Mulimu ki Mañi?

MU KONA ku alaba cwañi puzo ye? Batu ba bañwi ba ikutwa kuli ba ziba hande Mulimu—ba li ki mulikanaa bona yo mutuna. Ba bañwi ba nga Mulimu sina muhabo bona. Ba lumela kuli Mulimu u teñi, kono ba ziba ze nyinyani ka za hae. Haiba mu lumela ku Mulimu, mu kona ku alaba cwañi lipuzo ze latelela?

1. Kana Mulimu ki mutu luli?

2. Kana Mulimu u na ni libizo?

3. Kana Jesu ni Mulimu ya Maata Ote ki mutu a li muñwi?

4. Kana Mulimu wa ni tokomela?

5. Kana Mulimu u amuhela bulapeli kaufela?

 Ha ne mu ka buza batu ba bañwi lipuzo ze, mu kana mwa fiwa likalabo ze ñata ze shutana-shutana. Kacwalo ha ku komokisi batu ha ba bile ni litumelo ni mihupulo ye fosahezi ka za Mulimu.

Likalabo ki za Butokwa Hahulu

Ha naa ambola ni musali ya naa fumani fa lisima ili ya naa lumela ku Mulimu, Jesu Kreste naa koñomekile butokwa bwa ku ziba niti luli ka za Mulimu. Musali yo wa Musamaria, naa lumezi kuli Jesu ne li mupolofita. Kono naa katalizwe ki nto ye ñwi. Bulapeli bwa Jesu ne bu shutana ni bwa musali yo. Musali yo ha naa bulezi maikuto a hae, Jesu naa mu bulelezi patalaza kuli: “Mina mu lapela se mu sa zibi.” (Joani 4:19-22) Kalabo yeo i lu bonisa kuli Jesu naa lutile kuli haki balapeli kaufela ba ba ziba hande Mulimu.

Kana manzwi a Jesu ao a talusa kuli ha ku na ya kona ku ziba hande Mulimu? Batili. Jesu cwale a bulelela musali yo kuli: “Balapeli ba niti ba ka lapela Ndate ka moya ni ka niti; kakuli ki bona b’a tokwa Ndate.” (Joani 4:23) Kana mu ba bañwi ba batu ba ba lapela Mulimu “ka moya ni ka niti”?

Ki kwa butokwa hahulu ku mina ku ziba kalabo kwa puzo yeo. Kabakalañi? Jesu naa koñomekile butokwa bwa ku ba ni zibo ye nepahezi ha naa lapezi kuli: “Mi bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.” (Joani 17:3) Kaniti, kuli mu fumane bupilo bo bu sa feli, mu ka tokwa ku ziba niti ka za Mulimu!

Kana luli kwa konahala ku ziba niti ka za Mulimu? Eni, kwa konahala! Kono cwale, mu kona ku i ziba cwañi? Ha naa ama ku yena muñi, Jesu naa bulezi kuli: “Ki na nzila, ni niti, ni bupilo; ha ku na mutu ya ka taha ku Ndate, konji ka na.” (Joani 14:6) Hape naa ize: “Ha ku na ya ziba Ndate kuli ki mañi, konji Mwana, ni y’a lata Mwana ku mu taluseza Yena.”—Luka 10:22.

Kacwalo, nzila ye lu kona ku ziba Mulimu ka yona i mwa lituto za naa lutile Jesu Kreste, yena Mwanaa Mulimu. Mi mane Jesu u lu sepisa kuli: “Ha mu tiiseza mwa linzwi la ka, mu ka ba balutiwa ba ka ba niti; mi mu ka ziba niti, mi niti i ka mi lukulula.”—Joani 8:31, 32.

Kono cwale, Jesu naa ka alaba cwañi lipuzo liketalizoho ze buzizwe kwa makalelo?

[Siswaniso se si fa likepe 4]

Kana mu lapela Mulimu ye mu sa zibi hande?