkerew “unong ed linawa [na Dios].” Anggaman mikontraan ed nibalikas a gagala na Dios, siansia nin akikasi si Moises a makaloob komon ed Canaan: “Kerewen ko ed sika ya abuloyan mo ak pa komon, ta nengnengen ko so maong a dalin a wala ed labas na Jordan.” Balet nibaga la’d si Moises a sikatoy agmakaloob ed satan a dalin lapud seryoson lingo to. Kanian, imbes ya onabuloy, inkuan nen Jehova ed sikato: “Masarag la komon ed sika. Agmo ak la pisasalitaan ed saya a pamaakaran.”​—Deuteronomio 3:25, 26; 32:51.

Si apostol Pablo et nampikasin nainawaan komon ed “sabit ed laman” to. (2 Corinto 12:7) Sayan “sabit” et nayarin ontutukoy ed graben sakit ed mata odino ed mabetbet a panamairap na saray onsusumpa tan palson kaagian. (2 Corinto 11:26; Galacia 4:14, 15) Insulat nen Pablo: “Akikasi ak ed Katawan ya amitlo, pian naekal komon [itan] ed siak.” Anggaman ontan, amta na Dios a no si Pablo et mantultuloy a manpulong anggan wala iyan makapairap a “sabit ed laman,” nipatnag so pakayari na Dios tan say baleg a talek nen Pablo ed Sikato. Kanian, imbes ya iter na Dios so kerew to, say imbaga na Dios ed sikato et: “Say pakayarik agawan ayadyari ed kakapuyan.”​—2 Corinto 12:8, 9.

On, mas kabat na Dios no talagan parad pankaabigan tayo so pangiter to ed saray kerew tayo. Lawas a say ebat nen Jehova ed pikakasi tayo et panmaongan tayo, a mitunosan ed maaron gagala ton walad Biblia.