IFA ussun kopwe pölüweni ena kapas eis? Chommong aramas ra lükü pwe a wor emön Kot, iwe, ra fel ngeni me niuokkusiti i. Nge rese kon lien silei napanapan kewe. Ika ka lükü Kot, epwe ifa ussun kopwe pölüweni ekkeei kapas eis fan?

1. Kot wesewesen emön?

2. Mei wor iten Kot?

3. Itä Jises ewe Kot mi Unusen Tekia?

4. Kot a tongeiei?

5. Itä Kot a etiwa sokkopaten fel meinisin?

Ika kopwe tingorei aramas pwe repwe pölüweni ekkena kapas eis, eli epwe sokkopat met repwe apasa. Ina minne, sisap mäirü pwe a wor chommong tutulap me ekiekmwääl ussun Kot.

 Pwata a Lamot Pölüwen Ekkena Kapas Eis

Atun Jises Kraist a fos ngeni emön fefin mi lükü Kot ünükün eü ito, Jises a menlapei lamoten än emön silei ewe enlet ussun Kot. Ena fefin a silei pwe Jises i emön soufos. Nge a wor an osukosuk. Än Jises lamalam a sokko seni an. Lupwen a pwär ngeni Jises an na osukosuk, Jises a affata: “Ämi chon Samaria oua fel ngeni iö ousap silei.” (Jon 4:19-22) Seni ena pworaus, sia küna pwe Jises ese meefi pwe chon ekkewe lamalam meinisin ra wesewesen silei Kot.

Alon Jises a itä wewe ngeni pwe esor emön epwe tongeni silei Kot? Aapw. Jises a pwal apasa ngeni ena fefin: “Ekkewe chon fel mi let repwe fel ngeni ewe Sam lon ngun o enlet. Pun ewe Sam a pwal kutta ei sokkun aramas pwe repwe fel ngeni i.” (Jon 4:23, TF) Ka kan fel ngeni Kot “lon ngun o enlet”?

A fokkun lamot pwe kopwe pwisin pölüweni ena kapas eis. Pwata? Jises a menlapei lamoten än aramas silei minne mi enlet lupwen a iotek: “Iwe, iei manau esemuch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.” (Jon 17:3) Pwüngün, om äpilükülükün küna manau esemuch a riri ngeni om kopwe silei ewe enlet ussun Kot!

Mei wesewesen tufich ach sipwe silei ewe enlet ussun Kot? Ewer! Ifa ussun kopwe küna? Jises a pwisin apasa ussun i: “Ngang ewe al me ewe let me ewe manau. Esap wor eman epwe tongeni feila ren Semei me lüki.” (Jon 14:6) A pwal apasa: “Esap wor eman a silei ewe Sam, pwe ewe Nau chök me chokewe ewe Nau a filiiretä pwe epwe pwäri i ngeniir.”​—Luk 10:22.

Iwe, kiien ach silei Kot a nom lon äitien Nöün Kot we, Jises Kraist. Iwe, Jises a pwon ngenikich: “Are oupwe aleasochisi ai kewe kapas, oupwe wesewesen nei chon kaiö. Oupwe silei ewe let, nge ewe let epwe angasakemi.”​—Jon 8:31, 32.

Ifa ussun Jises epwe pölüweni ekkena nimu kapas eis mi mak le poputään ei lesen?

[Sasing lon pekin taropwe 4]

Ka kan fel ngeni emön Kot kese wesewesen silei?