Nzambi Kele Nani?

INKI mvutu nge tapesa na ngyufula yai? Bantu mingi keyindulaka nde bo zaba Nzambi mbote mpi nde yandi kele nduku ya ngolo. Bankaka ketadilaka Nzambi mutindu bo ketadilaka muntu mosi ya dikanda ya ntama. Bo kekwikilaka nde yandi kele, kansi bo zaba mambu fyoti ya metala yandi. Kana nge kekwikilaka na Nzambi, nki mvutu nge tapesa na bangyufula yai kele na nsi?

1. Keti Nzambi kele muntu ya kyeleka?

2. Keti Nzambi kele ti zina?

3. Keti Yezu kele Nzambi Nkwa-Ngolo Yonso?

4. Keti Nzambi kekudibanzaka sambu na mono?

5. Keti Nzambi kendimaka mitindu yonso ya lusambu?

Kana nge yula bantu yankaka na kupesa bamvutu na bangyufula yai, ntembe kele ve nde nge tabaka bamvutu mingi ya kuswaswana. Yo yina, yo kele dyambu ya kuyituka ve na kumona nde masapu mpi bangindu ya mbi mebasikaka mingi na yina metala Nzambi.

Kikuma Yina Bamvutu Kele Mfunu

Ntangu Yezu Kristu vandaka kusolula ti nkento mosi yina vandaka kukwikila na  Nzambi, yina yandi kutanaka ti yandi na dibulu ya masa, Yezu kumonisaka mfunu ya kuzaba kyeleka na yina metala Nzambi. Nkento yina ya Samaria kundimaka nde Yezu kuvandaka profete. Kansi, kima mosi vandaka kuyangisa yandi. Dibundu ya Yezu kuswaswanaka ti yina ya yandi. Ntangu yandi tubaka dyambu yina vandaka kuyangisa yandi, Yezu kutubilaka yandi pwelele nde: “Beno bantu ya Samaria, beno zaba mpenza ve Nzambi yina ya beno ke sambaka.” (Yoane 4:19-22) Na kutadila mambu yai, beto kebakisa nde Yezu kulongaka nde bantu yonso ve ya kesambilaka kezabaka mpenza Nzambi.

Keti mambu ya Yezu ketuba ketendula nde ata muntu mosi ve lenda zaba mpenza Nzambi? Ve. Yezu kulandaka na kutuba na nkento yina nde: “Bantu ya kieleka ta sambaka Tata [na mpeve mpi na, NW] kieleka, sambu Tata ke zolaka bayina ke sambaka yandi mutindu yina.” (Yoane 4:23) Keti nge kele na kati ya bantu yina kesambilaka Nzambi “na mpeve mpi na kieleka”?

Yo kele mfunu mpenza nde nge baka mvutu na ngyufula yai. Sambu na nki? Yezu kumonisaka mfunu ya nzayilu ya sikisiki ntangu yandi sambaka nde: “Kana bo zaba nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.” (Yoane 17:3) Ya kyeleka, kivuvu na nge sambu na luzingu ya bilumbu kekwisa ke na kuwakana ya ngolo ti kuzaba kyeleka ya metala Nzambi!

Keti mpila kele mpenza ya kuzaba kyeleka ya metala Nzambi? Ee, mpila kele! Inki mutindu nge lenda zaba yo? Yezu kutubaka sambu na yandi mosi nde: “Mono kele nzila, mono kele kieleka, mono kele moyo. Ata muntu mosi ve lenda kwenda na Tata na nzila ya nkaka kana yandi kwisa na mono nzila ve.” (Yoane 14:6) Yandi tubaka dyaka nde: “Ata muntu mosi ve kuzaba kana Tata kele nani, kansi Mwana mpamba muntu kuzaba ti bantu yina ya Mwana zola nde bo zaba kana Tata kele nani.”​—Luka 10:22.

Yo yina, sambu na kuzaba Nzambi, yo kele mfunu na kutadila malongi ya Yezu Kristu, Mwana ya Nzambi. Nkutu, Yezu kesila beto nde: “Kana beno ke landa malongi na mono, ya kieleka beno kele balonguki na mono; beno ta zaba mambu yina kele ya kieleka, ebuna mambu yina ta katula beno na kimpika.”​—Yoane 8:31, 32.

Ebuna, nki mvutu Yezu tapesa na bangyufula tanu yina kele na zulu?

[Kifwanisu ya kele na lutiti 4]

Keti nge kesambilaka Nzambi yina nge mezaba mpenza ve?