តើព្រះជានរណា?
តើព្រះជានរណា?
តើអ្នកនឹងឆ្លើយសំណួរនោះយ៉ាងដូចម្ដេច? មនុស្សជាទូទៅជឿថាមានព្រះមែន ពួកគេស្រឡាញ់ព្រះយ៉ាងអស់ពីចិត្ត ហើយកោតខ្លាចលោកផងដែរ។ ប៉ុន្តែ មនុស្សជាច្រើនស្គាល់ព្រះមិនច្បាស់ទេ។ ប្រសិនបើអ្នកជឿទៅលើព្រះ តើអ្នកនឹងឆ្លើយសំណួរខាងក្រោមនេះយ៉ាងដូចម្ដេច?
១. តើព្រះជាបុគ្គលពិតទេ?
២.តើព្រះមាននាមទេ?
៣.តើលោកយេស៊ូជាព្រះដែលមានអំណាចខ្លាំងក្លាបំផុតឬ?
៤. តើព្រះយកចិត្តទុកដាក់នឹងខ្ញុំទេ?
៥. តើព្រះពេញចិត្តនឹងការគោរពប្រណិប័តន៍គ្រប់បែបគ្រប់យ៉ាងឬទេ?
ប្រសិនបើអ្នកសួរអ្នកដទៃសំណួរទាំងនេះ អ្នកនឹងទទួលចម្លើយយ៉ាងច្រើនដែលប្លែកៗពីគ្នា។ ម្ល៉ោះហើយ ពុំមែនជាការចម្លែកអ្វីឡើយ! ដែលរឿងព្រេងនិងគំនិតខុសឆ្គងអំពីព្រះត្រូវបានលូតលាស់។
ចម្លើយមានសារៈសំខាន់
ពេលលោកយេស៊ូគ្រិស្តកំពុងនិយាយជាមួយស្ត្រីម្នាក់ដែលជឿលើព្រះ នោះលោកបានបញ្ជាក់ពីការចាំបាច់ក្នុងការស្គាល់សេចក្ដីពិតអំពីព្រះ។ ស្ត្រីនោះទទួលស្គាល់ថាលោកយេស៊ូជាអ្នកប្រកាសទំនាយម្នាក់។ ប៉ុន្តែមានអ្វីមួយដែលធ្វើឲ្យនាងខ្វល់។ សាសនារបស់លោកយេស៊ូគឺខុសពីនាង។ ពេលនាងជម្រាបប្រាប់លោកយេស៊ូអំពីកង្វល់នេះ នោះលោកនិយាយយ៉ាងចំៗថា៖ «អ្នករាល់គ្នាគោរពប្រណិប័តន៍ដោយគ្មានចំណេះ»។ (យ៉ូហាន ៤:១៩-២២) គឺឃើញច្បាស់ហើយ លោកយេស៊ូបានបង្រៀនថាមិនមែនមនុស្សទាំងអស់ដែលជឿលើព្រះ ពិតជាស្គាល់ឬមានចំណេះអំពីព្រះឡើយ។
តើពាក្យរបស់លោកយេស៊ូបានសេចក្ដីថាគ្មាននរណាអាចស្គាល់ព្រះឬ? មិនមែនដូច្នេះទេ។ លោកយេស៊ូមានប្រសាសន៍ទៅស្ត្រីនេះទៀតថា៖ «អ្នកគោរពប្រណិប័តន៍ដ៏ពិតនឹងគោរពប្រណិប័តន៍បិតានៅស្ថានសួគ៌ដោយមានការដឹកនាំពីសកម្មពលរបស់លោកនិងដោយសេចក្ដីពិត ព្រោះបិតានៅស្ថានសួគ៌កំពុងរកមនុស្សបែបនេះដើម្បីគោរពប្រណិប័តន៍លោក»។ (យ៉ូហាន ៤:២៣) តើអ្នកស្ថិតក្នុងចំណោមអស់អ្នកដែលគោរពប្រណិប័តន៍ព្រះ ដោយ«មានការដឹកនាំពីសកម្មពលរបស់លោកនិងដោយសេចក្ដីពិត»ឬទេ?
ការបញ្ជាក់យ៉ាងច្បាស់អំពីចម្លើយចំពោះសំណួរនោះ គឺមានសារៈសំខាន់ណាស់សម្រាប់អ្នក។ ហេតុអ្វីបានជាមានសារៈសំខាន់ណាស់? លោកយេស៊ូបានដៅបញ្ជាក់នូវការចាំបាច់ឲ្យមានចំណេះត្រឹមត្រូវពេលលោកអធិដ្ឋានថា៖ «ដើម្បីបានជីវិតដែលគ្មានទីបញ្ចប់ ពួកគាត់ត្រូវស្គាល់លោកដែលជាព្រះពិតតែមួយឲ្យបានច្បាស់ ព្រមទាំងយេស៊ូគ្រិស្ត ដែលលោកបានចាត់ឲ្យមក»។ (យ៉ូហាន ១៧:៣) ត្រូវហើយ ឱកាសដែលអ្នកមានដើម្បីទទួលជីវិតនៅថ្ងៃអនាគត គឺជាប់ពាក់ព័ន្ធនឹងការស្គាល់សេចក្ដីពិតអំពីព្រះ!
តើយើងពិតជាអាចដឹងសេចក្ដីពិតអំពីព្រះបានទេ? ពិតជាអាចមែន! បើដូច្នេះ តើអ្នកអាចដឹងសេចក្ដីពិតអំពីព្រះយ៉ាងដូចម្ដេច? លោកយេស៊ូមានប្រសាសន៏អំពីខ្លួនថា៖ «ខ្ញុំជាផ្លូវ ជាសេចក្ដីពិត និងជាជីវិត។ គ្មានអ្នកណាអាចមកឯបិតានៅស្ថានសួគ៌បានឡើយ លើកលែងតែអ្នកនោះមកតាមខ្ញុំ»។ (យ៉ូហាន ១៤:៦) លោកក៏បានពោលថា៖ «គ្មានអ្នកណាស្គាល់ព្រះដែលជាបិតាច្បាស់ជាងបុត្ររបស់លោក និងអ្នកដែលបុត្ររបស់លោកសុខចិត្តបើកសម្ដែងឲ្យស្គាល់នោះទេ»។—លូកា ១០:២២
ដូច្នេះ វិធីដែលយើងអាចស្គាល់ព្រះគឺតាមសេចក្ដីបង្រៀនរបស់លោកយេស៊ូ ដែលជាបុត្ររបស់ព្រះ។ តាមពិត លោកយេស៊ូសន្យាថា៖ «ប្រសិនបើអ្នករាល់គ្នានៅជាប់នឹងសេចក្ដីបង្រៀនរបស់ខ្ញុំ អ្នករាល់គ្នាពិតជាអ្នកកាន់តាមខ្ញុំមែន។ ហើយអ្នករាល់គ្នានឹងស្គាល់សេចក្ដីពិត ហើយសេចក្ដីពិតនោះនឹងរំដោះអ្នករាល់គ្នាឲ្យមានសេរីភាព»។—យ៉ូហាន ៨:៣១, ៣២
ដូច្នេះ ចំពោះសំណួរទាំងប្រាំដែលបានលើកឡើងនៅដើមអត្ថបទនេះ តើលោកយេស៊ូនឹងឆ្លើយយ៉ាងដូចម្ដេច?