Basikubala Balabuzya

Nkaambo nzi Leza Ncatayiinguli Mipailo Imwi?

Leza tayoosyi. Mbubonya usyi bana mbwayanda kuti bana bakwe kabalikwaya kubandika anguwe, awalo Jehova ulayanda kuti katubandika anguwe kwiinda mukupaila. Nokuba boobo, mbubonya mbuli usyi musongo uuli woonse, Leza ulijisi twaambo tubotu ncatayiinguli mipailo imwi. Sena twaambo ooto ntwamaseseke naa sena tulakonzya kutujana mu Bbaibbele?

Imwaapostolo Johane utwaambila kuti: “Lino kaanzambwene nkitujisi kubusyu bwakwe nkaaka kakuti, na twakumbila kufumbwa cintu cili buti cili mbuli makanze aakwe, ulatumvwa.” (1 Johane 5:14) Zyintu nzyotulomba kuli Leza nzyeelede kuti kazyeendelana amakanze aakwe. Bamwi bantu bapailila zyintu ziteendelani amakanze aa Leza—mbuli kuzunda mucisolo ca lottery amukubbeja. Bamwi balapaila kabajisi makanze mabi. Imwaapostolo Jakobo ulatucenjezya kujatikizya kupaila munzila iitali kabotu, kuti: “Mulakumbila zimwi, pele tamupegwi, nkaambo kukumbila kwanu takweensi kwamuciyanza cibotu. Mulakumbila zintu kuti muzisowe kumisalo yanu.”—Jakobo 4:3.

Amuciyeeyele buyo, ikuti nkamu zyobilo zyabasikuuma bbola kazipailila kuti zizunde, Leza takonzyi kuyiingula mipailo iili boobu. Ncimwi buyo amasi alaakupailila kuti kubota cisi cabo cazunda munkondo.

Aabo batayandi kutobela mulawo wa Leza tabeelede kuyeeya kuti mipailo yabo ilakonzya kwiingulwa. Aciindi cimwi Jehova wakaambila bakombi basikuupaupa ameso kuti: “Nekuba kuti mwakomba zikombyo zinji, nsikooyooswiilila. Maanza aanu alizwide bulowa.” (Isaya 1:15) Ibbaibbele lyaamba kuti: “Na muntu wasinka matwi aakwe kukumvwa mulawo, acikombyo cakwe cilaba cisesemyo.”—Tusimpi 28:9.

Kulubazu lumwi, Jehova ulaiswiilila mipailo yabakombi bapaila camoyo woonse alimwi ibamubelekela kweelana amakanze aakwe. Pele sena eeci caamba kuti ulabapa kufwumbwa ncobalomba? Peepe. Amulange-lange zikozyanyo zimwi zyamu Magwalo.

Musa wakali kumvwana kapati a Leza pele wakeelede kulomba zyintu kweelana ‘amakanze aa Leza.’ Mukwiimpana amakanze aa Leza, Musa wakalomba kuti azumizyigwe kunjila munyika ya Kanana naakati: “Sa inga ndazubuka kuyoobona nyika imbotu iili mutala lya-Jordano.” Pele akaambo kacibi ncaakacita, Leza wakali mwaambilide kuti takanjili munyika eeyi. Aboobo, muciindi cakumuzumizya musa kweelana ambwaakamulomba, Leza wakamwaambila kuti: “Uleke kwaamba. Utandaambili limbi aya makani.”—Deuteronomo 3:25, 26; 32:51.

Imwaapostolo Paulo wakali kupailila kuti ligusyigwe penzi ndyaakali kwaamba kuti “bumvwa buyasa mumubili.” (2 Bakolinti 12:7, BT) “Bumvwa” oobu bulakonzya kuba penzi lyakuciswa meso naa kukazyigwa lyoonse ‘ababunyina babeji.’ (2 Ba-Korinto 11:26; Ba-Galatiya 4:14, 15) Paulo wakalemba kuti: “Ndakakumbila kotatwe ku-Mwami kaambo kacintu eci, kuti cindizwide.” Nokuba boobo, Leza wakalizyi kuti ikuti Paulo naakazumanana kukambauka nokuba kuti wakali ‘abumvwa buyasa mumubili,’ nicakatondezya kuti Leza ulaanguzu akuti Paulo wakali kumusyoma cakumaninina. Aboobo, muciindi cakumucitila cintu Paulo ncaakali kulomba, Leza wakamwaambila kuti: “Inguzu zyangu zilaswiililika loko mukati kabukompami.”—2 Ba-Korinto 12:8, 9.

Masimpe, Leza nguuzyi ciindi nakonzya kutupa nzyotulomba. Jehova lyoonse ulatucitila zyintu zibotu kweelana amakanze aakwe aalembedwe mu Bbaibbele.