Ki sennla Bondye?

KI MANNYER ou ti pou reponn sa kestyon? Serten dimoun i panse ki zot konn Bondye byen e lezot i krwar ki i egziste me zot pa konn bokou lo li. Si ou krwar dan Bondye, ki mannyer ou ti pou reponn sa bann kestyon?

1. Eski Bondye i en personnaz reel?

2. Eski Bondye i annan en non?

3. Eski Zezi i Bondye Tou Pwisan?

4. Eski Bondye i enterese avek mwan?

5. Eski Bondye i aksepte tou kalite ladorasyon?

Si ou demann lezot pour reponn sa bann kestyon, i tre probab ki ou pou ganny plizyer diferan kalite larepons. I pa sirprenan alor ki i annan bann zistwar ek fo konsep ki’n devlope lo Bondye.

Akoz larepons i vreman enportan?

Pandan ki i ti pe koz avek en madanm relizye ki i ti zwenn kot en pi, Zezi Kri ti fer resorti lenportans pour konn laverite lo Bondye. Sa madanm Samariten, ti rekonnet ki Zezi ti en profet. Me en keksoz ti  pe fatig li. Larelizyon Zezi ti diferan avek pour li. Kan i ti montre ki sa ti pe trakas li, Zezi ti koz fran avek li e dir: “Zot zot pa konnen ki zot adore.” (Zan 4:19-22) Dan parol ki Zezi ti dir, i evidan ki pa tou dimoun relizye ki vreman konn Bondye.

Eski sa ki Zezi ti dir i vedir personn pa kapab vreman arive konn Bondye? Non. Zezi ti dir avek sa madanm: “Bann vre [a]dorater [i] ador Bondye an-espri e an verite, parski se koumsa ki Bondye i oule ki nou ador li.” (Zan 4:23) Eski ou parmi sa bann dimoun ki ador Bondye “an-espri e an verite”?

I vreman enportan pour ou fer sir konsernan larepons sa kestyon. Akoz? Zezi ti fer resorti sa nesesite pour ganny en konnesans egzakt ler i ti priye: “Lavi eternel . . . savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:2, 3) Wi, konn laverite lo Bondye i relye tre pros avek sa posibilite ki ou annan pour ganny lavi eternel dan lavenir!

Eski i vreman posib pour konn laverite lo Bondye? Wi, i posib! Alor, ki mannyer ou kapab konn laverite lo Bondye? Zezi ti dir sa lo li menm: “Se mwanmenm semen, laverite ek lavi. Personn pa kapab ariv kot mon Papa san pas par mwan.” (Zan 14:6) I ti osi dir: “Personn pa konn mon Papa eksepte son Garson ek bann ki son garson in swazir pour revel li.”—Lik 10:22.

Alor, sa mwayen atraver ki nou kapab konn Bondye i trouve dan lansennyman Zezi Kri, Garson Bondye. Annefe, Zezi i promet nou ki: “Si zot gard sa ki mon’n ansenny zot, zot vreman mon disip. Alor zot a konn laverite e laverite i ava fer zot lib.”—Zan 8:31, 32, The Holy Bible—New International Version.

Alor, ki mannyer Zezi ti pou reponn sa senk kestyon ki’n ganny souleve anler?

[Portre lo paz

Eski ou ador en Bondye ki ou pa vreman konnen?