Anie Edi Abasi?

AFO ọkpọbọrọ mbụme oro didie? Ndusụk owo ẹkere ke mmimọ imenen̄ede ifiọk Abasi—nte ke enye edi n̄kpet n̄kpet ufan mmimọ. Mbon en̄wen ẹda Abasi nte iman oro mmọ mînen̄ekede ibuana n̄kpọ. Mmọ ẹnịm ke enye odu edi inen̄ekede ifiọk n̄kpọ iban̄a enye. Edieke afo enịmde ke Abasi odu, afo ọkpọbọrọ mme mbụme oro ẹbụpde mi didie?

1. Nte Abasi edi ata owo?

2. Nte Abasi enyene enyịn̄?

3. Nte Jesus edi Ata Ọkpọsọn̄ Abasi?

4. Nte Abasi ekere aban̄a mi?

5. Nte Abasi enyịme kpukpru orụk utuakibuot?

Edieke ọdọhọde mme owo ẹbọrọ mbụme emi, ibọrọ oro mmọ ẹdinọde ẹkeme ndikpa fi idem. Imosụk ise ẹnyenede mme n̄ke ye ukwan̄ ekikere ẹban̄a Abasi.

Ibọrọ Mbụme Emi Ẹnen̄ede Ẹdi Akpan N̄kpọ

Ke ini Jesus Christ ekenyenede nneme ke obube mmọn̄ ye n̄wan kiet oro ekenịmde ke Abasi odu, Jesus ama ọdọhọ ke ọfọn ẹnen̄ede ẹfiọk Abasi. N̄wan Samaria emi ama ọfiọk ke Jesus ekedi prọfet. Edi ama enyene se ikafịnade enye. Ido ukpono Jesus ekedi isio ye esiemmọ. Ke ini enye eketịn̄de n̄kpọ emi, Jesus ama ọdọhọ enye in̄wan̄-in̄wan̄ ete: “Mbufo ẹtuak ibuot ẹnọ se mbufo mîfiọkke.” (John 4:19-22) Ke akpanikọ, Jesus ekekpep ke idịghe kpukpru mbon oro ẹnịmde ke Abasi odu ẹnen̄erede ẹfiọk Abasi.

 Ndi ikọ Jesus ọkọwọrọ ke owo ndomokiet ikemeke ndinen̄ede mfiọk Abasi? Baba. Jesus ama aka iso ọdọhọ n̄wan oro ete: “Ata mme andituak ibuot [ẹdituak] ibuot ẹnọ Ete ke spirit ye ke akpanikọ, koro, ke akpanikọ, edi utọ mme owo emi ke Ete oyom ete ẹtuak ibuot ẹnọ imọ.” (John 4:23) Ndi afo edi kiet ke otu mbon oro ẹtuakde ibuot ẹnọ Abasi “ke spirit ye ke akpanikọ”?

Afo ndifiọk ibọrọ mbụme oro enen̄ede edi akpan n̄kpọ. Ntak-a? Koro Jesus ama etịn̄ aban̄a ufọn edinyene nnennen ifiọk ke ini enye ọkọbọn̄de akam ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Ih, ana afo enen̄ede ọfiọk owo emi Abasi edide man enyene uwem ke ini iso!

Ndi ẹkeme ndinen̄ede mfiọk Abasi? Etieti! Do, didie ke ikeme ndifiọk enye? Jesus eketịn̄ ntem aban̄a idemesie ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.” (John 14:6) Enye ama ọdọhọ n̄ko ete: “Baba owo kiet inyụn̄ ifiọkke enye emi Ete edide ke mîbọhọke Eyen, ye enye emi Eyen enyịmede ndiyarade enye nnọ.”—Luke 10:22.

Ke ntre, ukpepn̄kpọ Jesus Christ Eyen Abasi edinam ikeme ndifiọk Abasi. Ke nditịm ntịn̄, Jesus ọn̄wọn̄ọ ọnọ nnyịn ete: “Edieke ikọ mi odude ye mbufo, mbufo ẹnen̄ede ẹdi mbet mi, ndien mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.”—John 8:31, 32.

Sia edide ntre, didie ke Jesus ọkpọbọrọ mbụme mbition oro ikobụpde ke ntọn̄ọ?

[Ndise ke page 4]

Nte afo atuak ibuot ọnọ Abasi emi mûnen̄ekede ufiọk?