Keti Nzambi Kele Muntu ya Kyeleka?

Bamvutu yina bantu mingi kepesaka:

◼ “Yandi kele bisika yonso, na kati ya bima yonso. Yandi kele bonso mupepe.”

◼ “Yandi kele mayele mosi ya bo lenda tendula ve, to ngolo mosi ya kemonanaka ve.”

Inki Yezu kutubaka?

◼ “Bisika . . . kele mingi na nzo ya Tata.” (Yoane 14:2) Yezu kutubaka na mutindu mosi ya kifwani nde Nzambi kele ti nzo, to kisika ya kuzingila.

◼ “Mono katukaka na Tata, mono kwisaka kukuma awa na nsi-ntoto. Ntangu yai, mono ke bika nsi-ntoto yai, mono ke kwenda na Tata.” (Yoane 16:28) Yezu vandaka kukwikila nde Nzambi kele Muntu ya kyeleka mpi yandi kele ti kisika yina yandi kezingaka.

YEZU kutubaka ata mbala mosi ve nde Nzambi kele ngolo mosi ya kemonanaka ve. Kansi, yandi tubaka na Nzambi mpi kusambaka yandi. Mbala mingi, yandi vandaka kubinga Yehowa Tata na yandi ya zulu, bangogo yina kemonisa nde yandi vandaka ti bangwisana ya ngolo ti Nzambi.​—Yoane 8:19, 38, 54.

Yo kele kyeleka nde “ata muntu mosi ve me monaka Nzambi,” mpi nde “Nzambi kele Mpeve.” (Yoane 1:18; 4:24) Kansi, mambu yai ketendula ve nde yandi kele ve ti mutindu mosi buna ya nitu. Biblia kezabisa beto nde: “Kana nitu ya kimuntu kele, nitu ya kimpeve mpi kele.” (1 Korinto 15:44) Ebuna, keti Yehowa kele ti nitu ya kimpeve?

Ee. Ntangu Yezu kufutumukaka, yandi “kotaka na zulu kibeni; kuna yandi ke telamaka na meso ya Nzambi sambu na beto.” (Baebreo 9:24) Dyambu yai kelonga beto mambu zole ya mfunu na yina metala Nzambi. Ya ntete, yandi kele ti kisika ya kuzingila. Ya zole, yandi kele Muntu, kansi ve ngolo mosi ya kemonanaka ve mpi ya kezingaka bisika yonso.

Ebuna, nki mutindu Nzambi kele ti kiyeka ya kuyala bisika yonso? Nzambi lenda tinda mpeve santu na yandi, to ngolo na yandi ya kesalaka kisalu, na konso kisika na luyalanganu. Bonso tata mosi kesadilaka diboko na yandi sambu na kulembika mpi kupesa kikesa na bana na yandi, Nzambi kesadilaka mpeve santu na yandi sambu na kulungisa lukanu na yandi.​—Nkunga 104:30; 139:7.

Sambu Nzambi kele Muntu, yandi kele mpi ti kimuntu. Yandi kele ti mambu yina yandi kezolaka mpi yina yandi kezolaka ve, yandi kele mpi ti mawi. Biblia kesonga beto nde yandi kezolaka bantu na yandi, kesepelaka na bima ya yandi mesalaka, kemengaka lusambu ya biteki, mpi kewaka mpasi sambu na mambu ya mbi. (Kuyantika 6:6; Kulonga 16:21, 22; 1 Bantotila 10:9; Nkunga 104:31) Biblia kebinga yandi na 1 Timoteo 1:11 nde ‘Nzambi ya kiese.’ Mpila ya kuyituka kele ve na kumona mutindu Yezu kutubaka nde beto lenda longuka na kuzola Nzambi yai na ntima na beto yonso!​—Marko 12:30. a

[Noti na nsi ya lutiti]

[Bangogo sambu na kubenda dikebi ya kele na lutiti 5]

Bonso tata mosi kesadilaka diboko na yandi, Nzambi kesadilaka mpeve santu na yandi sambu na kulungisa lukanu na yandi